“Ubuya Kuphendula Uthini?”
1. Ziziphi iingxaki abantu abaninzi abajamelana nazo?
1 Ngaba uyalithanda iLizwi likaThixo kodwa ukufumanisa kunzima ukukhumbula iinkcukacha ezithile ngeengxelo zeBhayibhile okanye apho afumaneka khona amazwi athile eBhayibhileni? Ungathanda na ukuba abantwana bakho bayiqonde kakuhle inyaniso neemfundiso zeBhayibhile? Inqaku elithi “Ubuya Kuphendula Uthini?” elibakho kwiphepha 31 likaVukani! wanyanga nganye linokunceda abaselula nabantu abakhulileyo ukuba balazi ngakumbi iLizwi likaThixo.—IZe. 17:11.
2. Anokusetyenziswa njani amacandelo ahlukahlukeneyo kwinqaku elithi “Ubuya Kuphendula Uthini?”
2 Unokulisebenzisa njani eli nqaku? UVukani! kaJanuwari 2006 wacebisa ngelithi: “Khawuziphe ithutyana uze uqwalasele iphepha 31. . . . Eminye imibandela kweli phepha iza kubangel’ umdla kubafundi abaselula, kanti eminye iza kubashiya bekrwel’ iintloko abafundi beBhayibhile abanamava bezama ukukhumbula izinto abazifundileyo. Icandelo elithi ‘Kwenzeka Nini Oku?’ liya kukunceda ukuze uzikrwelele umgca wokulinganisa ixesha abaphila ngalo abantu abathile ekuthethwe ngabo eBhayibhileni nexesha ezenzeka ngalo iziganeko ezibalulekileyo. Ngoxa iimpendulo zecandelo elithi ‘Kule Nkupho’ ziya kufumaneka kulo lonke eli phephancwadi, iimpendulo kwinkoliso yeminye imibuzo ziya kufumaneka kwiphepha elichaziweyo kwakule nkupho, yaye ziya kubhalwa zijongiswe phezulu. Kutheni ungenzi uphando ngaphambi kokuba ufunde iimpendulo uze uncokolele nabanye ngoko ukufundileyo? Kwakhona usenokusebenzisa eli nqaku litsha lithi, ‘Ubuya Kuphendula Uthini?’ njengengxoxo yeBhayibhile yentsapho okanye abahlobo.”
3. Ziye zangenelwa njani ezinye iintsapho kweli nqaku, yaye yiyiphi inxalenye oyithanda kakhulu?
3 Eneneni, iintsapho ezininzi ziyakuthanda ukusebenzisa eli nqaku njengesifundo sentsapho. Omnye umama ubhala enjenje: “Mna nomyeni wam siye sagqiba kwelokuba siquke icandelo elithi ‘Bantwana Khangelani Le Mifanekiso’ kwisifundo sethu sentsapho ukuze sihlale sibangel’ umdla kwintombi yethu eneminyaka emithathu. Kumnandi gqitha ukumbukela ethatha uVukani! wakhe aze atyhile iphepha ngalinye de afumane loo nto ayifunayo.” Omnye ubawo waseBrazil uthi: “Mna nonyana wam oneminyaka esixhenxe ubudala silithanda gqitha eli nqaku likaVukani! Liye lanceda uMoises ukuba anikele ingqalelo, akwazi ukutyhila iZibhalo, aqonde injongo yemifanekiso aze awazi namaxesha abalulekileyo embalini.” UAshley, oneminyaka esibhozo ubudala, ubhala enjenje: “Ndiyanibulela ngenqaku elithi ‘Ubuya Kuphendula Uthini?’ elingasemva kuVukani! Lindifundise lukhulu ngeBhayibhile.”
4. Intsapho inokulisebenzisa njani eli nqaku kwisifundo sayo?
4 Kutheni ningasebenzisi inqaku elithi “Ubuya Kuphendula Uthini?” ngamanye amaxesha xa ninesifundo sentsapho? Ninokusebenzisa i-Index okanye iWatchtower Library ekwiCD-ROM ukuze nifumane iimpendulo zemibuzo enzima. Ngokwenjenjalo, niya kuba nifundisa abantwana benu indlela yokwenza uphando. Ukuba ninabantwana abadala, ninokubacela ukuba benze inxalenye engalulanga kangako yokufumana iimpendulo phantsi komxholo othi ‘Ndingubani?’ okanye othi ‘Kwenzeka Nini Oku?’ ngaphambi kwesifundo sentsapho. Basenokwandula ke bachaze izinto abazifumeneyo kuphando lwabo xa ninesifundo. Ukusebenzisa eli nqaku kakuhle yenye indlela abazali abanokubethelela ngayo iLizwi likaThixo kubantwana babo, bebanceda ukuba bazi “imibhalo engcwele” kwasebusaneni.—2 Tim. 3:15; Dut. 6:7.