Bekani Abantu Bonke
“Bekani abantu bonke, . . . uThixo moyikeni. Ukumkani mbekeni.”—1 PETROS 2:17.
1. (a) Ngaphandle koThixo noKristu ngoobani ekufanelekileyo ukuba banikwe imbeko? (b) Kukweziphi iinkalo abamele abantu baboniswe imbeko ngokutsho kweyoku-1 kaPetros 2:17?
SIBONILE ukuba sinyanzelekile ukuba simnike imbeko uYehova uThixo noYesu Kristu. Oko kusisenzo esifanelekileyo, sobulumko nesothando. Kanti iLizwi likaThixo likwabonisa ukuba simele sinikele imbeko nakubantu abangoowethu. Sixelelwa oku, “Bekani abantu bonke.” (1 Petros 2:17) Ekubeni le ndinyana iqukumbela ngomyalelo othi, “ukumkani mbekeni,” ibonisa ukuba kufanele kuboniswe imbeko kwabo ibafaneleyo ngenxa yezikhundla zabo. Ngoko, ngoobani esifanele sinikele kubo imbeko ngokufanelekileyo? Abo bafanelwe yimbeko basenokuquka abangakumbi kunokuba abanye besenokucinga. Sisenokuthi kukho iinkalo ezine esimele sibonakalise imbeko kuzo kwabanye abantu.
Beka Abalawuli Bezobupolitika
2. Sazi njani ukuba “ukumkani” okhankanywe kweyoku-1 kaPetros 2:17 ubhekisela kuye nawuphi na ukumkani ongumntu okanye umlawuli wezobupolitika?
2 Eyokuqala yezi nkalo inxulumene noorhulumente behlabathi. Kufuneka sibabeke abalawuli bezobupolitika. Kutheni sisithi uPetros wayecinga ngabalawuli bezobupolitika xa wanikela esi siluleko: “Ukumkani mbekeni”? Kungenxa yokuba uthetha ngemeko engaphandle kwebandla lamaKristu. Wayesandul’ ukuthi: “Wuthobeleni ngoko wonke ummiso ongowomntu, ngenxa yayo iNkosi; nokuba ngukumkani, njengowongamileyo; nokuba ngabalawuli, njengabathunyiweyo nguye.” Kwakhona, phawula ukuba uPetros ubonisa umahluko okhoyo phakathi koThixo ‘nokumkani,’ esithi: “UThixo moyikeni. Ukumkani mbekeni.” (1 Petros 2:13, 14) Ngoko “ukumkani” uPetros asibongoza ukuba simbeke ngookumkani abangabantu nabalawuli bezobupolitika.
3. Angoobani “amagunya awongamileyo,” yaye afanelwe yintoni?
3 Ngokufanayo umpostile uPawulos uyalela athi: “[Walulameleni] amagunya awongamileyo.” La “magunya ongamileyo” asingoYehova uThixo okanye uYesu Kristu, kodwa angabalawuli bezobupolitika, amagosa aseburhulumenteni. Ecinga ngala, uPawulos uhlabela mgama esithi: “Bonke banikeni okubafaneleyo; . . . imbeko ofanelwe yimbeko.” Ewe, abo baye bavunyelwa nguThixo ukuba balawule kwezobupolitika bafanelwe yimbeko.—Roma 13:1, 7.
4. (a) Imbeko inokuboniswa njani kubalawuli bezobupolitika? (b) Nguwuphi umzekelo umpostile uPawulos awawumiselayo ekubonakaliseni imbeko kubalawuli?
