Ixesha Lobutyebi—Koobani?
SIPHILA kwihlabathi elinobutyebi obuninzi. Ngaba kunzima ukukholelwa oko? Kaloku, abantu bamanye bamazwe abasoze bayisebenzise bayigqibe imali yabo. Kuqikelelwa ukuba ngowama-2005 ingeniso yemveliso yehlabathi lonke yaba ngaphaya kwee-R424 ezigidi zezigidi. Ukuba le mali ibinokwabelwa umntu ngamnye ophilayo ngoku emhlabeni, besiya kufumana malunga nee-R63 600. Eso sixa siyanda mihla le.
Kodwa ke, izinto zahluke mpela koko sikwaziyo ngobutyebi behlabathi. Ngokutsho kwempapasho yakutshanje yeZizwe Ezimanyeneyo, abona bantu bathathu bazizinhanha emhlabeni, banobutyebi obungaphezu kwengeniso yamazwe angama-48 ahlwempuzekileyo edibene. I-UN Development Programme ithi abantu abangamawaka ezigidi ezibini ezinesiqingatha, bazabalazela ukuphila ngemali engaphantsi kweedola ezimbini ngosuku. Abantu abangamakhulu ezigidi abondlekanga yaye ukusela amanzi acocekileyo kuliphupha.
EUnited States, izazi ngentlalo zenza uphando ngeqela labantu “abasesichengeni sokuba ngamahlwempu.” Ngabantu abangaphezu kwezigidi ezingama-50 kweli lizwe abantyumpantyumpeka kobu bugxwayiba, phezu kwako nje ukuba abantu beli lizwe bedad’ emalini.
Kutheni kubonakala ngathi nakuba ehlabathini lonke abantu abaninzi beengomal’ iyavuza kodwa kukho abantu abangamakhulu ezigidi abaziimpula zikaLujaca? Kutheni bebaninzi kangaka abantu abangenakuze beve nevumba eli lobutyebi?
[Amagama acatshulweyo akwiphepha 3]
Abona bantu bathathu bazizinhanha emhlabeni banobutyebi obungaphezu kwengeniso yamazwe angama-48 ahlwempuzekileyo edibene
[Umfanekiso okwiphepha 2, 3]
Abantwana abasebenza kulo mzi-mveliso wezitena bahlawulwa ii-R3,50 ngosuku
[Inkcazelo]
© Fernando Moleres/Panos Pictures
[Inkcazelo Ngomfanekiso okwiphepha 3]
© Giacomo Pirozzi/Panos Pictures