Ihlabathi Elingenabuhlwempu Lisemnyango

IMIFANEKISO yeParadesi njengalo ukwiphepha elingaphandle leli phephancwadi, ubangel’ umdla kubantu abahlwempuzekileyo. Iparadesi yayiyinto yokoqobo kwisibini sokuqala esingabantu, uAdam noEva. Ikhaya laso lalingumyezo wase-Eden. (Genesis 2:7-23) Nangona baphulukana nayo loo Paradesi, ukukholelwa kwiparadesi yexesha elizayo—ihlabathi elitsha elingenabuhlwempu—asilophupha nje. Kusekelwe ngokuqinileyo kwizithembiso zeBhayibhile.

Khawucinge ngesithembiso esenziwa nguYesu Kristu ngosuku lokugqibela lobomi bakhe emhlabeni. Omnye wabenzi-bubi abafa noYesu wabonisa ukholo kumandla kaThixo okucombulula iingxaki zabantu. Wathi: “Yesu, uze undikhumbule xa uthe wangena ebukumkanini bakho.” La mazwi abonisa ukuba lo menzi-bubi wayekholelwa ukuba uYesu uya kulawula njengoKumkani yaye abafileyo baya kuvuswa. UYesu waphendula wathi: “Inene ndithi kuwe namhlanje, Uya kuba nam eParadesi.”—Luka 23:42, 43.

Ithetha ngabo baya kuphila eParadesi, iBhayibhile ithi: “Ngokuqinisekileyo baya kwakha izindlu baze bahlale; batyale izidiliya baze badle isiqhamo sazo.” (Isaya 65:21) Ewe, “okunene baya kuhlala, ngamnye phantsi komdiliya wakhe naphantsi komkhiwane wakhe, yaye akuyi kubakho bani ubangcangcazelisayo; kuba wona kanye umlomo kaYehova wemikhosi ukuthethile oko.”—Mika 4:4.

Kodwa, kutheni ubuhlwempu buvunyelwe ngoku? UThixo ubanceda njani abo bathwaxwa bubuhlwempu? Buya kuphela nini ubuhlwempu?

Kutheni Ubuhlwempu Buvunyelwe?

IParadesi ababebekwe kuyo uAdam noEva yaphela ngenxa yemvukelo eyaqaliswa yingelosi engendawo, uSathana uMtyholi. Esebenzisa inyoka njengesithethi sakhe, uSathana walukuhlela uEva ekubeni aphule umthetho kaThixo owawusalela ukutyiwa kwesiqhamo somthi othile. Wamkhohlisa emenza akholelwe ukuba ukuzimela geqe kuThixo kuya kumenza aphile ubomi obubhetele. Xa uEva wanika uAdam isiqhamo esalelweyo, naye wasitya, egatya uThixo ngenxa yokufuna ukukholisa umfazi wakhe.—Genesis 3:1-6; 1 Timoti 2:14.

Esi sibini sinemvukelo kwakufanelekile ukuba sigxothwe eParadesi yaye ukususela ngoko kwafuneka sitsale nzima ukuze siphile. Ukuza kuthi ga namhlanje, uYehova uye wavumela uSathana ukuba alawule abantu abanesono, esenza kubonakale umphumo wokungamthobeli uThixo. Imbali iye yangqina ukuba umntu akanako ukwenza umhlaba ube yiParadesi. (Yeremiya 10:23) Kunoko, ukuzimela geqe kuThixo kuye kwabangela iingxaki ezingathethekiyo, eziquka ubuhlwempu.—INtshumayeli 8:9.

Noko ke, amahlwempu akashiywanga enyanyeni kweli hlabathi lizaliswe ziinkathazo. KwiLizwi likaThixo eliphefumlelweyo, iBhayibhile, anokufumana ukhokelo lobulumko.

