Ngaba Intliziyo Echwayitileyo Inokuyiphucula Impilo Yakho?

Ukumkani osisilumko wakwaSirayeli wabhala wathi kwiminyaka enokuba ngama-3 000 eyadlulayo: “Umntu onentliziyo echwayitileyo uba nempilo.” (IMizekeliso 17:22, IBhayibhile yesiXhosa yowe-1996) Namhlanje oogqirha bayavumelana nala mazwi aphefumlelweyo. Kodwa abantu abaninzi abasoloko ‘bechwayitile.’

Bambalwa kuthi abantu abakwaziyo ukuziphepha izinto ezicinezelayo zobomi, nto leyo ebangela badakumbe. Sekunjalo, uhlolisiso lwamvanje lubonisa ukuba phezu kwazo nje iinzima, kubalulekile ukuba sihlale sichwayitile.

Ukukhangela kwikamva ngolangazelelo kuchazwa ngokuba “kukungaphelelwa lithemba nangona ikamva libonakala limfiliba.” Xa izinto zingamhambeli kakuhle umntu onembono eqaqambileyo ngekamva, uvakalelwa njani? Akalahl’ imbeleko ngakufelwa. Oku akuthethi kuthi uphila kwilizwe lamaphupha. Kunoko, xa izinto zingahambi kakuhle udl’ amathamb’ entloko. Uthi kwakubakho umnyinyiva, axoze mphini wumbi.

Kwelinye icala, umntu onembono emfiliba ngekamva usoloko ezibek’ ityala xa kuvel’ ingxaki. Ucinga ukuba iliwa liyakuhlala libhek’ umoya ngenxa yokuba usisidenge, yimpatha okanye abantu abamcacelanga. Ngenxa yoko, uzibona engungantweni.

Ngaba ukuhlala sichwayitile kunento okuyenzayo empilweni yethu? Kunjalo kanye. Uhlolisiso olwenziwa kwizigulana ezingaphezu kwama-800 olwathabatha iminyaka engama-30 kwiKliniki yaseMayo, eRochester, eMinnesota, eUnited States izazinzulu zafumanisa ukuba abantu abahlala bechwayitile basempilweni yaye baphila ixesha elide kunabantu abadakumbileyo. Kwakhona abaphandi bafumanise ukuba bajamelana bhetele noxinezeleko yaye abafane badandatheke.

Noko ke, akulula ukuba uhlale uchwayitile kweli hlabathi lineenzingo. Ngoko ke, akufanele kusimangalise ukubona abantu bengonwabanga. Inokuconjululwa njani le ngxaki? Eli nqaku linebhokisi enamacebiso anokukunceda.

Nangona ukuhlala uchwayitile kungaziphelisi zonke iingxaki, kunokukwenza ube sempilweni uze waneliseke. IBhayibhile ithi: “Yonke imihla yoxhwalekileyo mibi; kodwa onentliziyo echwayitileyo uba netheko rhoqo.”—IMizekeliso 15:15.

[Ibhokisi/Umfanekiso okwiphepha 26]

Amacebiso Anokukunceda Uhlale Uchwayitilea

◼ Xa uvakalelwa kukuba awuzukuyinandipha into ethile okanye awuzukwazi ukuyenza yisiphule neengcambu loo ngcamango engqondweni yakho.

◼ Zama ukuwunandipha umsebenzi wakho. Enokuba unjani umsebenzi owenzayo jonga izinto ezikuhlaziyayo.

◼ Hlala nabantu abaza kukukhuthaza.

◼ Lungisa ezo zinto unokukwazi ukuzilungisa, uze uzinyamezele izinto ongenakwenzanto ngazo.

◼ Bhala izinto zibe ntathu ezintle eziye zenzeka kuwe suku ngalunye.

[Umbhalo osemazantsi]