4 Siyibonisa njani imbeko kubalawuli bezobupolitika? Enye indlela kungokubaphatha ngentlonelo enzulu. (Thelekisa eyoku-1 kaPetros 3:15.) Yaye ngenxa yesikhundla abakuso, bafanelwe yintlonelo enjalo nakubeni besenokuba bangabantu abangendawo. Umbhali-mbali ongumRoma uTacitus wayichaza iRhuluneli uFelikis njengomntu “owayecinga ukuba unokwenza nabuphi na ububi ngaphandle kokohlwaywa.” Sekunjalo uPawulos waqalisa ukuzithethelela kwakhe phambi koFelikis ngendlela enentlonelo. Ngokufanayo, ngentlonelo uPawulos waxelela ukumkani uHerode Agripa oku, “Ndiva kamnandi, kumkani Agripa, ndiza kuziphendulela nje phambi kwakho namhla,” nakubeni uPawulos wayesazi ukuba uAgripa wayesenza umbulo. Ngokufanayo, uPawulos wabonisa imbeko kwiRhuluneli uFesto, ebhekisela kuye ngokuthi “odume kunene,” nakubeni uFesto wayengumnquli wezithixo.—IZenzo 24:10; 26:2, 3, 24, 25.
5. Yiyiphi enye indlela yokubonisa imbeko kumagunya aseburhulumenteni, yaye amaNgqina kaYehova awumisela njani umzekelo omhle ekwenzeni oku?
5 Enye indlela esiwabeka ngayo amagosa aseburhulumenteni iboniswa ngumpostile uPawulos xa wabhala ngokunikela okufanelekileyo kumagunya aseburhulumenteni. Wathi umele anikwe “irhafu ofanelwe yirhafu, unikelo ofanelwe lunikelo.” (Roma 13:7) AmaNgqina kaYehova ayakwenza oku kungakhathaliseki ukuba liliphi na ilizwe ahlala kulo ehlabathini. EItali iphephandaba iLa Stampa lathi: “Angabona bemi banyanisekileyo nabani na ebenokufuna ukuba nabo: Awaziphephi iirhafu okanye afune ukuphepha imithetho angayithandiyo ukuze alungelwe.” Yaye iThe Post yasePalm Beach, eFlorida, eUnited States, yaphawula oku mayela namaNgqina kaYehova: “Ayazihlawula iirhafu zawo. Aphakathi kwabona bemi banyanisekileyo bale Riphabliki.”
Bonisa Imbeko Kubaqeshi
6. Ngoobani abanye athi umpostile uPawulos noPetros bamele babekwe?
6 Inkalo yesibini esifanele sibonise imbeko kuyo kukwiindawo zethu zengqesho. Umpostile uPawulos noPetros bagxininisa imbaluleka yokuba amaKristu abeke abo bawongameleyo kulwalamano lomsebenzi. UPawulos wabhala oku: “Onke ke amakhoboka aphantsi kwedyokhwe, ndinga ke angababalela abaniniwo ekuthini, bafanelwe yimbeko yonke, ukuze igama likaThixo nemfundiso inganyeliswa. Lawo ke ankosi zikholiweyo, makangazideli ngakuba zingabazalwana; makube kukhona azikhonzayo.” Yaye uPetros wathi: “Nina zicaka, bathobeleni ninako konke ukoyika abanikhonzisayo, ingabi ngabalungileyo nabathantamisayo bodwa, ibe kwanabagwenxa [kwanabo kunzima ukubakholisa, NW].”—1 Timoti 6:1, 2; 1 Petros 2:18; Efese 6:5; Kolose 3:22, 23.
7. (a) Isiluleko seBhayibhile sokuba “amakhoboka” abonise imbeko ‘kwiinkosi’ zawo sisetyenziswa njani ngokufanelekileyo namhlanje? (b) Yintoni abaqeshwa abangamaKristu abaqeshwe ngamaKristu abafanele bayiphaphele?
7 Kambe ke, ubukhoboka abusekho kwezinye iindawo namhlanje. Kodwa imigaqo eyayilawula amaKristu kulwalamano lwesicaka nenkosi iyasebenza kulwalamano lomqeshwa nomqeshi. Ngaloo ndlela, abaqeshwa abangamaKristu banembopheleleko yokubonisa imbeko kwanakubaqeshi ekunzima ukubakholisa. Yaye kuthekani ukuba umqeshi ulikholwa elinguwenu? Kunokulindela impatho okanye ukuthandwa okukhethekileyo ngenxa yolo lwalamano, umqeshwa ufanele abe kukhona akulungeleyo ukusebenzela umqeshi wakhe ongumKristu, engamxhaphazi nangayiphi na indlela.
