Ubuhle Beerozi ZaseAfrika
NGUMBHALI KAVUKANI! EKENYA
“Yeyona ntyatyambo intle ndakha ndayibona!” “Sesona sipho sihle unokusipha umhlobo osenyongweni.” “Kuyindlela ethile yokuthi, ‘Ndiyakuthanda.’”
MHLAWUMBI nawe uvakalelwa ngendlela efanayo nabantu baseKenya, abacatshulwe ngasentla. Kuzo zonke iintyatyambo, kuquka nezo zikhula endle nezityalwa ngabantu, kunokwenzeka ukuba ayikho eye yathandwa ehlabathini jikelele njengerozi. Iye yathimba ingqalelo yabantu kangangeenkulungwane. Iimbongi ziye zabhala ngayo ngoxa abazobi ngokuphindaphindiweyo beye bazizoba. UShakespeare wayincoma ngamazwi abhalwe kwincwadi ethi Romeo and Juliet athi: “Yintoni le ingaka ngegama? Nkqu nerozi ukuba ibinagama limbi ibiya kuqhubeka inevumba elimnandi.” Ngenxa yerozi, ubuhlobo buye basekwa baza bomelezwa, iye yangciba iintanda zobuhlobo yaza yomeleza abantu abaninzi abagulayo.
Ukongezelela koko, irozi yenza intywenka yemali. Kumazwe anemozulu entle yokutyala iintyatyambo, irozi yeyona ingenisa imali eninzi. Ngokomzekelo, eKenya, kwizigidi zeentyatyambo ezithunyelwa kwamanye amazwe nyaka ngamnye, ama-70 ekhulwini ziirozi, ngenxa yoko eli lizwe linkqenkqeza phambili ehlabathi ngokuvelisa le ntyatyambo.
Mandulo, ngaphambi kokuba abantu bazi ngeempawu zerozi ezithi ndijonge, irozi ibizikhulela endle. Namhlanje, ngokudibanisa iimbewu zeentyatyambo, kuye kwaveliswa iintlobo ezili-100 zeerozi zasendle kwaza kwaveliswa mawaka waka azo. Ngenxa yoko, le ntyatyambo yaziwe ehlabathini ngokubanzi ifumaneka phantse kulo naliphi na ilizwe emhlabeni. Eyona rozi yaziwayo neyona ityalwe kakhulu kuthiwa yihybrid.
Ukusuka Efama Ukuya Kwingqayi Yakho
Abantu abaninzi iirozi bazithenga emarikeni okanye kubantu abathengisa iintyatyambo. Ezi ntyatyambo zityalwa kwiifama ezinkulu ukuze zithengiswe yaye zifuna unonophelo oluthe chatha xa kuthelekiswa nezo sizityala emakhayeni ethu. Xa besityelele enye yezo fama eNairobi siye sabona inkathalo ekhethekileyo ukuze kulungiselelwe ezi ntyatyambo ngaphambi kokuba ziye emarikeni.
Kule fama, njengayo nayiphi na enye yaseKenya, kukho iindlwana eziluhlaza ezibonakala lula yaye kugcinwa kuzo iirozi ezithengiswayo kwiifama. (Khangela ifoto ekwiphepha 26.) Ezi ndlwana zakhelwe iinjongo eziliqela. Iintyatyambo ezisandul’ ukudityaniswa ziethe-ethe yaye kufuneka zikhuselwe kwimozulu embi. Izantyalantyala zemvula, imimoya evuthuzayo nemitha yelanga, zonke ezi zinto zinokuzenzakalisa. Ukuze kugcinwe iqondo lobushushu lifanelekile, kufuneka ungene lula umoya opholileyo noshushu.
Kule ndlwana kukho iintyatyambo ezingumkrozo ezingalinganiyo. Kule fama kutyalwa iirozi ezahlukeneyo, ezifana neyona yaziwayo ihybrid tea rose, esikwa ngaphezulwana nje kweesentimitha ezingama-70 ubude ukusa kwiseetheart rose engama-35 ubude. Le fama ezihektare ezimbini ezinesiqingatha inokutyala izityalo ezingama-70 000.
Ezi ntyatyambo zizifumana njani izondlo zazo? Akusetyenziswa umhlaba nje oqhelekileyo. Ezi ntyatyambo zibekwa phezu kwamatye entaba-mlilo kuze kugalelwe umxube wemichiza phezu kwazo. Kudla ngokunconyelwa le nkqubo, kuba kaloku amatye akanazo iintsholongwane ezixhaphakileyo emhlabeni. Ezi zityalo zinkcenkceshelwa ngohlobo oluthile lwemibhobho. Kule nkqubo, imibhobho emincinane ijoliswa kwezi ntyatyambo ize ikhuphe amanzi nezinye izondlo ngezixa ezifanelekileyo. Ngenxa yokuba zinemingxuma iindawo ezihleli ezi ntyatyambo zivulela amanzi angene kuzo. Emva koko aphinda asetyenziswe.
