Impilo Efezekileyo Kubo Bonke

NJENGEHAMBO, imekobume, nokunyamekela impilo, indlela esidalwe ngayo nayo iyayichaphazela impilo yethu. Loo ndlela sidalwe ngayo iphenjelelwa yimfuza nazizigulo esiye sanazo kamva ngenxa yokuba imizila yemfuza isenokukhokelela kuzo.

Enye ingcali yezempilo ithi: “Indlela esidalwe ngayo ekuzalweni kwethu ubukhulu becala yiyo ebonisa enoba uphile qethe, uza kuphila ixesha elide okanye uza kuphila kwaukuphila kusini na.”

Nokuba yiyiphi na indlela esizifumana ngayo ezi zifo, ukuqaqanjelwa yintloko, izihlunu ezibuhlungu, ukudinwa kwemithambo-luvo, amathambo angomelelanga, iintliziyo ezingasebenzi kakuhle nezinye izifo zisikhumbuza umhla nezolo ukuba impilo yethu ichatshazelwe kakhulu ngumzimba nayingqondo engafezekanga. Yintoni unobangela oyintloko wezi ngxaki zempilo zigqugqisileyo?

Unobangela Oyintloko

Ugqirha wezonyango ogama linguLuka owayephila ngenkulungwane yokuqala yeXesha Eliqhelekileyo uphendula lo mbuzo kwibali eliphefumlelweyo awalibhalayo ngoYesu Kristu. ULuka ubhala achaze ukuba ngenye imini, indoda eyayinedumbe yaya kuYesu ifuna ukunyangwa. UYesu waxelela lo mntu unedumbe oku: “Uzixolelwe izono zakho.” Ngoko, ukuze abonise ukuba ngenene wayenamandla okuxolela izono, uYesu wayalela le ndoda wathi: “Vuka, uthabathe ukhuko lwakho, uye endlwini yakho.” Loo ndoda yenjenjalo! Ngenxa yoko, “besuka bathi nqa bonke” ababezibonele oko kuphiliswa, baza “bamzukisa uThixo.”—Luka 5:17-26.

Sisiphi esi sono uYesu wayebhekisela kuso? Impendulo isinceda siqonde isizathu sokuba sigula, sisaluphala size sife. Ekubeni siqinisekisiwe ukuba “sonke isibhalo, siphefumlelwe nguThixo,” sinokuyikhangela eBhayibhileni loo mpendulo. (2 Timoti 3:16; 2 Petros 1:21) Isixelela ukuba umntu wokuqala, uAdam, wadalwa esempilweni egqibeleleyo. Wayenempilo entle logama wayesathobele uMdali wakhe.

Noko ke, uAdam wakhetha ukwaphula umthetho kaThixo. Ngokungathobeli nangokuvukela ngabom uMdali wakhe, wayesona. Ngenxa yoko, waba ngumntu ongafezekanga, wagula, yaye ekuhambeni kwexesha wafa. Ngoko ke, isono saba ngunobangela wokugula nokufa kuka-Adam.

Kanye njengokuba abazali bedlulisela izifo kubantwana ngenxa yemithetho yemizila yemfuza, ngoko ukungafezeki nokugula okubangelwa kuko kwadluliselwa nguAdam kwinzala yakhe, uhlanga lwabantu. Ngaloo ndlela, zonke izifo zisisiphumo sesono sika-Adam santlandlolo. (Genesis 2:17; 3:1-19; Roma 5:12) Ngaba sikho isicombululo?

Isicombululo

Ukutshintsha kwempilo efezekileyo ukusa kwimpilo emaxongo kwabangelwa sisono—ukuvukela kuka-Adam umthetho kaThixo. Ukutshintsha kwempilo emaxongo ukusa kwimpilo efezekileyo kungenzeka kuphela ngokususwa kwesono. (Roma 5:18, 19) Njani? Omnye umntu ofezekileyo, olingana ngokuthe ngqo noAdam ngoxa wayefezekile, kwakufuneka anikele ngobomi bakhe njengentlawulelo. Umthetho kaThixo ukukuba “umphefumlo wobuyiselwa ngomphefumlo,” oko kukuthi, ubomi ngobomi.—Duteronomi 19:21.

Noko ke, akukho namnye kwinzala ka-Adam enesono owayenokunikela intlawulelo enjalo. Ngaloo ndlela, uYehova ngothando wanikela ngoNyana wakhe, uYesu, njengomntu ofezekileyo ukuba anikele ngobomi bakhe “bube yintlawulelo yokukhulula abaninzi” ukuze “sidle ubomi naye.”—Mateyu 20:28; 1 Yohane 4:9; INdumiso 49:7.

Ngoxa wayesemhlabeni, uYesu wabonisa ukuba uYise, uYehova, wamnika amandla okususa izono xa waxelela owayenedumbe oku, “uzixolelwe izono zakho,” yaye loo ndoda iphilisiweyo yagoduka. Amaxesha amaninzi uYesu wayesebenzisa la mandla avela kuThixo ngokuphilisa ngoko nangoko iimfama, izithulu nabanye abaninzi abanezigulo ezahlukahlukeneyo.

Ngokuphathelele oku kunyanga kukaYesu kungummangaliso, iBhayibhile ithi: “Kweza kuye izihlwele ezininzi, zinazo iziqhwala, iimfama, izidenge, izilima, nabanye abaninzi, zababeka phantsi ezinyaweni zikaYesu; wabaphilisa; zada zamangaliswa izihlwele ezo, zakubona izidenge zithetha, izilima ziphilile, iziqhwala zihamba, neemfama zibona.” (Mateyu 15:30, 31) Okuphawuleka ngokokude kwangakumbi, uYesu wayekwazi ukubuyisela abantu abafileyo ebomini. IBhayibhile ichaza abaliqela baba bavuswayo.—Luka 7:11-16; 8:49-56; Yohane 11:14, 38-44.