Imbeko Kwisangqa Sentsapho
8, 9. (a) Ngoobani ekufuneka abantwana bebabekile? (b) Kutheni abantwana befanele babonise le mbeko, yaye banokuyibonisa njani?
8 Inkalo yesithathu ekufuneka kuboniswe imbeko kuyo kukwisangqa sentsapho. Ngokomzekelo, abantwana banyanzelekile ukuba babeke abazali babo. Oku kwakungeyomfuneko kuMthetho owawunikwe uMoses kuphela kodwa kwakhona kwakuyimbopheleleko yamaKristu. Umpostile uPawulos wabhala oku: “Bantwana, baveni abazali benu ngokwabaseNkosini; kuba oko kububulungisa. Beka uyihlo nonyoko.”—Efese 6:1, 2; Eksodus 20:12.
9 Kutheni abantwana befanele bababeke abazali babo? Bafanele bababeke ngenxa yegunya abanalo abazali babo belinikwe nguThixo kwanangenxa yoko abazali babo bakwenzileyo, ukubangela ukuba bazalwe nokubanyamekela nokubakhulisa ukususela ebuntwaneni. Abantwana bafanele bababeke njani abazali babo? Bafanele bakwenze oku ubukhulu becala ngokubathobela nokubalulamela. (IMizekeliso 23:22, 25, 26; Kolose 3:20) Ukunikela imbeko enjalo kusenokufuna ukuba abantwana asebekhulile banikele inkxaso eyongezelelekileyo kubazali babo nakoomakhulu nootatomkhulu babo abakhulileyo, ngezinto eziphathekayo nezingokomoya. Oku kufuna ukuba ubani abe ngolungelelene ngobulumko ngokubhekisele kwezinye iimbopheleleko, ezinjengokunyamekela abakhe abantwana nokuba nesabelo ngokuzeleyo kunxulumano lwamaKristu nakubulungiseleli basentsimini.—Efese 5:15-17; 1 Timoti 5:8; 1 Yohane 3:17.
10. Abafazi banembopheleleko yokubonisa imbeko koobani, yaye oku banokukwenza ngaziphi iindlela?
10 Kanti entsatsheni asingobantwana kuphela abamele banikele imbeko kwabanye. Abafazi bamele bawabeke amadoda abo. Umpostile uPawulos wakwathi “umfazi ke makabe nentlonelo enzulu ngendoda.” (Efese 5:33, NW; 1 Petros 3:1, 2) Ukubonisa ‘intlonelo enzulu’ kumadoda ngokuqinisekileyo kubandakanya ukuwabeka. USara wayibeka indoda yakhe, uAbraham, ngokuyibiza ngokuba “yinkosi.” (1 Petros 3:6) Ngoko bafazi, xelisani uSara. Nikelani imbeko kumadoda enu ngokwamkela izigqibo zawo nangokusebenzela ukuba ziphumelele. Ngokwenza konke okusemandleni enu ukunceda amadoda enu athwale imithwalo yawo, kunokongezelela kuyo, niwabonisa imbeko.
11. Mayela nokubonisa imbeko, yiyiphi imbopheleleko anayo amadoda, yaye ngoba?
11 Kuthekani ngamadoda? KwiLizwi likaThixo ayalelwa oku: “Nina madoda, hlalani nabo [abafazi benu] ngokokwazi, nimbeka umfazi, njengesona sitya siethe-ethe, njengeendlalifa kunye nani zobabalo lobomi, ukuze imithandazo yenu ingathinteleki.” (1 Petros 3:7) Ngokuqinisekileyo oko kufanele kuwenze amadoda acinge. Kufana nokungathi umfazi uphawulwe ngamagama athi “Uxabisekile. Uethe-ethe. Mphathe ngenyameko! Mbeke!” Ngoko amadoda mawakhumbule ukuba ngaphandle kokuba ayababeka abafazi bawo ngokubaphatha ngolwazelelelo olululo, aya kuphazamisa ulwalamano lwawo noYehova uThixo, kuba imithandazo yawo iya kuthinteleka. Enyanisweni, kukokwengenelo yentsapho yonke ukuba amalungu entsapho anikelane imbeko.
