Izimvo Zabafundi BakaVukani!
Ukunceda Ulutsha Lujamelane Nemiqobo (Matshi 2007) Njengomntu osemtsha oneminyaka eli-18 ubudala, ndiziqonda kakuhle izinto ezininzi ekuthethwa ngazo kweli nqaku ngokuphathelele ukusebenzisa icell-phone neInternet. Ndandinxibelelana nabantu endingabaziyo ngeInternet. Kungekudala ndawela emgibeni ngenxa yokuncokola nabo bantu bangalunganga. Ngoko nangoko ndaba buthathaka ngokomoya. Ndada ndavuma nokubonana ngokoqobo nabaliqela babo bantu. Okulusizi kukuba, oku kwakhokelela ekubeni ndiwele ekuziphatheni okubi. Ndithandazela ukuba eli nqaku libancede abanye baphephe intlungu nomvandedwa endisenawo nanamhla oku. Ebusuku ndiyaphuthelwa yaye suku ngalunye, xa zifika ezo ngcinga zidandathekisayo kuba nzima, kodwa ke ndilwa ngamandla noSathana.
UB. R., waseUnited States
Kutheni Ndisifa Isiqaqa? (Aprili 2007) Kwandikhuthaza gqitha ukwazi ukuba asindim kuphela onengxaki yokufa isiqaqa. Eli nqaku landenza ndaziva ngathi uYehova uthetha nam ngqo, esithi, “Ndiyayibona intlungu okuyo, ngoko ndikunika into eza kukukhuthaza.”
UI. R., waseMadagascar
Into Enenzuzo Ngaphezu Kobugcisa (Aprili 2007) Andikwazi kuyichaza indlela endinombulelo ngayo ngeli nqaku. Kangangeminyaka emithandathu, bendingumphathi kumaziko amabini abafoti naqhuba kakuhle. Ndandiwuthanda gqitha lo msebenzi wam kuba wawundenza ndikwazi ukukhupha bonke ubuchule endinabo. Noko ke, nakuba izinto zazindihambela kakuhle gqitha kumsebenzi wempangelo, ndandingakwazi ukuyiphumeza kakuhle inkonzo yam kuYehova. Ndandixakeke gqitha ngumsebenzi wam wobugcisa kangangokuba ndandingakwazi ukwenza nantoni na enye. Ndandiyiqonda kakuhle into yokuba lukho utshintsho ekufuneka ndilwenze. Ngoko ndawuyeka lo msebenzi ndaza ndaxakeka ngakumbi enkonzweni. Uvuyo nolwaneliseko endandilufumana kumsebenzi wokwenza iifoto ezintle, alunakuthelekiswa novuyo endilufumana kubulungiseleli bobuKristu.
UA. P., waseUnited States
Abantu Abaselula Bayabuza. . . Ngaba Lo Mntu Undifanele?(Meyi 2007) Kutshanje ndiye ndatsaleleka kumntu ebendicinga ukuba angaba liqabane elifanelekileyo lomtshato. Noko ke, emva kokufunda eli nqaku, ndiye ndafumanisa ukuba iimpawu ebendizithanda kuye azibalulekanga kangako. Eli nqaku lindincedile ndabona ukuba eyona nto ibalulekileyo kumntu oza kuba liqabane lomtshato, ziimpawu zokomoya nendlela aphatha ngayo abanye abantu. Ndiyambulela uYehova ngamanqaku anjengeli asikhuselayo thina bantu baselula aze asikhokele.
UE. P., waseUnited States
Masikwazise Kubemi Base-East Timor (Meyi 2007) Eli nqaku ndalifunda ngomdla omkhulu. Ndaqala ukuva ngeli lizwe xa kwakuthethwa ngalo ezindabeni ngokuphathelele izidubedube zalapho. Ukususela ngoko bendisoloko ndinomdla wokwazi ukuba abantu base-East Timor baphila njani na phantsi kwezi meko, nokwazi ukuba amaNgqina kaYehova alapho aqhuba njani na kumsebenzi wawo wokunikela ubungqina. Ndiye ndamangaliswa yindlela abanomoya omhle ngayo aba bantu, banganikezeliyo phantsi kwezi meko zimaxongo kodwa abaqhubeka benyamezele. Andisokuze ndiyilibale inkalipho abanayo abantu base-East Timor noncumo oluhle lukaJacob nentsapho yakhe.
UY. M., waseJapan