Ukuvala Umsantsa—Isicombululo Sokwenene

ABANTU abaninzi ehlabathini lonke bazama ukuphila suku ngalunye phezu kwabo nje ubuhlwempu. Kucacile ukuba bafuna urhulumente wobulungisa nongenabuqhetseba ofuna ngokunyanisekileyo ukutshintsha eli hlabathi lingenako okusesikweni. Kwakhona lo rhulumente ufanele abe namandla ngokwaneleyo ukuze aphumeze iinjongo zakhe ezintle. Ngaba ngokwenene sinokulindela urhulumente onjalo phakathi kwabantu?

Imbali ingqinelana nesilumkiso seBhayibhile esithi: “Musani ukukholosa ngezidwangube, nangonyana womntu wasemhlabeni, lowo ungenalo usindiso.” (INdumiso 146:3) Ngaba uye wafumanisa ukuba ukuthembela ngoorhulumente babantu kusoloko kukhokelela kudano? Phofu ke, ngubani omnye esinokuthembela kuye?

Enyanisweni, izigidi zabantu ziya zathandazela urhulumente wobulungisa onokuphelisa ukuxhatshazwa kwabantu. Mhlawumbi nawe uye wawenza umthandazo ongumzekelo uYesu awafundisa ngawo othi: “Bawo wethu osemazulwini, malingcwaliswe igama lakho. Mabufike ubukumkani bakho. Makwenzeke ukuthanda kwakho nasemhlabeni, njengasezulwini. Siphe namhlanje isonka sethu sale mini; uze usixolele amatyala ethu, njengokuba nathi sibaxolele abanamatyala kuthi. Ungasingenisi ekuhendweni, kodwa sihlangule kulowo ungendawo.”—Mateyu 6:9-13.

Ngaba uBukumkani uYesu abuthandazelayo bobu sibufunayo? Ngaba ngurhulumente wobulungisa nongenabuqhetseba? Ngaba bunamandla ngokwaneleyo ukuba buzalisekise iinjongo zabo ezintle? Ngokuqinisekileyo, bunjalo! UThixo omisele lo rhulumente, ‘uBawo wethu osemazulwini’ ‘nguThixo olilungisa noMsindisi,’ yena ‘ulilungisa kuyo yonke imisebenzi yakhe.’ (Isaya 45:21; Daniyeli 9:14) Kuthiwa ngaye: “Usulungeke kakhulu emehlweni ukuba ungabona okubi,” ngoko ke siqinisekile ukuba urhulumente wakhe akayi kusiqhatha. (Habhakuki 1:13) Yaye ekubeni ‘uThixo engakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye,’ siyazi ukuba ngokungenamkhethe unomdla kwintlalo-ntle yomntu ngamnye emhlabeni.—IZenzo 10:34, 35; Roma 2:11.

Sele Bumiselwe Yaye Buyalawula!

Nangona uBukumkani bukaThixo bumiselwe ezulwini buya kulawula emhlabeni ngaloo ndlela buzalisekisa iinjongo zikaThixo. Oku kuquka ukuyeka ukulawula koorhulumente babantu abangafezekanga kuze endaweni yabo kulawule urhulumente ofezekileyo kaThixo. KuDaniyeli 2:44 kuthenjiswa ukuba: “Ngemihla yabo kumkani [oorhulumente babantu] uThixo wezulu uya kumisa ubukumkani obungenakuze bonakaliswe. Yaye obo bukumkani abuyi kudluliselwa kubo nabaphi na abanye abantu. Buya kuzityumza buziphelise zonke ezi zikumkani, buze bona bume ukusa kwixesha elingenammiselo.”

Xa kulawula lo rhulumente, ekugqibeleni ukuthanda kukaThixo kuya kwenziwa ezulwini nasemhlabeni. Hayi indlela ekukhuthaza ngayo ukwazi ukuba lo rhulumente uya kukuphelisa ngokupheleleyo ukungalingani okuphakathi kwezityebi namahlwempu! Akusoze kuphinde kubekho abantu abambalwa abazizityebi nabantu abaninzi abangamahlwempu.

Kusenza sivuye kakhulu ukwazi ukuba uBukumkani bukaThixo basezulwini sele bumiselwe ukuze bucombulule ezi ngxaki ngonaphakade. Ubalo-maxesha lweBhayibhile neziganeko zehlabathi zalatha kunyaka we-1914 njengonyaka owamiselwa ngawo urhulumente kaThixo ezulwini.a Ngoko ke, phantse ibe yinkulungwane, elungiselela isiseko sehlabathi elitsha elinobulungisa.

Abo baqondayo ukuba uBukumkani bumiselwe nabathobela ulwalathiso lwalo rhulumente abakhethi buso. AmaNgqina kaYehova enza umsebenzi wokushumayela phantse kuwo onke amazwe. Kungakhathaliseki enoba zizityebi okanye amahlwempu, abemi balo mazwe, banikwa ithuba lokufunda indlela yokufumana ubomi obungunaphakade. (Yohane 17:3) AmaNgqina akakuvumeli ukuba zizityebi nokuba ngamahlwempu kwawo kuwenze acalulane ebandleni. Abantu abajongwa ezibhatyini. Kunoko, bayahlonelwa ngenxa yobuntu babo. Eyona nto ibalulekileyo zizinto zokomoya kunezinto eziphathekayo.