Ebandleni
12. (a) Ngoobani abanembopheleleko yokubonisa imbeko ebandleni? (b) UYesu wabonisa njani ukuba kufanelekile ukwamkela imbeko?
12 Kwakhona wonke ubani unembopheleleko yokubonakalisa imbeko ebandleni lamaKristu. Siyalulekwa: “Mayela nembeko leyo, phangelanani.” (Roma 12:10) Komnye wemizekeliso yakhe uYesu wabonisa ukuba kuyinto efanelekileyo ukwamkela imbeko. Wathi xa simenyelwe esidlweni, sifanele sihlale kwesona sihlalo siphantsi, kuba uya kuthi osimemileyo asicele ukuba sihlale kwesona sihlalo siphezulu, ibe siya kufumana imbeko besibona bonke abanye abamenyiweyo. (Luka 14:10) Ngoku, ekubeni thina sonke sikuxabisa ukunikwa imbeko, ngaba asifanele sibe nolwazelelelo ngabanye size sibekane? Sinokukwenza njani oku?
13. Ziziphi ezinye zeendlela esinokubonisa ngazo imbeko kwabanye ebandleni?
13 Amazwi oxabiso ngomsebenzi owenziwe kakuhle akukunikela imbeko. Ngoko sinokubekana ngokumncoma ubani, mhlawumbi ngentetho okanye amagqabaza awanikeleyo ebandleni. Ukongezelela, sinokubekana ngokubonisa ukuthobeka kwengqondo kubazalwana noodade bethu abangamaKristu, ngokubaphatha ngentlonelo enzulu. (1 Petros 5:5) Ngaloo ndlela sibonisa ukuba siyabaxabisa njengabakhonzi abangoowethu nababekekileyo bakaYehova uThixo.
14. (a) Abazalwana ebandleni banokuyibonisa njani imbeko efanelekileyo koodade? (b) Yintoni ebonisa ukuba ukupha abanye izipho yenye indlela yokubonisa imbeko?
14 Umpostile uPawulos waluleka uTimoti oselula ukuba abaphathe oodade abakhulileyo abangamaKristu njengoonina nabaselula njengoodade bokwenyama, ‘enobunyulu bonke.’ Ewe, xa abazalwana bekuphaphele ukungabi ngabakhululeke ngokugqith’ emgceni ngakoodade babo abangamaKristu, ngokuthi babaqhele ngokugqithiseleyo, baya kuba babanika imbeko. UPawulos wahlabela mgama ebhala oku: “Babeke abahlolokazi abangabahlolokazi ngenene.” Enye indlela umhlolokazi osweleyo anokubekwa ngayo kungokumxhasa ngezinto eziphathekayo. Kodwa ukuze akufanelekele oku, umele ‘angqinelwe ngemisebenzi emihle.’ (1 Timoti 5:2-10) Mayela nezipho zokuphathekayo, ngokubhekisele kubantu besiqithi saseMelita uLuka wabhala oku: “Bathi bona basenzela iimbeko [ngezipho, NW] ezininzi; bathi, xa sindulukayo, basithwesa ngezinto esizisweleyo.” (IZenzo 28:10) Ngaloo ndlela, imbeko inokuboniswa komnye ngokumpha izipho zokuphathekayo.
15. (a) Kukoobani esinembopheleleko ekhethekileyo yokubonisa imbeko? (b) Yiyiphi enye indlela esinokubonisa ngayo imbeko kwabo bakhokelayo?
