Okwenzeka Ehlabathini

◼ Ngokutsho kolunye uhlolisiso, amabhinqa abeleka ngokutyandwa anamathuba aphindwe kathathu okufa xa kuthelekiswa nalawo abeleka ngendlela eqhelekileyo.—OBSTETRICS AND GYNECOLOGY, EUNITED STATES.

◼ UStephen Hawking osisazinzulu wabuza lo mbuzo kwi-Internet: “Kwihlabathi elineengxaki kangaka kwezobupolitika, kwezentlalo nakwindlela ophethwe ngayo umhlaba, abantu banokuqhubeka njani bephila eminye iminyaka eli-100?” Kwinyanga kamva wathi: “Nam andazi. Yiloo nto endenze ndabuza lo mbuzo, ukuze abantu bacinge ngaloo nto, nokuze baziqonde iingozi ngoku esijamele nazo.”—THE GUARDIAN, EBRITANI.

◼ Nyaka ngamnye abantu abaphakathi kwezigidi ezili-14 nezili-19 kubemi baseTanzania abazizigidi ezingama-37 baba nesifo seengcongconi. “Esi sifo sibulala abantu abanokuba ngama-100 000 nyaka ngamnye kweli lizwe.”—THE GUARDIAN, ETANZANIA.

Iintlanzi Zigcina Amanzi Ecocekile

Kwizixeko ezininzi zakuMntla Merika kusetyenziswa iibluegill, iintlanzi ezikwaziyo ukuva imichiza ukuze zilondoloze amanzi okusela ecocekile. Ingxelo yeAssociated Press ithi: “Ezi ntlanzi zigcinwa kwiitanki ezizaliswa ngamanzi kamasipala, yaye kufakwa izixhobo ezisebenza imini nobusuku ukuhlola indlela eziphefumla ngayo, ukubetha kwentliziyo nendlela eziqubha ngayo ezi ntlanzi xa kukho ityhefu.” Le ngxelo ithi ngenye imini kwisiXeko saseNew York, “ezi ntlanzi zeva ukuba kuchitheke idiesel kwiiyure ezimbini ngaphambi kokuba . . . ezinye izixhobo zifumanise oko,” yaye oku kwathintela ukuba ingade ifike kumanzi aselwayo.

Ukwandiswa Kwentshongo

IThe New York Times ithi ngoxa isebe lempilo lizam’ ukukhuthaza abantu ukuba bayeke ukutshaya, zona iinkampani zecuba “ngendlel’ echuliweyo zenza abantu babe ziingedle ngakumbi” ngokongeza intshongo “nge-10 ekhulwini kwiminyaka emithandathu edluleyo.” Kuhlolisiso olwenziwe mvanje, kuhlolwa imikhwa yeentshayi, kufunyaniswe ukuba iinkampani zecuba zizama “ukubambisa iintshayi eziselula nezintsha zize zithintele iingedle zingayeki.” Xa zivavanywa, kwafunyaniswa ukuba “phantse zonke iintlobo [zemidiza] zinentshongo eyaneleyo ukubangela iintshayi zibe ngamakhoboka ecuba.”

Ingalo Efakelwayo Elawulwa Ziingcinga

Indoda yaseUnited States eyanqunyulwa iingalo zombini ngemva kwengozi ngoku isebenzisa ingalo efakelwayo elawulwa ziingcinga. Le ndoda iyakwazi ukukhwela elelini, isebenzise iroller yokupeyinta nokwanga abazukulwana bayo. ICable News Network ithi: “Kwingalo yayo yasekhohlo, le ndoda inomatshini oxelisa ingalo yayo yemvelo olawulwa bubuchopho. “Iyacinga ‘Vala isandla,’ zize izimva-mvo ezithunyelwa ngombane zisivale.” Iielectrode zifumanisa oko izihlunu zifuna ukukwenza zize zikuthumele kwikhompyutha esengalweni. Ikhompyutha ichukumisa umatshini okwilungu elifakelweyo, nto leyo ebangela ukuba amalungu ayo enze oko kwenziwa yingqiniba nasisandla.

Iindidi Ezininzi Zezidalwa Ezintsha

Iphephandaba laseTahiti iFenua Info lithi nyaka ngamnye kufunyanwa phantse ama-17 000 eendidi ezintsha zezidalwa. Kwezi zidalwa zitsha, ezingama-75 ekhulwini kuzo zizinambuzane, kodwa phakathi kwazo kufunyanwa nezinokuba ngama-450 ezinethambo lomqolo, kuquka iindidi zeentlanzi ezingama-250 nezilwanyana ezincancisayo ezingama-20 ukusa kuma-30. Ezimbini kwezintathu zezi zidalwa zincancisayo ziimpuku namalulwane, yaye eli phephandaba lithi “kudla ngokufunyanwa nesilwanyana esikhulu esanyisayo nyaka ngamnye,” nto leyo ezothusayo izazinzulu. Apha kufunyaniswa imithi nezityalo.