Intlungu Abatyhubela Kuyo Ookrebe
NGUMBALI KAVUKANI! EMEXICO
ZIMBALWA izilwanyana ezoyikeka njengookrebe. Kuqikelelwa ukuba ehlabathini jikelele, ookrebe bahlasela abantu abakumlinganiselo omalunga nama-75 ngonyaka, abali-10 kubo bayafa. Kwezi ziganeko, neefilimu ziphinda zongeze ngokubonisa ukrebe oligongqongqo elitya abantu. Inyaniso kukuba umel’ uchul’ ukunyathela kwiindawo enookrebe. Noko ke, izibakala zibonisa ukuba abantu abaninzi babulawa ziinyosi naziingwenya kunokuba bebulawa ngookrebe.
Kwelinye icala, ookrebe bazingelwa ngabantu. Umphandi wombutho oyiArgus Mariner Consulting Scientists, kwiphephancwadi iPremier uthi: “Minyaka le kubanjiswa ookrebe abangaphezu kwezigidi ezili-100—kangangokuba bebaninzi aba krebe, xa benokukroziswa omnye emva komnye, bebeya kuwujikeleza kahlanu umhlaba.” Ukongezelela ekulotyweni kwabo, inani labo liphinda lincitshiswe kukungazali kakhulu, ukukhula kade, ukumitha ixesha elide nokonakaliswa kweendawo abazalela kuzo, zonke ezi zinto ziphumela ekubeni banciphe ngokukhawuleza. Ukuba ookrebe bangaphela, kuya kuthabatha iminyaka ngaphambi kokuba babe baninzi kwakhona.
Uninzi lookrebe lubanjiswa ngenxa yamaphikwana abo, nathengiswa ngemali etshisiweyo kumazwe aseAsiya kusithiwa kwenzelwa amayeza namanye avusa inkanuko.a Isuphu eyenziwe ngala maphikwana kukutya kookumkani yaye kunokuxabisa iR 1 000 isitya nje esinye! Ukuze kuthengiswe kwiimarike zaseAsiya, ookrebe baye basikwe la maphikwana bephila baze baphoswe elwandle apho bafika bafe ngenxa yendlala okanye barhaxwe.
Ikho Into Emele Yenziwe Ukuze Basinde
Ngaba oku kubulawa kookrebe kumele kusikhathaze? Kunokuba nzima ukuvelana nookrebe njengokuba sisenza kwiindlovu nakwiminenga. Noko ke, simele sikhumbule ukuba zinendima ebalulekileyo ekugcineni ulungelelwano lwezinto eziphila elwandle. Ngokomzekelo, ekubeni ookrebe bephila ngokutya ezinye iintlanzi ziya kwanda gqitha xa bembalwa.
Kumazwe amaninzi ukuzingela ookrebe akunamiqathango. Emva kweengxoxo ezithabathe iminyaka elishumi, iMexico, ilizwe eliloba ookrebe kakhulu, liye laloba ngaphezu kweetoni ezingama-30 000 ngonyaka yaye kutshanje liye lamisela umthetho okwalelayo ukuzingela ookrebe. Ukuze sibone nje ukwanda kweengxaki ezikhoyo ekulobeni iintlanzi, ukufunwa kwamaphikwana ookrebe kuye kwandisa ukuloba ngokungekho mthethweni kwiindawo ekugcinwa kuzo ookrebe ehlabathini lonke. Ngokomzekelo, umlawuli weGalápagos National Park Service, ukhala ngelithi: “Ukulotywa okungekho mthethweni kookrebe eGalápagos kuye kwantinga kwiminyaka yakutshanje. Linengeniso eninzi eli shishini yaye liye latsala amaqela afihlakeleyo emigulukudu.”
Likho inyathelo eliye lathatyathwa ukuze kusindiswe ookrebe—kwamanye amazwe ukusika la maphikwana akusekho mthethweni. Phofu, uCharlotte Mogensen, weWorld Wildlife Fund ulumkisa ngelithi kusekuninzi okumele kwenziwe. Uthi: “Ookrebe basesichengeni ehlabathini lonke. Sibongoza yonke imibutho yokuloba ukuba inganeli nje ukuba ikuthintele ukupheliswa kokusikwa kwamaphikwana ezi zilwanyana, kodwa kwaziwe bonke ookrebe abalapho ngokuthi kuncitshiswe inani lookrebe ababanjiswayo ukuze ookrebe bande.”
Okuvuyisayo kukuba, uMdali wezilwanyana zasendle kungekudala uza kukuphelisa ukuphathwa kakubi kwezilwanyana. Enye yezo zilwanyana zoyikekayo nezingenakuze zithatyathelw’ indawo ngookrebe.—ISityhilelo 11:18.
[Umbhalo osemazantsi]
a Into efik’ ixake, kumaphikwana ookrebe kukuba kuye kwafunyaniswa ukuba anemekyuri eninzi, nto leyo enokwenza amadoda angabinawo amandla okuzala.
[Ibhokisi/Imifanekiso ekwiphepha 17]
IINKCUKACHA NGOOKREBE
Ubukhulu: Esona silwanyana sikhulu iwhale shark (engaphezulu) inokufikelela iimitha ezili-18 ubude yaye ubukhulu bayo bunokuba ziintoni eziliqela. Kodwa ayinabungozi kuba itya iintlanzi nezilwanyana ezincinane zaselwandle.
Ixesha Lokuzala: Ookrebe bazala emva kokumitha iinyanga ezingama-22.
Umlinganiselo Wokuzala: Ukrebe uzala phakathi kwamathole amabini ukusa kwalishumi ngexesha. Uninzi lwala mathole azalwa ephila.
Umlinganiselo Wokukhula: Uninzi luthabatha iminyaka eli-12 ukusa kweli-15 ngaphambi kokuba nalo luzale.
Ixesha Lokuphila: Kunzima ukwazi ukuba ookrebe baphila ixesha elingakanani, kodwa iwhite shark enoburhalarhume iphila malunga neminyaka engama-60 ubudala.
[Inkcazelo]
Seawatch.org
© Kelvin Aitken/age fotostock
[Umfanekiso okwiphepha 16, 17]
Ngaphezu kweentlobo zezilwanyana ezingama-300, ezingama-62 zinokuphela
[Inkcazelo]
© Mark Strickland/SeaPics.com
[Umfanekiso okwiphepha 17]
Ikhilogram nje enye yephikwana lokrebe linokuthengiswa nge-R 3 000 okanye ngaphezulu. Imihlathi yewhite shark inokuba ngama-R 70 000.
[Inkcazelo]
© Ron & Valerie Taylor/SeaPics.com