Ngaba Uloyiko Lunokuze Luphele?

NGABA nabani na ohlala kwihlabathi lanamhlanje eliyingozi usenokuyeka ngokupheleleyo ukoyika? Oko akunakwenzeka. Kwanabantu abanokholo kuThixo bajamelana neengozi ezibabangela boyike. Ngokomzekelo, ebudeni benkulungwane yokuqala ngeXesha Eliqhelekileyo, umpostile uPawulos owayelityhutyhe lonke elimiweyo wakhankanya ukuba waphukelwa ngumkhombe, wajamelana neengozi emilanjeni, iingozi zezihange neengozi ezixekweni. (2 Korinte 11:25-28) Ngokufanayo namhlanje, inkoliso yethu ijamelana neemeko eziyingozi.

Noko ke, sinokubonakalisa ubulumko ngokuziphepha iimeko eziyingozi, ngaloo ndlela sinciphise uloyiko. IBhayibhile ithi: “Onobuqili ubona intlekele azifihle, kodwa abangenamava bayadlula baze bafumane isohlwayo.” (IMizekeliso 22:3) Ziziphi izinto eziluncedo esinokuzenza?

Ukubonakalisa Ubulumko

Nangona iBhayibhile yabhalwa kudala, okubangel’ umdla kukuba inemigaqo enokusinceda siphephe iingozi namhlanje. Ngokomzekelo ithi: “Ngokubhekisele kosisilumko, amehlo akhe asentlokweni yakhe; kodwa osisiyatha uhamba ebumnyameni obupheleleyo.” (INtshumayeli 2:14) Kubalulekile ukubazi abantu abakungqongileyo nokuziphepha iindawo ezimnyama xa kunokwenzeka. Mhlawumbi usenokuhamba ngezona zitrato zinezibane, enoba oko kuthetha ukuhamba umgama omdana xa ugoduka. Kwakhona iBhayibhile ithi: “Ababini balunge ngakumbi kunomnye . . . Ukuba ubani unokongamela omnye, ababini bekunye banokuma nxamnye naye.” (INtshumayeli 4:9, 12) Ukuba uhlala kwindawo eyingozi, qiniseka ukuba uhamba nomnye umntu xa ugoduka.

Ukuba udibana nabaphangi, kubalulekile ukukhumbula ukuba ubomi bubalulekile kunezinto eziphathekayo. (Mateyu 16:26) Kwakhona kubalulekile ukukhumbula ukuba, xa abantu abaninzi benomsindo, bayingozi yaye akunakubathemba.—Eksodus 23:2.

Ukuba umntu othile ufuna ukukudlwengula, uqhula ngezinto ezingamanyala, okanye uzama ukukubamba, kubalulekile ukuba umkhalimele kabukhali. Kusenokufuneka ukuba uhambe kuloo ndawo, kanye njengokuba uYosefu wenzayo xa umfazi oziphethe kakubi wayefuna ukumbamba. “Wasaba, waphumela phandle.” (Genesis 39:12) Ukuba akunakuhamba kuloo ndawo, usenokuthi: “Ndiyeke!” okanye “Mus’ ukundibamba!” okanye “Andiyithandi loo nto uyithethayo.” Ukuba kunokwenzeka, ziphephe iindawo ezaziwa ngokuba yingozi.

Ukujamelana Noloyiko Ekhaya

Yintoni onokuyenza ukuba woyika umyeni obethayo? Kusenokuba bubulumko ukuyazi indlela onokubaleka ngayo xa kunokwenzeka ukuba umyeni wakho aqalise ukukubetha okanye abethe abantwana bakho.a IBhayibhile ibalisa indlela uYakobi awayiceba ngenyameko ngayo indlela yokusaba ukuba umkhuluwa wakhe uEsawu wayenokufuna ukumhlasela. Nakuba lingazange lifuneke elo qhinga, oku kwakubonisa ubulumko. (Genesis 32:6-8) Kusenokufuneka ube nendawo ongabalekela kuyo xa kunokufuneka usabe ngesiquphe. Usenokuthetha naloo mntu kusengaphambili ngezinto ezisenokuba yimfuneko. Ukugcina iincwadi eziyimfuneko kwindawo ekulula ukuzifumana kuyo nezinye izinto eziyimfuneko kubalulekile.

Enye into onokuyenza kukwazisa abasemagunyeni ngokuxhatshazwa kwakho ngumyeni wakho nokucela ukuba bakukhusele.b IBhayibhile ifundisa ukuba bonke abantu baya kuvuna oko bakuhlwayelayo. (Galati 6:7) Ithetha ngegunya likarhulumente, iBhayibhile ithi: “Lingumlungiseleli kaThixo kuwe ukuze kulungelwe wena. Kodwa ukuba wenza okubi, yoyika.” (Roma 13:4) Ukubetha omnye umntu ekhaya lulwaphulo-mthetho olunzulu njengokuba kunjalo nasesitratweni. Ukulandela umntu lulwaphulo-mthetho kumazwe amaninzi.

