Ukungabi Namakhaya—Sisiphi Isicombululo?

“UPHA umntu intlanzi, yaye uya kumondla usuku olunye. Umfundisa ukuloba, yaye uya kumondla ubomi bakhe bonke.” Le ntetho yesiNgesi ibonisa ubunyaniso bokuba ukunceda abantu ngezinto abazifuna nje ngoku akubancedi kangako. Okona kubhetele kukunceda abantu bafunde ukucombulula iingxaki zabo baze bakwazi ukuzixhasa. Abantu abaninzi kufuneka bafundiswe iindlela zokuphila ubomi bemihla ngemihla okanye indlela abafanele babujonge ngayo ubomi ukuze baphumelele.

AmaNgqina kaYehova eyisekile kukuba eyona ndlela iphumelelayo yokunceda abantu abangenamakhaya kukubafundisa eyona ndlela ifanelekileyo yokuphila. Oku kuthetha ukusebenzisa elona cebiso lilungileyo—elo silifumana kuMdali wabantu. Nguye kuphela onawona macebiso alungileyo. Amacebiso akhe anceda abantu ukuba baphephe iingxaki ezininzi ezikhokelela ekubeni bangabi nayo indawo yokuhlala. Akwanceda nabantu abanyanisekileyo ukuba bakwazi ukumelana nale ngxaki. Kakade ke, ukufunda iBhayibhile kona nje kukodwa akwenzi ukuba iingxaki zingabikho. Noko ke, iBhayibhile inokunceda abantu bayeke ukusela utywala ngokugqithiseleyo, ukutshaya, ukusebenzisa iziyobisi, nokungcakaza, bazihlonele, nto leyo ekhokelela ekubeni baphile ubomi obunesidima.

Abantu abaninzi baye baphulukana namakhaya abo ngenxa yokusebenzisa kwabo ezi zinto zingasentla, nto leyo eye yabangela ukuba babe zizaphuli-mthetho, babe neengxaki zemali, okanye baqhekekelwe ziintsapho. IBhayibhile inamacebiso asebenzisekayo kuzo zonke ezi nkalo. Ukusebenzisa loo macebiso sele kuncede abantu abaninzi batshintsha indlela ababujonga ngayo ubomi—yaye aye abutshintsha ubuntu babo ngokupheleleyo—babhetele. Kakade ke, ukusebenzisa nje kuphela amacebiso eZibhalo kusenokungazicombululi zonke iingxaki ezinxulumene nokungabi nandawo yokuhlala. Okwexeshana, iintlekele zemvelo, ukuba nempilo enkenenkene, ubuhlwempu obusehlabathini lonke, ukuba likhoboka lotywala neziyobisi nezinye izinto ezifana nezo, ziingxaki ezifuna olunye uncedo. Ngoxa amaNgqina kaYehova esenza konke anokukwenza ukunceda abantu ababandezelekileyo ngenxa yezo ngxaki, ayazi ukuba kuphela nguMenzi wabantu onokucombulula ezo ngxaki ngonaphakade. Ngaba uza kuzicombulula?

Injongo KaThixo Yantlandlolo

Sinesizathu esivakalayo sokuba nethemba lokuba ukungabi namakhaya kuza kuphela kungekudala. Eli themba lisekelwe entweni? Kaloku, uYehova uThixo walungiselela indoda nomfazi bokuqala ikhaya elihle. UThixo wababeka eparadesi, apho babenayo yonke into ababeyifuna. Ukuba babethobele ulwalathiso loMenzi wabo, ngebabewenze wonke umhlaba wayiParadesi. Inzala yabo ngeyayinentabalala yokutya, namakhaya amahle. Bonke abantu bebeza kuthandana baze basebenzisane. Leyo yayiyinjongo kaThixo yantlandlolo. Akatshintshanga, leyo iseyinjongo yakhe nangoku.—INdumiso 37:9-11, 29.

Ukongezelela, nantoni na uThixo afuna ukuyenza iza kwenzeka. (Isaya 55:10, 11) IBhayibhile iprofeta isithi kuza ixesha apho wonke umntu eya kube enendawo yokuhlala nezinye izinto eziphathekayo eziyimfuneko. Kodwa ke, ngaphambi kokuba oko kwenzeke, bonke abantu bafanele batshintshe. Oko kuya kwenzeka xa uThixo engenelele kwimicimbi yabantu. Yiloo nto kanye uYesu wayecinga ngayo xa wafundisa abafundi bakhe ukuthandaza bathi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.”—Mateyu 6:9, 10.

