Liyintoni Ithemba Ngamahlwempu?

AKUKHO nto iphosakeleyo ngokusebenza nzima, ukuba nje abo basebenza nzima bafumana umvuzo ofanelekileyo. Phawula oko kwathethwa ngomnye umbhali weBhayibhile: “Ndiyazi ukuba akukho nto ilunge ngakumbi . . . kunokuba nemihlali nokwenza okulungileyo ebudeni bokudla kwalo ubomi; kwanokuba wonk’ umntu ufanele adle, asele aze ngokwenene abone okulungileyo kuko konke ukusebenza kwakhe nzima. Sisipho sikaThixo eso.”—INtshumayeli 3:12, 13.

Kodwa ke, njengokuba sele sifundile, ihlabathi lifuna abantu basebenze bagob’ umqolo lize libahlawule umvuzo omncinane. Abantu abaninzi bahlala bengamahlwempu yaye baphila ngamaceb’ alusizi suku ngalunye. Kunqabile ngabo ukuba ‘babe nemihlali benze okulungileyo’ ngenxa yobomi ababuphilayo. Ubutyebi behlabathi buye bafikelela kumanqwanqwa aphezulu, kodwa isiqingatha sabemi bomhlaba sishiywe kwesinomhlwa, asixhamli kule ndyebo.

UThixo Unomdla Kumahlwempu

UMdali woluntu, uYehova uThixo, akakholiswa yile meko. UYehova unovelwano ngamahlwempu. Sifunda oku eBhayibhileni: “Ngokuqinisekileyo [uThixo] akayi kusilibala isikhalo sabaxhwalekileyo.” (INdumiso 9:12) UYehova nguThixo onenkathalo ngamahlwempu.

IBhayibhile ithi ngoYehova: “Uzinikela kuwe lowo unelishwa, inkwenkwe engenayise. Wena ungumncedi wayo.” (INdumiso 10:14) Phawula indlela amazwi ale ndinyana asebenza ngayo kumntu ngamnye oxhwalekileyo.a Ngokwenene, uThixo uqwalasela ngamnye wabo aze anelise iintswelo zakhe. Umntu ngamnye uxabisekile yaye unikela ingqalelo kuye. UYehova umema wonke umntu enoba lihlwempu okanye sisityebi ukuba afunde kuye aze abe ngumhlobo wakhe.

Eny’ into abantu abayifundayo kuThixo kukuba uvelwano ngabanye. AmaNgqina kaYehova azigqala njengentsapho yokomoya. Anoxabiso ngabanye—phakathi kwawo uthando lobuKristu okwenyaniso luyinto yokwenene. INkosi uYesu Kristu wathi kubalandeli bakhe: “Nonke nina ningabazalwana.” (Mateyu 23:8) Ngoko ke, bonke abo bamkela unqulo lokwenyaniso bangamalungu obuzalwana obungenalucalucalulo enoba ubani ulihlwempu okanye usisityebi. Bayanyamekelana yaye bayakhuthazana ngamaxesha kaxakeka.

IBhayibhile inemigaqo enokunciphisa imiphumo yobuhlwempu. IZibhalo zibonisa ukuba uThixo uyakugatya ukungcolisa umzimba—ngokutshaya—nokusebenzisa kakubi utywala. (IMizekeliso 20:1; 2 Korinte 7:1) Umntu ophila ngale migaqo unokonga imali ebinokuchithelwa kule mikhwa iyingozi. Uyasinda kwizifo ezibangelwa kukutshaya nokunxila kuze kusinde nemali yakhe kwiindleko zoogqirha. IBhayibhile ikwasifundisa ukuba sikuphephe ukuba nesimo sengqondo sokuthanda izinto eziphathekayo nokubawa. (Marko 4:19; Efese 5:3) Ngokuthobela uThixo kule miba umntu uyakuphepha ukusafaza imali ngokungcakaza.

