Ngaba Ingxaki Yolwaphulo-mthetho Iya Kuze Iconjululwe?
“Uphando luye lwatyhila ukuba inkoliso yaba nqevu naxa sele ivela entolongweni iqala apho ibiyeke khona ukwaphul’ umthetho yaye ngamanye amaxesha yenza umonakalo ongenakuhlawulwa ngemali.”—Inside the Criminal Mind Ebhalwe nguGqr. Stanton E. Samenow.
KUNGAKHATHALISEKI ukuba uhlala phi, suku ngalunye kubonakala ngathi ulwaphulo-mthetho luthabath’ unyawo. Ngaloo ndlela, kusengqiqweni ukubuza ukuba: Ngaba izigwebo eziqatha, ukuvalelwa entolongweni ixesha elide nezinye iindlela ziyalunciphisa ulwaphulo-mthetho? Ngaba intolongo iyaziphucula izimilo zamabanjwa? Okubaluleke nangakumbi kukuba, Ngaba abantu bayamlungisa oyena nobangela wolwaphulo-mthetho?
Mayelana neendlela ezikhoyo zokunciphisa ulwaphulo-mthetho uGqr. Stanton E. Samenow ubhala athi: “Emva kokukhululwa entolongweni, [izikrelemnqa] ziba namacebo amatsha zize zilumke nangakumbi, kodwa zibuyele kwikakade lazo. Amanani adiza ukuba xa izaphuli-mthetho ziphinda zibanjwa emva kokuba ziphuma entolongweni sukuba ziye azakhathala.” Ngoko ke, iintolongo ziyazichewula izaphuli-mthetho.—Funda ibhokisi enomxholo othi “‘Ngaba Zizikolo Zolwaphulo-mthetho?”’ kwiphepha 7.
Ukongezelela koko, izaphuli-mthetho ezininzi azohlwaywa yaye oku kwenza oonqevu abaninzi bacinge ukuba ulwaphulo-mthetho lufanelekile. Ngenxa yoko bayarhumrheka. Umlawuli osisilumko wakha wabhala wathi: “Ngenxa yokuba isigwebo nxamnye nomsebenzi ombi singaphunyezwa ngokukhawuleza, ngoko intliziyo yoonyana babantu izele ngaphakathi kwabo kukwenza okubi.”—INtshumayeli 8:11.
Ngaba Izaphuli-mthetho Zinyanzelwa Ziimeko Okanye Ziyazikhethela?
Ngaba kunyanzelekile ukuba abantu bophule umthetho kuba nje befuna ukugxotha ikati eziko? USamenow uthi: “Ndandicinga ukuba ulwaphulo-mthetho luyinto eyamkelekileyo, okanye isebe lenkawu kwiimpula zikaLujaca, nabantu abaphila ubomi obungazinzanga.” Emva kokuwuphanda ixesha elide lo mbandela wayitshintsha indlela awayecinga ngayo. Wagqiba kwelokuba “izaphuli-mthetho ziyaluthanda ulwaphulo-mthetho. Ulwaphulo-mthetho lubangelwa yindlela umntu acinga ngayo kungekhona imeko aphila kuyo.” OkaSamenow wongezelela ngelithi: “Indlela aziphethe ngayo umntu iphenjelelwa yindlela acinga ngayo. Yonke into esiyenzayo siqale siyicinge ngaphambi kokuba siyenze, xa siyenza nasemva kokuba siyenzile.” Ngaloo ndlela kunokuba izaphuli-mthetho zijongwe njengeentsizana ezingenakuzinceda, wagqiba kwelokuba ziyazikhethela ukuphila ngaloo ndlela.”a
Elona gama siza kuligwadla lelithi “ukuzikhethela.” Kutshanje inqaku elisematheni eBritani belinomxholo othi: “Ulwaphulo-mthetho Ngumsebenzi Abazikhethela Wona Abafana Basezidolophini Kuba Befuna Ukuphucula Imeko Yabo.” Abantu banenkululeko yokuzikhethela indlela abafuna ukuphila ngayo nkqu naphantsi kwezona meko zinzima. Ayinakukhanyelwa into yokuba abantu banyamezela izinto ezibuhlungu ekuhlaleni nobuhlwempu okanye baphile kwiintsapho ezisoloko zixabana, kodwa soze babe zizaphuli-mthetho. USamenow uthi: “Ngaba nqevu abaphul’ umthetho kungekhona abamelwane abangalunganga, abazali abangakwaziyo ukuqeqesha abantwana babo, . . . okanye ukungabikho kwemisebenzi. Ulwaphulo-mthetho lubangelwa yindlela umntu acinga ngayo kungekhona iimeko zasekuhlaleni.”
