Uthando Luyaloyisa Ikhethe

“Okokuqala ezimbalini kuvele iqela elitsha lonqulo: apha asithethi ngohlanga olunqula ilizwe lalo, kodwa sithetha ngeqela lamatsha-ntliziyo angenabuhlanga nabuzwe: amadoda namabhinqa ahlanganisana kuphela ngenjongo yokunqula uthixo wawo.”—Incwadi ethi A History of Christianity, ebhalwe nguPaul Johnson.

ATHE esakwanda amaKristu okwenyaniso kuBukhosi bamaRoma, abantu babona ummangaliso—intsapho yokomoya yamaKristu esehlabathini jikelele nefundiswe ukuphila ngoxolo nangomanyano. Eyona nto yanceda le “ntsapho” ibe seluxolweni luthando lokwenene olungasekelwanga kwiimvakalelo kuphela kodwa nakwimigaqo eyifundiswe nguThixo.

UYesu Kristu, naye owayethiyiwe yaye ecalulwa ngabathile, wayifundisa le migaqo waza waphila ngokuvumelana nayo. (1 Petros 2:21-23) Phakathi kwezinye izinto wayengowaseGalili, ibe eGalili kwakuzele abalimi nabalobi, bantu abo ababejongelwa phantsi ziinkokeli zonqulo zaseYerusalem ezingamaYuda. (Yohane 7:45-52) Kwakhona, uYesu wayebalasele ngokufundisa, ethandwa, ehlonelwa kananjalo ngabantu abaninzi. Kuba zazibhuqwa ngumona, ezi nkokeli zonqulo zaqalisa ukuxoka ngoYesu, zaza zabhunga ngokumbulala!—Marko 15:9, 10; Yohane 9:16, 22; 11:45-53.

Sekunjalo, uYesu akazange ‘abuyisele ububi ngobubi.’ (Roma 12:17) Ngokomzekelo, xa abanye abaFarisi—amalungu ehlelo lamaYuda elalingamfuni uYesu—bambuza imibuzo enyanisekileyo, wabaphendula ngobubele. (Yohane 3:1-21) Wayede atye nabo, kuquka nomnye umFarisi owayenayo indawana yekhethe ngakuYesu. Walibonisa njani eli khethe? Ngaloo mihla kwakulisiko ukuhlamba iinyawo zondwendwe; kodwa lo mFarisi akazange azihlambe ezikaYesu. Ngaba loo nto yamkhathaza uYesu? Akunjalo. Kunokuba imkhathaze, wasebenzisa elo thuba ukuze afundise ngokuba novelwano nokuxolela.—Luka 7:36-50; 11:37.

UYesu Wayebathanda Abantu Ababegculelwa

Owona mzekeliso waziwayo kaYesu ngowomSamariya olungileyo, owasebenzisa imali yakhe ukunceda umYuda othile owayebethiwe waza wakhuthuzwa. (Luka 10:30-37) Kutheni kusithiwa lo mSamariya wenza into elungileyo? Eneneni, amaYuda namaSamariya ayethiyene egazini. Igama elithi “umSamariya” lalisetyenziswa ngamaYuda ukubonisa indelelo eyabhekiselwa nakuYesu. (Yohane 8:48) Ngenxa yaloo nto, awukho omnye umzekeliso owawunokodlula lowo, awayenokuwusebenzisa uYesu ukuphuhlisa umbandela wokungakhethi buso nokuthand’ ummelwane.

UYesu wawaxhasa amazwi akhe ngokuba ngumzekelo, ephilisa umSamariya owayeneqhenqa. (Luka 17:11-19) Kanti uYesu wafundisa amanye amaSamariya anoxabiso wada wancokola ithuba elide nomfazi ongumSamariya—nto leyo eyayingaqhelekanga. (Yohane 4:7-30, 39-42) Kutheni kwakungaqhelekanga nje oko? Oorabhi bakwaYuda ababeyilandela ngokungqongqo imithetho babengathethi naye nawuphi na umfazi esidlangalaleni—kuquka nesalamane esisondeleyo—singasathethi ke ngomfazi ongumSamariya!

