Okwenzeka Ehlabathini
◼ IINTERGOVERNMENTAL PANEL ON CLIMATE CHANGE (IPCC) yaseSwitzerland ithi: “Umhlaba uya usiba “shushu ngokuba shushu” kuyo yonke lento abantu ngabona babekek’ ityala.
◼ EJamani kuqikelelwa ukuba abantu abali-1,4 ne-1,9 lesigidi “ngamakhoboka amayeza.” Le ngxaki iyafana nokuba likhoboka lotywala.—TAGESSCHAU, GERMANY.
◼ EBritani, abantwana abangaphantsi konyaka basesichengeni sokugetyengwa.—THE TIMES, BRITAIN.
◼ UDennis Schornack weInternational Boundary Commission uthi: “Iindawo ezithile kumda ophakathi kweUnited States neKhanada zene gqitha kangangokuba azisabonakali kakuhle.”—ASSOCIATED PRESS, UNITED STATES.
Umzimba Uyakwazi Ukuzinyanga
UNjingalwazi Gustav Dobos oligqala kwisiBhedlele Samalahle saseEssen eJamani uthi: “Umzimba womntu uyakwazi ukunyanga malunga nama-60 ukusa kuma-70 ekhulwini ezigulo.” Kuthiwa ukuze umzimba uzinyange uvelisa imichiza anjengecortisone namachiza okuthintela ikidney stones amalunga nama-30 ukusa kwangama-40. Zininzi izinto esele zisaziwa izazinzulu ngale nkqubo, kodwa zininzi nezinto ezingekazazi. Iphephancwadi iVital lithi izazinzulu ziyaqonda ukuba, “le nkqubo yokuzinyanga komzimba iquka inkqubo entsonkothileyo ebandakanya amadlala, ukuzikhusela komzimba neemvakalelo zethu.” Noko ke, liphinda lihlabele mgama lisithi uxinezeleko neengxaki: “Zinokuyenza buthathaka inkqubo yokuzikhusela komzimba.”
Ukucakacwa Kobutyebi Behlabathi
IGuardian yaseLondon ithi: “Iqaqobana labantu abambalwa kwabalikhulu bazizityebi ezingawothiyo umlilo, balawula ama-40 ekhulwini bobutyebi besi sijikelezi langa.” Eli phephancwadi lithi: “Omakhonya ngabo bashishina kumaziko otyalo zimali okanye kumashishini anento yokwenza neInternet.” Uhlolisiso olwenziwa ngumbutho weZizwe Ezimanyeneyo lwadiza ukuba ama-37 ekhulwini ezi zinhanha zihlala eUnited States of America, ngoxa ezingama-27 ekhulwini zihlala eJapan size isi-6 ekhulwini sihlale eUnited Kingdom. Isiqingatha sabona bantu bangamahlwempu ehlabathini silawula umnqongo kuphela kobu butyebi. Ngokutsho kukaDuncan Green, intloko yophando eBritani kwiziko elibizwa ngokuba yiOxfam, uthi, “lo msantsa uphakathi kwezinhanha namahlwempu uyothusa. . . . awunakuze ukwazi ukuba sisityebi ukuba abantu abangama-800 ezigidi balala ngamanzi yonke imihla.”
Ukungangqamani Kwenani Labantwana Abazalwa ETshayina
Ngowama-2005 bekuzalwa abantwana abangamakhwenkwe abali-118 ngoxa kuzalwa amantombazana ali-100 kuphela. Ngokutsho kweChina Daily kwamanye amaphondo eli lizwe, “kuzalwa amakhwenkwe ali-130 ngoxa amantombazana eli-100. Unobangela wale ngxaki kukuba abazali bayakwazi ukumbona umntwana esengaphakathi kunina enokuba uza kuba yinkwenkwe okanye intombazana kusini na. Amagosa karhulumente athi oku kubangelwa kukuqingqwa kwenzala kwaseTshayina, izibini ezihlala ezidolophini kufuneka zizale umntwana abe mnye kuphela. Eli phephendaba lithi: “Ngowama-2020 kuya kube kukho amadoda azizigidi ezingama-30 angenakufumana bafazi ngenxa yokunqongophala kwabasetyhini,” yaye oku kungalungelelani kwenani labantwana abazalwayo kuya kuba “nefuthe entlalweni.”