15 Eqhubeka kwincwadi awayibhalela uTimoti, uPawulos uyabhala: ‘Abadala, abongamela kakuhle, mababalelwe ekuthini bafanelwe yimbeko ephindwe kabini, ngokukodwa abo babulalekayo elizwini nasemfundisweni.’ (1 Timoti 5:17) Sinokubabeka ngaziphi iindlela abadala, okanye abaveleli? UPawulos wathi: “Yibani ngabaxelisa mna, njengokuba nam ndixelisa uKristu.” (1 Korinte 11:1) Xa sithobela amazwi kaPawulos okuba ngabaxelisa yena, simnika imbeko. Oku kuya kusebenza kwabo bakhokelayo phakathi kwethu namhlanje. Ngomlinganiselo esibaxelisa ngawo ngokulandela umzekelo wabo, siya kuba sibanika imbeko.
16. Ziziphi iindlela ezongezelelekileyo enokuboniswa ngazo imbeko kwabo bakhokelayo?
16 Enye indlela esibonisa ngayo imbeko kubaveleli kungokuthobela esi sibongozo: “Bathambeleni abakhokeli benu, nibathobele; kuba bona abalali, ngenxa yemiphefumlo yenu, ngokwabaya kuphendula.” (Hebhere 13:17) Kanye njengokuba abantwana bebabeka abazali babo ngokubathobela, ngoko nathi siyababeka abo bakhokelayo phakathi kwethu ngokubathobela nokubalulamela. Yaye, njengokuba uPawulos namaqabane akhe banikwa imbeko ngokuphiwa izinto eziphathekayo ngabo bantu banobubele baseMelita, abameli abaninzi abahambahambayo boMbutho baye ngokufanayo banikwa imbeko kangangezihlandlo ezininzi. Kambe ke, abafanele bazicele izipho ezinjalo okanye bathi thsuphe ukuba bebeya kuzixabisa okanye bathi ziyimfuneko.
17. Abo banamalungelo okuvelela banayiphi imbopheleleko yokubonisa imbeko?
17 Kwelinye icala, bonke abo bakwizikhundla zokuvelela kwintlangano engokobuthixo—enoba kukwibandla lasekuhlaleni, kwisiphaluka okanye kwisithili njengomveleli ohambahambayo, kwelinye lamasebe eWatch Tower Society okanye kwisangqa sentsapho—banembopheleleko yokubonisa imbeko kwabo bangaphantsi kwabo. Oku kufuna ukuba babacingele yaye babe novelwano. Bafanele bangeneke ngamaxesha onke, babe nobulali baze bathobeke ngentliziyo nangengqondo, njengokuba uYesu Kristu wathi wayenjalo.—Mateyu 11:29, 30.
Sebenzelani Ukubekana
18. (a) Yintoni enokusithintela ukubonisa imbeko kwabo ibafaneleyo? (b) Kutheni kungekho singxengxezo ngesimo sengqondo esiphosakeleyo nesokugxeka?
18 Sonke sifanele silwele ukubekana, kuba kukho isithintelo esinamandla sokuba singakwenzi oko. Eso sithintelo, okanye umqobo, yintliziyo yethu engafezekanga. IBhayibhile ithi, “Ukuyila kwentliziyo yomntu kubi kwasebutsheni bakhe.” (Genesis 8:21) Olunye lotyekelo lomntu olusenokuphazamisana nokubonisa imbeko kwabanye kukuba nesimo sengqondo esiphosakeleyo nesokugxeka. Sonke singabantu ababuthathaka nabangafezekanga, ekubeni inceba nobabalo lukaYehova luye lwayimfuneko kuthi. (Roma 3:23, 24) Ekuqondeni kwethu oku, masikuphaphele ukuba singasoloko sicinga ngeentsilelo zabazalwana bethu okanye sizithandabuze iintshukumisa zabazalwana bethu.