Ngaba ungathanda ukwazi ngendlela ekuza kuba yiyo xa kulawula lo rhulumente wobulungisa? Ngoko qala namhlanje ukufunda ngalo rhulumente. Funda uze ukhangele phambili kwihlabathi xa abantu beza kuba belingana.

[Umbhalo osemazantsi]

[Ibhokisi/Imifanekiso ekwiphepha 8, 9]

Bonke Ngabazalwana, Enoba Zizityebi okanye Ngamahlwempu

◼ Ekupheleni kweMfazwe Yehlabathi II, amaNgqina kaYehova amaninzi eYurophu nakumazwe aseAsia, ayengenakutya, iimpahla, nendawo yokuhlala. AmaNgqina asuka kwamanye amazwe athumela iimpahla nokutya okuninzi kubazalwana bawo eYurophu, kwiiPhilippines naseJapan. AmaNgqina aseUnited States naseKhanada anikela ukuze kuthunyelwe ezo zinto eBelgium, eCzechoslovakia (ngoku eyiRiphabliki yaseCzech neSlovakia) eFinland, eFransi, eGrisi, eHolani, eHungary, eItali, eJamani, eOstriya, ePoland, eRomania.

[Imifanekiso]

EUnited States

ESwitzerland

EJamani

◼ Kutshanje, ngehlobo lowe-1994, iqela lamaNgqina angamatsha-ntliziyo elalisuka eYurophu lakhawuleza ukuya kunceda abazalwana noodade abangamaKristu eAfrika. Kwalungiselelwa iindawo zokuhlala zokwexeshana nezibhedlele ukuze kuncedwe iimbacu zaseRwanda. Kwathunyelwa iimpahla ezininzi, iingubo, ukutya, neencwadi zokufunda iBhayibhile. Abantu abangaphezu kwama-7 000 ababeziimbacu—abaphantse baliphindaphinde kathathu inani lamaNgqina kaYehova eRwanda ngelo xesha—bancedwa gqitha lelo phulo.

◼ Kwiminyaka emibini kamva, ngowe-1996, kwaqhambuka imfazwe kummandla okwimpuma yeDemocratic Republic of Congo. Izityalo zatshabalala, kwabiwa kwiindawo ezigcina ukutya, yaye kwakunzima nokufika apho uya khona. Inkoliso yabantu yayisitya kanye nje ngosuku, nto leyo eyabangela ukungondleki nezifo. AmaNgqina kaYehova aseYurophu akhawuleza ukuya kunceda. Iqela labahlanguli elingamaNgqina elaliquka oogqirha lasa amayeza kunye nemali ngenqwelo-moya. NgoJuni 1997 amaNgqina aseBelgium, eFransi, naseSwitzerland anikela ngeekhilogram ezingama-500 zamayeza, iitoni ezili-10 zamaqebengwane aneprotini, neetoni ezingama-20 zokunye ukutya, iitoni ezingama-90 zeempahla, izihlangu ezili-18 500 neengubo ezili-1 000. Konke oku kwaxabisa phantse ii-R6,7 zezigidi.

◼ Ngaphandle kokunceda abantu ngezinto eziphathekayo, amaNgqina kaYehova anomdla wokunceda abantu ngokomoya. Oku sikubona ngokwakha kwawo iiHolo zoBukumkani apho abantu bafundiswa khona inyaniso yeBhayibhile. Ngowe-1997 kwanikelwa le ngxelo: “Ngoncedo lwabazalwana abasuka kwamanye amazwe, [iWatch Tower] Society iye yakwazi ukwakha iiHolo zoBukumkani ezintsha ezingama-413 kwaza kwalungiswa ezinye ezingama-727 kumazwe awahlukahlukeneyo angama-75, ngeenyanga nje ezine.” Ngonyaka wama-2003 kwanikelwa le ngxelo: “Phakathi kwamazwe aseYurophu aye akhelwa kwilungiselelo lokunceda amazwe ahluphekileyo nangenazo iiHolo zoBukumkani yiRomania, yaye ukususela ngoJulayi 2000 kuye kwakhiwa iiHolo zoBukumkani ezingama-124. Besebenzisa nje iplani eqhelekileyo xa besakha zonke iiHolo zabo zoBukumkani, eUkraine bakha ezingama-61 ngonyaka wama-2001 yaye ngowama-2002 bakha ezinye ezingakumbi ezingama-76. Ngoncedo lwemali ekuye kwanikelwa ngayo kwiNgxowa-mali yeeHolo zoBukumkani, kuye kwakhiwa iiHolo zoBukumkani ezininzi eBulgaria, eCroatia, eMacedonia, eMoldova, eRashiya, eSerbia naseMontenegro.”

[Imifanekiso]

ECroatia

EBulgaria

ERomania

[Umfanekiso okwiphepha 7]

Itsha-ntliziyo linyamekela abantwana beembacu ababini abaziinkedama

[Inkcazelo]

© Liba Taylor/Panos Pictures

[Umfanekiso okwiphepha 10]

AmaNgqina kaYehova asasaza isigidimi sethemba

[Umfanekiso okwiphepha 10]

UBukumkani bukaThixo buza kuphelisa ubuhlwempu