Kungekudala Ulwaphulo-mthetho ‘Luza Kube Lungekho’
“Kusele ithutyana angabikho ongendawo.”—INDUMISO 37:10.
UMDALI wethu uYehova uThixo unomdla onzulu ebantwini; akakho kude njengokuba abanye becinga. (INdumiso 11:4, 5) Ngaphezu koko, uzibona zonke iintlobo zolwaphulo-mthetho nokungekho sikweni, nkqu nezo zingabonwayo ngabanye abantu. “Amehlo kaYehova akuzo zonke iindawo, ahlala ekhangele ababi nabalungileyo.” (IMizekeliso 15:3) Unokuqiniseka ukuba abangendawo ‘basemhlabeni omtyibilizi.’—INdumiso 73:12, 18.
Noko ke, abathe tye nangona besenokuba ngamahlwempu baze baphathwe kakubi banethemba elimangalisayo. Umdumisi uDavide wabhala wathi: “Mlinde ongenakusoleka uze umkhangele othe tye, kuba ikamva laloo mntu liya kuba leloxolo.” (INdumiso 37:37) Noko ke, loo mazwi anokusithuthuzela ngakumbi namhlanje, kuba siyazi ukuba akusentsuku zatywala azaliseke.
Siphila Kwimihla Yokugqibela
Kwiminyaka engama-2 000 eyadlulayo, abafundi bakaYesu bambuza umbuzo owawuza kuchaphazela izizukulwana ezaziza kuza. Bambuza bathi: “Sixelele, . . . uya kuba yintoni na umqondiso . . . wokupheliswa kwenkqubo yezinto?” (Mateyu 24:3) UYesu wawuphendula ngokweenkcukacha lo mbuzo kwincwadi kaMateyu isahluko 24, kuMarko isahluko 13 nakuLuka isahluko 21. Ezi ncwadi zeVangeli zichaza imihla yokugqibela yale nkqubo yezinto njengekwakuya kugquba iimfazwe, iindlala, izifo, iinyikima ezinkulu nokwanda kolwaphulo-mthetho.
Ezi meko zimandundu awaprofeta ngazo uYesu zaqalisa ngowe-1914. Umbhali-mbali uEric Hobsbawm kwincwadi yakhe ethi Age of Extremes, uthi inkulungwane yama-20 “yeyona iye yaba nezantyalantyala zegazi ezimbalini.”
Mayelana nobungendawo obuya buthath’ unyawo, iBhayibhile ithi: “Ekuhlumeni kwabo bangendawo njengotyani nabo bonke abo baqhelisela okwenzakalisayo betyatyamba, oko kukuze babhujiswe ngonaphakade.” (INdumiso 92:7) Ewe, kucace nakuthathatha ukuba ukwesamela kolwaphulo-mthetho namhlanje—njengokudubula kwezityalo entwasahlobo—kubonisa phandle ukuba ubungendawo bumele busitshulwe neengcambu! Ngaba ezo asizondaba zimnandi?—2 Petros 3:7.
“Amalungisa Aya Kuwudla Ilifa Umhlaba”
INdumiso 37:29 ithi: “Amalungisa aya kuwudla ilifa umhlaba, ahlale kuwo ngonaphakade.” Zonke iintlobo zolwaphulo-mthetho nokungabikho kokusesikweni ziya kuba zizinto zexesha elidluleyo. Ziya kuba zingasekho zonke izinto ezinxulumene nolwaphulo-mthetho: iialam, izitshixo, iinkundla, amagqwetha, amapolisa neentolongo. IBhayibhile ithembisa ukuba: “Izinto zangaphambili aziyi kukhunjulwa, zinganyuki zithi qatha entliziyweni.”—Isaya 65:17.
Ewe, umhlaba noluntu luya kungcamla iinguqu ezingazange zibekho ngaphambili. (Isaya 11:9; 2 Petros 3:13) AmaNgqina kaYehova akholose ngelo themba yaye ayakumema ukuba uzibonele ngawakho amehlo ukuba oku kuza kuzaliseka kungekudala. Khumbula ukuba Lowo uphefumlele iZibhalo Ezingcwele ‘akanakuxoka.’—Tito 1:2.
[Ibhokisi/Umfanekiso okwiphepha 9]
UKUNCEDA AMABANJWA NGOKOMOYA
Sele kuqengqeleke iminyaka amaNgqina kaYehova eUnited States ebhalelwa ngabantu angama-4 169 abasezintolongweni, kwizibhedlele zamabanjwa namakhaya okuhlaziya izimilo zabantu abakhotyokiswe ziziyobisi. Abanye bacela uncwadi kanti abanye bacela ukuqhutyelwa izifundo zeBhayibhile. AmaNgqina kaYehova athetha naba bantu. Ehlabathini ngokubanzi, amaNgqina atyelela ngokuthe rhoqo iintolongo ukuze aqhube izifundo zeBhayibhile namabanjwa, amadoda namabhinqa, abafuna uncedo lokomoya. Uninzi lwaba bantu luye lwenza iinguqu kubuntu babo, lwabhaptizwa njengamaKristu yaye ngoku luthobela umthetho.