19. Yintoni eya kusinceda siphephe isimo sengqondo esiphosakeleyo?
19 Indlela yokoyisa naluphi na utyekelo lokugxeka olunjalo luthando nokuzeyisa. Kufuneka sibe nesimo sengqondo sovelwano, sokunyaniseka nesihle ngakubazalwana bethu, siphawula iimpawu zabo ezintle. Ukuba kukho okuthile esingakuqondiyo, masisoloko sikulungele ukubophulela abazalwana bethu size sithobele isiluleko sikaPetros esithi: “Ngaphezu kweento zonke ke, yibani nothandano olunyamekileyo, ngokuba uthando luya kugubungela inkitha yezono.” (1 Petros 4:8) Sifanele sibe nothando olunjalo ukuba siza kubanika imbeko ebafaneleyo abazalwana bethu.
20, 21. (a) Luluphi olunye utyekelo olusenokuphazamisana nokubonisa kwethu imbeko kwabanye? (b) Yintoni eya kusinceda silwe nolu tyekelo?
20 Olunye uphawu olusenokuphazamisana nokubonisa kwethu imbeko kwabanye lutyekelo lokuba nochuku, okanye ukuba neemvakalelo ezibukhali ngokungeyomfuneko. Kukho amaxesha okuba neemvakalelo ezibukhali. Imvumi nabazobi bamele babe neemvakalelo ezibukhali zokuva izandi okanye zokubona imibala njengenxalenye yomsebenzi wabo. Kodwa ukuba neemvakalelo ezibukhali ngokungeyomfuneko, okanye ukuba nochuku, kulwalamano lwethu nabanye kuluhlobo oluthile lokuzingca olunokusenza singabi nalo uxolo luze lusithintele ekubonakaliseni imbeko kwabanye.
21 Amazwi afumaneka kwiNtshumayeli 7:9 asinika icebiso elihle mayela noku: “Musa ukukungxamela ukuqumba ngomoya wakho, kuba ingqumbo ilala esifubeni sezidenge.” Ngoko ukuba neemvakalelo ezibukhali ngokungeyomfuneko okanye ukuqumba ngokukhawuleza kubonakalisa ukuswela ubulumko nokungabi nangqiqo intle, kwanokuswela uthando. Sifanele siphaphe hleze utyekelo lwethu lwesono olunjengokuba nesimo sengqondo esingakhuthaziyo, ukuba ngabagxeka ngokugqith’ emgceni, okanye ukuba neemvakalelo ezibukhali ngokungeyomfuneko, kusithintele ekubonakaliseni imbeko kwabo ibafaneleyo.
22. Inokushwankathelwa njani imbopheleleko yethu yokubonisa imbeko?
22 Enyanisweni, sinezizathu ezininzi zokubonakalisa imbeko kwabanye. Yaye, njengoko sibonile, kukho iindlela ezininzi kakhulu, esinokubonakalisa imbeko ngazo. Ngamaxesha onke simele siphaphe hleze ukuzingca okuthile okanye isimo sengqondo esiphosakeleyo siphazamisane nokubonakalisa kwethu imbeko. Kufuneka sikuphaphele, ngokukodwa ukubonakalisa imbeko kwisangqa sentsapho yethu, amadoda kubafazi nabafazi emadodeni kwanabantwana kubazali babo. Yaye ebandleni, sinembopheleleko yokubonakalisa imbeko kubanquli abangoowethu, ngokukodwa, kwabo basebenza nzima phakathi kwethu abakwizikhundla zokuvelela. Kuzo zonke ezi nkalo, kukokwengenelo yethu ukubonisa imbeko efanelekileyo kwabo bakhankanywe ngasentla, ekubeni, njengoko uYesu watshoyo: “Ukupha kunoyolo ngaphezu kokuphiwa.”—IZenzo 20:35.
Ubuya Kuphendula Njani?
◻ Kutheni simele sibonise imbeko kumagunya aseburhulumenteni yaye sinokuyibonisa njani?
◻ Sisiphi isiluleko seBhayibhile esinokusetyenziswa kulwalamano lomqeshwa nomqeshi?
◻ Imbeko ifanele iboniswe njani kwisangqa sentsapho?
◻ Yiyiphi imbeko ekhethekileyo enokuboniswa ebandleni, yaye ngoba?
◻ Ubuthathaka babantu bokusilela ukubonisa imbeko kwabanye bunokoyiswa njani?