Imbono YeBhayibhile

Unjani UThixo?

IBhayibhile ithi: “UThixo unguMoya nabo bamnqulayo bamele banqule ngomoya nenyaniso.” La mazwi atyhila uhlobo lomntu alulo uThixo—ungumoya! (Yohane 4:19-24) Sekunjalo iBhayibhile ithi ngumntu. Igama lakhe nguYehova.—INdumiso 83:18.

Abanye babafundi beBhayibhile baye badideka ngohlobo lomntu uThixo alulo. Ekubeni uThixo engumoya ongabonakaliyo, kutheni iindinyana ezininzi zeBhayibhile zisithi unamehlo, iindlebe, impumlo, intliziyo, iingalo, izandla, iminwe neenyawo?a Bambi banokuggqiba kwelokuba uThixo unomzimba ofana nowomntu ekubeni iBhayibhile isithi umntu wenziwa ngomfanekiso wakhe. Ngokuqwalasela oko kuthethwa yiBhayibhile ukudideka kuya kuphela.—Genesis 1:26.

Kutheni Kusithiwa Uneempawu Zabantu?

Ukuze bancede abantu baqonde ukuba uThixo unjani, ababhali beBhayibhile ababephefumlelwe basebenzisa iimpawu zabantu xa bechaza uSomandla. Abaphengululi bakubiza oku ngokuthi, sisimntwiso. Oku kubonisa indlela ekunzima ngayo ukuchazela abantu ukuba unjani uThixo oyinyaniso, uYehova. Ngoko ke, uThixo uchazwe ngendlela enokuqondwa ngabantu. Oku akuthethi kuthi ezi zichazi simele sizithathe ngokoqobo, kanye njengokuba xa iBhayibhile isithi uThixo “nguLiwa,” “ulilanga,” “nekhaka.”—Duteronomi 32:4; INdumiso 84:11.

Ngokufanayo, ukuze abantu baqonde ukuba umntu uneempawu ezifana nezikaYehova nangona engafezekanga, iBhayibhile ithi umntu wadalwa ngomfanekiso kaThixo. Kodwa oku akuthethi kuthi abantu bangumoya okanye uThixo unomzimba wenyama.

Ngaba UThixo Yindoda Okanye Libhinqa?

Xa iBhayibhile isebenzisa iimpawu zomntu kuThixo, asimele sikuthathe ngokoqobo oko, kunjalo naxa kuthethwa ngoThixo ngokungathi yindoda. Ngabantu kuphela abahlukaniswa ngokobuni babo, ngoko ukuchaza uThixo ngale ndlela kubangelwa kukungakwazi kwabantu ukumchaza kakuhle uYehova uThixo onguSomandla.

Xa iBhayibhile isithi uThixo ‘nguBawo’ isinceda siqonde ukuba uMdali wethu unokufaniswa nobawo onothando, okhuselayo nonenyameko. (Mateyu 6:9) Oku akuthethi kuthi sifanele sicinge ukuba uThixo okanye izidalwa zokomoya zasezulwini zingamabhinqa namadoda. Izidalwa zomoya azahlukaniswa ngokobuni. Okubangela umdla kukuba, iBhayibhile ithi abo babizelwe ukuba ziindlalifa noKristu kuBukumkani basezulwini abalindelanga ukuba baqhubeke bengamadoda okanye amabhinqa xa benziwe oonyana bokomoya bakaThixo. Umpostile uPawulos wabakhumbuza esithi “akukho ndoda nabhinqa” xa bezukiswa njengoonyana bokomoya bakaThixo. Bachazwa ngokufuziselayo ngokuthi ‘ngumtshakazi’ weMvana, uYesu Kristu. Konke oku kubonisa ukuba iimpawu zobuntu ezisetyenziswayo xa kuchazwa uThixo, noNyana wakhe okuphela kwamzeleyo uYesu nezinye izidalwa zomoya, azimele zijongwe ngokoqobo.—Galati 3:26, 28; ISityhilelo 21:9, 1 Yohane 3:1, 2.

Kuba beqonda ukubaluleka kwendima yendoda, ababhali beBhayibhile babhekisela kuThixo njengendoda. Babesazi ukuba indoda ethobela imigaqo kaThixo inokufaniswa noYehova, ongubawo onothando kubantwana bakhe basemhlabeni.—Malaki 3:17; Mateyu 5:45; Luka 11:11-13.

Olona Phawu Lubalaseleyo LukaThixo

Nangona engumoya, uMongami akaziphakamisi, akazifihlanga yaye uyanxibelelana nezidalwa zakhe. Kwakhona ukuba ngumoya kwakhe, akubangeli ukuba kubekho umsantsa phakathi kwakhe nabantu abaneentliziyo ezinyanisekileyo abafuna ukwazi ngeempawu zakhe ezinjengothando, amandla, ubulumko, okusesikweni ezibonisa uhlobo loThixo anguye njengoko zibonakala nakwindalo.—Roma 1:19-21.

Uhlobo lomntu uThixo anguye lunokubonakala kuphawu lwakhe olubalaseleyo, uthando. Ngenxa yokubalasela kothando lwakhe, kuthiwa uluthando lumntwisiwe. (1 Yohane 4:8) Olu phawu lubandakanya nezinye iimpawu zobuntu bakhe ezinjengenceba, ukuxolela, nokuzeka kade umsindo. (Eksodus 34:6; INdumiso 103:8-14; Isaya 55:7; Roma 5:8) UYehova ngokwenene nguThixo oluthando osimemayo sonke njengabantu ukuba sisondele kuye.—Yohane 4:23.

[Umbhalo osemazantsi]

NGABA WAKHA WAZIBUZA?

◼ Ngubani igama likaThixo?—INdumiso 83:18.

◼ Sinokuzibona phi iimpawu zikaThixo ezibalaseleyo?—Roma 1:19-21.

◼ Luluphi uphawu lukaThixo olubalaseleyo?—1 Yohane 4:8.