Indlela Yokuhlakulela Uthando Lokwenene
“Uthando lichiza lobomi; uthando luyaphilisa.”—Living to Purpose, nguJoseph Johnson, ngowe-1871.
UMNTU ukufunda njani ukuthanda? Ngokufundela ukuba sisazinzulu ngengqondo? Ngokufunda iincwadi ezithile? Ngokubukela ifilimu ezibalaselisa uthando? Akunjalo. Abantu bafunda ukuthanda okokuqala ngomzekelo nangoqeqesho lwabazali babo. Abantwana baya kulwazi uthando ukuba bakwikhaya elinothando naxa bebona abazali babo bebondla, bebakhusela, bebancokolisa baze babonakalise umdla wokwenene kubo. Kwakhona bafunda ukuthanda xa abazali babo bebafundisa ukulandela imigaqo efanelekileyo yoko kulungileyo noko kuphosakeleyo.
Uthando lokwenene aluyomvakalelo nje enzulu. Lusoloko lubeka izilangazelelo zabanye kuqala, nangona maxa wambi abanye besenokungakuxabisi oko, nto leyo edla ngokwenzeka kubantwana xa beqeqeshwa ngothando. Owona mzekelo ugqibeleleyo walowo wabonakalisa uthando lokungazingci nguMdali. Umpostile uPawulos wabhala: “Nyana wam, musa ukuyidelela ingqeqesho kaYehova, yaye ungatyhafi wakulungiswa nguye; kuba lowo uYehova amthandayo uyamqeqesha.”—Hebhere 12:5, 6.
Bazali, ninokumxelisa njani uYehova ekubonakaliseni uthando kwintsapho yenu? Yaye ubaluleke kangakanani umzekelo eniwubonisayo kulwalamano lwenu njengendoda nomfazi?
Fundisa Uthando Ngomzekelo
Ukuba ungumyeni, ngaba uyamhlonela yaye uyamxabisa umfazi wakho? Ukuba ungumfazi, ngaba uyamthanda yaye uyamxhasa umyeni wakho? IBhayibhile ithi indoda nomfazi bafanele bathandane baze bahlonelane. (Efese 5:28; Tito 2:4) Ukuba benjenjalo, abantwana bazibonela ngokwabo uthando lobuKristu. Esi isenokuba sisifundo esinamandla nesixabisekileyo!
Kwakhona abazali bakhuthaza ukuba kubekho uthando entsatsheni xa bethobela imigaqo ephakamileyo ngokuphathelele izinto ezinjengokuzonwabisa, ukuziphatha, usukelo nezinto eziza kuqala. Ehlabathini lonke, abantu baye bafumanisa ukuba iBhayibhile iluncedo kakhulu ekumiseleni imigaqo enjalo yentsapho, bengqina ngokwabo ukuba ngokwenene iBhayibhile “iphefumlelwe nguThixo kwaye iyingenelo ekufundiseni, ekohlwayeni, ekulungelelaniseni izinto, ekuqeqesheleni ebulungiseni.” (2 Timoti 3:16) Eneneni, imigaqo yokuziphatha nokhokelo lobomi olufumaneka kwiNtshumayelo yaseNtabeni, ezo zinto azinakuthelekiswa nanto.—Mateyu, isahluko 5 ukusa kwese-7.
Xa yonke intsapho ilandela ukhokelo lukaThixo ize ithobele imigaqo yakhe, mntu ngamnye uziva enqabisekile yaye kusenokwenzeka ukuba abantwana babathande baze babahlonele abazali babo. Kwelinye icala, kwikhaya elingenamigaqo abantwana basenokucaphuka, babe nomsindo yaye bavukele.—Roma 2:21; Kolose 3:21.
Kuthekani ngabazali abangenamaqabane? Ngaba kunzima kakhulu kubo ukufundisa abantwana babo ukuba babe nothando? Kusenokungabi njalo. Nangona kungekho nto enokuthabathel’ indawo ikhaya elinomama notata, amava abonisa ukuba, ukuba kukho ulwalamano oluhle entsatsheni oko kunokusivala ngomlinganiselo othile isikhewu somzali ongekhoyo. Ukuba ungumzali ongenaqabane, zabalazela ukusebenzisa imigaqo yeBhayibhile ekhayeni lakho. Eneneni, omnye umzekeliso usixelela oku: “Kholosa ngoYehova ngayo yonke intliziyo yakho, ungayami ngokwakho ukuqonda. Uze umgqale yena ezindleleni zakho zonke, kwaye uya kuwenza uthi tye umendo wakho”—kuquka nomendo wabazali.—IMizekeliso 3:5, 6; Yakobi 1:5.
Abantu abaninzi abaselula abalungileyo bakhuliswa ngabazali abangenamaqabane yaye ngoku bakhonza uThixo ngokuthembeka kumawaka amabandla amaKristu amaNgqina kaYehova ehlabathini lonke. Oku kububungqina bokuba nabo abazali abangenamaqabane banokuphumelela ekufundiseni abantwana babo ngothando.
