Ngaba Ulwaphulo-mthetho Lwaphul’ izikeyi?
◼ Umfundi ophazamisekileyo engqondweni, oxhobe wafohlela, unqunqel’ egoqweni abafundi nootitshala besikolo afunda kuso.
◼ Intwazana eneminyaka emine ubudala iyathinjwa loo nto ishiya iintliziyo zabazali zilihlwili.
◼ Inkwenkwe ekwishumi elivisayo iyavuma ukuba iye yabulala umntu kuba nje ifuna ukuziyolisa yaza eso sidumbu yasibonisa oontanga bayo abayingcina loo nto iyindaba yakwamkhozi iiveki eziliqela.
◼ Kwi-internet, umntu oxhaphaza abantwana ngokwesini ucebisana nabanye abaxhaphazi ngendlela yokurhwebesha abantwana.
EZI zezinye zezinto ezingundaba-mlonyeni kumajelo eendaba kule mihla. Ngaba uziva ukhuselekile kwindawo ohlala kuyo ngakumbi ebusuku? Ngaba wena okanye intsapho yakho nikhe nangamaxhoba olwaphulo-mthetho? Izigidi zabantu ehlabathini jikelele—nkqu nakumazwe awayefudula ekhuselekile—ziyavuma ukuba azilali buhlayo ngenxa yolwaphulo-mthetho nobundlobongela. Khawuve nje ezi ngxelo zivela kwamanye amazwe.
EJAPAN: IAsia Times inikela le ngxelo: “IJapan yayikade ilelinye lawona mazwe akhuselekileyo ehlabathini . . . Sithetha nje, oko kuziva ukhuselekile kusuke kwathi shwaka yaye ukunqabiseka kwabantu kuye kwathatyathelw’ indawo yinkxalabo, ulwaphulo-mthetho nobunqolobi obugqugqisileyo ehlabathini.”
KWILATIN AMERICA: Ingxelo yeendaba yowama-2006 ithi, oosomaqhuzu baseBrazil bacingela ukuba kuza kubakho imfazwe yabanqolobi eSão Paulo. Ngenxa yobundlobongela obabugqugqise iiveki eziliqela, umongameli weli lizwe wayalela ukuba kutyalwe amajoni kwizitrato zesi sixeko. Ingxelo yephephandaba iTiempos del Mundo ithi, kuMbindi waseMerika naseMexico, “kukho ulutsha olungama-50 000 olukumaqela emigulukudu yaye le migewu yenza abasemagunyeni balale bephaphama.” Eli phephandaba loleka lisithi: “Ngonyaka wama-2005 nje kuphela, la maqela eenjubaqa aye abulala abantu abamalunga nama-15 000 eEl Salvador, eHonduras, naseGuatemala.”
EKHANADA: IUSA Today ngowama-2006 yathi: “Iingcali zolwaphulo-mthetho zixhalabile kukwanda kwamaqela eenjubaqa. Amapolisa afumanise ukuba kukho amaqela emigulukudu angama-73 kwizitrato zaseToronto.” Eli phephandaba likwathi isikhulu samapolisa saseToronto savuma ukuba ingxaki yokwanda kwamaqela emigulukudu ayinakuconjululwa lula.
EMZANTSI AFRIKA: UPatrick Burton, ophanda ngolwaphulo-mthetho, uthi kwiFinancial Mail: “Ukoyika ulwaphulo-mthetho kuchaphazela bonke abantu abaselula eMzantsi Afrika.” Eli phephandaba lalek’ umsundulo lisithi, oku kuquka “ulwaphulo-mthetho olunxulumene nobundlobongela njengokuphangwa kuxhotyiwe, ukuhluthelwa imoto nokuxhonyiswa ezibhankini.”
EFRANSI: Abantu abaninzi abahlala kwiindawo eziqeshisayo umhla nezolo baphila ubomi bentshontsho “njengokuba behamba kwizinyuko ezonakaliswe ngabom, behamba kwiindawo zokupakisha iimoto eziyingozi yaye besebenzisa izithuthi zikawonke-wonke eziyingozi ebusuku.”—Guardian Weekly.
EUNITED STATES: Amaqela emigulukudu alungelelanisiweyo nawo anegalelo kule ntsindabadala. Ngokutsho kwengxelo ekwiNew York Times, kwelinye ilizwana laseMerika, uhlolisiso olwenziwa ngamapolisa lwadiza ukuba umlisela nomthinjana oluphantse lube ngama-17 000, lungamalungu kwelinye lala maqela angama-700. La maqela ande ngamalungu angama-10 000 kwisithuba seminyaka emine nje kuphela.
EBRITANI: KwiThe Times yaseLondon iUNICEF igqabaza ngendlela ulwaphulo-mthetho olubachaphazela ngayo abantwana isithi: “Abantwana abaninzi baseBritani bafa ngokudutyulwa. . . . Amaxhoba nababulali ngabantu abaselula.” Inani lamabanjwa Engilani naseWales liye lantinga laya kutsho kuma-80 000.
EKENYA: Ingxelo yeendaba ithi: “Umama nentombi yakhe abangazange baphume ngokukhawuleza kwimoto yabo badutyulwa ngabantu ababeyohlutha ecaleni kohola wendlela oxakekileyo. Ikomkhulu laseKenya, iNairobi, lidume ngokuba nazo zonke iintlobo zolwaphulo-mthetho, njengokohluthwa kweemoto, ukuphanga nokuqhekezwa kwamakhaya ngogonyamelo.
Ngaba ulwaphulo-mthetho lwaphul’ izikeyi? Yintoni kanye kanye unobangela wolwaphulo-mthetho? Ngaba likho ithemba lokuba ngenye imini abantu baya kuze bahlale ngoxolo nonqabiseko? Amanqaku alandelayo aza kuphendula le mibuzo.