‘Ndifuna Ukunqula UThixo Ngaphambi Kokuba Ndife’
IBALI LIKAMAMIE FREE
NGOWE-1990 kwaqhambuka imfazwe yamakhaya eLiberia. Njengoko umlo wawusiya usiba nzima, uMamie, intwazana eneminyaka eli-12 ubudala yesizwe samaKrahn kunye nentsapho yakowayo, babevaleleke kwikhaya labo elikwikomkhulu lalapho iMonrovia. UMamie uthi: “Seva kuqhushumba ngasemnyango, umjukujelwa wabetha kwindlu yommelwane wethu yaza yavutha. Amalangatye antumeka nekhaya lethu nalo lavutha.” Kuloo mlo wawugquba apho, uMamie nonina noninalume babaleka.
UMamie ubalisa esithi: “Ngesiquphe ndachanwa yinto ethile.”
Umama wabuza: “Kwenzeke ntoni?”
Ndamphendula ndathi: “Kukho into endichanileyo, ndicing’ ukuba yimbumbulu.”
UMamie wawa phantsi eqaqanjelwa waza wathandaza wathi: “Thixo, khawundiphulaphule. Ndicinga ukuba ndiza kufa, kodwa ndifuna ukukunqula ngaphambi kokuba ndife.” Waza waf’ isiqaqa.
Becinga ukuba uMamie ufile, abamelwane bafuna ukumngcwaba kunxweme olukufuphi nalapho. Noko ke, unina wanyanzelisa ukuba asiwe kwisibhedlele esikufutshane. Ngelishwa, kwesi sibhedlele kwakungekho nendawo yokunyathela, yaye kwakungekho ndlela yokunyamekela amadoda, amabhinqa kunye nabantwana ababenzakele. Umalume kaMamie naye owayenzakele wafa ngobo busuku, kodwa uMamie wasinda, kodwa waf’ umzimba ukususela esinqeni ukusa emazantsi.
Wophela ngaphakathi yaye wayegcuma ziintlungu. Sekulityelwe, kwiinyanga ezine kamva oogqirha benza iiX-ray ukuze bakwazi ukubona le mbumbulu. Yafunyanwa iphakathi kwimiphunga nentliziyo. Uqhaqho lwaluya kubeka ubomi bakhe esichengeni, ngaloo ndlela unina wamsa kwixhwele. UMamie uyabalisa: “Landisika ngencakuba, emva koko labeka umlomo walo kwelo nxeba lizama ukufunxa imbumbulu. Lathi: ‘Nantsi,’ likhupha imbumbulu emlonyeni. Salihlawula saza sahamba.”
Kodwa le ndoda yayixoka. Ezinye iiX-ray zabonisa ukuba imbumbulu yayisekho emzimbeni. UMamie nonina babuyela kweli xhwele, yaye labaqinisekisa ukuba iiX-ray zaziya kubonisa emva kweenyanga ezisithoba ukuba imbumbulu ayikho. Bagoduka baza balinda ngomonde. Ebudeni beli xesha uMamie wasebenzisa amayeza athile ukuze athomalalise iintlungu. Kwaphinda kwabuya ezinye iiX-ray kwiinyanga ezisithoba kamva. Imbumbulu yayisekho. Ixhwele laphel’ emehlweni.
Kwakusele kuziinyanga ezili-18 ngoku uMamie enembumbulu emzimbeni wakhe. Esinye isizalwana samsa kwelinye ixhwele. Kunokubanceda, lasuka lathi uMamie nonina babeza kufa ngomhla othile. UMamie wayeneminyaka eli-13 ubudala ngeli xesha. UMamie uthi: “Xa lwafika olo suku lwalubekiwe, akukho mntu wafayo.”
Utatomncinci kaMamie wamsa kumfundisi owathi uboniswe ngombono ukuba uMamie ungumlwelwe ngenxa yobugqwirha kungekhona imbumbulu. Wamthembisa uMamie esithi wayenokuphinda akwazi ukuhamba kwisithuba nje seveki ukuba wayenokulandela izinto aza kumxelela ukuba azenze. UMamie uchaza esithi: “Ndandihlamba ngamanzi olwandle athandazelweyo, ndizila ukutya yaye kwakufuneka ndiziqengqe phantsi suku ngalunye ezinzulwini zobusuku, kusenokwenzeka ukuba ndakwenza oku iiyure ezininzi. Zonke ezi zinto zazindibambisa isisila sehobe, ibe akukho nto yatshintshayo.”
Ekugqibeleni, izibhedlele ezininzi zaqalisa ukusebenza kwakhona, yaye uMamie wakwazi ukwenziwa utyando lokukhupha imbumbulu. Wayesele engcungcutheke iminyaka emibini ziintlungu. Uthi: “Emva kotyando, neentlungu zathi qabu ndaza ndakwazi ukuphefumla lula. Nakuba ndandife umzimba, ndandikwazi ukusimelela.”