Ulwaphulo-mthetho Lubangelwa Yindlela Umntu Acinga Ngayo
IBhayibhile yalatha kumntu wangaphakathi kungekhona kwiimeko aphila kuzo. UYakobi 1:14, 15 uthi: “Ngamnye ulingwa ngokutsalwa nokuwexulwa ngumnqweno wakhe. Wandule ke umnqweno, xa uthe wakhawula, uzale isono.” Xa umntu efukame iingcinga ezimbi, uba neminqweno emibi. Le minqweno inokuphumela kwizenzo ezibi. Ngokomzekelo, ukubukela imifanekiso engamanyala kunokumenza umntu athi phithi thwanga sisini yaye oko kunokumenza adlwengule.
Enye inkalo esimele sicinge ngayo lihlabathi elithanda imali, ukuzonwabisa nokuzifica ngeziyolo. Mayela neli xesha lethu iBhayibhile yaxela kwangaphambili ukuba: “Ngemihla yokugqibela . . . , abantu baya kuba ngabazithandayo, abathandi bemali, . . . iindlobongela, abangathandi kulunga, abathandi beziyolo kunokuba bathande uThixo.” (2 Timoti 3:1-5) Okulusizi kukuba, iifilimu, imidlalo yevidiyo, uncwadi nabantu abamisela imizekelo emibi, mpawu ezo eziphenjelelwa lihlabathi yaye zikhuthaza ulwaphulo-mthetho.b Noko ke, umntu ngamnye kufuneka alumke angaphenjelelwa zezi mpawu. Bambi ababefudula bephenjelelwa zezi mpawu baye bayitshintsha indlela abaphila ngayo.
Abantu Banokutshintsha
Ukuba sisaphuli-mthetho akuthethi ukuba uya kuhlala usisaphuli-mthetho. Incwadi ethi Inside the Criminal Mind ithi, kanye njengokuba umntu ezikhethele ukuba sisaphuli-mthetho, “unokuguquka aze aphile ngendlela efanelekileyo.”
Amava abonisa ukuba abantu abaneemvelaphi ezahlukahlukeneyo banokutshintsha.c Into efunekayo kukulungela ukutshintsha isimo sengqondo, iintshukumisa, nendlela yokucinga ukuze ivisisane nemilinganiselo yoMdali engaguqukiyo kungekhona iimbono zabantu ezitshintshayo. Ngapha koko, ngubani osazi ngakumbi kunaye? Ukongezelela, ngaba asingoThixo onelungelo lokusigqibela ngokulungileyo nokubi? Ukuze siyazi imilinganiselo yakhe, uye waphefumlela abantu abangama-40 aboyika uThixo ukuba babhale iBhayibhile Engcwele—umqulu owaziwa ngokuba yincwadi eyalathisa abantu ukuze bonwabe baze baphile ubomi obunenjongo.—2 Timoti 3:16, 17.
Kusenokungabi lula ukwenza iinguqu ezifunekayo ukuze sikholise uThixo, kaloku kufuneka silwisane notyekelo lwethu lwesono. Enyanisweni, omnye umbhali weBhayibhile wakha wakufanisa oku ‘nomlo’ ongaphakathi kuye! (Roma 7:21-25) Waphumelela kulo mlo kuba wayengaxhomekekanga kumandla akhe kodwa kumandla kaThixo oLizwi lakhe eliphefumlelweyo ‘eliphilileyo nelinamandla.’—Hebhere 4:12.
