Umabonwakude—“Umfundisi Ofihlakeleyo”

UMABONWAKUDE usisixhobo esinamandla sokufundisa. Sinokufunda ngamanye amazwe nangabantu esingenakuze sibabone. Sityelela amahlathi ashinyeneyo namazwe anomkhenkce, ukuya kwincopho zeentaba neenzulu zolwandle ngenxa kamabonwakude. Sikhangela izinto ezibangel’ umdla zeathom neenkwenkwezi. Sibukela iindaba size sibone izinto ezenzeka mbombo zone zomhlaba. Sifumana ulwazi ngezobupolitika, imbali, nezinto ezidl’ umzi nezithethe zabantu. Umabonwakude ububonisa njengokuba bunjalo ubomi babantu begaxeleka ezingozini okanye bebhiyozela uloyiso. Uyonwabisa, uyafundisa uze uchukumise.

Phofu ke, uninzi lweenkqubo zikamabonwakude azakhi kwaye azinamfundiso ingako. Kusenokwenzeka ukuba eyona nto igxekwa ngokuphandle ngabanye abantu bubundlobongela nokuziphatha kakubi ngokwesini okuxhaphakileyo kumabonwakude. Kolunye uhlolisiso lwaseUnited States kwafunyaniswa ukuba kwiinkqubo ezimbini kwezintathu zikamabonwakude kukho ugonyamelo kwimiboniso emithandathu ngeyure. Ngexesha umntu oselula efikelela kubuntu obudala, uya kuba sele ebukele imiboniso engamawaka yobundlobongela nokubulala. Imiboniso yesini ixhaphakile. Iinkqubo ezimbini kwezintathu kumabonwakude zithetha ngesini, ezingama-35 ekhulwini ziquka ukuba neentlobano zesini okubonakala ngathi akuyongozi kwaye kuyinto esuka nje izenzekele kubantu abangatshatanga.a

Iinkqubo ezinento yokwenza nesini nobundlobongela zifunwa ngamehl’ abomvu ehlabathini lonke. Iifilimu zaseMerika ezinobundlobongela, neziboniswa kumabonwakude kamva, zithengwa lula ngamazwe angaphandle kweMerika. Akukho mfuneko yokuba zibe nabadlali abaphambili okanye ibe libali elivus’ umdla kodwa ziqondakala lula. Ukuze zithimbe ingqalelo yomntu obukeleyo kufuneka zibe nemiboniso yokulwa, ukubulala neentlobano zesini. Ukuze oku zikwenze ixesha elide kufuneka kubekho utshintsho oluthile. Abantu ababukeleyo bayadinwa kukubona into enye; uvuthondaba lwefilimu lusuka lube yinto nje eqhelekileyo. Ukuze kuvuselelwe umdla wabantu ababukeleyo, abavelisi bezi filimu benza konke abanako ukuze bothuse okanye bavuselele abantu ababukeleyo, ngokongeza ubundlobongela, ukuba neentlobano zesini nenkohlakalo engakumbi.

Impikiswano Ngempembelelo Kamabonwakude

Abantu basuleleka ukusa kuwuphi umkhamo lugonyamelo nesini esiboniswa kumabonwakude? Abahlalutyi bagxeka ubundlobongela obuboniswa kumabonwakude ngokuphembelela abantu ukuba babe ndlongondlongo okanye bangabacingeli abanye abangamaxhoba obundlobongela bokoqobo. Bakwathi ukuveliswa kweenkqubo ezingamanyala kuqhwabel’ izandla ukuziphatha kakubi yaye kudodobalisa imilinganiselo yokuziphatha.

Ngaba ngumabonwakude lo kuthethwa ngawo ngolu hlobo? Lo mbuzo uye wadala impikiswano kangangamashumi eminyaka; kuye kwenziwa uhlolisiso kwabhalwa neencwadi namanqaku amaninzi agwadla le nyewe. Int’ efik’ ixak’ abantu kukuvelisa ubungqina bokuba unozala wazo zonke ezi zinto ngumabonwakude, ngokomzekelo, ukuqhelana nobundlobongela kwasebuntwaneni kunokwenza lowo ubukeleyo abe ndlongondlongo akuba mdala. Ukuvelisa ubungqina obubek’ ityala umabonwakude kuseyinkohla. Ngokomzekelo: Masithi usela iyeza elithile okwesihlandlo sokuqala uze kwisithuba nje seeyure ezingephi umzimba wakho urhawuzele wonke. Kwimeko enjalo kusengqiqweni ukucinga ukuba umzimba wakho uyaphikisana neli yeza. Ngamanye amaxesha umzimba ubonakalisa iimpawu zokungalifuni elo yeza emva kwexesha. Xa oko kusenzeka, ukuqiniseka ukuba ukurhawuzela kwenziwa lelo yeza kuba nzima kakhulu, kaloku zininzi izinto ezenza umzimba urhawuzele.