Ngoko ke uThixo umjonga njani umntu onekhethe kodwa ozamayo ukulisusa entliziyweni yakhe? Kwakhona, iBhayibhile iwuhlolisisa ngendlela ethuthuzelayo lo mba.

UThixo Unomonde Kuthi

Kwinkulungwane yokuqala, amaYuda amaninzi angamaKristu ayebacalula abantu abangengomaYuda, yaye abaninzi kwaba bantu babesiba ngamakholwa. UYehova uThixo wayilungisa njani le ngxaki yayinokubangela iyantlukwano? Ngomonde walifundisa ibandla lamaKristu. (IZenzo 15:1-5) Njengokuba kuboniswe ekuqaleni kweli nqaku, loo monde waba nemiphumo emihle, kuba ibandla ‘lalingenabuhlanga nabuzwe.’ Ngenxa yoko, “amabandla aqhubeka eqiniswa elukholweni yaye esanda ngenani imihla ngemihla.”—IZenzo 16:5.

Sifunda ntoni kuloo nto? Musa ukunikezela, kodwa qhubeka uthembele kuThixo onika ubulumko namandla kwabo ‘bamcela ngokholo.’ (Yakobi 1:5, 6) Usamkhumbula uJennifer, uTimothy, uJohn, no-Olga ekuthethwe ngabo kwinqaku lokuqala kungcelele lwala manqaku? UJennifer wathi efika kumabanga aphezulu, wabe sele engumKristu oqolileyo, ibe wayesele ezifundise ukungazihoyi izithuko zobuhlanga nezinto ezazithethwa ngesithomo sakhe. Kuthe naxa kugezelwa enye intombazana ngabo afunda nabo, uJennifer wayithethelela waza wayithuthuzela.

Yintoni eyanceda uTimothy akacaphuka xa abanye abafundi babemgculela ngenxa yohlanga alulo? Wathi: “Eyona nto yayindixhalabisa yindlela endandinokulenza ligculelwe ngayo igama likaYehova uThixo. Kwakhona ndandisoloko ndizikhumbuza ukuba simele ‘sihlale siboyisa ububi ngokulungileyo, size singabuvumeli busoyise.’”—Roma 12:21.

UJohn wayeka ukuhlekisa ngomfundi ongumHausa owayeseklasini yakhe. Uthi: “Ndandikwishumi elivisayo ukudibana kwam nabafundi abangamaHausa ababa ngabahlobo bam. Omnye wabo bafundi wandincedisa kumsebenzi esasiwunikwe esikolweni yaye ndasebenza kakuhle gqitha naye. Ngoku abantu ndibajonga ngenye indlela kungekhona isizwe okanye uhlanga abalulo.”

UOlga nomnye umthunywa wevangeli awayesebenza naye, abazange boyike xa batshutshiswa ngabachasi abanentiyo kodwa baqhubeka beqinisekile ukuba abanye abantu baya kusamkela isigidimi seBhayibhile. Abaninzi basamkela esi sigidimi. Uthi: “Kwiminyaka engamashumi amahlanu kamva, kweza enye indoda eyandinika ingxowana entle. Ngaphakathi kuyo kwakukho amatye amancinane awayebhalwe iimpawu zobuKristu ezinjengokulunga, ububele, uthando noxolo. Yandixelela ukuba yayiphakathi kwamakhwenkwe awandigibisela ngamatye yaye ngoku ingumzalwana ongumKristu. Ikunye nenkosikazi yayo bandinika iziqhuma ezibini zeentyatyambo ukongezelela kulaa ngxowana yamatye.”

Ixesha Elingayi Kuba Nakhethe Nalucalucalulo!

Ikhethe nocalucalulo ziza kuphela kungekudala. Njani? Okokuqala nje, umhlaba uya kube unoMlawuli owabonisa ukuba “akayi kugweba ngayo nayiphi na imbonakalo nje esemehlweni akhe”—uYesu Kristu. (Isaya 11:1-5) Ukongezelela, abalawulwa bakaYesu baya kuxelisa isimo sakhe sengqondo, kuba bonke baya kufundiswa nguye noYise, uYehova uThixo.—Isaya 11:9.

Loo mfundiso sele iqalile yaye ixhobisa abantu bakaThixo ukuba bakwazi ukuphila kwinkqubo entsha ngokupheleleyo. