Impilo Esemgangathweni Kubantu Bonke—Iza Kubakho Kungekudala!
IFOCUS eliphephancwadi leendaba laseJamani inikela le ngxelo: “Ingcamango yokungaphindi ugule . . . ixhaphakile kungokunje.” Kanti le ngcamango ayikho ntsha. Ukuqala kobomi babantu, uMdali wayengenazo kwaphela iinjongo zokuba uluntu lugule. Injongo yakhe yayingaphelelanga nje ekubeni “bonke abantu abasemhlabeni bafumane mpilo encumisayo.” (Akekeliswe sithi.) UMdali wethu wayefuna ukuba wonke umntu abe nempilo egqibeleleyo!
Ngoko kutheni sonke sithwaxwa kukugula nezifo? IBhayibhile isixelela ukuba uYehova uThixo wabadala begqibelele abazali balo lonke uluntu, uAdam noEva. Emva kokugqiba kwakhe ukudala, “uThixo wazibona zonke izinto awayezenzile, khangela! zilunge gqitha.” UMdali wethu onothando akazange abe neenjongo zokuba ubomi boluntu buthwaxwe kukugula nokufa. Kodwa xa uAdam noEva bakhetha ukushiya indlela yobomi eyayiphambi kwabo, bawela esonweni. Umphumo wesono sika-Adam yaba kukufa, okwathi kwadluliselwa kulo lonke uluntu.—Genesis 1:31; Roma 5:12.
UYehova akazange alushiye nje enyanyeni uluntu. Kanti akazange ayilahle nenjongo yalo yantlandlolo ngalo nangomhlaba. Kuyo yonke iBhayibhile, uyachaza ukuba injongo yakhe kukubuyisela impilo esemgangathweni yantlandlolo kwabo bantu bathobelayo. Ngoxa uYesu Kristu, uNyana kaThixo, wayesemhlabeni, wabonisa amandla kaThixo okunyanga izigulo. Ngokomzekelo, uYesu wanyanga ubumfama, iqhenqa, ukungeva, umlambo, isathuthwane, nabo babengakwazi kuzenzela nto.—Mateyu 4:23, 24; Luka 5:12, 13; 7:22; 14:1-4; Yohane 9:1-7.
Kungekudala uThixo uya kuyalela uKumkani wakhe onguMesiya, uYesu Kristu, ukuba atsal’ iintambo kwimicimbi yabantu yehlabathi. Xa sele kulawula yena, isiprofeto sikaIsaya siya kuzaliseka: “Akakho ummi wakhona oya kuthi: ‘Ndiyagula.’ Abemi belo lizwe baya kuzixolelwa iziphoso zabo.” (Isaya 33:24) Iza kwenzeka njani loo nto?
Siphawula ukuba lo mprofeti ubhala ‘ngokuxolelwa kweziphoso zabantu.’ Lilonke, unobangela oyintloko wokugula—isono esazuzwa ilifa luluntu—siya kushenxiswa. Njani? Ixabiso ledini lentlawulelo likaYesu liya kusetyenziswa kuluntu oluthobelayo, ngaloo ndlela lisusa unobangela wokugula nokufa. Wonke umhlaba uza kuba yiparadesi. Umpostile ongumKristu uYohane wabhala wathi: “[UThixo] uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.” Loo nto iza kwenzeka kungekudala!—ISityhilelo 21:3, 4; Mateyu, isahluko 24; 2 Timoti 3:1-5.
Ukulungelelana
Okwangoku, izigidi zabantu zithwaxwa kukugula nezifo. Ngoko, kuyimveli ukuba abantu bazikhathaze ngempilo yabo neyabo babathandayo.
Namhlanje amaKristu awuxabisa ngokwenene umgudu owenziwa zezamayeza. Athabatha amanyathelo asengqiqweni ukuze ahlale esempilweni. Noko ke, isithembiso seBhayibhile sekamva elingenazigulo sisinceda ukuba silungelelane kule nkalo. De uKumkani onguMesiya azithabathele kuye iintambo zokulawula imicimbi yabantu, impilo ayikabi yegqibeleleyo. Njengoko sele sibonile, kwanezona zinto zibangel’ umdla ziye zafunyaniswa azikakwazi ukufumana eyona pesika imuncis’ iintupha esenkcochoyini yomthi—impilo esemgangathweni yabantu bonke.
Usukelo “lwempilo encumisayo yomntu wonke ehlabathini” luya kufikelelwa kungekudala. Kodwa alusayi kufikelelwa ziZizwe Ezimanyeneyo okanye iWorld Health Organization okanye ngabo baxhalabele imeko-bume okanye abacebisi bezentlalo okanye oogqirha. Loo nto iya kwenziwa nguYesu Kristu. Hayi indlela ekuya kuchwayitisa ngayo ukubona uluntu ekugqibeleni ‘lukhululwe ekukhotyokisweni kukonakala luze lube nenkululeko ezukileyo yabantwana bakaThixo’!—Roma 8:21.
[Imifanekiso ekwiphepha 10]
Wonke umntu uya kuba nempilo esemgangathweni kwihlabathi elitsha likaThixo