Amandla Okutya “Okunezondlo”
Ukuze umzimba ube sempilweni kufuneka utye ukutya okunezondlo. Kwakhona, oko kutya kufuneka kuhlafunisiswe kuze kwetyiswe kakuhle yaye oko kuthabath’ ixesha nomgudu. Ngokufanayo, ukuze sibe sempilweni ngokomoya kufuneka siwahlafunisise amazwi kaThixo ukuze azike ezingqondweni nasezintliziyweni zethu. (Mateyu 4:4) IBhayibhile ithi: ‘Izinto eziyinyaniso, nezizezenkxalabo enzulu, nezibubulungisa, nezinyulu, nezithandekayo, nekuthethwa kakuhle ngazo, nezinesidima, nezincomekayo, ziqheliseleni izinto enazifundayo, yaye uThixo woxolo uya kuba nani.’—Filipi 4:8, 9.
Phawula ukuba kufuneka ‘siqhelisele’ iingcamango zikaThixo ukuba sifuna ukuhluba umntu omdala size sambathe umntu omtsha. Kufuneka umonde ukuze sikhule ngokomoya akwenzeki ngokuqhwanyaza kweliso.—Kolose 1:9, 10; 3:8-10.
Makhe sihlole umzekelo webhinqa elalixhatshazwa lisengumntwana; lasebenzisa iziyobisi, utywala necuba; sithetha nje lithiwe nka ngesigwebo sobomi balo bonke entolongweni ngenxa yezenzo ezahlukeneyo zolwaphulo-mthetho. Ngoxa lisentolongweni lafunda iBhayibhile namaNgqina kaYehova laza laphila ngokuvisisana nezinto elazifundayo. Umphumo? Ngokuthe ngcembe labuhluba ubuntu obudala laza lambatha ubuntu obutsha bukaKristu. Ngoku aliselilo ikhoboka leengcinga ezimbi nezonakalisayo. Enye yeendinyana elizithandayo eBhayibhileni yincwadi yesi-2 kwabaseKorinte 3:17, ethi: “Ke kaloku uYehova unguMoya; yaye apho ukhoyo umoya kaYehova, kukho inkululeko.” Ewe, nakuba livalelwe, linandipha inkululeko elalingenayo ngaphambili.
UThixo Unenceba
UYehova uThixo akamncami umntu.d UNyana kaThixo uYesu Kristu wathi: “Ndize kubizela enguqukweni, kungekhona abantu abangamalungisa, kodwa aboni.” (Luka 5:32) Liyinyaniso elokuba ukuphila ngokuvisisana nemilinganiselo yeBhayibhile akulula. Kodwa ukuze siphumelele kufuneka sibe nomonde size sisebenzise amalungiselelo kaYehova uThixo aquka inkxaso enothando esiyifumana kumaKristu aqolileyo ngokomoya. (Luka 11:9-13; Galati 5:22, 23) Ukuze ancede abantu baphile ngokuvisisana nemilinganiselo yeBhayibhile, amaNgqina kaYehova atyelela rhoqo iintolongo ehlabathini lonke ukuze aqhube izifundo zeBhayibhile namadoda namabhinqa anyanisekileyo aye enza zonke iintlobo zolwaphulo-mthetho onokucinga ngazo.e Kwiintolongo eziliqela amaNgqina aqhuba iintlanganiso.—Hebhere 10:24, 25.
Nakuba ezinye izaphuli-mthetho ziye zalishiya ikhondo lazo zaza zaba ngamaKristu okwenyaniso, iBhayibhile isithela thsuphe ‘ngokwanda kokuchas’ umthetho.’ (Mateyu 24:12) Njengokuba siza kubona kwinqaku elilandelayo, loo mazwi ayinxalenye yesiprofeto esiquka iindaba ezilungileyo.