‘Musani Ukuxhala’

Xa wayethetha nesihlwele sabantu esasiquka amahlwempu amaninzi, uYesu wathi: “Qwalaselani ngenyameko iintaka zezulu, ngokuba azihlwayeli mbewu, azivuni yaye azihlanganisi koovimba; ukanti uYihlo osemazulwini uyazondla. Anixabisekanga ngaphezu kwazo na? . . . Musani ke ukuxhala nisithi, ‘Siza kudla ntoni na?’ okanye, ‘Siza kusela ntoni na?’ okanye, ‘Siza kunxiba ntoni na?’ Kuba zonke ezi zizinto iintlanga ezizisukela ngentumekelelo. Kuba uYihlo osemazulwini uyazi ukuba ziyimfuneko kuni zonke ezi zinto. Qhubekani, ke ngoko, nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni.”—Mateyu 6:26-33.

Akuyomfuneko ukuba umntu olihlwempu abe. (IMizekeliso 6:30, 31) Uya kunyanyekelwa ukuba uThixo umbeka kwindawo yokuqala ebomini bakhe. Cinga ngemeko kaTukiso, indoda yaseLesotho. Ngowe-1998, imikhosi yamanye amazwe yangena eLesotho ukuza kunqanda imvukelo nxamnye norhulumente. Ngenxa yaloo mfazwe, iivenkile zaphangwa, abantu balahlekelwa yimisebenzi kwaza ukutya kwanqongophala ngendlela engathethekiyo.

UTukiso wayehlala kweyona ndawo ihlwempuzekileyo yelo komkhulu. Abamelwane bakhe abaninzi baphanga iivenkile ukuze babe nokutya. Ekufikeni kukaTukiso kwindawo awayehlala kuyo enegumbi elinye, wafumanisa ukuba uMaseiso, ibhinqa awayehlala nalo, wayenokutya okuninzi awayekubile. UTukiso wathi, “Zikhuphele ngaphandle ezi zinto,” waza wamcacisela ukuba ubusela buchasene nomthetho kaThixo. UMaseiso wathobela. Abamelwane babagculela baza bazithathela oko kutya kubiweyo.

Oku uTukiso wakwenza ngenxa yoko wayekufunde kwisifundo sakhe seBhayibhile namaNgqina kaYehova. Ngaba ukuthobela kwakhe umthetho kaThixo kwambulalisa ngendlala? Akunjalo. Emva kwethuba elithile abadala bebandla lamaNgqina kaYehova awayeye kulo baya kuTukiso bemphathele ukutya. Eneneni, amaNgqina kaYehova aseMzantsi Afrika athumela iitoni ezimbini zokutya kubazalwana nodade bawo abangamaKristu eLesotho. UMaseiso wachukunyiswa kukuthobela uThixo kukaTukiso noncedo lothando olwanikelwa libandla. Naye waqalisa ukufundisisa iBhayibhile. Ekugqibeleni, bawubhalisa ngokusemthethweni umtshato wabo baza bakufanelekela ukubhaptizwa njengamaNgqina kaYehova. Basakhonza uThixo ngokuthembeka.

UYehova uThixo uwakhathalele amahlwempu. (Bona ibhokisi enomxholo othi “UThixo Uwajonga Njani Amahlwempu?”) Ngothando uye wenza ilungiselelo lokunceda abanye abanjengoTukiso noMaseiso ukuze bafunde ngakumbi ngaye. Yaye kwiLizwi lakhe, unikele isiluleko esisebenzisekayo kubomi bemihla ngemihla.