Indlela Bonke Abanokuluhlakulela Ngayo Uthando
IBhayibhile yaxela kwangaphambili ukuba ‘imihla yokugqibela’ iya kubonwa ngokungabikho ‘komsa wemvelo,’ oko kukuthi, ukungabikho kothando oludla ngokubakho phakathi kwamalungu entsapho. (2 Timoti 3:1, 3) Sekunjalo, kwanabo ekusenokwenzeka ukuba bakhulela kwikhaya elingenalo uthando banokufunda ukuhlakulela uthando. Banokukwenza njani oku? Ngokufunda kuYehova, oluvela Kuye uthando nalubonakalisa kubo bonke abasondela kuye ngokusuk’ entliziyweni. (1 Yohane 4:7, 8) Omnye umdumisi wathi: “Nokuba ubawo noma bangandishiya, ke yena uYehova uya kundithabatha.”—INdumiso 27:10.
UYehova ulubonakalisa kuthi uthando ngeendlela ezininzi ezahlukahlukeneyo. Ulubonakalisa ngolwalathiso lobubele oluvela eBhayibhileni, ngoncedo lomoya oyingcwele, nangenkxaso yabazalwana abangamaKristu. (INdumiso 119:97-105; Luka 11:13; Hebhere 10:24, 25) Makhe siqwalasele indlela ezi nkalo ezinokusinceda ngayo ukuze sikhulise uthando ngoThixo nangommelwane.
Ulwalathiso Lobubele Oluphefumlelweyo
Ukuze sibe nolwalamano olusenyongweni nomntu othile, simele simazi kakuhle loo mntu. Ngokuzityhila eBhayibhileni, uYehova uyasicela ukuba sisondele kuye. Kodwa ke, ukufunda iBhayibhile akwanele. Simele sisebenzise oko ikufundisayo zise sizuze ngokwenjenjalo. (INdumiso 19:7-10) UIsaya 48:17 uthi: “Mna, Yehova, ndinguThixo wakho, Lowo ukufundisa okuyingenelo kuwe, Lowo ukubangela unyathele endleleni ofanele uhambe ngayo.” Ewe, uYehova oluthando, uyasifundisa ukuze kuzuze thina—kungekhona ngenxa yokuba efuna ukusibekela imiqathango engeyomfuneko.
Kwakhona ukuba nolwazi lweBhayibhile kuyasinceda sikhulise uthando ngabanye abantu. Oku kungenxa yokuba inyaniso yeBhayibhile isifundisa indlela uThixo abajonga ngayo abantu ize isibonise imigaqo engendlela esifanele sibaphathe ngayo abanye. Sinolwazi olunjalo, sinesizathu esiqinileyo sokuhlakulela uthando ngommelwane. Umpostile uPawulos wathi: “Ndiqhubeka ndithandazela ukuba uthando lwenu luphuphume ngakumbi nangakumbi lulwazi oluchanileyo nokuqonda okupheleleyo.”—Filipi 1:9.
Ukuze sibone indlela uthando olunokuphuphuma ngayo “lulwazi oluchanileyo,” makhe siqwalasele oko kubhalwe kwiZenzo 10:34, 35: “UThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” Ukuba uThixo ujonga abantu ngokwezenzo zabo ezilungileyo nangokuhlonela uThixo, kungekhona ngobuzwe okanye ngobuhlanga, ngaba asimele sibajonge abanye abantu ngendlela efanayo, singakhethi buso?—IZenzo 17:26, 27; 1 Yohane 4:7-11, 20, 21.
Uthando—Isiqhamo Somoya KaThixo
Kanye njengemvula efika ngexesha esitiyeni ibangela isivuno esihle, umoya kaThixo ubangela abantu abaphulaphulayo babe neempawu iBhayibhile ezichaza ‘njengesiqhamo somoya.’ (Galati 5:22, 23) Eyona nto ibalulekileyo kwesi siqhamo luthando. (1 Korinte 13:13) Kodwa siwufumana njani umoya kaThixo? Eyona ndlela ibalulekileyo kungomthandazo. Ukuba sithandazela umoya kaThixo, uya kusinika. (Luka 11:9-13) Ngaba ‘uqhubeka’ uthandazela umoya oyingcwele? Ukuba wenjenjalo, ngoko ke isiqhamo sawo esixabisekileyo, kuquka nothando, sifanele sibonakale ngakumbi ebomini bakho.
Kodwa ke, kukho olunye uhlobo lomoya osebenza nxamnye nomoya kaThixo. IBhayibhile ithi ‘ngumoya wehlabathi.’ (1 Korinte 2:12; Efese 2:2) Lo moya uyimpembelelo embi, yaye uvela kuSathana uMtyholi, “umlawuli weli hlabathi” loluntu olunxaxhileyo kuThixo. (Yohane 12:31) Njengomoya ovusa isaqhwithi, “umoya wehlabathi” uvelisa iminqweno emibi ephelisa uthando ize yanelise ubuthathaka benyama.—Galati 5:19-21.
