Abantu Abaselula Bayabuza . . .

Ngaba Lo Mntu Undifanele

Khawuziphe ithuba lokuphendula le mibuzo ilandelayo:

Ziziphi iimpawu ocinga ukuba zibalulekile kumntu onqwenela ukutshata naye? Kuludwe olulandelayo phawula ngokuthi ✔ ecaleni kweempawu ezine ocinga ukuba zibalulekile.

․․․․․ yinzwane okanye yinzwakazi

․․․․․ uzixabisile izinto zokomoya

․․․․․ unobuhlobo

․․․․․ unokuthenjwa

․․․․․ uyathandwa

․․․․․ uziphethe kakuhle

․․․․․ unoburharha

․․․․․ unosukelo ebomini

Xa wawusemncinane, ngaba wakha wathabatheka ngumntu othile? Kolu ludwe lungentla phawula ngokuthi X ecaleni kophawu ocinga ukuba lwakutsalela kuloo mntu.

AKUKHO nto iphosakeleyo ngokubuza oku kungasentla. Kaloku nokufaneleka kwakhe kubalulekile. Simele sivume ukuba xa ubani esenentabatheko yobutsha, usenokujonga iimpawu eziphambi kwamehlo akhe njengezo zikumhlathi osekhohlo?

Noko ke, njengoko uya ukhula, uqalisa ukusebenzisa amandla akho okucinga ukuhlolisisa imibandela enzulu, njengakumhlathi osekunene. Mhlawumbi usenokubona ukuba eyona ntombi iyinzwakazi elumelwaneni ayithembekanga kwaye eyona nkwenkwe ithandwayo eklasini ayiziphethanga kakuhle. Xa udlula entlahleni yobutsha—xa iimvakalelo zesini zinamandla—kulindeleke ukuba ukhangele ngaphaya kweempawu eziphambi kwamehlo ukuze uphendule lo mbuzo, Ngaba lo mntu undifanele?—1 Korinte 7:36.

Ngaba Ndinokutshata Naye Nabani Na?

Njengokuba ixesha lihamba useza kuphandlwa ngabaninzi besini esahlukileyo. Kodwa asinguye wonk’ ubani onokutshata naye. Ngaphezu koko, ufuna undofa naye, umntu oza kuba yintonga yakho yasekhosi uze nawe ube ngumsimelelo wakhe. (Mateyu 19:4-6) Ngubani bethu lowo? Ngaphambi kokuba uphendule lo mbuzo, ufanele ‘uzijonge esipilini’ uze uzihlolisise ngokunyanisekileyo.—Yakobi 1:23-25.

Ukuze uzazi kakuhle khawuphendule le mibuzo ilandelayo:

Ziziphi iimpawu zam ezintle?

․․․․․

Ziziphi iimpawu endibuthathaka kuzo?

․․․․․

Ziziphi iimfuno endinazo ngokweemvakalelo nangokomoya?

․․․․․

Ukuzazi akuyondlwan’ iyanetha, kodwa imibuzo efana nale inokukunika isiqalo esihle.a Njengokuba uzazi ngakumbi, unamathuba amaninzi okufumana umntu oza kubalaselisa iimpawu zakho ezintle kunobuthathaka bakho. Kuthekani ke ukuba ucinga ukuba ufumene umntu okufaneleyo?

Ngaba Izinto Ziza Kusihambela Kakuhle?

Ukuze uphendule loo mbuzo, khawumqwalasele ngeliso elibukhali lo mhlobo wakho. Kodwa ke, ulumke! Usenokutyekela ekuboneni oko ufuna ukukubona. Ngoko ke, ziphe ixesha. Funa ukwazi uhlobo lomntu alulo ngokwenene.

Abantu abaninzi abathandanayo bafunda nje ubuntu obubonakala emehlweni. Ungeva bethetha ngezinto abafana ngazo, besithi: ‘Sithanda umculo ofanayo.’ ‘Sithanda ukonwaba ngendlela efanayo.’ ‘Sivumelana ngayo yonk’ into!’ Njengoko sele kukhankanyiwe, ukuba udlule ngokupheleleyo entlahleni, uya kubona okungaphaya kunezo mpawu zibonakala phambi kwamehlo. Ufanele wazi ‘umntu ofihlakeleyo wentliziyo.’—1 Petros 3:4; Efese 3:16.

Ngokomzekelo, kunokukhangela indlela enivumelana ngayo ngezinto, kusenokuba luncedo ukubona indlela avakalelwe ngayo xa nisahluka ngezimvo. Ngamany’ amazwi, lo mntu ukulungisa njani ukungavani—ngaba unyanzelisa iimbono zakhe, okanye ‘ugqajukelwa ngumsindo’ okanye ngaba usebenzise “intetho etshabhisayo”? (Galati 5:19, 20; Kolose 3:8) Ngaba unolwazelelelo—uyayekelela ukuze alondoloze uxolo kwimibandela yokuzikhethela?—Yakobi 3:17.

Enye inkalo emele iqwalaselwe: Ngaba lo mntu uyakuxhaphaza, nguzwilakhe okanye unesikhwele? Ngaba ufuna ukwazi yonk’ into oyenzayo? Elinye ibhinqa eliselula, uNicole uthi: “Ukufuna ukukulawula nokuba nesikhwele ziimpawu omele uzilumkele. Ndikhe ndive ngabantu abathandanayo besilwa ngenxa yokuba omnye engakhange amxelele indawo aya kuyo. Yinkathazo ke leyo.”