UMamie Udibana NamaNgqina KaYehova
Kwiiveki ezimbalwa emva kokwenza utyando, unina wadibana namaNgqina kaYehova. Kuba wayesazi ukuba intombi yakhe yayikuthanda ukufunda iBhayibhile, wawabiza amaNgqina ukuba eze kwakhe. Ngoko nangoko, uMamie wasamkela isifundo seBhayibhile. Noko ke, emva kweenyanga ezimbalwa wabuyela esibhedlele waza walahlekana namaNgqina.
Kodwa uMamie wayesalufuna ulwazi ngeBhayibhile. Xa kwafika umfundisi wecawa ukuze amncede, walwamkela uncedo lwakhe. Ngexesha lesikolo seCawa, omnye umfundi wabuza utitshala: “Ngaba uYesu uyalingana noThixo?”
Utitshala wathi: “Ewe bayalingana. Kodwa uYesu akalingani ncam noThixo.”
UMamie wazibuza: ‘Abalingani ncam? Kodwa loo nto ayikho ngqiqweni. Lukho unyawo lwemfene kule nto.’ Engakholelwa ukuba oko wayekufunda kwakuyinyaniso, uMamie wayishiya le cawa.
Ngowe-1996 kwavela izixholoxholo kwakhona eMonrovia. Kwafa abantu abaninzi kwintsapho yakuloMamie, baza batshiselwa umzi wakowabo okwesibini. Kwiinyanga ezimbalwa kamva, amaNgqina amabini adibana noMamie xa ayeshumayela kwindlu nendlu. UMamie waqalisa ukufunda iBhayibhile kwakhona. Xa waya okokuqala kwiintlanganiso zebandla, wothuka ukubona wonke umntu esebenza—kuquka nabadala bebandla—becoca iHolo yoBukumkani. Kamva kuloo nyaka wavuyiswa kukuya kwiNdibano Yesithili “Yabathunywa Boxolo Lobuthixo,” eyona ndibano inkulu wakhe waya kuyo yamaNgqina kaYehova.
UMamie uthi: “Ndachukumiseka gqitha. AmaNgqina ayethandana ngokwenene, nakuba ayesuka kwizizwe ezahlukeneyo. Ibe yonke into yayilungiselelwe kakuhle.”
Ukuzaliseka Komnqweno Wakhe Wokunqula UThixo
Ngowe-1998 imilo yavuka phantsi, kwaza oku kwanyanzela uMamie nonina ukuba babhacele kwilizwe eliselumelwaneni, iCôte d’Ivoire, apho bahlala kwiNkampu yeeMbacu iPeace Town kunye nabanye abantu abasuka eLiberia abanokuba ngama-6 000. UMamie waqhubeka efunda namaNgqina waza wenza inkqubela entle. Ngokukhawuleza emva koko wafuna ukuba nenxaxheba ekuxeleleni abanye ngokholo lwakhe. Ukuze akwazi ukushumayela entsimini, oodade nabazalwana bakhe bokomoya babemqhuba ngesitulo sakhe esiqhutywayo. Ngale ndlela, uMamie wakwazi ukushumayela kubantu abaninzi abaziimbacu.
Nakuba kwakukho imiqobo emininzi eyayikwenza kube nzima ukuya kwiHolo yoBukumkani, eyayimalunga neekhilomitha ezintandathu ukusuka apho wayehlala khona, uMamie wayesiya kuzo zonke iintlanganiso. NgoMeyi 14, 2000, wahamba iikhilomitha ezili-190 esiya kwindibano ekhethekileyo yosuku olunye yaye wabhaptizwa, ebonakalisa uzahlulelo lwakhe kuThixo. (Mateyu 28:19, 20) Phambi kwabantu ababenyembezana, uMamie wathwalwa waza wafakwa kwichibi ukuze antywiliselwe. Ubuso bakhe babuzele imincili njengoko wayephuma emanzini.
Ngoku, uhlala kwinkampu yeembacu eseGhana yaye usukelo lwakhe kukuba nguvulindlela othe ngxi okanye umshumayeli wexesha elizeleyo. Unina uye waqalisa ukufunda iBhayibhile namaNgqina kaYehova ibe ngoku sele eshumayeza nabanye ngezinto azifundileyo. Bobabini bakhangele phambili kwixesha elithenjiswa liLizwi likaThixo, xa “isiqhwala siya kutsiba njengexhama, nolwimi lwesimumu luya kumemelela ngochulumanco.”—Isaya 35:5-7.
[Umfanekiso okwiphepha 22]
Imbumbulu eyakhutshwa emzimbeni kaMamie
[Umfanekiso okwiphepha 23]
UMamie usiwa kwichibi ukuze abhaptizwe
[Umfanekiso okwiphepha 23]
Uqhuba isifundo seBhayibhile nonina, uEmma