Utitshala Utshintsha Imbono Awayenayo

◼ Kwiminyaka embalwa edluleyo, utitshala eBatumi, kwilizwe laseGeorgia wacela abafundi ukuba badwelise Imithetho Elishumi. Wamangaliswa lo titshala xa omnye wabafundi bakhe, uAnna, wayicengceleza. Waphendula neminye imibuzo yeBhayibhile ngendlela echuliweyo. Utitshala engakholelwa, wambuza ukuba ukwazi njani konke oku. Xa uAnna wamphendulayo ukuba wayefunde namaNgqina kaYehova, lo titshala wamngen emlonyeni, esithi anenzondelelo yempambano.

Ngesinye isihlandlo, utitshala wacela abafundi ukuba babhale isincoko ngobomi baseGeorgia nangeengxaki ezahlukahlukeneyo elo lizwe elalijongene nazo. Ekupheleni kwesincoko sakhe uAnna wabhala wathi: “Nayiphi na imizamo yabantu yokulungisa iingxaki ezikhoyo ayiyi kuphumelela, kuba uYeremiya 10:23 uthi: ‘Ayikho semntwini wasemhlabeni indlela yakhe. Asikokomntu ohambayo ukwalathisa inyathelo lakhe.’ Zonke iingxaki ziya kuconjululwa kuphela buBukumkani bukaThixo.”

Ngemini elandelayo utitshala wasincoma isincoko sika-Anna phambi kweklasi esithi: “Ndisithandile isincoko sika-Anna asibhale ngamazwi akhe. Kuso uye wacacisa indlela iingxaki zehlabathi eziya kutshintsha ngayo.” Utitshala wayeyithanda nendlela uAnna awayeziphethe ngayo, emncoma phambi kweklasi yonke ngesimilo sakhe nendlela enesidima awayenxiba ngayo.

Xa amaNgqina kaYehova aqhagamshelana nalo titshala ekhayeni lakhe, lo titshala wathi ngaphambili wayecinga ukuba anenzondelelo yempambano kodwa ngoku wayetshintshe imbono awayenayo ngenxa yomfundi wakhe uAnna. Ngowama-2007, lo titshala waya kwiSikhumbuzo sokufa kukaYesu Kristu kunye namaNgqina kaYehova, waza waphulaphula ngenyameko.

Emva kweSikhumbuzo, utitshala ka-Anna wavuma ukuba wayekholisekile yindlela amaNgqina kaYehova ayazi kakuhle ngayo iBhayibhile. Ngoku amaNgqina afunda naye iBhayibhile ngokuthe rhoqo. Licacile elokuba, njengalo titshala, nawe ufuna ukwazi ngeenkolelo zabanye. Kutheni ungaceli omnye wamaNgqina kaYehova akuqhubele isifundo seBhayibhile sesisa?

[Umfanekiso okwiphepha 21]

UAnna ebhala isincoko sakhe