Unokuphila Ixesha Elide Kangakanani?

“Inyama yakhe mayihlaziyeke ngakumbi kunasebutsheni; makabuyele emihleni yamandla obutsha bakhe.”—YOBHI 33:25.

XA INJA isifa emva kokuba iphile iminyaka eli-10 okanye engama-20, mhlawumbi idla ngokuba izenze zonke izinto ezifanele zenziwe yinja. Isenokuba ikhulise amantshontsho, yaleqa iikati, yagqumelela amathambo yaza yakhusela umniniyo. Kodwa xa umntu esifa emva kokuba ephile iminyaka engama-70 okanye engama-80, zimbalwa izinto aye wakwazi ukuzenza. Ukuba ebethand’ imidlalo, kusenokuba mnye okanye mibini akwazi ukuyidlala kakuhle. Ukuba ebethanda umculo, mhlawumbi usenokuba ebekwazi nje ukudlala isixhobo esinye okanye ezibini kuphela. Ukuba ebethanda ukuthetha nabantu ngolwimi lwabo, isenokuba zimbini okanye zintathu kuphela iilwimi ebekwazi ukuzithetha kakuhle. Ukuba ebenokuphila ubomi obude kunobo—zininzi izinto ebenokukuvuyela ukuzenza—njengokudibana nabanye abantu, ukubona izinto ezintsha nokusondela kuThixo.

Usenokuzibuza, ‘Kwakutheni ukuze uThixo adale abantu ukuba banandiphe izinto ezininzi aze enz’ impazamo yokuba abantu baphile nje ixesha elifutshane?’ Ukuphila kwabantu ubomi obufutshane akuhambisani nendlela abantu abaye badalwa ngayo. Kwakhona usenokuzibuza, ‘Kwakutheni ukuze uThixo adale abantu beneempawu ezikhethekileyo njengokusesikweni nokuba nothando aze kwangaxeshanye abenze batyekele ebubini?’

Ukuba ubona imoto entle enesifotho, ngaba ubunokuthi le moto yenziwe yanesifotho? Akunjalo! Usenokuthi, ‘le moto ayenziwanga yanje. Yayenziwe kakuhle, kodwa ukho umntu oyonakalisileyo emva koko.’ Ngokufanayo, xa sihlolisisa indlela emangalisayo esenziwe ngayo, sinokutsho sithi indlela ubomi obuyiyo ngoku asiyondlela ebebufanele ukuba buyiyo. Ubomi bethu obufutshane nezenzo ezityekele ebubini zifana nesasifotho sikula moto intle. Licacile elokuba ukho umntu owonakalisa ilifa loluntu. Ngubani lowo? Ubungqina obuvela eBhayibhileni balatha kumoni omnye.

Ukuba abantu badalwa ukuba baphile ubomi obungunaphakade, ngubani emva koko owonakalisa elo lifa labantu bonke? Isenokuba ngukhokho wethu sonke. Akukho mntu wumbi onokonakalisa imizila yemfuza yenzala yakhe. ILizwi likaThixo, iBhayibhile lithi: “Njengokuba isono sangena ngamntu mnye [UAdam, umntu wokuqala] ehlabathini nokufa ngaso isono, ngaloo ndlela ukufa kwasasazeka kubo bonke abantu.” (Roma 5:12) Ngoko ke, iZibhalo zibek’ ityala uAdam njengalowo oye wonakalisa ilifa lethu. Abantu babedalwe ukuba baphile ubomi obunjani?

Ukuqonda Indlela Ubomi Bomntu Obabuyiyo Ngaphambili

Xa iBhayibhile isithi ukufa “kwangena ehlabathini,” ibonisa ukuba uluntu kwasekuqaleni lwalungadalelwanga ukuba lufe. Ukwaluphala nokufa kwabantu kwabangelwa kukuvukela uThixo kwabantu bokuqala. Izilwanyana kwelinye icala zazingadalelwanga ukuba ziphile ngonaphakade.—Genesis 3:21; 4:4; 9:3, 4.

