Abantu Abaselula Bayabuza . . .

Ndimele Ndenze Ntoni Xa Abazali Bam Bexambulisana?

YINTO engenakwenzeka ukuba ungachatshazelwa ziingxabano zabazali bakho. Kaloku uyabathanda kwaye ulindele ukuba bakuxhase. Xa bengaboni ngasonye nawe inokukuxhalabisa loo nto. Kutheni abazali bakho bengaboni ngasonye maxa wambi?

Iimbono Ezahlukeneyo

UYesu wathi xa indoda nomfazi betshata, baba “nyama-nye.” (Mateyu 19:5) Ngaba oko kuthetha ukuba uyihlo nonyoko baza kusoloko bebona izinto ngasonye? Nakanye. Inyaniso kukuba, nabaphi na abantu ababini—nkqu indoda nomfazi abamanyeneyo—abasoloko bebona ngasonye.

Xa abazali bengaboni ngasonye, akuthethi ukuba umtshato wabo uza kuphela. Kusenokwenzeka ukuba abazali bakho bayathandana—naxa ngamanye amaxesha bebonakala ngathi abaginyani ncam. Yintoni ke le yenza ukuba bagrwangxulane? Kusenokwenzeka ukuba iimbono zabo azifani ngombandela othile. Naleyo ayisoloko iphosakele, ingathethi nokuba umtshato wabo uza kuphela.

Ngokomzekelo: Ngaba wakha waya kubukela ifilimu nabahlobo bakho abasenyongweni waza wafumanisa ukuba indlela eniyibone ngayo le filimu ayifani tu? Inokwenzeka loo nto. Kwanabona bantu basondeleleneyo abasoloko bebona ngasonye.

Kusenokuba njalo nakubazali bakho. Mhlawumbi bobabini bafuna igcinwe imali, kodwa indlela yabo yokuqingqa imali yiyo le ibangel’ ingxaki. Mhlawumbi baceba ukuba nikhe nibethwe ngumoya njengentsapho, kodwa abavisisani ngendlela yokwenza oko. Kusenokuba bobabini bafuna wena ufumane imfundo esemagqabini, suka babe neendlela ezahlukeneyo zokukucebisa. Nantsi ingongoma, umanyano aluthethi ukuba makuhanjwe ngomgca wempuku. Abantu abanyama-nye basenokubona izinto ngokwahlukileyo.

Kodwa kutheni abazali bakho begrwanxulana ngenxa yokungaboni ngasonye? Kutheni ukwahluka nje kwezimvo kubenza baxambulisane?

Ukungafezeki Kunegalelo

Ubukhulu becala ukuxabana kwabazali bakho kubangelwa kukungafezeki. IBhayibhile ithi: “Sonke siyakhubeka izihlandlo ezininzi. Ukuba kukho nabani na ongakhubeki zwini, lowo uyindoda egqibeleleyo.” (Yakobi 3:2) Abazali bakho abafezekanga, phofu wena kuqala awufezekanga. Ngamanye amaxesha, sonke sidla ngokuthetha izinto size sizisole ngazo yaye ngamanye amaxesha loo mazwi siwathethayo anokwenzakalisa “njengokuhlaba kwekrele.”—IMizekeliso 12:18.

Mhlawumbi ukhe wayiqaphela nawe le nto. Ngokomzekelo, ngaba wakha waxambulisana nomntu osenyongweni kuwe? Mhlawumbi sikhona isiganeko osikhumbulayo. Intwazana egama linguMarie,a ithi: “Sonke sikhe sixambulisane nabanye. Phofu, ngabantu endibathandayo abadla ngokundicaphukisa—mhlawumbi kukuba ndilindele lukhulu kubo!” Amadoda nabafazi abangamaKristu balindele lukhulu omnye komnye yaye loo nto ayimele isothuse kuba iBhayibhile ibabekela imilinganiselo ephakamileyo. (Efese 5:24, 25) Kuba bengafezekanga, kuyinto elindelekileyo ukuba omnye one omnye. IBhayibhile ithi: “Kuba bonke bonile baza basilela kuzuko lukaThixo.”—Roma 3:23; 5:12.

