Iindlela Ezintandathu Zokuphumelela

UKUZE umntu aphumelele ngokwenene ebomini, ufanele athobele imilinganiselo kaThixo nevumelana nenjongo anayo ngathi. IBhayibhile ithi, umntu ophila ngale milinganiselo, “uya kuba njengomthi otyalwe ngakwimisinga yamanzi, onika isiqhamo sawo ngexesha lawo nonamahlamvu angabuniyo, yaye konke akwenzayo kuya kuphumelela.”—INdumiso 1:3.

Nangona singafezekanga yaye sisenza iimpazamo, sinako ukuphumelela! Ngaba nawe ungathanda ukuphumelela? Ukuba kunjalo, le migaqo yeBhayibhile mithandathu inokukunceda uphumelele, nto leyo enikela ubungqina obucacileyo bokuba iimfundiso zeBhayibhile ngokwenene zibubulumko obuvela kuThixo.—Yakobi 3:17.

1 Yiba Nembono Elungeleleneyo Ngemali

‘Ukuthanda imali yingcambu yazo zonke iintlobo zobubi, yaye ngenxa yokusukelana nolo thando bambi baye bazingxwelerha ngeentlungu ezininzi.’ (1 Timoti 6:10) Phawula ukuba imali asiyongxaki—iyafuneka ukuze sizinyamekele thina neentsapho zethu—kodwa ingxaki kukuyithanda. Eneneni, ukuthanda imali kwenza ubani abe likhoboka layo okanye ayinqule.

Njengoko sifundile kwinqaku lokuqala, abantu abasukelana nobutyebi kuba befuna ukuphumelela, eneneni basukelana nomoya. Abaneli nje kukudana kodwa bangena nasezingxakini. Ngokomzekelo, abantu abaxakeke kukufuna ubutyebi, badla ngokutyeshela iintsapho nabahlobo. Abanye bancama nobuthongo—ngenxa yomsebenzi nokuxhalaba okanye ukukhathazeka. “Bumnandi ubuthongo bokhonzayo, enoba udla kancinane okanye kakhulu; kodwa indyebo yesityebi ayisivumeli ukuba silale.”—INtshumayeli 5:12.

Imali imenza ikhoboka umntu kwaye iyakhohlisa. UYesu Kristu wathetha ‘ngamandla akhohlisayo obutyebi.’ (Marko 4:19) Ngamany’ amazwi, umntu uye abe nethemba lokuba xa esisityebi uya konwaba kodwa akubi njalo. Kunoko umntu osisityebi uye afune ubutyebi obungakumbi. “Umntu othanda imali akaneli,” itsho njalo iNtshumayeli 5:10.—iThe New English Bible.

Ngamafuphi, ukuthanda imali kukhokelela kudano nonxunguphalo yaye umntu angade abandakanyeke nakulwaphulo-mthetho ngenxa yemali. (IMizekeliso 28:20) Izinto ezingumthombo wolonwabo nempumelelo kukuba nomoya wokupha, ukuxolela, ukuziphatha kakuhle, uthando nokuba nolwalamano oluhle noThixo.

2 Yiba Nomoya Wokupha

“Kunoyolo ngakumbi ukupha kunokwamkela.” (IZenzo 20:35) Ngoxa ukupha ngamaxesh’ athile kunokuzisa uvuyo, umntu onomoya wokupha uhlala onwabile. Eneneni, umoya wokupha ubonakala ngeendlela ezininzi. Eyona ibalaseleyo nexabiseke kakhulu, kukuchitha ixesha nabantu, nokubanceda.

Emva kokwenza uphando ngokuba nomoya wokungazingci, ukonwaba, nokuba sempilweni, unjingalwazi uStephen G. Post wagqiba kwelokuba, ukuba nomoya wokungazingci nowokunceda abanye kubangela impilo-nde, impilo-ntle, uxolo lwengqondo yaye kunciphisa nodandatheko.

