Xa Ukugula Kungasekho!
ABANTU abaninzi bacinga ukuba baya kufumana umnyinyiva kwiintlungu nokugula ezulwini emva kokuba befile. Noko ke, ngokuchasene nenkolelo egqugqisileyo, iBhayibhile ithembisa uluntu ngokubanzi ngobomi kwiparadesi esemhlabeni. (INdumiso 37:11; 115:16) Eli themba liqaqambileyo liquka impilo efezekileyo, ulonwabo nobomi obungunaphakade.
Kutheni sisaluphala size sife? Liya kubakho njani ihlabathi apho kungekho kugula? IBhayibhile iyayiphendula loo mibuzo.
◼ Oyena nobangela wokugula Abazali bethu bokuqala uAdam noEva, badalwa benemizimba enempilo efezekileyo. (Genesis 1:31; Duteronomi 32:4) Babedalelwe ukuba baphile emhlabeni ngonaphakade. Lanqum’ inqatha xa bathi ngabom bona uThixo kwaza emva koko kwayint’ elula ngabo ukufumana izifo. (Genesis 3:17-19) Ngokutyeshela igunya likaThixo, baqhawula onke amakhonkco ababenawo noMdali, uMthombo wobomi obufezekileyo. Imizimba yaba nesiphako. Emva koko bagula baza bafa, kanye njengokuba uThixo wabalumkisayo.—Genesis 2:16, 17; 5:5.
Emva kwemvukelo uAdam noEva badlulisela ukungafezeki ebantwaneni babo. (Roma 5:12) Njengokuba inqaku elidluleyo libonisile, izazinzulu namhlanje ziyazi ukuba ukugula nokufa kunokudluliselwa ngemfuza. Iqela lezazinzulu, kutshanje liye lagqiba ngelithi: “Kungokwemvelo yaye kucace ngca ukuba xa umntu eqalisa ukuphila, umzimba uzihlahlela indlela yokuzitshabalalisa.”
◼ Kungengamntu Inzululwazi iye yafikelela emanqwanqweni ekulweni nokugula. Kodwa unobangela wokugula useyinkohla kwinzululwazi. Asingomnqa ke lo kubantu abaqhelene neLizwi likaThixo, kaloku lithi: “Musani ukukholosa ngezidwangube, nangonyana womntu wasemhlabeni, lowo ungenalo usindiso.”—INdumiso 146:3.
Noko ke, njengokuba iBhayibhile isitsho, “izinto ezingenakwenzeka kubantu zinokwenzeka kuThixo.” (Luka 18:27) UYehova uThixo unokuwuphelisa unobangela wokugula. Uza kuziphelisa zonke izifo. (INdumiso 103:3) ILizwi lakhe lisithembisa oku: “Khangela! Intente kaThixo iphakathi koluntu, yaye uya kuhlala nalo, lube ngabantu bakhe. Naye abe nguThixo walo. Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.”—ISityhilelo 21:3, 4.
◼ Oko umele ukwenze UYesu Kristu wayichaza yacaca into esimele siyenze ukuze silifumane ihlabathi apho ukugula kuza kube kungekho. Wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.”—Yohane 17:3.
Ulwazi ngoThixo neemfundiso ezingoNyana wakhe, uYesu, zifumaneka eBhayibhileni. Olu lwazi luquka amacebiso aluncedo nasekuphucula ubomi bakho ngoku. Ngaphezu koko, uThixo uthembisa abanquli bakhe abathobelayo ngehlabathi elingenazo iintlungu. Ewe, uThixo uthembisa ihlabathi apho kungasayi kubakho “ummi wakhona oya kuthi: ‘Ndiyagula.’”!—Isaya 33:24.
[Ibhokisi/Imifanekiso ekwiphepha 11]
Imbono Elungeleleneyo Ngempilo
IBhayibhile isikhuthaza ukuba sibuhlonele ubomi. AmaNgqina kaYehova enza konke okusemandleni awo ukuze anyamekele impilo yawo. Ayaziphepha izinto ezenzakalisa impilo yawo, ezifana nokusebenzisa kakubi iziyobisi nokutshaya icuba. UThixo ulindele ukuba abanquli bakhe babe ngcathu kwiziselo nasekutyeni. (IMizekeliso 23:20; Tito 2:2, 3) Ukuphila ubomi obunjalo kunye nokuphumla ngokwaneleyo nokwenza umthambo kunokukukhusela kwizifo. Abantu abagulayo kusenokufuneka badibane neengcali zempilo ezinokuthenjwa.
IBhayibhile isikhuthaza ukuba sibe nengqiqo “nengqondo ephilileyo.” (Tito 2:12; Filipi 4:5) Abantu abaninzi namhlanje abalungelelananga, baba ngathi babotshw’ emnweni xa befuna unyango, baxolele nangokunanisa ngolwalamano lwabo noThixo. Abanye babhenela kunyango oluthandabuzekayo nolunokubenzakalisa. Kanti abanye bachitha imali nexesha elininzi kunyango olungasebenziyo nolusenokuba yingozi.
Inyaniso yile, impilo efezekileyo ayikabikho. Njengokuba usalinde de kuphele ukugula, ubulumko nokuqonda okufumaneka eBhayibhileni kunokukunceda ulungelelane ekufuneni kwakho impilo ebhetele.