IBhayibhile inemigaqo eluncedo yemihla ngemihla nkqu naxa umntu sele elihlwempu. Oku kulandelayo kwenzeka ngokoqobo:

Kwilizwe elinabantu abaninzi abangaphangeliyo omnye umqeshwa kumzi-mveliso wabeka umsebenzi wakhe esichengeni ngokucela emsebenzini ukuze aye kwiintlanganiso zebandla. Umphathi wakhe ngewayesuke wamgxotha. Kodwa wenza into engalindelwanga neyothusa nabanye abasebenzi ngokumvumela angezi emsebenzini. Ngaphezu koko, lo mphathi wamxelela ukuba ufuna aqhubeke esebenza kulo mzi-mveliso yaye wamncoma ngokuba “ngumsebénzi ongumzekelo.” Ngoba?

Lo msebénzi liNgqina likaYehova, yaye uphila ngokwemigaqo yeBhayibhile. Enqwenela ‘ukuziphatha ngokunyaniseka kwizinto zonke,’ wayengaxoki, engelilo isela yaye wayesaziwa njengomntu onyanisekileyo. (Hebhere 13:18) Ethobela umgaqo ophefumlelweyo ofumaneka kwabaseKolose 3:22, 23, wayewenza umsebenzi wakhe “ngomphefumlo uphela.” Oku kuthetha ukuba wayemthobela umqeshi wakhe yaye ekhuthele emsebenzini.

Liyinyaniso elokuba abarhwebi namhlanje ngoohlohl’ esakhe yaye ekuphela kwento ebalulekileyo kukufumana ingeniso. Abo baphila ngemigaqo yeBhayibhile basenokukufumanisa kunzima ukufumana ukutya, impahla nekhusi. Kodwa ke, abaphila ngale migaqo baba nesazela esicocekileyo phambi koMdali wabo yaye bakhangele phambili ngentembelo xa uYehova “uThixo onika ithemba” eya kwenza kubekho umnyinyiva.—Roma 15:13.

Isicombululo Sikanaphakade

IBhayibhile isixelela indlela uYehova avakalelwa ngayo ngokucinezelwa kwamahlwempu. ILizwi likaThixo eliphefumlelweyo lithi: “Yeha ke abo bamisela imimiselo eyenzakalisayo nabo bathi, bebhala rhoqo, babhale inkathazo, ukuze bashenxise izisweli etyaleni nokuze bahluthe okusesikweni kwabaxhwalekileyo . . . , ukuba abahlolokazi babe lixhoba labo, nokuze babe nokuphanga kwanamakhwenkwe angenayise!” (Isaya 10:1, 2) Enoba abawahoyi amahlwempu ngabom okanye bengazi, abo basemanqwanqweni kwinkqubo yezoqoqosho namhlanje bayinxalenye yengcinezelo uThixo uSomandla athi uza kuyitshitshisa.

Umprofeti uIsaya ubuza aba bacinezeli umbuzo oxhokonx’ ingcinga: “Niya kuthini na ke ngemini yokunikwa ingqalelo neyokonakaliswa okuvela kude?” (Isaya 10:3) UYehova uya kuwatshonisa amashishini abo ngokutshabalalisa inkqubo yorhwebo engekho sikweni.

Kodwa injongo kaThixo iquka okungakumbi kunokuthabatha nje amanyathelo achasene nabacinezeli. Abo bantliziyo zinyanisekileyo baya kwenzelwa okusesikweni. Ngorhulumente ongenakulawulwa ngamandla abantu, uya kuvumela bonke abantu baphile ubomi obanelisayo nobonwabisayo kungekho ntlupheko. Ngelo xesha impumelelo ayisayi kuxhomekeka kwilifa lemali eninzi, kubahlobo abangabarhwebi okanye ekubeni ngusomashishini ovunyiweyo. Sinokuqiniseka njani ukuba olo tshintsho luya kwenzeka?

UYehova unyule uYesu Kristu njengomlawuli woluntu ebhekisela kwelo xesha limangalisayo ngokuthi “ekudalweni okutsha.” (Mateyu 19:28) Eli gama linengcamango yobutsha nesiqalo esitsha sobomi babantu. Ngokusebenzisa ibinzana elithi “ekudalweni okutsha,” uYesu wayebalaselisa ukuba uYehova uya kunika abantu ithuba lokuphila ubomi ngokwenjongo yoMdali wethu onothando. Phakathi kwezinto eziya kwenzelwa uluntu, kuya kususwa uxanduva oluziswa yimeko yezoqoqosho.