Ngapha koko, umntu akahlwempuzeki ngenxa yokuba nesandla esivulekileyo. IMizekeliso 11:25 ithi: “Umphefumlo onesisa uya kutyetyiswa, yaye oseza abanye ngesisa naye uya kusezwa ngesisa.” Ngokuvumelana nala mazwi, abantu abanomoya wokupha—kungekhona ngenjongo yokufumana okuthile—baxabisekile yaye bayathandwa, ingakumbi nguThixo.—Hebhere 13:16.

3 Xolela Ngesisa

“Qhubekani . . . nixolelana ngesisa ukuba nabani na unesizathu sokukhalazela omnye. Kanye njengoko uYehova wanixolela ngesisa, yenzani njalo nani.” (Kolose 3:13) Abantu banamhlanje abaxoleli; kunokuba babonakalise inceba bathanda ukuziphindezela. Uba yintoni umphumo? Xa umntu egculelwa uyaphindisa, naxa ephathwa ngogonyamelo uyaphindisa.

Oku kusenokubangela ezinye iingxaki. Ingxelo ekwiThe Gazette yaseMontreal, eKhanada, ithi “kuhlolisiso olwenziwa kubantu abangaphezu kwama-4 600, abaneminyaka eli-18 ukusa kwengama-30 ubudala, kwafunyaniswa ukuba abona bantu bakhohlakeleyo, nabangenabubele” bagula ngamaphaphu. Eneneni, amanye amaphaphu ayonakele nangaphezu kwawabantu abatshayayo! Enyanisweni, ukuxolela akubangeli ukuba nolwalamano oluhle nabanye kuphela, kunoko kuyingenelo nakwimpilo yethu!

Yintoni onokuyenza ukuze ube nomoya wokuxolela? Qala ngokuzigocagoca ngokunyanisekileyo. Ngaba wena akubacaphukisi abanye maxa wambi? Akuvuyi na xa bekuxolela? Kutheni ke nawe ungabaxoleli abanye? (Mateyu 18:21-35) Enye into ebalulekileyo kukuzeyisa. Yenza enye into okanye ke zinike ixesha ukuze umsindo wehle. Uya kubona ukuba ukukwazi ukuzeyisa luphawu oluhle. IMizekeliso 16:32 ithi: “Ozeka kade umsindo ulunge ngakumbi kunendoda enamandla.” “Ulunge ngakumbi kunendoda enamandla”—ngaba asiyompumelelo leyo?

4 Phila Ngokuvisisana Nemilinganiselo KaThixo

“Umyalelo kaYehova uhlambulukile, uwenza akhanye emehlo.” (INdumiso 19:8) Ngamany’ amazwi, imilinganiselo kaThixo iyingenelo kuthi—emzimbeni, engqondweni nangokweemvakalelo. Phakathi kwezinye izinto, iyasikhusela kwizinto eziyingozi, njengokusebenzisa kakubi iziyobisi, ubunxila, ukuziphatha kakubi ngokwesini nokubukela amanyala. (2 Korinte 7:1; Kolose 3:5) Ezi zinto zinokuphumela kugonyamelo, kubuhlwempu, ukungathembeki, ukuqhekeka kweentsapho, ukuphazimiseka engqondweni nangokweemvakalelo, izifo, nokufa ngaphambi kwexesha.

Kodwa ke, abo baphila ngokuvisisana nemilinganiselo kaThixo baba namaqhina obuhlobo aqinileyo, isidima, noxolo lwengqondo. UIsaya 48:17, 18 uthi uThixo, ‘nguLowo ukufundisa okuyingenelo kuwe, Lowo ukubangela unyathele endleleni ofanele uhambe ngayo.’ Wongezelela esithi: ‘Owu ukuba nje kuphela okunene ubunganikela ingqalelo kwimiyalelo yam! Ngoko uxolo lwakho beluya kuba njengomlambo, nobulungisa bakho njengamaza olwandle.’ Ewe, uMdali wethu ufuna kungenelwe thina. Ufuna ‘sinyathele kwindlela’ esa kwimpumelelo yokwenene.

5 Yiba Nothando Olungazingciyo

“Uthando luyakha.” (1 Korinte 8:1) Bebuya kuba njani ubomi ngaphandle kothando? Bebuya kuba lilize yaye budakumbise! Umpostile uPawulos ongumKristu waphefumlelwa nguThixo ukuba abhale athi: “Ukuba andinalo uthando [ngabanye], ndiyinto engento. . . akuncedi nto konke konke.”—1 Korinte 13:2, 3.