Ngaphantsi koBukumkani bukaThixo obulawula ngokusesikweni, abantu abathobelayo baya kukubona ukuzaliseka kwesi siprofeto sikhuthazayo: “Ngokuqinisekileyo baya kwakha izindlu baze bahlale . . . Abayi kwakha kuhlale abanye; abayi kutyala kudle abanye. . . . Nomsebenzi wezandla zabanyuliweyo bam baya kuwusebenzisa ngokupheleleyo.” (Isaya 65:21, 22) Ngamazwi nje alula, akukho mntu uza kube engenayo indawo yokuhlala.

Ngoku amaNgqina kaYehova enza unako nako wokunceda abantu ngokomoya. Abonisa uthando nto leyo eyakhuthazwa nguYesu. (Mateyu 22:36-39) Oko kuwenza ancede abo baye baphulukana nezindlu zabo ngenxa yeentlekele zemvelo.a

Ngokusengqiqweni, amaNgqina ayaqonda ukuba akanakukwazi ukunceda umntu wonke. UJacek, wasePoland ohlala kwindawo yokufihla intloko yabantu abangenamakhaya, uthi ngokuphathelele abantu abangenamakhaya: “Abanye babo baba ndlongondlongo okanye basebenzisa iziyobisi. Abanye abafuni ukuba kuthethwe ngonqulo, kuba becinga ukuba uThixo akanamdla kubo. Kodwa bakho abaphulaphulayo xa kuthethwa ngeLizwi likaThixo.” Ngokomzekelo, uJacek uye wenjenjalo. Sele eqalile ukufunda okungakumbi ngoko kanye iBhayibhile ikufundisayo.

Omnye owaphulaphulayo nguRoman, onesifo sikaGawulayo nobehlala esitratweni kwade kwamvanje. Uthi: “Xa ndafika kwindawo yoonontlalo-ntle, ndandingazi ukuba amaNgqina kaYehova ayeneentlanganiso kufuphi nalapho. Athetha nam esitratweni yaye andichazela ukuba ukukhalela uncedo kwabantu abangenamakhaya uThixo uyakuva. Andimema ukuba ndiye kwenye yeentlanganiso zawo.”—INdumiso 72:12, 13.

Kwamchaphazela njani oko wakuvayo? “Ndafunda ukuba ndingaphila ngonaphakade kumhlaba oyiParadesi nokuba ndixabisekile emehlweni kaThixo. Ndingqongwe ngabahlobo abatsha abanothando, ndayeka ukunikel’ ingqalelo kwiingxaki endandinazo yaye ndaqalisa ukutshintsha ubuntu bam. Ngenxa yokuba ndimthanda uThixo, ndayeka ukutshaya yaye emithandazweni ndamthembisa ukuba ndiza kuhamba emendweni wobulungisa.”

URoman wenza inkqubela ngokomoya yaye wakhawuleza wabhaptizwa waza waba liNgqina likaYehova. Ngoncedo lwabazalwana nabasemagunyeni, wakwazi ukufumana indawo efanelekileyo yokuhlala. URoman evuya uthi: “Intliziyo yam izaliswe luvuyo olungathethekiyo. Ndiye ndasondela ngakumbi kuThixo oye wandinceda ndaphila ubomi obunenjongo. Ndinentsapho engabazalwana noodade kwakhona ndinayo nendlu!”

Ikamva Labantu Abangenamakhaya

AmaNgqina kaYehova enza unako nako ukubonisa uvelwano kubo bonke abamelwane bawo, kuquka nakubantu abangenamakhaya. Azabalazela ukuthetha nabanye ngenyaniso yeBhayibhile ephathelele ikamva elibhetele—inyaniso kwanangoku enokutshintsha ubomi babantu.—Yohane 8:32.

IBhayibhile ithi: “Oko kwenziwe kwagwenxa akunakwenziwa kuthi tye.” (INtshumayeli 1:15) Ewe, nangona kukho amatsha-ntliziyo nabasemagunyeni abanqwenela ukucombulula le ngxaki, kodwa kunzima ukuphelisa ingxaki yokungabi namakhaya nobuhlwempu. Noko ke, iBhayibhile iyasiqinisekisa ukuba kungekudala xa kulawula uBukumkani bukaThixo, bonke abantu abathobelayo baza kuhlala kamnandi.

[Umbhalo osemazantsi]

[Umfanekiso okwiphepha 8]

Umama oyimbacu osuka eSomalia uphethe itikiti lokufumana ukutya

[Inkcazelo]

© Trygve Bolstad/Panos Pictures

[Umfanekiso okwiphepha 9]

Ngaphezu koko, abantu abangenamakhaya bafuna ithemba ngekamva

[Imifanekiso ekwiphepha 10]

Xa kulawula uBukumkani bukaThixo akukho mntu uza kube engenayo indawo yokuhlala