Iprofeta ngolawulo lukaYesu Kristu, iBhayibhile ithi: “Kuba uya kumhlangula lowo ulihlwempu ukhalela uncedo, kwanalowo uxhwalekileyo nabani na ongenamncedi. Uya kuba nosizi ngesisweli nangehlwempu, nemiphefumlo yabangamahlwempu uya kuyisindisa. Uya kuwukhulula umphefumlo wabo kwingcinezelo nakugonyamelo negazi labo liya kuxabiseka emehlweni akhe.”—INdumiso 72:12-14.

Nawe unokuzuza kwesi sithembiso sichulumancisa kangaka. Kodwa ukuze kuzaliseke injongo kaThixo ngobomi kwelo hlabathi litsha, kuyinto ebalulekileyo ukuba ufunde uze wenze ukuthanda koThixo oyinyaniso. Yenza izigqibo zobulumko ezisekelwe kulwazi lweLizwi likaThixo. Phila ucinga ngekamva eliqaqambileyo uThixo alithembisa abantu. Akusayi kuphoxeka. ILizwi likaThixo liyathembisa: “Kuba lowo ulihlwempu akayi kusoloko elityalwa, nethemba lalowo ululamileyo aliyi kuze litshabalale ngonaphakade.”—INdumiso 9:18.

[Umbhalo osemazantsi]

[Amagama acatshulweyo akwiphepha 9]

Unokuba nekamva eliqaqambileyo

[Ibhokisi/Umfanekiso okwiphepha 10]

Ngaba Ndifanele Ndifudukele Kwindawo Ebhetele?

ILizwi likaThixo alibayaleli abantu ngendawo abafanele bahlale okanye basebenze kuyo. Nakuba kunjalo, imigaqo yeBhayibhile inokumnceda ubani agqibe enoba ukufudukela kwenye indawo ngenxa yezoqoqosho kunokuba sisizathu esivakalayo kusini na. Qwalasela lo mbuzo ulandelayo nemigaqo yeZibhalo enokusetyenziswa.

1. Ngaba ndiphenjelelwa ngundiva? IMizekeliso 14:15 ithi: “Nabani na ongenamava ukholwa ngamazwi onke, kodwa onobuqili uyawaqwalasela amanyathelo akhe.” Emva kokuba enye indoda ifudukele kwilizwe laseNtshona Yurophu yathi: “Ndeva kusithiwa apha imali ininzi kangangokuba ingathi ikhula emithini. Ndisafuna loo mithi nanamhlanje.”

2. Ngaba ndinembono elungeleleneyo ngeemfuno zentsapho yam? Ngaba ndibhidanis’ iikomityi xa kuthethwa ngeemfuno neminqweno engekho ngqiqweni yezinto eziphathekayo? Iintloko-ntsapho zimele zinyamekele abafazi nabantwana bazo ngezinto eziphathekayo. (1 Timoti 5:8) Kwangaxeshanye uThixo unike oobawo imbopheleleko yokufundisa abantwana ukuziphatha nangokomoya. (Duteronomi 6:6, 7; Efese 6:4) Ubawo usenokubanyamekela bhetele abantwana bakhe ngezinto eziphathekayo xa efudukela kwelinye ilizwe. Kodwa akanakukwazi ukubaqeqesha ngokomoya ukuba akakho kunye nabo iiveki, iinyanga okanye iminyaka.

3. Ngaba ndiyaqonda ukuba ukufuduka kwam kuya kubeka mna nomfazi wam esichengeni sokukrexeza? ILizwi likaThixo lilumkisa izibini ezitshatileyo ukuba zingaze zizityeshele iimfuno zazo zesini.—1 Korinte 7:5.

4. Ndiyaqonda na phofu ukuba ukungena kwelinye ilizwe ngaphandle kwemvume karhulumente kunokundifaka enyuleni? AmaKristu okwenyaniso amele athobele imithetho yelizwe.—Roma 13:1-7.

[Imifanekiso ekwiphepha 8, 9]

Imigaqo yeBhayibhile iluncedo enoba sizizinhanha okanye singamahlwempu

[Inkcazelo Ngomfanekiso okwiphepha 7]

Phezulu: © Trygve Bolstad/Panos Pictures