Imbono YeBhayibhile
Ngaba Kufanelekile Ukuwongwa Ngezibizo?
NJENGOKO amaKristu enkulungwane yokuqala ayesenza imisebenzi yawo yemihla ngemihla yaye eshumayela iindaba ezilungileyo zoBukumkani bukaThixo, adibana namagosa amaninzi karhulumente, amanye kuwo ayenezikhundla eziphezulu. Abafundi bakaYesu abazange basebenzise izibizo ezithile ezaziza kubonisa izigxina ababekuzo. Ngelo xesha kwakuqhelekile ukuba kusetyenziswe izibizo ezithile xa kuthethwa nomntu osemagunyeni. Umlawuli waseRoma wayebizwa ngokuba ‘nguLowo uyiNgangamsha.’—IZenzo 25:21.
Ngoko, xa abafundi bakaYesu bethetha nabasemagunyeni, ngaba babesebenzisa izibizo abawongwa ngazo? Thina sifanele senze ntoni?
Ukubahlonela Akubonisi Ukuvumelana Nehambo
Umpostile uPawulos wathi amaKristu afanele ‘anike bonke oko kubafaneleyo, lowo kufuneka imbeko kuye, amnike imbeko leyo.’ (Roma 13:7) Oku kwakuquka ukusebenzisa izibizo xa ethetha nabasemagunyeni. Namhlanje yinto eqhelekileyo ukusebenzisa izibizo ezifana nesithi Obalaseleyo nesithi Mhlekazi xa kuthethwa nabasemagunyeni. Kodwa abanye basenokubuza, ‘Ndinokulisebenzisa njani eli gama emntwini endicinga ukuba ihambo yakhe ayifanelekanga?’
Abantu abaninzi abasemagunyeni bayenza kakuhle imisebenzi yabo, kodwa asingabo bonke esinokubathemba. Sekunjalo, iBhayibhile ithi sifanele sithobele ookumkani nabaphathi “ngenxa yeNkosi.” (1 Petros 2:13, 14) Ngoko ke, ekubeni sisazi ukuba nguThixo ovumele ukuba loo mntu abe semagunyeni, simele simhlonele ngenxa yesikhundla akuso.—Roma 13:1.
Apha akuthethwa ngendlela abaziphethe ngayo abasemagunyeni. Eso ayisosizathu sokuba sibanike imbeko. Ukusebenzisa isibizo esithile xa sithetha nomntu onegunya, akuthethi ukuba siyiqhwabel’ izandla ihambo yakhe. Oku kuboniswa yinto eyenzeka kumpostile uPawulos.
Indlela UPawulos Awayezisebenzisa Ngayo Izibizo
Umpostile uPawulos wabanjwa eYerusalem ngezimangalo zobuxoki waza wamiswa phambi kwerhuluneli yakwaYuda, uFelikis. UFelikis wayengengomzekelo omhle. Umbhali-mbali waseRoma uTacitus wathi uFelikis “wayecinga ukuba yena wayenokwenza nantoni na embi kodwa angohlwaywa.” Wayesamkela izinyobo kunokuba agwebe ngokusesikweni. Sekunjalo, kwiminyaka emibini uPawulos esentolongweni, wayeyihlonela le rhuluneli xa bethetha—yena uFelikis wayejonge ukunyotywa, nto leyo angazange ayifumane, kunoko uPawulos wasuka wamshumayeza.—IZenzo 24:26.
UFesto, irhuluneli eyangena ezihlangwini zikaFelikis, waxelelwa ngetyala likaPawulos eKesareya. Efuna ukuthandwa ziinkokeli zamaYuda, uFesto wathi ityala likaPawulos malichotshelwe eYerusalem. Esazi ukuba wayengazi kugwetywa ngokusesikweni apho, uPawulos wasebenzisa amalungelo akhe njengomRoma wathi: “Ndibhenela kuKesare!”—IZenzo 25:11.
UFesto wayengazi ukuba uza kuzichaza njani izimangalo abekwa zona uPawulos kuKesare, ngoko wancedwa nguKumkani uAgripa II owayetyelele uFesto nowaba nomdla kweli tyala. Ngosuku olulandelayo, ukumkani wangena kwigumbi labaphulaphuli ehamba nabaphathi-mkhosi kunye nezihandiba zesixeko.—IZenzo 25:13-23.
Emva kokuba enikwe ithuba lokuzithethela, uPawulos waqalisa intetho yakhe ngokusebenzisa isibizo esithi “Kumkani,” kuba wayesazi ukuba uAgripa yingcali kumasiko nakwiimbambano eziphakathi kwamaYuda. (IZenzo 26:2, 3) Ngelo xesha, uAgripa wayesaziwa ukuba ukrexeza nodadewabo. Ngokuqinisekileyo uPawulos wayemazi ukuba uziphethe kakubi. Sekunjalo, uPawulos wamnika imbeko efanele ukumkani.
Ngoxa uPawulos wayezithethelela, uFesto wathi: “Uyaphambana, Pawulos!” Kunokuba uPawulos acaphuke, wazola, ebiza loo rhuluneli ngokuthi, “Festo Obalaseleyo.” (IZenzo 26:24, 25) Wayinika imbeko eyifaneleyo le rhuluneli. Ngoko ke, le mizekelo iphakamisa lo mbuzo, Ngaba abasemagunyeni sifanele sibahloniphe ngomlinganiselo othile?
Intlonelo Elinganiselweyo
Igunya loorhulumente lilinganiselwe, njengoko kuboniswe kwabaseRoma 13:1 ethi: “Amagunya akhoyo abekwe nguThixo kwizikhundla zawo ezilinganiselweyo.” Ngoko indlela esimele siwahlonele ngayo ilinganiselwe. UYesu wabonisa loo mlinganiselo xa wathi kubafundi bakhe: “Ningabizwa kuthiwe Rabhi, kuba mnye umfundisi wenu, kanti nonke nina ningabazalwana. Ngaphezu koko, ningabizi nabani na ngokuthi nguyihlo emhlabeni, kuba mnye uYihlo, Lowo wasezulwini. Ningabizwa nangokuthi ‘iinkokeli,’ kuba inye iNkokeli yenu, uKristu.”—Mateyu 23:8-10.
Kukho umahluko xa sisebenzisa izibizo ekubonakaliseni intlonelo kubantu abasemagunyeni naxa sizisebenzisa kubantu bonqulo. Ngoko, xa uPawulos wayesithi sifanele siwanike imbeko, wayengathethi kuthi masisebenzise izibizo zonqulo kumagosa karhulumente. Umntu olandela isiluleko seZibhalo uya kuwaphatha ngentlonelo amagosa anjalo. Kodwa isazela sakhe esiqeqeshwe ngeBhayibhile siya kumenza akuphephe ukusebenzisa naziphi na izibizo zonqulo, ekubeni efanele ‘abuyisele izinto zikaThixo kuThixo.’—Mateyu 22:21.
NGABA WAKHA WAZIBUZA?
◼ Abalandeli bakaYesu babebajonga njani abasemagunyeni?—Roma 13:7.
◼ Ngaba umpostile uPawulos wasebezisa izibizo zokuwonga kumagosa karhulumente?—IZenzo 25:11; 26:2, 25.
◼ Zizibizo ezinjani uYesu awathi azifanelekanga?—Mateyu 23:8-10.
[Umfanekiso okwiphepha 20, 21]
Wayesithini uPawulos xa ebiza uAgripa?