Ngoko ke, ikho le nto iza kwenza abazali baxambulisane. Umpostile uPawulos wathi abantu abatshatileyo “baya kuba nembandezelo enyameni yabo,” kanti enye inguqulelo yesiXhosa ithi “baya kuhlala befikelwa ziingxaki.” (1 Korinte 7:28.) Baninzi oonobangela abanokwenza izinto zingahambi kakuhle ekhaya—umqeshi ophethel’ imbengwana umzali wakho, ukuxinana kweemoto namatyala angalindelekanga.

Ukwazi ukuba abazali bakho abafezekanga nokuba ngamanye amaxesha kunokwenzeka ukuba balwisana neengxaki ezinkulu, kunokukunceda ukujonge ngeny’ indlela uxambulisana kwabo. Yiloo nto kanye eyafunyaniswa nguMarie. Uthi: “Ingathi abazali bam bagrwangxulana ngakumbi ngoku kunokuba kwakunjalo ngaphambili, maxa wambi ndiye ndizibuze enoba basathandana kusini na. Kodwa ke ndiphinde ndicinge, ‘Iminyaka engama-25 utshatile nabantwana abahlanu, yhu zininzi ezi zinto kufuneka bazinyamekele!’” Mhlawumbi ‘usenokuvelana’ nabazali bakho ngokwazi ukuba zininzi iimbopheleleko zabo.—1 Petros 3:8.

Indlela Yokujamelana Nale Meko

Mhlawumbi uyayiqonda into yokuba abazali bakho abafezekanga, yaye uyazi ukuba zininzi iingxaki abamele bajamelane nazo suku ngalunye. Kodwa ke umbuzo usemi, Yintoni omele uyenza xa bexambulisana? Khawuzame la macebiso alandelayo:

◼ Mus’ ukungenelela. (IMizekeliso 26:17) Ayingomsebenzi wakho ukuzenza umcebisi ngemitshato kuba ufuna ukubuyisela izinto esiqhelweni. Phofu kunokwenzeka ukuba isikhuni siya kubuya nomkhwezeli. UCharlene oneminyaka eli-18 ubudala uthi: “Ndikhe ndazama ukulamla, kanti ndiwuphosil’ umhlola, ndangxoliswa kanobom.” Bayeke bazilungisele iingxaki zabo.

◼ Yiba nembono elungeleleneyo. (Kolose 3:13) Njengokuba besikhe satsho ngaphambili, ukuxambulisana kwabazali bakho akuthethi kuthi baza kuqhawul’ umtshato. Ngoko ke, musa ukucinga ukuba izinto zonakele xa bexambulisana ngento engenamsebenzi. UMelanie, oneminyaka engama-20 ubudala uthi: “Naxa bexambulisana, ndiyazi ukuba basathandana yaye basasithanda nathi. Baza kuyilungisa ingxaki yabo.” Nalo nto inokwenzeka kubazali bakho xa bengaboni ngasonye ngezinto.

◼ Phalaza imbilini yakho ngokuthandaza. Akunyanzelekanga ukuba ube nomvandedwa ngezinto ozixhalabeleyo. IBhayibhile ithi: “Umthwalo wakho wulahlele kuYehova, yaye yena wokuxhasa.” (INdumiso 55:22) Umthandazo unokwenza umahluko. Umpostile uPawulos wabhalela abaseFilipi wathi: “Zaziseni izibongozo zenu kuThixo ngomthandazo nesikhungo nombulelo; yaye uxolo lukaThixo olungaphaya kokuqonda luya kuzilinda iintliziyo zenu namandla enu engqondo ngoKristu Yesu.”—Filipi 4:6, 7.

◼ Nyamekela impilo yakho. Asibobulumko ukuzixhalabisa ngokugqith’ emgceni ngezinto ezingaphaya kwamandla akho. Oku kunokuchaphazela nempilo yakho. IBhayibhile ithi: “Inyameko yokuxhalaba esentliziyweni yendoda iya kuyibangela ukuba iqubude.” (IMizekeliso 12:25) Zama ukuba unciphise uxinezeleko ngokuchitha ixesha nabahlobo abakhuthazayo nangokwenza imisebenzi eyakhayo.

