Abavakalisi BoBukumkani Bayabalisa
ILatvia Iyasabela Kwiindaba Ezilungileyo
IBHAYIBHILE iyibeka ngokucacileyo into yokuba kukuthanda kukaThixo ukuba “zonke iintlobo zabantu zisindiswe zize zifikelele elwazini oluchanileyo lwenyaniso.” (1 Timoti 2:4) Abo kangangeminyaka emininzi babengenalo ilungelo lokuva iindaba ezilungileyo ngoku bayaziva! ELatvia, njengakwezinye iindawo zehlabathi, abantu abakubudala nabaneemvelaphi ezahlukahlukeneyo bayasabela kwesi sigidimi, njengoko amava alandelayo ebonisa.
• ERēzekne, idolophu ekwimpuma yeLatvia, umama nentombi yakhe ekwishumi elivisayo bacela ulwalathiso kwelinye ibhinqa esitratweni. Emva kokubanika inkcazelo, eli bhinqa, ekwathi kanti lingomnye wamaNgqina kaYehova, labamemela kwiintlanganiso zamaNgqina.
Ekubeni lo mama nentombi yakhe babetyekele kunqulo, bagqiba kwelokuba baye kwiintlanganiso. Endleleni, benza isivumelwano sokuba xa kunokubakho into engafanelekanga apho, babeza kuhamba bengaphozisanga maseko. Noko ke, bazinandipha iintlanganiso kangangokuba ingcinga yokuhamba ayizange ithi qatha ezingqondweni zabo. Basamkela isifundo seBhayibhile baza baqalisa ukuya rhoqo kwiintlanganiso. Kwiinyanga nje ezintathu, bavakalisa umnqweno wokuthelela kumsebenzi wokushumayela yaye bajonga phambili ekubhaptizweni.
• Kwidolophu esentshona Latvia, elinye iNgqina ladibana noAnna oneminyaka engama-85 ubudala, owabonakalisa umdla wokwenene waza wamkela isifundo seBhayibhile. Intombi yakhe namanye amalungu entsapho bamchasa ngokukrakra. Kodwa uAnna akazange avumele oko okanye ubudala bakhe nempilo yakhe enkenenkene ukuba zimthintele ekufundeni iBhayibhile.
Ngenye imini, uAnna waxelela intombi yakhe ukuba wayeza kubhaptizwa. Intombi ka-Anna yaphendula yathi: “Ukuba uyabhaptizwa, ndiza kukuthumela kwikhaya labangenakuzinyamekela.” Noko ke, esi sisongelo asizange simdimaze uAnna. Ngenxa yemeko yempilo yakhe, wabhaptizelwa ekhayeni lakhe.
Yasabela njani intombi ka-Anna? Yasiguqula isimo sayo, yaza yamlungiselela isidlo esikhethekileyo emva kobhaptizo. Yandula ke yabuza unina, “Uziva njani ngoku njengoko ubhaptiziwe?” UAnna waphendula wathi: “Ndiziva ngathi ndiyimveku!”
• NgoDisemba wowe-1998, amaNgqina amabini adibana nowayesakuba ngunjengele womkhosi weyayisakuba yiSoviet Union. Ekubeni wayekholelwa kuMdali, wasamkela isifundo seBhayibhile, yaza inkosikazi yakhe yamthelela kamva. Ngokukhawuleza benza inkqubela baza bangabavakalisi abangabhaptizwanga. Ngehlobo elilandelayo, owayesakuba ngunjengele wabhaptizwa. Uthando lwesi sibini ngezinto zokomoya lube lukhuthazo kubo bonke abasebandleni. Ngaphezu koko, baye bazinikela kumsebenzi wokuguqula elinye ikhaya lasekuhlaleni ekubeni yiHolo yoBukumkani entle.