Ukungabi Namakhaya—Ingxaki Esehlabathini Lonke

NGUMBHALI KAVUKANI! EPOLAND

“BAYANUKA, bamdaka—akukho nto banayo, akukho mntu ubaziyo!” Le nto ithethwayo iyakhwankqisa, kodwa ngokutsho kwamatsha-ntliziyo anceda abantu abangenamakhaya eCzestochowa, ePoland, le yindlela nje eqhelekileyo abajongwa ngayo abantu abangenamakhaya.

Ngokutsho kwengxelo ekwiThe Economist kwiminyaka embalwa edluleyo, kwimingxuma ehamba amanzi engaphantsi kwezitrato zaseUlaanbaatar, eMongolia, abantwana abaninzi abangenamakhaya bahlala kwiirhatyi ezinukayo ezinamanzi amdaka okanye kwiindawo zokufudumeza okanye ukupholisa izakhiwo. Lo lindixesha uthi nangona babothukile kukuva ngaba bantwana bangenamakhaya, abantu abaninzi baseMongolia bagqiba ngelithi le meko “ibangelwa kukuba abantu bayonqena ukukhulisa abantwana babo.”

Kwamanye amazwe, abantwana abahlala ezitratweni babulawa ngabantu abathi bangoolind’ ikhaya (vigilantes). Yintoni ebangela oku? Impapasho yeZizwe Ezimanyeneyo ithi: “Kumbindi nakuMzantsi Merika abantu abaninzi abaziijaji, amapolisa, abakumajelo eendaba, abezoshishino, nabantu basekuhlaleni bakholelwa kukuba abantwana abahlala esitratweni baza konakalisa izimilo zabanye abantu.” Kwale mpapasho ithi: “Ngokomlinganiselo, suku ngalunye kuthiwa abantwana abathathu kwabo bahlala esitratweni bayabulawa kwisithili saseRio de Janeiro.”

Ngoko ke iWeb page, eyenziwa ngamatsha-ntliziyo anceda abantwana abangenamakhaya eCzestochowa ithi abantu abangenamakhaya “basenza soyike size singakhululeki . . . , kodwa ke bathwaxwa yindlala ngokufanayo nathi. Baninzi abantwana abanjalo, yaye abanazo izinto eziyimfuneko khon’ ukuze baphile ubomi obusemgangathweni.” Le mpapasho yongezelela isithi: “Sinethemba lokuba . . . kukho abantu abaya kunceda kule ngxaki inkulu kangaka.” Yintoni kanye kanye le ifunekayo yaye ifuneka kangakanani?

[Umfanekiso okwiphepha 2, 3]

Phakathi kule mingxuma yamanzi kuhlala iqela labantwana abangenamakhaya

[Inkcazelo]

Jacob Ehrbahn/Morgenavisen Jyllands-Posten