Wakuthanda Oko Wakufundayo

BEKUSANDUL’ UKUFUNYANWA ileta evela kwibhinqa elithile. Layibhala le leta ngaphambi kokuba libulawe ngumhlaza ngoMeyi 2004. Alizange ligqibe ukuyibhala loo leta, ngesiquphe lagula kakhulu. Kodwa ke, abo bafunda le leta ingekathunyelwa bachukumiseka yaye ukholo lwabo kuThixo lomelezwa.

Kule leta ayibhalileyo, uSusan uthi wayeneminyaka eli-14 ubudala xa watsalel’ umnxeba umdala ongumKristu oliNgqina likaYehova eConnecticut, eUnited States. Uchaza iimeko awayejamelene nazo ngoxa wayekwishumi elivisayo. NgoNovemba 2005 umama kaSusan wayifumana loo leta ichukumisayo waza wathumela ikopi yayo kwikomkhulu lamaNgqina kaYehova eNew York.

USusan wathi wayifumana inombolo yefowuni yalo mdala waseConnecticut kwincwadi yefowuni ngowe-1973. Uthi: “Ndineminyaka eli-14 ubudala, ngalo nyaka ndaqalisa ukufunda IMboniselo noVukani! Ndathi, le ifanele ukuba yinyaniso. Ngenxa yokuba ndandingazange ndidibane namaNgqina kaYehova, ndawakhangela kwincwadi yefowuni ndaza ndakhetha inombolo yefowuni enamanani amathathu okuqala afana nawasekhaya. Xa uMzalwana uGenrich waphendulayo, wothuka akufumanisa ukuba andizange ndidibane namaNgqina.”a

Ingxaki Enkulu

USusan uyachaza kwileta yakhe ukuba xa wayeneminyaka elishumi ubudala wasiwa kumakazi wakhe ukuba aye kuhlala naye, eConnecticut. Wayefanele ahlale nje ixeshana, kodwa emva kwexesha elithile uSusan waxelela unina owayehlala yedwa eFlorida ukuba ufuna ukuhlala nomakazi. Kwileta yakhe uSusan wathi imeko yakhe ifana “neStockholm syndrome, apho abathinjwa bakha ubuhlobo nabaqweqwedisi babo.”b Wayephethwe kakubi gqitha.

USusan wabhala wathi: “Umakazi neqabane lakhe babendixhaphaza ngokugqithiseleyo. Ukongezelela, babembalwa abantu ababekhe beze endlwini. Xa ndavunyelwa ukuba ndiye esikolweni, ndandinganikwa nto endiza kuyitya esikolweni yaye ndandingenayo neempahla ezifanelekileyo nangona uMama wayethumela imali. Ndandinepenti enye, nangona iintombi ezimbini zikamakazi ezincinane apha kum zazinayo yonk’ into.” Wakubalisa oku ukuze siqonde isizathu sokuba azi ukuba wayeza kuba sengxakini enkulu ukuba umakazi wakhe wayenokufumanisa ukuba wayenomdla wokwazi okungakumbi ngeBhayibhile.

Indlela USusan Awakhula Ngayo Elwazini LweBhayibhile

USusan wabhala wathi: “UMzalwana uGenrich wandazisa kuLaura, udade onguKristu oqolileyo yaye sachitha ixesha elininzi ephendula imibuzo yam emininzi yeBhayibhile. Sasidla ngokudibana rhoqo kwindawo yokuhlamba iimpahla.” USusan uthi akazange akhe azenzele isigqibo ngayo nantoni na kodwa emva kokuba ndincokole namaNgqina ndaza ndafunda incwadi esekelwe eBhayibhileni njengethi Inyaniso Ekhokelela Kubomi Obungunaphakade ndenza isigqibo.

USusan uqhubeka esithi: “Kwakusebusuku ngoLwesihlanu xa ndaxelela umakazi ukuba ndidla ngokuncokola namaNgqina. Wandinyanzela ukuba ndingalali ngobo busuku bonke ndime ekhitshini. Emva koko ndazimisela ngakumbi ukuba ndibe liNgqina.”