Apha akubhekiswa kuthando oluphakathi kwendoda nebhinqa nakuba eneneni nalo lunendawo yalo. Kunoko, kubhekiswa kuhlobo lothando olunzulu nolunempembelelo ngakumbi nolusekelwe kwimilinganiselo kaThixo.a (Mateyu 22:37-39) Ngapha koko olu thando lushukumisela ubani esenzweni. UPawulos wathi olu thando lunomonde yaye lunobubele. Alunamona, aluqhayisi yaye aluzigwagwisi. Lusishukumisela ukuba sincede abanye, alukhubeki msinya yaye luyaxolela. Uthando olunjalo luyakha. Ngaphezu koko, lusinceda sibe nolwalamano oluhle nabanye ingakumbi amalungu entsapho.—1 Korinte 13:4-8.

Abazali bafanele babathande ngokunzulu abantwana babo baze bababekele imilinganiselo ecacileyo esekelwe eBhayibhileni. Abantwana abakhulele kumakhaya anjalo baziva benqabisekile, bezinzile, bethandwa ngokwenene yaye bexabisekile.—Efese 5:33–6:4; Kolose 3:20.

UJack oselula waseUnited States wakhulela kwintsapho ephila ngemilinganiselo yeBhayibhile. Emva kokuba ephumile ekhaya, uJack wabhalela abazali bakhe ileta. Inxalenye yaloo leta yayisithi: “Bendisoloko ndizama ukulandela umyalelo [weBhayibhile] othi: ‘Beka uyihlo nonyoko, ukuze kulunge kuwe.’ (Duteronomi 5:16) Ngokwenene izinto ziye zandilungela. Yaye ngoku ndikuxabisa kakhulu ukuzibhokoxa kwenu. Ndinibulela kakhulu ngokusebenza nzima nindikhulisa nangenkxaso yenu.” Ukuba ungumzali, unokuvakalelwa njani xa unokufumana ileta ethetha ngolu hlobo? Ngaba akunakuvuya?

Kwakhona uthando lomgaqo “luvuyisana nenyaniso”—inyaniso efumaneka eBhayibhileni. (1 Korinte 13:6; Yohane 17:17) Ngokomzekelo: Abantu ababini abatshatileyo abaneengxaki zomtshato bafunda amazwi awathethwa nguYesu akuMarko 10:9, athi: “Oko uThixo akubophelele ngedyokhwe ndawonye [emtshatweni] makungahlukaniswa mntu.” Emva koko kufuneka bazigocagoce. Ngaba ngokwenene ‘bavuyisana nenyaniso yeBhayibhile’? Ngaba umtshato wabo bawugqala njengongcwele, njengoko noThixo ewugqala ngaloo ndlela? Ngaba bazimisele ukuzama ukulungisa iingxaki zabo ngothando? Ukuba kunjalo, umtshato wabo unokuphumelela yaye oko kuya kubazisela uvuyo.

6 Yiphaphele Intswelo Yakho Yokomoya

“Banoyolo abo bayiphapheleyo intswelo yabo yokomoya.” (Mateyu 5:3) Ngokungafaniyo nezilwanyana, abantu banentswelo yokomoya. Yiloo nto bezibuza imibuzo efana nethi, Yintoni injongo yobomi? Ngaba ukho uMdali? Kwenzeka ntoni kuthi xa sisifa? Lisiphathele ntoni ikamva?

Ehlabathini lonke, izigidi zabantu abanyanisekileyo ziye zaqonda ukuba iBhayibhile iyayiphendula le mibuzo. Ngokomzekelo, lo mbuzo wokugqibela uphathelele injongo kaThixo ngoluntu. Yiyiphi loo njongo? Kukuba umhlaba ube yiparadesi yaye kuhlale kuwo abantu abathanda uThixo nemilinganiselo yakhe, ngonaphakade. INdumiso 37:29 ithi: “Amalungisa aya kuwudla ilifa umhlaba, ahlale kuwo ngonaphakade.”