Abantu badalwa bahluka kwizilwanyana. Sikwimo ephakamileyo yobomi kunezilwanyana, kanye njengokuba neengelosi zikwimo ephakamileyo yobomi kuneyabantu. (Hebhere 2:7) Ngokungafaniyo nezilwanyana, abantu benziwe “ngokomfanekiso kaThixo.” (Genesis 1:27) Kwakhona ngokwahlukileyo kwizilwanyana, iBhayibhile imbiza uAdam ngokuba ‘ngunyana kaThixo.’ (Luka 3:38) Sinesizathu esivakalayo esibangela sikholelwe ukuba abantu babengadalelwanga ukuba baluphale baze bafe. UThixo akafi yaye noonyana bakhe akazange abadalele ukuba bafe.—Habhakuki 1:12; Roma 8:20, 21.

Ukongezelela, injongo kaThixo yokudala umntu kwasekuqaleni siyibona kwiingxelo zembali yezizukulwana zokuqala zoluntu. Abantu belo xesha babephila kangangeenkulungwane ngaphambi kokuba baluphale. UAdam waphila iminyaka engama-930. Kwizizukulwana ezimbalwa kamva, unyana kaNowa, uShem waphila iminyaka engama-600 yaye umzukulwana kaNowa uArpakhishadi waphila iminyaka engama-438.a (Genesis 5:5; 11:10-13) Kamva, uAbraham waphila iminyaka eli-175. (Genesis 25:7) Imiphumo yesono iyabuchaphazela ubomi bethu, ngokuthe ngcembe ibangela ubomi bube bufutshane. Kodwa ekuqaleni abantu babedalelwe ukuba baphile ubomi obungunaphakade. Kusengqiqweni ukuzibuza ukuba, ‘Ngaba uThixo usafuna ukuba abantu baphile ngonaphakade emhlabeni?’

Ukukhululeka Ekwaluphaleni

Ekubeni uYehova uThixo wathi nabani na ongamthobeliyo uya kukuvuna oko akuhlwayeleyo ngokuthi afe, inzala ka-Adam yabonakala ingenakuzinceda. (Genesis 2:17) Kodwa ke, iZibhalo eziphefumlelweyo zisinika ithemba lokuba umntu othile uza kusihlawulela ukuze sikhululeke ekwaluphaleni. Siyafunda: “Mkhulule angehli aye emhadini! Ndifumene intlawulelo! Inyama yakhe mayihlaziyeke ngakumbi kunasebutsheni; makabuyele emihleni yamandla obutsha bakhe.” (Yobhi 33:24, 25; Isaya 53:4, 12) IBhayibhile inethemba elimangalisayo—lothile oye wahlawula intlawulelo eza kusikhulula ekwaluphaleni!

Ngubani onokukwazi ukuhlawula intlawulelo? Ixabiso layo lalingaphezu kwemali. Ibhekisela kubantu abangafezekanga, iBhayibhile ithi: “Akukho namnye kubo onokumkhulula nangayiphi na indlela umzalwana wakhe, okanye anike uThixo intlawulelo ngaye . . . ukuba ufanele aphile ngonaphakade.” (INdumiso 49:7-9) Noko ke, uYesu Kristu wayenento exabiseke ngakumbi kunemali. Ngoxa wayesemhlabeni, wayengumntu ofezekileyo. Ngenxa yokuba wayenguNyana kaThixo, wakhuselwa ekubeni asizuze njengelifa isono sika-Adam. UYesu wathi weza ukuze “anikele ngomphefumlo wakhe ube yintlawulelo ngenxa yabaninzi.” Ngesinye isihlandlo wathi: “Mna ndizele ukuba zibe nobomi yaye zibe nabo ngokuyintabalala.”—Mateyu 20:28; Yohane 10:10.

Eyona ngongoma iphambili uYesu awayethetha ngayo xa wayeshumayela, lithemba lobomi obungunaphakade. Umlandeli wakhe othembekileyo uPetros wakha wathi: “Nguwe onamazwi obomi obungunaphakade.” (Yohane 6:68) Ithetha ukuthini iBhayibhile xa ithetha ngobomi obungunaphakade?