Ukususela ngoko, uMzalwana uGenrich wayesoloko ephathela uSusan iincwadi ezazimnceda ukuba aqonde iBhayibhile. USusan wabhala wathi: “Incwadi Yonyaka YamaNgqina kaYehova yowe-1974 (yesiNgesi) iyankentenza engqondweni yam, ngenxa yokuba ibalisa ngendlela amaNgqina kwiJamani yamaNazi aye anyamezela ngayo intshutshiso ngaphambi nasebudeni beMfazwe Yehlabathi II. . . . Ngelo xesha kanye ndacela lo mdala ukuba andirekhodele iingoma zoBukumkani ukuze ndizifunde. Kwisithuba esingangonyaka ndandikwazi ukucula kakuhle iingoma ezili-119 kwiculo lowe-1966 elithi, “‘Nivuma Nibetha Uhadi Entliziyweni Yenu.’”

“UMzalwana uGenrich wayedla ngokundishiyela iikhasethi ezineentetho, imidlalo yeBhayibhile nezinocwangciso lwendibano. Wayedla ngokuzishiya kwiRoute 10 kufuphi nepali yefowuni yaye mna ndandidla ngokuzilanda apho. . . . Imeko endandikuyo yaqalisa ukundikhathaza ngenxa yokuba ndandingayi esifundweni. Ngoko ke, ndandicinga ukuba ndandingasenawo amandla okumelana nale meko.”

USusan wathi, iminyaka embalwa eyalandelayo yaba nzima kakhulu. Wayengasadibani namaNgqina amabini awayewazi. Kodwa uthi, “ukwazi zonke iingoma ‘kwandithuthuzela.’” Njani? “Ngenxa yokuba ndandiwakhumbula amazwi engoma, njengala athi ‘Njengemikhos’ engafun’ ubumnandi.’ Ndandiwazi ukuba loo mazwi abhalwa liNgqina ngoxa lalikwinkampu zoxinaniso eJamani ebudeni beMfazwe Yehlabathi II yaye oku kuye kongezelela iintlungu kobu bugxwayiba ndikubo. Ndandivakalelwa kukuba ndiligwala yaye ndandicinga ukuba uYehova undishiyile.”c

Ukukhululeka Ekugqibeleni

“Izinto zatshintsha xa ndandineminyaka eli-18 ubudala. AmaNgqina ayengasityeleli kangangeminyaka ngenxa yokuba apho ndandihlala khona yayiyenye yezindlu ezikuluhlu lwamakhaya athi amaNgqina ‘angaphindi abuye.’ Kodwa ngalo mini elinye iNgqina elalisuka kwelinye ibandla latyelela yaye ndancokola nalo kuba ndandisele ndedwa endlwini. Ndandiqala ukusala ndedwa endlwini ngoMgqibelo. Obo yaba bubungqina bokuba uYehova akandilahlanga. Ngoko ke, ndatsal’ elumnxeba uMzalwan’ uGenrich, ndamxelela ukuba ndikulungele ukushiya ikhaya yaye ndacela ukuba andicebise ukuba ndenze ntoni. Ekugqibeleni, ndancedwa ukuze ndiphume kobo bugxwayiba.”

NgoAprili 1977, uSusan wafudukela kwenye indawo. Ileta yakhe yongezelela isithi: “Ebudeni bonyaka owalandelayo, ndandikwazi ukuya kwiintlanganiso nakwiindibano yaye ndaqalisa ukuya entsimini. Ndakwazi nokunxibelelana nomama kwakhona. Wayengayazi indlela endandiphethwe ngayo kakubi kuyo yonke loo minyaka, wothuka xa ndandimchazela. Wafuna ukwenz’ okuthile yaye waqiniseka ukuba ndandinayo yonk’ into endandiyifuna. Kwiminyaka embalwa ngaphambilana uMama wayefudukele eAlaska. Kuba wayenomdla eBhayibhileni, ndafudukela eAlaska ngowe-1978 ndisiya kuhlala naye. Ekugqibeleni waba liNgqina yaye uye wahlala ethembekile de kwanamhlanje.