Ilungiselelo Elihle

AmaNgqina kaYehova asoloko ezama ukubonisa ukuba uThixo uwakhathalele amahlwempu. (Galati 2:10) Ngalo lonke ixesha intlekele ithwaxa ilizwe elithile aze amaKristu okwenyaniso achaphazeleke, kuye kwenziwe amalungiselelo okunikela uncedo olufunekayo. Okubaluleke ngakumbi, amaNgqina abonakalisa inkxalabo yeentswelo zokomoya zabantu bonke, kuquka namahlwempu. (Mateyu 9:36-38) Ebudeni beminyaka engama-60 edluleyo, amawaka abalungiseleli abaqeqeshiweyo aye ngokuzithandela aba ngabavangeli basemazweni kumazwe asemzini. Ngokomzekelo, yayisisibini saseFinland esingabavangeli basemazweni esathi ngokufunda ulwimi lwesiSuthu sakwazi ukufundisa uTukiso noMaseiso ukuze babe ngabafundi bakaYesu. (Mateyu 28:19, 20) Lo msebenzi wobuvangeli basemazweni udla ngokuquka ukuncama ukuphila ubomi obutofotofo kwilizwe elimi kakuhle nokufudukela kwilizwe elihlwempuzekileyo.

AmaKristu okwenyaniso akanakubhenela kubusela kuba nje efuna ukuphila. Kunoko, anokholo lokuba uYehova uThixo unako ukuwanyamekela. (Hebhere 13:5, 6) Enye indlela uYehova abanyamekela ngayo abantu bakhe kungokusebenzisa intlangano esehlabathini lonke yabakhonzi bakhe, abanyamekelanayo.

Enye indlela uYehova awanceda ngayo amahlwempu uwanika isiluleko esisebenzisekayo kubomi bemihla ngemihla. Ngokomzekelo, iBhayibhile inikela lo myalelo: “Lowo ubayo makangabi seba, kunoko makasebenze nzima, esenza umsebenzi olungileyo ngezandla zakhe, ukuze abe nento yokwabela lowo usweleyo.” (Efese 4:28) Abantu abaninzi abangaqeshwanga baye bakwazi ukuzenzela imisebenzi ethile besebenza nzima njengokuzilimela imifuno. Kwakhona iBhayibhile inceda abantu abangamahlwempu balondoloze imali ngokubafundisa ukuba baphephe imikhwa eyingozi, enjengokunxila.—Efese 5:18.

Ihlabathi Elingenabuhwempu—Nini?

IBhayibhile ibonisa ukuba siphila ‘kwimihla yokugqibela’ yokulawula kukaSathana. (2 Timoti 3:1) Kungekudala, uYehova uThixo uza kuthumela uYesu Kristu aze kugweba abantu. Kuya kwenzeka ntoni ngelo xesha? UYesu wanikela impendulo komnye wemizekeliso yakhe. Wathi: “Xa uNyana womntu efika esebuqaqawulini bakhe, nazo zonke iingelosi zikunye naye, uya kwandula ke ahlale phantsi kwitrone yakhe yobuqaqawuli. Kwaye zonke iintlanga ziya kuhlanganiselwa phambi kwakhe, abahlule abantu omnye komnye, kanye njengokuba umalusi esahlula izimvu ezibhokhweni.”—Mateyu 25:31-33.

Izimvu ezikulo mzekeliso ngabo bazithoba kulawulo lukaYesu. UYesu ubafanisa nezimvu kuba bayamlandela njengoMalusi wabo. (Yohane 10:16) Aba bafana nezimvu baya kufumana ubomi kulawulo lukaYesu olufezekileyo. Iya kuba bubomi obonwabisayo kwihlabathi elitsha elingenabo ubuhlwempu. Abantu abafana neebhokhwe, abalugatyayo ulawulo lukaYesu, baya kutshatyalaliswa ngonaphakade.—Mateyu 25:46.

UBukumkani bukaThixo buza kuphelisa ubungendawo. Ngelo xesha ubuhlwempu buya kube bungasekho. Kunoko, umhlaba uya kuhlalwa ngabantu abathandanayo nabanyamekelanayo. Isibakala sokuba elo hlabathi litsha liza kubakho sinokubonwa kuthando lwabazalwana abasehlabathini lonke bamaNgqina kaYehova, kuba uYesu wathi: “Ngako oko bonke baya kwazi ukuba ningabafundi bam, ukuba ninothando phakathi kwenu.”—Yohane 13:35.