Phezu kokuba zinyanyekelwa kakuhle, iirozi zinokuhlaselwa zizifo ezahlukeneyo ezibangelwa kukungunda. Ezi zifo ziquka ibotrytis, iSphaerotheca pannosa, ezihlasela amagqabi nesiqu sezityalo. Ukuba azibekwa esweni, ezi zifo zinokuyonakalisa intyatyambo. Ukuzitshiza ngamayeza athintela ukungunda kunokuba luncedo.
Njengokuba ixesha lihamba, kubonakala imibala eqaqambileyo, nto leyo ebonisa ukuba iirozi sele zilungele ukuvunwa. Ezi ntyatyambo zisikwa kakuhle ngoxa amathupha esavalekile. Okweli xesha amagqabi akakavuleki. Ukusika ezi ntyatyambo ngoku kwandisa ixesha lazo kuze kugcine nombala wazo. Noko ke, ixesha ezisikwa ngalo ezi ntyatyambo linokwahluka kuxhomekeke uhlobo lwentyatyambo. Kubhetele ukusika iintyatyambo kusasa okanye xa sele litshonile ilanga kuba ulophu luninzi yaye azibuni ngokukhawuleza. Emva kokuba zisikiwe, iintyatyambo zifakwa kwigumbi elibandayo. Oku kuqinisekisa ukuba iirozi zihlala zingabuni ixesha elide.
Ezi ntyatyambo zidlulela kwinqanaba elilandelayo. Kweli nqanaba zahlulwa ngokwemibala nobukhulu bazo. Ekugqibeleni, iintyatyambo zilungelwe ukusiwa emarikeni. Ukusuka kule fama ziya kwisikhulo seenqwelo-moya saseNairobi, zize ke zithunyelwe eYurophu, umgama omalunga neekhilomitha ezingamawaka ukusuka apho. Ngenxa yokuba zikhawuleza zibune, ezi ntyatyambo kufuneka zifike kwiimarike zasekuhlaleni nakwezamazwe ngamazwe kwiiyure nje ezingama-24 emva kokuba zisikiwe.
Xa uphinde ufumana iintyatyambo zerozi njengesipho okanye uzithenga emarikeni okanye kumntu othengisa iintyatyambo, cinga ngomgama ezihambe wona. Mhlawumbi oko kuya kulwandisa uxabiso lwakho ngoMdali uYehova uThixo.—INdumiso 115:15.
[Ibhokisi/Imifanekiso ekwiphepha 26]
Ngaba Kuya Kuze Kubekho Irozi Eluhlaza Okwesibhakabhaka?
Irozi isuka kude. Phofu, kuyabonakala ukuba uhambo lwayo luse lude. Kukho iindlela ezintsha zokutyala ezisetyenziswayo kweli shishini. Zimbalwa iintyatyambo ezinokuvelisa imibala emininzi njengerozi. Nguwuphi umbala owuthanda kakhulu? Ngumbala omhlophe, omthubi okanye omfusa? Uninzi lwale mibala luvele ngokudityaniswa kweerozi ezahlukeneyo.
Ngokomzekelo, ubusazi ukuba iirozi “ezibomvu,” zazingekho ekuqaleni? Iirozi azikwazi ukuvelisa umbala obomvu. Kodwa lo mbala ubomvu wavela ngokuxutywa nezinye izityalo ngowe-1930, kwaza ke kwavela umbala obomvu noqaqambileyo esiwaziyo namhlanje. Nakuba kukho iintlobo ezahlukeneyo zerozi, kukho umbala ekudala werozi olindelwe ngamehlo abomvu—leyo yirozi eluhlaza. Irozi azikwazi ukuvelisa umbala oluhlaza. Noko ke, emva kohlolisiso lweminyaka emininzi ziingcaphephe zenkampani yaseOstreliya neyaseJapan, ngowama-2004 kwenziwa irozi eluhlaza eyilwe ngokudibanisa izityalo ezahlukeneyo. Kodwa kuse kude engqinibeni ukuba kungenziwa irozi eluhlaza nangakumbi. Asazi, ukuba yozala nkomoni.
[Umfanekiso]
Indlwana yokukhulisa iintyatyambo
[Umfanekiso okwiphepha 25]
Zilungele ukuvunwa