Ngokufanayo, kusenzima ukugqiba ngelithi umabonwakude usisizekabani sogonyamelo nezimilo ezigqwethekileyo. Abanye abahlalutyi bathi oko kusenokwenzeka. Ukwalek’ umsundulu, ezinye izikrelemnqa zithi izimo zazo zengqondo zalolwa koko zakubukela kumabonwakude. Kwelinye icala, zininzi izinto ezixonxa izimilo zabantu ebomini babo. Imidlalo yevidiyo yobundlobongela, imilinganiselo yokuphila yabahlobo nezalamane, iimeko esiphila phakathi kwazo—zonke ezi zinto zinegalelo kwisimo sengqondo esindlongondlongo.

Asingomnqa into yokuba kukho ukubethabethana kwezimvo ngalo mba. Ugqirha wengqondo waseKhanada uthi: “Akukho bungqina bezamayeza obubonisa ngokuphandle ukuba ukubukela imiboniso yobundlobongela kwenza ubani abe yindlobongela okanye bumnyanzele ekubeni yindlobongela.” Noko ke, iAmerican Psychological Association Committee on Media and Society ithi: “Ayinakuphikiswa into yokuba abantu ababukela kakhulu imiboniso yogonyamelo kumabonwakude basulelwa lula sisimo sengqondo sogonyamelo nokungabi nasimilo.”

Impembelelo Kamabonwakude

Into omele uyikhumbule kukuba, abahlalutyi abaninzi baphikisana ngobungqina—ubungqina bokuba ukubukela ubundlobongela benza ubani abe ndlongondlongo. Bambalwa phofu abantu abanokuma ngelithi umabonwakude akanampembelelo kwindlela esicinga ngayo. Ukuba uyicinga kakuhle le nto, ifoto nje enye inokusenza sibe nomsindo, silile okanye sonwabe. Umculo uchukumisa indlela esivakalelwa ngayo ngendlela engenakuthelekiswa nanto. Amazwi okanye oko kubhaliweyo, kusenza sicinge, sivakalelwe size senze izinto ngendlela ethile. Khawucinge ke ngomfanekiso oshukumayo, umculo namazwi athethwayo alungelelaniswe kakuhle. Naso ke isizathu esenza umabonwakude ube nomtsalane! Kwaye ufumaneka lula. Omnye umbhali uthi xa ethetha ngomabonwakude: “Ukususela ngexesha umntu wathi wakwazi ukubhala iimbono zakhe ephepheni . . . ayikho enye into eye yachaphazela impucuko yabantu njengaye.”

Amashishini achitha amawaka ezigidi zeerandi nyaka ngamnye kuba esazi ukuba abantu baphenjelelwa lula koko bakuvayo nabakubonayo. Akachithi le mali kuba ecinga ukuba iintengiso ziyasebenza; akwenza oku kuba esazi ukuba ziyasebenza. Iintengiso zenza abantu bathenge. Ngowama-2004, inkampani yakwaCoca-Cola yachitha malunga namawaka ezigidi zeerandi ezili-13,4 kwiintengiso ehlabathini lonke, iintengiso ezibhaliweyo, koonomathotholo nakumabonwakude. Ngaba yazisola? Le nkampani yenza ingeniso yamawaka ezigidi zeerandi ezili-134 ngaloo nyaka. Abathengisi bayazi ukuba intengiso enye ayinalo ulwamvila lokuguqula iingqondo zabantu. Kunoko, bayazi ukuba loo ntengiso yakhela phezu kweentengiso zeminyaka edluleyo.

Ukuba imizuzwana engama-30 yentengiso ichaphazela isimo sengqondo somntu nesimilo sakhe, sinokuqiniseka ukuba iiyure sibukele umabonwakude zinokusichaphazela. Umbhali wencwadi ethi Television—An International History, uthi: “Kwezo nkqubo zingumsina-ndozele, umabonwakude ngumfundisi ofihlakeleyo.” Enye incwadi ethi A Pictorial History of Television ithi: “Umabonwakude uguqula indlela esicinga ngayo.” Umbuzo esifanele sizibuze wona ngothi, ‘Ngaba oko ndikubukelayo kuchaphazela indlela endicinga ngayo?’

Kwabo bakhonza uThixo, loo mbuzo uphathelele enye into ekhethekileyo. Oko sikubona kumabonwakude kungqubana nemigaqo ephakamileyo yokuziphatha efundiswa yiBhayibhile. Imilinganiselo yokuphila nezinto eziboniswa kumabonwakude njengezamkelekileyo, eziqhelekileyo nezisefashonini, ziyagatywa yiBhayibhile. Kwangaxeshanye, imilinganiselo yamaKristu isingelwa phantsi yaye abo babonakala bephila ngayo babethwa ngoyaba, bayagculelwa baze benziwe intlekisa kumabonwakude. Omnye umbhali wakhalaza esithi: “Akwanelanga nje ukwenza izinto eziziintloni zibe nesidima. Zizinto ezinesidima ezigqalwa njengezenz’ iintloni.” Ngokuphindaphindiweyo “umfundisi ofihlakeleyo” uyasebeza esithi: “Okulungileyo kubi nokubi kulungile.”—Isaya 5:20.