Abantu baba nalo moya mbi xa bethanda izinto eziphathekayo, bezingca, bethanda ubundlobongela, yaye beneembono ezigqwethekileyo ngothando, nto leyo exhaphakileyo ehlabathini. Ukuba ufuna ukukhula kuthando lokwenene, umele uwuxhathise ngamandla umoya weli hlabathi. (Yakobi 4:7) Kodwa ke, ungathembeli emandleni akho; cela uncedo lukaYehova. Umoya wakhe—awona mandla omeleleyo kwindalo iphela—anokukomeleza uze uphumelele.—INdumiso 121:2.
Funda Uthando Kubazalwana AbangamaKristu
Kanye njengokuba abantwana befunda ukubonakalisa uthando xa lubonakaliswa ekhaya, sonke—abaselula nabadala—sinokukhulisa uthando ngokunxulumana namanye amaKristu. (Yohane 13:34, 35) Eneneni, enye yezona zinto zibalulekileyo kwibandla lamaKristu ‘kukulolana eluthandweni nasemisebenzini emihle.’—Hebhere 10:24, iBhayibhile yesiXhosa.
Uthando olunjalo luxatyiswa kakhulu ngabo ‘bahlinzekileyo nabalahliweyo’ kweli hlabathi lisingqongileyo lingenalo uthando. (Mateyu 9:36) Amava aye abonisa ukuba xa umntu omdala ethandwa, oko kungaphilisa amanxeba okungathandwa ngoxa wayengumntwana. Ngoko ke, kubaluleke kakhulu ukuba onke amaKristu azahluleleyo abamkele abasebatsha abaze kunxulumana nawo!
“Uthando Aluze Lutshitshe”
IBhayibhile ithi “uthando aluze lutshitshe.” (1 Korinte 13:8) Kwenzeka njani oko? Umpostile uPawulos uthi: “Uthando luzeka kade umsindo yaye lunobubele. Uthando alunakhwele, alugwagwisi, alukhukhumali, aluziphathi ngokungandilisekanga, alufuni ezalo izilangazelelo, alucaphuki. Alunanzondo.” (1 Korinte 13:4, 5) Kucacile ukuba olu thando asilothando nje lwasentsomini okanye oludikidiki. Ngokwahlukileyo koku—abo balubonakalisayo bayaqonda ukuba ubomi bungamahla-ndinyuka, kodwa abakuvumeli oku kuphelise uthando lwabo ngabantu. Ngokwenene uthando olunjalo “lungumxokelelwane ogqibeleleyo womanyano.”—Kolose 3:12-14.
Cinga ngomzekelo wentombazana engumKristu eneminyaka eli-17 ubudala eKorea. Xa yaqalisa ukukhonza uYehova uThixo, intsapho yakowayo yayingakuthandi oko yaye kwafuneka ilishiye ikhaya. Kodwa ke, kunokuba ivuthe ngumsindo, yawuthandazela lo mbandela, ivumela iLizwi likaThixo nomoya oyingcwele ukuba zixonxe indlela ecinga ngayo. Emva koko, yayidla ngokubhalela intsapho yakowayo, ichaza indlela ebathanda ngayo. Ngenxa yoko, abantakwayo ababini abadala baqalisa ukufundisisa iBhayibhile yaye ngoku bangamaKristu azahluleleyo. Unina nomntakwayo omncinane nabo bayamkela inyaniso yeBhayibhile. Ekugqibeleni, uyise, owayechase ngeyona ndlela, waguquka. Le ntombazana iliNgqina ibhala isithi: “Sonke singamaKristu atshatileyo, yaye intsapho yakowethu ngoku ingabanquli abamanyeneyo abangama-23.” Hayi indlela olunamandla ngayo uthando!
Ngaba ufuna ukuhlakulela uthando lokwenene uze uncede abanye ukuze nabo benjenjalo? Ngoko ke sondela kuYehova, kuba luvela Kuye olu phawu luxabisekileyo. Ewe, phulaphula oko kuthethwa liLizwi lakhe, thandazela umoya oyingcwele, uze unxulumane ngokuthe rhoqo nabazalwana abangamaKristu. (Isaya 11:9; Mateyu 5:5) Komeleza ngokwenene ukwazi ukuba kungekudala bonke ububi buya kupheliswa, kuze kusale kuphela abo babonakalisa uthando lokwenene lobuKristu! Ngokwenene, uthando lungundoqo kulonwabo nakubomi.—INdumiso 37:10, 11; 1 Yohane 3:14.
[Imifanekiso ekwiphepha 6]
Umthandazo nokufundisisa iLizwi likaThixo kuya kusinceda sihlakulele uthando lokwenene