Ukwenza ezi zinto sele sizikhankanyile kunokunciphisa uloyiko ngomkhamo othile. Kodwa iBhayibhile inikela okungakumbi kunamacebiso nje aluncedo. Asiyoncwadi nje yamacebiso ngendlela yokwenza izinto. Yincwadi eneziprofeto eziza kuzaliseka ezityhila oko kwenziwa nguThixo ngoku naza kukwenza kwixesha elizayo. IBhayibhile ibathembisa ntoni abantu abahlala besoyikiswa?

Oko Kuthethwa Kukuhlala Usoyika

Umpostile uPawulos wabhala: “Ngemihla yokugqibela kuya kufika amaxesha amanqam ekunzima ukujamelana nawo. Kuba abantu baya kuba ngabazithandayo, . . . abangenawo umsa wemvelo, abangayifuni kwaphela imvisiswano, abanyelisi, abangenakuzeyisa, iindlobongela, abangathandi kulunga.” (2 Timoti 3:1-3) La mazwi achaza kanye eli xesha loloyiko!

Xa wayethetha ‘ngokupheliswa kwale nkqubo yezinto,’ uYesu wathi: “Uhlanga luya kuvukelana nohlanga, nobukumkani buvukelane nobukumkani; kuya kubakho iinyikima zomhlaba ezinkulu, neendyikitya zokufa nokunqongophala kokutya kwiindawo ngeendawo; kuya kubakho imibono eyoyikekayo nemiqondiso emikhulu ezulwini.” (Mateyu 24:3, 7, 8; Luka 21:10, 11) Ngoko ke, “imibono eyoyikekayo” esiyibonileyo neyinxalenye yeli xesha siphila kulo loloyiko ayifanele isothuse. Kodwa ithetha ntoni?

UYesu wathi: “Xa nibona ezi zinto zisenzeka, yazini ukuba ubukumkani bukaThixo bukufuphi.” (Luka 21:31) Kwixesha lethu, sinokulindela ukuba urhulumente kaThixo omiselwe ezulwini alawule phezu kwabo bonke abantu. (Daniyeli 2:44) Buya kuba njani ubomi ngoko?

Ukuphela Koloyiko!

IBhayibhile ithetha ngexesha elizayo loxolo xa iimfazwe ziya kuphela, abenzi bobubi baya kuba bengasekho, naxa umhlaba uya kuzala ngabantu abathanda uThixo. UPetros, umpostile kaYesu, wabhala esithi ixesha elizayo liya kuba ‘yimini yomgwebo neyentshabalalo yabantu abangenabuthixo.’ Abangendawo baya kuba bengasekho yaye kuya kube kungasekho sizathu sakoyika kuba emhlabeni kuya kuba “kumi ubulungisa.” (2 Petros 3:7, 9, 13) Khawuthelekelele indlela ekuya kube kumnandi ngayo ukuhlala nabantu onokubathemba abathandana ngokwenene! Esi sithembiso sisinceda ukuba siwajonge ngeliny’ iliso la maxesha ayingozi. Akasayi kuqhubeka ngokungapheliyo.—INdumiso 37:9-11.

Abo bahlala besoyika banokuncedwa ngamazwi athethwa kumprofeti kaYehova athi: “Yithini kwabantliziyo zinexhala: ‘Yomelelani. Musani ukoyika. Yabonani! UThixo wenu uya kuza enempindezelo, enembuyekezo kaThixo. Uya kuza anisindise.’” (Isaya 35:4) Ngoko ke, abakhonzi boThixo wokwenyaniso banokukhangela kwikamva beqinisekile. (Filipi 4:6, 7) Kubantu ababehlala besoyika, kuyavuyisa ukwazi ukuba uYehova akayitshintshanga injongo yakhe yantlandlolo yokuba umhlaba uzaliswe ngabantu abamaziyo nababonakalisa iimpawu zakhe zothando.—Genesis 1:26-28; Isaya 11:9.

Siyazi ukuba akukho nto inokuthintela uYehova ekuzalisekiseni injongo yakhe yothando ngabantu. (Isaya 55:10, 11; Roma 8:35-39) Xa sikuqonda oku, amazwi awaziwayo omdumisi aba nentsingiselo engakumbi. Apho sifunda oku: “UYehova ngumalusi wam. . . . Uyawuhlaziya umphefumlo wam. Undikhokelela kumkhondo wobulungisa ngenxa yegama lakhe. Nangona ndihamba kwintlambo yethunzi elimnyama, andoyiki nto imbi, kuba unam wena.” (INdumiso 23:1-4) Nangona siphila kwixesha eloyikeka ngakumbi, ihlabathi elingenalo uloyiko lisemnyango yaye ngokuqinisekileyo liyeza.

[Imibhalo esemazantsi]

[Imifanekiso ekwiphepha 8-10]

Kungekudala uThixo uza kuluphelisa uloyiko ehlabathini