Simele sikulumkele oko sikubukelayo kuba kuyayichaphazela indlela esicinga ngayo. IBhayibhile ithi: “Ohamba nezilumko uya kuba sisilumko naye, kodwa osebenzisana neziyatha uya kuhlelwa bububi.” (IMizekeliso 13:20) Umphengululi weBhayibhile uAdam Clarke, ubhala athi: “Ukuhamba nothile kudiza uthando nolwalamano olusondeleyo naye, kulula ukuxelisa abantu esibathandayo. Ngaloo ndlela sithi, ‘Ndibonise abahlobo bakhe, ndiza kukuxelela umntu anguye.’ Ndibonise abantu abasenyongweni kuye, ndiza kuqashela isimilo sakhe.” Njengokuba sele sifundile, abantu abaninzi bachitha ixesha elininzi nabantu abakumabonwakude abangazi nowathwethwa ngobulumko, abantu umKristu okhulileyo ngokomoya angenakuze abamemele ekhayeni lakhe.

Ukuba ugqirha ukunika iipilisi ezinamandla kakhulu ubuya kucinga ngenzuzo yokuzisebenzisa nangemiphumo emibi enokwenzeka ngenxa yokuzisebenzisa. Ukusebenzisa iyeza elingelilo—okanye ukusebenzisa iyeza ngokugqith’ emgceni—kunokwenzakalisa impilo yakho. Kunjalo ke nangokubukela kakhulu umabonwakude. Kububulumko ukucinga nzulu ngoko sikubukelayo.

Umpostile uPawulos wakhuthaza amaKristu ukuba acinge ngezinto eziyinyaniso, nezizezenkxalabo enzulu, nezibubulungisa, nezinyulu, nezithandekayo, nekuthethwa kakuhle ngazo, nezinesidima nezincomekayo. (Filipi 4:6-8) Ngaba uza kuliphulaphula elo cebiso? Ukuba kunjalo, uya konwaba kakhulu.

[Umbhalo osemazantsi]

[Amagama acatshulweyo akwiphepha 5]

“Umabonwakude yinto eyilelwe ukonwabisa wena ekhayeni lakho, usonwatyiswa ngabantu obungenakuze ubamemele kulo.”—David Frost, umsasazi waseBritani

[Ibhokisi ekwiphepha 5]

KUTHEKANI NGEENTLOBANO ZESINI NOGONYAMELO OLUSEBHAYIBHILENI?

Uyintoni umahluko phakathi kweentlobano zesini nogonyamelo ekuthethwa ngalo eBhayibhileni noko kuboniswa kumabonwakude? Iindawo ekuthethwa ngazo ngesini nogonyamelo eBhayibhileni zenzelwe ukufundisa kungekhona ukonwabisa abantu. (Roma 15:4) ILizwi likaThixo linengxelo yembali yezinto ezenzeka ngokwenene. Oko, kusinceda siqonde imbono kaThixo ngezinto size sifunde kwiimpazamo zabanye.

Kumazwe amaninzi xa kuboniswa iintlobano zesini nogonyamelo kumabonwakude, oku akwenzelwa ukufundisa—kwenzelwe ukungenisa imali. Abathengisi bafuna ukutsala abantu kangangoko kunokwenzeka, yaye isini nogonyamelo zenza ababukeli bathi nta amehlo koomabonwakude babo. Umphumo: Baza kubukela intengiso baze bathenge oko kubhengezwayo. Abahleli beendaba bacikoza besithi: “Ukuba zinegazi, ziphambili.” Ngeliphandle, ukuba iindaba zimanyumnyezi—zingolwaphulo-mthetho, iintlekele zemvelo neemfazwe—zithathelwa phezulu kuneendaba ezipholileyo.

Nakuba iBhayibhile ithetha ngezenzo zogonyamelo, ikhuthaza abantu ukuba baphile ngoxolo—bangabi nanzondo kodwa bacombulule iingxaki ngoxolo. Ikhuthaza ukuziphatha kakuhle ngokwesini ngalo lonke ixesha. Nto leyo ekungafane kuthethwe ngayo kumabonwakude.—Isaya 2:2-4; 1 Korinte 13:4-8; Efese 4:32.

[Ibhokisi/Umfanekiso okwiphepha 7]

UMABONWAKUDE NABANTWANA

“Ngokusekelwe kubungqina obuvela kuhlolisiso olwahlukeneyo olwenziwe kumashumi eminyaka edluleyo, izazinzulu nabantu ngokubanzi bavumelana ngelokuba ukubukela ugonyamelo kuyingozi ebantwaneni.”—The Henry J. Kaiser Family Foundation.

“[Sivumelana ngokuphandle] neAmerican Academy of Pediatrics ukuba abantwana abaneminyaka emibini nangaphantsi ‘abafanele [babukele umabonwakude].’ Aba bantwana basakhulayo ngokwasengqondweni kufuneka badlale kwaye abantu ngokuqhelekileyo kufuneka babe nolwalamano nabanye ukuze bakhule engqondweni, emzimbeni baze bakwazi ukujamelana nobomi.”—The National Institute on Media and the Family.

[Umfanekiso okwiphepha 6, 7]

Ngaba oko ndikubukelayo kuyichaphazela indlela endicinga ngayo ngendlela endifuna ngayo?