Oku kuphilisa kungummangaliso kusiqinisekisa ukuba akukho sifo uYesu angenakungasinyangi ngamandla akhe. Ngaba uya kuphinda asebenzise la mandla wayewanikwe nguThixo? Ngaba sinokungenelwa?

Ukuba Nempilo Efezekileyo Kuqinisekile

Iziprofeto zeBhayibhile zibonisa ukuba uYesu sele elawula ezulwini njengoKumkani woburhulumente basezulwini bukaThixo. UThixo uye wagunyazisa ukuba asuse bonke oorhulumente babantu abakhoyo ngoku aze alawule umhlaba uphela. (INdumiso 110:1, 2; Daniyeli 2:44) Uya kuzaliseka umthandazo uYesu awawufundisa abalandeli bakhe othi: “Mabufike ubukumkani bakho. Makwenziwe ukuthanda kwakho nasemhlabeni, njengokuba kusenziwa emazulwini.” (Mateyu 6:10) Phantsi kolawulo lobo Bukumkani basezulwini, inxalenye yokuthanda kukaThixo ngalo mhlaba iya kuba kukuphucula iimeko zempilo zentsapho engabantu ngokumangalisayo.

Ngoko, ngengqiqo yokoqobo neyokomoya, “aya kuvulwa amehlo eemfama, zivulwe iindlebe zezithulu; size sitsibe njengexhama isiqhwala, lumemelele ulwimi lwesidenge.” “Akayi kuthi ummi wakhona, Ndiyafa.”—Isaya 33:24; 35:5, 6.

Phantsi koBukumkani bukaThixo basezulwini, impilo efezekileyo iya kuthetha ukuba abantu abasayi kuphinda bafe njengokuba sisifa ngoku. ILizwi likaThixo lithembisa oku: “Bonke abakholwayo kuye . . . babe nobomi obungunaphakade.” “Isibabalo sikaThixo bubomi obungunaphakade, kuKristu Yesu iNkosi yethu.” (Yohane 3:16; Roma 6:23) Ewe, kude kudala indumiso ephefumlelweyo yathembisa oku: “Amalungisa aya kulidla ilifa ilizwe, ahlale kulo ngonaphakade.” (INdumiso 37:29) Njengokuba wenzayo ngexesha awayesemhlabeni, uYesu uya kwandula avuse abafileyo aze abanike ithuba lokungenelwa kwimpilo efezekileyo. IBhayibhile ithembisa oku: “Kuza kubakho uvuko lwabafileyo, lwamalungisa kwanolwabangemalungisa.”—IZenzo 24:15.

Umhlaba nawo uya kuchuma phantsi kolawulo loBukumkani ukuze indlala, efak’ isandla kwimpilo embi, ingaphindi ibekho. Iziprofeto zeBhayibhile zisixelela oku: “Umthi wasendle wonika isiqhamo sawo, ilizwe linike indyebo yalo, banqabe emhlabeni wabo.” (Hezekile 34:27) “Umhlaba uyivelisile indyebo yawo; uya kusisikelela uThixo, uThixo wethu.” (INdumiso 67:6) “Makubekho intabalala yengqolowa ezweni.” (INdumiso 72:16) “Inemihlali intlango nomqwebedu; iyagcoba inkqantosi, iyadubula njengomfiyo.”—Isaya 35:1.

Sishwankathela imeko eya kuba ikho kwihlabathi elitsha likaThixo, isiprofeto esikwincwadi yokugqibela yeBhayibhile sithi: “Azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu.”—ISityhilelo 21:4.

Ngaba uthi, ‘Oko kuyintsom’ emini’? Ngoko, cinga ngale nto. Ngaphambi kokuba uAdam abe ngumoni, wayenempilo efezekileyo. Khawucinge ukuba ngekwakwenzekile ukuba ubani athethe naye ngelaa xesha aze amxelele ukuba ngenye imini umhlaba uya kuzaliswa ngabantu abaqaqanjelwayo, abancwinayo nabaluphalayo. Ngaba awucingi ukuba uAdam ngewakufumanisa oko kuyintsom’ emini? Ukanti, ngoku kuyinto yokwenene.

Ukubuyisela oko, impilo efezekileyo iya kuba yinto yokwenene phantsi koBukumkani bukaThixo. ILizwi likaYehova liyasiqinisekisa: “Lawo ngamazwi ayinyaniso, athembekileyo.” (ISityhilelo 21:5) Oko uThixo athi kuza kwenzeka kuza kwenzeka kuba “noThixo akanakuxoka.”—Hebhere 6:18, TE.

Yintoni onokuyenza ngoku ukuze uqinisekiswe ngokunandipha ezi ntsikelelo zizayo? Indlela esa ebomini obufezekileyo nakubomi obungunaphakade yacaciswa koko uYesu wakuthethayo emthandazweni oya kuYise: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.”—Yohane 17:3.

Cela isifundo seBhayibhile sesisa kumaNgqina kaYehova ekhayeni lakho. Aya kukuvuyela ukukunceda ukuba ufunde okungakumbi ngamadinga amangalisayo kaThixo. Iya kuba linyathelo lakho lokuqala kwindlela esa kwimpilo efezekileyo!

[Umfanekiso okwiphepha 14]

Kwihlabathi elitsha likaThixo, bonke abantu baya kunandipha impilo efezekileyo