Waziwa njani ngabanye abantu lo mfana okanye intombazana onomdla kuyo? Usenokufuna ukuthetha nabantu ekudala bemazi lo mntu njengabantu abaqolileyo abasebandleni lakhe. Baya kukuxelela enoba ‘kunikelwa ingxelo entle’ ngaloo mntu.—IZenzo 16:1, 2.b

Ngaba Nifanele Nahlukane?

Kuthekani ukuba uyabona ukuba lo mntu akanakuba liqabane elifanelekileyo lomtshato? Kuloo meko, kusenokuba kuhle ukuba niluqhawule ulwalamano lwenu. IBhayibhile ithi: “Onobuqili ubona intlekele azifihle, kodwa abangenamava bayadlula baze bafumane isohlwayo.”—IMizekeliso 22:3.c

Ekuhambeni kwexesha usenokuthandana nomnye umntu. Ukuba kunjalo, usenokuba nembono elungeleleneyo. Mhlawumbi ngelo xesha, uya kuwuphendula ngokuthi ewe! umbuzo othi “Ngaba lo mntu undifanele?”

Amanqaku angakumbi athi “Abantu Abaselula Bayabuza . . . ” afumaneka kwiWeb site ethi: www.watchtower.org/ype

[Imibhalo esemazantsi]

OMELE UCINGE NGAKO

◼ Ziziphi iimpawu onazo eziya kuba luncedo emtshatweni?

◼ Ziziphi iimpawu ozifuna kwiqabane lomtshato?

◼ Ziziphi iindlela onokufunda ngazo ngobuntu, ihambo nendlela aziwa ngayo umntu othandana naye?

[Ibhokisi ekwiphepha 19]

Ngaba uya kuba ngumyeni ofanelekileyo?

IZINTO EZISISISEKO

▪ Ulisebenzisa njani igunya anokuba unalo—Mateyu 20:25, 26.

▪ Luyintoni usukelo lwakhe?—1 Timoti 4:15.

▪ Ngaba usebenzela ukulufikelela olo sukelo?—1 Korinte 9:26, 27.

▪ Ngoobani abahlobo bakhe?—IMizekeliso 13:20.

▪ Sinjani isimo sengqondo sakhe ngemali?—Hebhere 13:5, 6.

▪ Uzonwabisa ngayiphi indlela?—INdumiso 97:10.

▪ Sinjani isinxibo sakhe?—2 Korinte 6:3.

▪ Ulubonakalisa njani uthando lwakhe ngoYehova?—1 Yohane 5:3.

EZONA MPAWU ZIBALULEKILEYO

▪ Ngaba ukhuthele?—IMizekeliso 6:9-11.

▪ Ngaba uyisebenzisa kakuhle imali?—Luka 14:28.

▪ Ngaba kuthethwa kakuhle ngaye?—IZenzo 16:1, 2.

▪ Ngaba uyabahlonela abazali bakhe?—Eksodus 20:12.

▪ Ngaba unolwazelelelo?—Filipi 2:4.

IIMPAWU OMELE UZILUMKELE

▪ Ngaba ukhawuleza abe nomsindo?—IMizekeliso 22:24.

▪ Ngaba uzama ukuba niziphathe kakubi ngokwesini?—Galati 5:19.

▪ Ngaba ukuxhaphaza ngamazwi okanye uyakubetha?—Efese 4:31.

▪ Ngaba kufuneka asele utywala ukuze onwabe?—IMizekeliso 20:1.

▪ Ngaba unesikhwele okanye uyazingca?—1 Korinte 13:4, 5.

[Ibhokisi ekwiphepha 20]

Ngaba uya kuba ngumfazi ofanelekileyo?

IZINTO EZISISISEKO

▪ Ukubonakalisa njani ukuzithoba kwintsapho yakowabo nasebandleni?—Efese 5:21, 22.

▪ Indlela anxiba ngayo ibonisa ntoni?—1 Petros 3:3, 4.

▪ Ngoobani abahlobo bakhe?—IMizekeliso 13:20.

▪ Sinjani isimo sakhe sengqondo ngemali?—1 Yohane 2:15-17.

▪ Luyintoni usukelo lwakhe?—1 Timoti 4:15.

▪ Ngaba ngoku usebenzela ukufikelela usukelo lwakhe?—1 Korinte 9:26, 27.

▪ Uzonwabisa ngayiphi indlela?—INdumiso 97:10.

▪ Ulubonakalisa njani uthando lwakhe ngoYehova?—1 Yohane 5:3.

EZONA ZINTO ZIBALULEKILEYO

▪ Ngaba ukhuthele?—IMizekeliso 31:17, 19, 21, 22, 27.

▪ Ngaba uyisebenzisa kakuhle imali?—IMizekeliso 31:16, 18.

▪ Ngaba kuthethwa kuhle ngaye?—Rute 4:11.

▪ Ngaba uyabahlonela abazali bakhe?—Eksodus 20:12.

▪ Ngaba unolwazelelelo?—IMizekeliso 31:20.

IZINTO OMELE UZILUMKELE

▪ Ngaba uyazithand’ iingxabano?—IMizekeliso 21:19.

▪ Ngaba uzama ukuba niziphathe kakubi ngokwesini?—Galati 5:19.

▪ Ngaba ukuxhaphaza ngamazwi okanye uyakubetha?—Efese 4:31.

▪ Ngaba kufuneka asele utywala ukuze onwabe?—IMizekeliso 20:1.

▪ Ngaba unesikhwele okanye uyazingca?—1 Korinte 13:4, 5.