Ubuncwane Obukwelona Chibi Likhulu KuMbindi Merika
NANGONA iNicaragua ililizwe elincinane, kodwa izigobh’ amacala ngokuba nelona chibi likhulu kuMbindi Merika—iChibi laseNicaragua. Into ebangel’ umdla kukuba kusenokwenzeka ukuba leli chibi kuphela elinamanzi akwaziyo ukuphila iintlanzi ezifumaneka elwandle njengookrebe nezinye. Ezinye izazinzulu zikholelwa ukuba amanzi eli chibi ayevela kwiPasifiki kodwa kwathi ngenxa yentaba-mlilo wavaleka umnyele owawulidibanisa nolwandle. Njengoko ityuwa yayisiya iphela kumanzi eli chibi, intlanzi ezilapho zaya ziyiqhela loo meko.
Eli chibi nelinobude obumalunga neekhilomitha ezili-160 neezingama-70 kweyona ndawo ibanzi, liphakame phantse ngeemitha ezingama-30 ngaphezu kolwandle. Zingaphezu kwama-400 iziqithi ezikweli chibi, yaye ezimalunga nama-300 kuzo zindawonye yaye zingqonge uSingasiqithi iAsese, okufutshane nedolophu yaseGranada esekupheleni kwamantla eli chibi. Zona zibizwa ngokuba ziziQithana zaseGranada.
Esona siqithi sikhulu kweli chibi yiOmetepe esembindini. IOmetepe le, nemalunga neekhilomitha ezingama-25 ubude nezili-13 ububanzi yakhiwa ziinduli ezimbini ezaveliswa yintaba-mlilo. Eyona nduli iphakamileyo kuzo zonke iinduli ezi kweli chibi yiConcepción ephakame kangangeemitha ezili-1 610. Nanamhl’ oku isaman’ ukugqabhuka intaba mlilo. Enye induli yiMadera ephakame kangangeemitha ezili-1 394 nakuba yona ingasagqabhuki. Le nduli ithiwe rhwelele luhlaza olushinyeneyo yaye inechweba elithiwe wambu yinkungu embindini wayo.
Eli chibi yenye yeendawo ezithandwayo ngabakhenkethi. Bathontelana kulo ukuze babone ubuhle bendalo ekulo kunye nentaphane yentsalela yezinto ezazisetyenziswa mandulo. Kodwa ke isekho enye into entle kwiChibi laseNicaragua ekusafuneka kufundwe ngayo.
Abantu Abakhe Emanzini
Iziqithana zaseGranada zenile zizityalo yaye zinentlaninge yezilwanyana zasendle. Ezi ziqithi zivathiswe ngobuqheleqhele beentyatyambo ezingayiwayo ezifumaneka kwiintshinyela zamahlathi alapho. Xa ugugutha elunxwemeni wofika kukho iintaka ezimibalabala ezidla ngokufunyanwa kwiindawo ezenileyo njengookhwalimanzi, amangabangaba, izangxa, nezinye ezitya iintlanzi. Kwimithi emikhulu ekwinyele yehlathi ufumana iindlwana zeentaka ezinkulu zijiwuza njengoko ziphephezeliswa yimpepho ephuma kwelo chibi.
Kwezinye zezi ziqithi kuhlala abantu. Kukho imizi yabalobi neyezinhanha ezithanda ukuza kubethwa ngumoya. Zikho ke nezikolo neendawo zokungcwaba kuquka iivenkile zokutyela neebhari. Ezi ziqithi zifana nelali esemanzini.
Mihla le kubakho isikhephe esiqokelela abantwana kwezo ziqithi sibase esikolweni. Kukwakho nelinye iphenyana eliyivenkile nalo elityhutyha ezo ziqithi lithengisela abantu iziqhamo nemifuno. Yinto eqhelekileyo ukubona amadoda eloba iintlanzi ngeminatha ngoxa wona amabhinqa ehlamba iimpahla.
NamaNgqina kaYehova axakekile kwezi ziqithi. Ashumayela iindaba ezilungileyo zoBukumkani bukaThixo kubantu balapho ngephenyane. (Mateyu 24:14) Indlela engaqhelekanga ome ngayo lo mmandla yawabangela ingxaki amaNgqina: Yayiza kufumaneka phi indawo efanelekileyo yokuhlanganisana ukuze kufundwe iLizwi likaThixo, iBhayibhile? Ukuze athobele isiluleko seBhayibhile esithi ‘angakutyesheli ukuhlanganisana ndawonye,’ amaNgqina eza necebo—akha iHolo yoBukumkani yokuqala endanda emanzini eNicaragua!—Hebhere 10:25.
IHolo YoBukumkani Endanda Emanzini
NgoNovemba 2005, enye indoda nomfazi wayo abangamaNgqina kaYehova nabashumayela ngokusisigxina bafudukela kwiziqithana zaseGranada. Kwiinyanga ezimbalwa kamva, bamemela abantu kwiSikhumbuzo sokufa kukaKristu, baza bamangaliswa kukuza kwabantu abangama-76. Loo nto yenza esi sibini sabona ukuba kwakumele kuqhutywe iintlanganiso zamaKristu rhoqo kuloo ndawo. Ekubeni kwakunzima ukufumana indawo efanelekileyo yokuqhuba ezo ntlanganiso, esi sibini saxoza mphini wumbi. Sagqiba ekubeni kwakhiwe iHolo yoBukumkani endanda phezu kwamanzi eyayinokususwa kwenye indawo isiwe kwenye.