“Emva kokuba sele ndiqalisile ukuya kwiintlanganiso, uMzalwana uGenrich walungiselela uhambo neqela elithile oluya kwikomkhulu lehlabathi lamaNgqina kaYehova eBrooklyn, eNew York yaye wandimema ukuba nam ndihambe. Esi yayisesona sipho sihlala sihleli umntu ebenokundipha sona, kuba olo tyelelo lwandenza ndanoxabiso olunzulu yaye lwandenza ndambulela uYehova ngentlangano yakhe. Ngalo mazwi ndiyaphelela apho. Ndayishwankathela ngenxa yokuba ndandifuna ukuyigqiba ukuyibhala ngexesha.”

Le nkcazelo ingasentla yileta enamaphepha amathandathu anesiqingatha yaye akukho mgca uqakathiweyo. Ngasekugqibeleni koko kubhalwe nguSusan wathi: “Ndisesibhedlele, ndiye ndagula kakhulu kule nyanga idluleyo yaye bendicinga ukuba ngokuqinisekileyo ndiza kufa . . . Ndathandaza kuYehova ndisithi ukuba nje ndinokuphila iiveki ezimbini ndingakwazi ukulungelelanisa izinto ezithile. . . . Andilindelanga ukuba ndiphile ixesha elide, kodwa ndimele nditsho ukuba ndiyivuyele le minyaka bendisenyanisweni, ibubomi obubhetele kakhulu kunokuba ubani ebecinga.”

Le leta ibingenamqukumbelo okanye ichaze ukuba ivela kubani na yaye khange ithunyelwe nokuthunyelwa. Abo bayifumanayo abazange bayazi ukuba yekabani. Kodwa, njengokuba bekukhankanyiwe ngaphambili, ekugqibeleni le leta yathunyelwa kunina kaSusan.

Ukufunda Okungakumbi NgoSusan

Emva kokuba uSusan ebhaptiziwe ngoAprili 14, 1979, unina wabuyela eFlorida. USusan wahlala eAlaska kuba wayesele ebaqhelile abazalwana abakwibandla eliseNorth Pole. Kungekudala emva koko waba kwinkonzo yexesha elizeleyo. Ekugqibeleni wafudukela eFlorida yaye ngowe-1991 watshata nomzalwana ongumdala nokwanguvulindlela othe ngxi yaye wafa emva nje kokuba uSusan wafayo.

USusan nomyeni wakhe bebethandwa gqitha, bebesebenza kunye njengokuba bebekwinkonzo yexesha elizeleyo de ukugula kukaSusan kwababangela abakwazi ukuhlala bengoovulindlela. Uchithe iminyaka engaphezu kwama-20 ekwinkonzo yexesha elizeleyo. Umngcwabo wakhe owawuseFlorida wanxityelelaniswa ngefowuni neBandla laseNorth Pole.

Ileta kaSusan isinceda sibone iintsikelelo ezifunyanwa ngabantu abaye bakhonza uYehova nabanethemba elimangalisayo lovuko. (IZenzo 24:15) Ibali lobomi bukaSusan kwakhona lenza sibone ngokucacileyo ukuba uThixo ukufutshane kubo bonke abo basondela kuye!—Yakobi 4:7, 8.

[Imibhalo esemazantsi]

[Amagama acatshulweyo akwiphepha 23]

“Ndiyivuyele le minyaka bendisenyanisweni, ibubomi obubhetele kakhulu kunokuba ubani ebecinga”

[Umfanekiso okwiphepha 21]

Xa uSusan wayeneminyaka elishumi ubudala

[Umfanekiso okwiphepha 23]

USusan kunye nomyeni wakhe uJames Seymour