[Ibhokisi/Imifanekiso ekwiphepha 6, 7]

UTHIXO UWAJONGA NJANI AMAHLWEMPU?

IBhayibhile ichaza uMdali wabantu ‘njengaLowo unika abalambileyo isonka.’ (INdumiso 146:7) Iqulethe iindinyana ezingaphezu kwekhulu ezibalaselisa ukuba uThixo uwaxhalabele amahlwempu.

Ngokomzekelo, xa uYehova wanika uSirayeli wamandulo uMthetho wakhe, wamyalela ukuba angawavuni ngokupheleleyo amasimi akhe. Wayengafanele abhikice iziqhamo eziseleyo zomthi womnquba okanye isidiliya emva kokuba kuvuniwe. Le mithetho yayililungiselelo lothando elenzelwe abasemzini, iinkedama, abahlolokazi nabanye abaxhwalekileyo.—Levitikus 19:9, 10; Duteronomi 24:19-21.

Ngaphezu koko, uThixo wayalela amaSirayeli esithi: “Nize ningamxhwalekisi nabani na ongumhlolokazi okanye inkwenkwe engenayise. Ukuba uthe wayixhwalekisa nangayiphi na indlela, yadanduluka kum, ndosiva ngenene isikhalo sayo; uvuthe umsindo wam, ndinibulale ngokuqinisekileyo ngekrele, babe ngabahlolokazi abafazi benu, bangabi nayise oonyana benu.” (Eksodus 22:22-24) Okubuhlungu kukuba, amaSirayeli amaninzi afumileyo awatyeshela loo mazwi. Ngenxa yoko nezinye izenzo ezibi, uYehova uThixo wanika amaSirayeli izilumkiso ezahlukahlukeneyo esebenzisa abaprofeti bakhe. (Isaya 10:1, 2; Yeremiya 5:28; Amosi 4:1-3) Ekugqibeleni, uThixo wavumela iAsiriya yaye kamva neBhabhiloni ukuba zithimbe umhlaba wamaSirayeli. AmaSirayeli amaninzi abulawa, yaye asindileyo athinjelwa kumazwe asemzini.

UNyana kaThixo oyintanda, uYesu Kristu, wabonakalisa inkxalabo kaYise enothando ngamahlwempu. Echaza injongo yobulungiseleli bakhe, uYesu wathi: “Umoya kaYehova uphezu kwam, ngenxa yokuba undithambisele ukuvakalisa iindaba ezilungileyo kumahlwempu.” (Luka 4:18) Oku akuthethi ukuba uYesu waphelelisela ubulungiseleli bakhe kumahlwempu. Ngothando wanceda nabantu abazizityebi. Noko ke, xa ebanceda, wayesoloko evakalisa inkxalabo yakhe ngamahlwempu. Ngokomzekelo, wacebisa omnye umlawuli osisityebi wathi: “Thengisa zonke izinto onazo, wabele amahlwempu, yaye uya kuba nobuncwane emazulwini; uze ube ngumlandeli wam.”—Luka 14:1, 12-14; 18:18, 22; 19:1-10.

UYehova uThixo noNyana wakhe bawaxhalabele ngokunzulu amahlwempu. (Marko 12:41-44; Yakobi 2:1-6) Ebonakalisa inkxalabo ngamahlwempu, uYehova uya kuzikhumbula izigidi zamahlwempu aye afa. Onke aza kuvuselwa kumhlaba omtsha ongenabo ubuhlwempu.—IZenzo 24:15.

[Imifanekiso]

Ubuzalwana bezizwe ngezizwe bamaNgqina kaYehova bubonisa ukuba liza kubakho ihlabathi elitsha

[Umfanekiso okwiphepha 5]

UTukiso noMaseiso nomvangeli wasemazweni owafundisisa iBhayibhile noTukiso

[Umfanekiso okwiphepha 5]

UMaseiso umi kumnyango wendlu yakhe kunye nomvangeli wasemazweni owafundisisa iBhayibhile naye