[Imibhalo esemazantsi]
a Ukugula ngengqondo kusenokuba ngomnye unobangela wolwaphulo-mthetho ngokukodwa kumazwe apho aba bantu beyekwa bayabule esithubeni kube kulula ukufumana izixhobo eziyingozi. Noko ke, kweli nqaku asithethi ngolu hlobo lolwaphulo-mthetho.
b Ukuze ufumane inkcazelo engakumbi ngalo mbandela funda uVukani! kaMatshi 8, 1998 iphepha 3-9, elinomxholo othi “Ihlabathi Elingenalo Ulwaphulo-mthetho—Liya Kubakho Nini?” noAgasti 8, 1985, iphepha 3-12 elinomxholo othi “Loze Luphele Na Ulwaphulo-mthetho Kwizitrato Zethu?”
c Eli phephancwadi neqabane lalo iMboniselo asoloko exubusha ngabantu abaye baguqulwa ziinyaniso zeBhayibhile baza bayeka ukuba zizaphuli-mthetho. Funda uVukani! kaJulayi 2006, iphepha 11-13; nokaOktobha iphepha 30-31; kuquka iMboniselo kaJanuwari 1, 2000, iphepha 4-5; kaOktobha 15, 1998, iphepha 27-9, nekaFebruwari 15, 1997, iphepha 21-4.
d Funda inqaku elikwiphepha 10 elithi “Imbono Yebhayibhile: Ngaba UThixo Uyazixolela Izono Ezinzulu?” kwiphepha 10.
e Funda ibhokisi ekwiphepha 9 enomxholo othi “Ukunceda Amabanjwa Ngokomoya.”
[Amagama acatshulweyo akwiphepha 5]
Izigidi zabantu eziziimpula zikaLujaca azikhange zibhenele kulwaphulo-mthetho
[Ibhokisi/Umfanekiso okwiphepha 6, 7]
“UKUBUYELA ENTOLONGWENI KUNGAPHELANGA NEMINYAKA EMIBINI”
Kumhlathi wephephandaba iThe Times yaseLondon eNgilani kwakukho lo mxholo, wawunikela ingxelo yokuba eBritani ngaphezu kwama-70 ekhulwini ezikrelemnqa ezigwetyiweyo ngenxa yokuqhekeza nobusela, zibuyela kwizisele kungekapheli neminyaka emibini. Ubukhulu becala izenzo zolwaphulo-mthetho zenziwa ngamakhoboka eziyobisi ngenxa yokufuna imali ukuze aqhubeke nomkhwa wawo obiza imali eninzi nododobalisa impilo yawo.
[Ibhokisi ekwiphepha 7]
“NGABA ZIZIKOLO ZOLWAPHULO-MTHETHO?”
UJohn Braithwaite kwiUCLA Law Review wabhala wathi: “Iintolongo zizikolo zolwaphulo-mthetho.” UGqr.Stanton E. Samenow kwincwadi yakhe ethi Inside the Criminal Mind uthi: “Izikrelemnqa ezininzi ziyafunda kumava azo kodwa zifunda izinto eziyingozi kwabanye abantu. Entolongweni umntu uba nexesha elaneleyo lokufunda indlela yokuba sisikrelemnqa esinamava. . . . Ezinye izaphuli-mthetho ziba ngooncanyelweni abaphum’ izandla de zikwazi ukubhungca zingabanjwa.”
Kwesinye isahluko sale ncwadi, okaSamenow uthi: “Ukuvalelwa entolongweni akusincedi isaphuli-mthetho ukuba sitshintshe ubuntu baso. Nokuba sivalelwe okanye singaphandle kwentolongo, siba namahlakani aso, sifunda amaqhinga amatsha yaye naso silola ezinye.” Esinye isaphuli-mthetho esiselula sathi: “Entolongweni ndiye ndafunda ukuba ngumhlohli wolwaphulo-mthetho.”