◼ Thetha nabazali bakho. Nakuba umele ungangeneleli kwiingxabano zabo, ngokuqinisekileyo unokubaxelela indlela ezikuchaphazela ngayo. Khetha ixesha elifanelekileyo lokuthetha nomnye wabo. (IMizekeliso 25:11) Thetha “ngomoya wobulali nentlonelo enzulu.” (1 Petros 3:15) Musa ukuba bek’ ityala. Kunoko chaza indlela ochaphazeleka ngayo kukuxambulisana kwabo.

Kutheni ungazami la macebiso angasentla? Abazali bakho banokusabela kwimigudu oyenzayo. Naxa bengasabeli, uyakwaneliseka kukwazi ukuba, naxa ungenakungenelela kwiingxabano zabo, unako ukwenza okuthile ngendlela wena osabela ngayo xa bengaboni ngasonye.

Amanye amanqaku athi “Abantu Abaselula Bayabuza . . . ” ifumaneka kwiWeb site ethi www.watchtower.org/ype

[Umbhalo osemazantsi]

OMELE UCINGE NGAKO

◼ Kutheni kunzima ngamanye amaxesha ukuba abazali bahlalisane kakuhle?

◼ Unokuthi kumntwana wakowenu omncinane ochatshazelwa kukuxabana kwabazali?

[Ibhokisi ekwiphepha 20]

AMAZWI ABHEKISWA KUBAZALI

Kungangenkankulu ukuba abantu abatshatileyo bahlale bebona ngasonye. Indlela ozisingatha ngayo ixhomekeke kuwe. Iingxabano zabazali ziyabachaphazela abantwana. Lo asingombandela eninokuwubetha ngoyaba kuba abantwana benu bayafunda kumzekelo eniwumiselayo. (IMizekeliso 22:6) Kutheni ningasebenzisi elo thuba ekucombululeni iingxaki zenu? Zama la macebiso alandelayo:

Phulaphula. IBhayibhile ithi ‘sikhawuleze ukuva, sicothe ukuthetha, sicothe ukuqumba.’ (Yakobi 1:19) Musa ukugalela ityuwa enxebeni ‘ngokubuyisela ububi ngobubi.’ (Roma 12:17) Naxa iqabane lakho libonakala lingafuni ukuphulaphula, wena unako ukukhetha ukuphulaphula.

Musa ukulihlasela iqabane lakho kunoko chaza ingxaki. Uzolile, lichazele iqabane lakho indlela ekuchaphazela ngayo indlela elizenza ngayo izinto. (“Ndiba buhlungu xa . . . ”). Musa ukubelik’ ityala okanye uligxeke (“Akundikhathalelanga.” “Akundiphulaphuli.”)

Khawubethwe ngumoya. Maxa wambi kuba bhetele ukuba nikhe nithi xha ekuthetheni ngombandela ude uthomalale umsindo. IBhayibhile ithi: “Ukuqala kosukuzwano kunjengovulela amanzi; ngoko ngaphambi kokuba kuvele ingxabano, rhoxa.”—IMizekeliso 17:14.

Cela uxolo kwiqabane lakho—yaye ukuba kufanelekile nakubantwana bakho. UBrianne, oneminyaka eli-14 ubudala, uthi: “Ngamanye amaxesha xa begqiba ukuxambulisana, abazali bam beza kum nakumkhuluwa wam baze bacele uxolo ngenxa yokuba bayayazi indlela okusikhathaza ngayo oko.” Enye yezona zifundo unokuzifundisa abantwana bakho ngokuthobeka kukuthi, “Ndicela uxolo.”

Ukuze ufumane inkcazelo engakumbi, funda uVukani! kaJanuwari 8, 2001, iphepha 8-14 nokaFebruwari 8, 1994, iphepha 19-28.

[Umfanekiso okwiphepha 19]

Musa ukubabek’ ityala. Chaza nje indlela ovakalelwa ngayo