Ngaba Wakha Walibona Ichibi Elipinki?

Ngumbhali kaVukani! eSenegal

NGABA likho ngokwenene ichibi elipinki? IChibi iRetba kuthiwa yiPink Lake, yaye ekubeni likumgama oziikhilomitha ezingama-30 kuphela apho sihlala khona eDakar, eSenegal, eNtshona Afrika, sigqibe kwelokuba sihambe siye kuzibonela enoba kuyafaneleka ukuyibiza ngale ndlela le ndawo. Nje ukufika kwethu sibona amanzi amahle nacwengileyo njengokuba ilanga libetha phezu kwawo. Eneneni abonakala enombala omhle opinki. Umntu osikhenkethisayo usixelela ukuba lo mbala mhle kangaka opinki ubangelwa kukubetha kwelanga kwizinto eziphilayo ezikula manzi. Phofu ke, kukho nezinye izinto ezibangel’ umdla kunombala weli chibi.

Kumanzi alo asidibi kukho ityuwa eninzi. Amanzi alo amtyuba kangangokuba sibona ezinye iindwendwe zidada nje ngaphezulu yaye aziziki.

Kuyabonakala ukuba abantu abaninzi baphila ngokusebenza apha kwiPink Lake (1). Abantu baxakekile, bathuth’ ityuwa ngeelori ezinkulu. Sema saza sazibonela ngawethu amehlo indlela abantu balapha abayifumana ngayo ityuwa kweli chibi. Amadoda angene ema ngeembambo echibini, aqhekeza le tyuwa ngeepeki. Esebenzisa imihlakulo, ayigalela ezingobozini aze ayithwale ngamaphenyana. Enye indoda esebenza apha isixelela ukuba ngeeyure ezintathu ufumana itoni enye yetyuwa. Amaphenyana azele kangangokuba ingathi angazika (2). Akufika la maphenyane elunxwemeni, ngamabhinqa ngoku asebenzayo. Athutha le tyuwa ngeengobozi azithwele entloko (3). Asebenza ngemvisiswano ngathi ngoomatshini abakhulu.

Belumnandi gqitha uhambo lwethu. Eli chibi lipinki yenye yezinto ezintle gqitha ezibangel’ umhlaba wethu ube sisipho esixabisekileyo esivela kuYehova.—INdumiso 115:16.

[Inkcazelo Ngomfanekiso okwiphepha 18]

Photo by Jacques CLEMENT, Clichy, FRANCE at http://community.webshots.com/user/pfjc