Ubomi Obungenasiphelo

Abapostile bakaYesu bajonge phambili ekuphileni ubomi obungenasiphelo ezulwini njengenxalenye yoBukumkani bukaYesu. (Luka 22:29; Yohane 14:3) Noko ke, uYesu wathetha nangenjongo kaThixo ngomhlaba. (Mateyu 5:5; 6:10; Luka 23:43) Ngoko ke, imimangaliso uYesu awayenzayo neemfundiso zakhe ngobomi obungunaphakade zaqinisekisa izithembiso uThixo awazenza kwakude kudala ngomprofeti uIsaya, ezazisithi: “Okunene uya kuginya ukufa ngonaphakade, yaye iNkosi enguMongami uYehova ngokuqinisekileyo iya kosula iinyembezi ebusweni bonke.” (Isaya 25:8) Ubomi babantu emhlabeni abuyi kuba nje yiminyaka yobutsha eye ilandelwe kukwaluphala.

Kwihlabathi likaThixo elitsha, xa abantu abathembekileyo befikelela emfezekweni, baya kukhululeka ekwaluphaleni. IBhayibhile ithi: “Indalo ngokwayo iya kukhululwa ekukhotyokisweni kukonakala ize ibe nenkululeko ezukileyo yabantwana bakaThixo.” (Roma 8:21) Khawufan’ ucinge! Abantu baya kuqhubeka bekhula ebulumkweni naselwazini. Kodwa njengokuba iinkulungwane zidlula, amandla abo obutsha akayi kuphela. Ngaba uya kuphila de ulibone elo xesha?

Uya Kuphila Ixesha Elingakanani?

Ngokutsho kukaYesu, kuya kubakho abantu abambalwa emhlabeni ngenxa yemini kaThixo yomgwebo. (Mateyu 24:21, 22) UYesu wathi: “Ngokuba ibanzi kwaye iphangalele indlela esa entshabalalweni, yaye baninzi abangena ngayo; kanti limxinwa isango kwaye imxinwa indlela esa ebomini, yaye bambalwa abayifumanayo.”—Mateyu 7:13, 14.

Ukuze sibe phakathi kwabo baya kuphila ubomi obungunaphakade, kufuneka sifune inkoliseko kaThixo. Ukuze siyifumane, sifanele siqale ngokwazi uThixo. UYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso.” (Yohane 17:3) Kuyavunywa ukuba kufuna umgudu ukwazi uThixo; kodwa oko kuwufanele umgudu. Ngokufanayo, kufuneka sisebenze nzima ukuze sifumane imali yokuthenga ukutya kosuku ngalunye. Efanisa ulwazi ngoThixo nokutya, uYesu wathi: “Sebenzelani, kungekhona ukutya okutshabalalayo, kodwa ukutya okuhlala kuse ebomini obungunaphakade.” (Yohane 6:27) Ngaba kufuneka umgudu ukuze sifumane ubomi obungunaphakade?—Mateyu 16:26.

UYesu wathi: “UThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.” (Yohane 3:16) Ngoko ke, ukuba uya kuphila ixesha elingakanani, oko kuxhomekeke kwindlela osabela ngayo kuthando lukaThixo.

[Umbhalo osemazantsi]

[Amagama acatshulweyo akwiphepha 7]

Emva kokuba umntu ephile iminyaka engama-80 ufumanisa ukuba oko akwenzileyo kuncinane gqitha kunoko ebenokukwenza

[Amagama acatshulweyo akwiphepha 8]

Abantu badalwe bakwimo ephakamileyo kuneyezilwanyana

[Umfanekiso okwiphepha 7]

Ngaba le moto yenziwe yanesifotho?

[Umfanekiso okwiphepha 8, 9]

Ilizwi likaThixo lithi abantu baya kubuyela kumandla obutsha babo