Esi sibini singethi mandla, saqalisa ukwakha nangona sasingazi nowathwethwa ngokwakha isakhiwo esindanda emanzini. Sancediswa ngabanye abantu abathandathu yaye loo msebenzi wabathabatha inyanga. Umgangatho waso wawuza kutshiselwa ngemibhobho yentsimbi kumagqongo amakhulu azaliswe ngumoya awayeza kusenza sikwazi ukundanda. Lo mgangatho wawuza kwenziwa ngamaplanga kuze kufulelwe ngeseyile. Aba bakhi babethandaza yonk’ imihla bengaqinisekanga enoba loo holo yayiza kukwazi kusini na ukundanda emanzini, yaye baphumelela.
Kuloo Holo yoBukumkani intsha kwaqhutywa iintlanganiso zokuqala ngoJuni 10, 2006. Ngosuku olulandelayo yarhuqelwa kwelinye icala lezo ziqithi ukuze kuqhutywe iintlanganiso nalapho. Bebonke abantu ababelapho babengama-48 phezu kwayo nje into yokuba abanye babehambe ngaphezu kwesiqingatha seyure ehlathini ukuze babekho. Bonke bavuyiswa gqitha kukuba nendawo yabo yokunqulela.
Abantu abeze kule Holo yoBukumkani baye bazive besekhaya. Njengoko bephulaphule isithethi, abantu bayakwazi ukuva amanzi ebetha ematyeni okanye ukukhala kweenkawu mgama. Abantu besi siqithi bakhawuleza bayiqhela le holo. Babewangazelisa izandla xa beyibona irhuqwa isisiwa kwenye indawo. Rhoqo ngeveki, baba ngaphezu kwama-20 abantu abeza apha ukuze bafundiswe iBhayibhile. Abantu bayayithanda le holo.
KwisiQithi SaseOmetepe
Malunga neekhilomitha ezingama-50 kumazantsi eGranada kukho isiQithi saseOmetepe. Ubuhle bendalo besi siqithi nomhlaba waso ochumayo kwasenza saba yeyona ndawo ithandwayo ngabantu. Enyanisweni, kwabonwa ngaso ukuba iNicaragua inomhlaba ochumileyo. Namhlanje iOmetepe inabantu abakuma-42 000 abaphila ngokuloba nokulima umbona, ibhanana, ikofu nezinye izinto. Naso esi isiqithi sinenyambalala yezilwanyana. Xa ukuso uva intsholo yezikhwenene, ubone amasomi atsho ngemibala eqaqambileyo eman’ ukuthi ngcu emithini kunye neenkawu ezinobuso obumhlophe ezithandwa gqitha ngabantu.
Nakubantu balapha zishunyayelwa gqitha iindaba ezilungileyo zoBukumkani bukaThixo. AmaNgqina alapha aye anda esusela kubantu abasi-8 ababhaptizwa ngowe-1966 aya kutsho kwabali-183 abakumabandla amane namhlanje ibe asaqhubeka esanda. Bandla ngalinye lineyalo iHolo yoBukumkani ekufutshane. Ngokomlinganiselo, namhlanje kukho iNgqina eli-1 kubantu abangama-230 kwesi siqithi.
AmaNgqina kaYehova aseOmetepe aye atyhubela ubunzima kangangeminyaka. Ngokomzekelo, ngowe-1980 abachasi bayintumeka ngomlilo iHolo yoBukumkani yawo eseMérida. Yaphinda yakhiwa ngowe-1984. Yasetyenziswa de kwangowama-2003 xa kwakhiwa iHolo yoBukumkani entle, kusenzelwa amalungu ebandla lalapho angama-60.
EMoyogalpa kwakhiwa iHolo yoBukumkani enkulu kulungiselelwa imihlangano emikhulu. Ineveranda eneqonga. Izitulo ziqala kanye phambi kwelo qonga eliseverandeni ziye emva. AmaNgqina alapha nabanye abamenyiweyo bamana ukuhlanganisana apha maxa wambi xa kukho imihlangano emikhulu. Abafundi bakaYesu Kristu abatsha babhaptizwa kweli Chibi laseNicaragua.—Mateyu 28:19.
Ngaba Obu Buncwane Buza Kulondolozwa?
Ngenxa yobukhulu balo, bekusoloko kubonakala ngathi iChibi laseNicaragua liya kuhlala likho. Kodwa namhlanje kufuneka likhuselwe. Amanzi alo angcolile ngenxa yemichiza eza namanzi aphuma emasimini nakwimizi-mveliso nangenxa yezibi ezikhukuliseke emahlathini ngenxa yokugawulwa kwawo.
Asiqinisekanga ke enoba iya kuphumelela kusini na imigudu karhulumente nabantu balapho yokuthintela le ngxaki. Enoba kwenzeka ntoni na, uMdali uza kubulondoloza bonke ubuncwane bomhlaba, kuquka amachibi, iziqithi ezihle nezilwanyana zasendle ukuze zibe lilifa labantu abathobelayo. IBhayibhile ithi: “Amalungisa aya kuwudla ilifa umhlaba, ahlale kuwo ngonaphakade.”—INdumiso 37:29.
[Umfanekiso okwiphepha 26]
IHolo yoBukumkani endanda emanzini