Ngokucacileyo, uMdali wethu akafuni siphumelele iminyakana nje engama-70 okanye engama-80. Ufuna siphumelele ngonaphakade! Ngoko eli lixesha lokuba ufunde ngoMdali wakho. UYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.” (Yohane 17:3) Njengoko ungenisa olo lwazi uze uphile ngokuvisisana nalo, uya kufumanisa ukuba ‘intsikelelo kaYehova iyatyebisa, yaye akongezi ntlungu kuyo.’—IMizekeliso 10:22.

[Umbhalo osemazantsi]

[Ibhokisi ekwiphepha 7]

EMINYE IMIYALELO ENOKUKUNCEDA UPHUMELELE

◼ Yoyika uThixo. “Ukoyika uYehova kukuqala kobulumko.”—IMizekeliso 9:10.

◼ Bakhethe ngobulumko abahlobo. “Ohamba nezilumko uya kuba sisilumko naye, kodwa osebenzisana neziyatha uya kuhlelwa bububi.”—IMizekeliso 13:20.

◼ Kuphephe ukuzibaxa izinto. “Inxila nedla-kudla baya kuhlwempuzeka.”—IMizekeliso 23:21.

◼ Musa ukuziphindezela. “Musani ukubuyisela ububi ngobubi nakubani na.”—Roma 12:17.

◼ Zibhokoxe emsebenzini. “Ukuba umntu akafuni kusebenza, makanganikwa kutya.”—2 Tesalonika 3:10.

◼ Sebenzisa uMthetho Omkhulu. “Zonke izinto . . . enifuna abantu bazenze kuni, yenzani ngokunjalo nani kubo.”—Mateyu 7:12.

◼ Lulawule ulwimi lwakho. “Lowo uthanda ukufumana ubomi nokubona imihla elungileyo, makathintele ulwimi lwakhe kokubi.”—1 Petros 3:10.

[Ibhokisi/Umfanekiso okwiphepha 8]

UTHANDO LIYEZA

Ugqirha okwangumbhali, uDean Ornish uthi: “Uthando lunokusenza sigule okanye siphile, sidakumbe okanye sonwabe, sibandezeleke okanye sinyangeke. Ukuba bekunokubakho iyeza elinamandla ngolo hlobo, phantse bonke oogqirha bebeya kulinika izigulana zabo. Bekungenakubakho gqirha ungalisebenzisiyo.”

[Ibhokisi/Imifanekiso ekwiphepha 9]

WAPHUMELELA EMVA KOKUDANDATHEKA

Xa kwaqalisa imfazwe kwilizwe lakowabo, uMilanko ohlala kwiBalkans, wangena emkhosini. Ngenxa yokuba wayelikroti, wabizwa ngokuba nguRambo, igama lelinye igorha elalidlala kwenye imovie eyayinogonyamelo. Noko ke, ekuhambeni kwexesha wadaniswa kukubona ukunganyaniseki nohanahaniso kwezomkhosi. Uthi: “Oku kwandikhokelela ekubandakanyekeni kwimikhuba engcolileyo—utywala, icuba, iziyobisi, ukungcakaza nokuziphatha okubi. Imeko yam yayimaxongo yaye ndandingayazi indlela yokuphuma kwezo ngxaki.”

Ngelo xesha lobunzima, uMilanko waqalisa ukufunda iBhayibhile. Kwathi ke ngenye imini etyelele isalamane sakhe, wabona iMboniselo, epapashwe ngamaNgqina kaYehova. Waba nomdla kakhulu koko wayekufunda waza waqalisa ukufunda iBhayibhle namaNgqina. Inyaniso yeBhayibhile yamnceda ukuba afumane indlela esa kulonwabo nempumelelo. Uthi: “Yandihlaziya yaye ndahlukana naloo mikhwa ingcolileyo ndaza ndaphila ubomi obahlukileyo, emva koko ndabhaptizwa ndaba liNgqina likaYehova. Abantu ababendazi bayeka ukuthi ndinguRambo ngoku bathi ndinguBunny—isiteketiso sam sobuntwana—kuba ngoku ndizolile.”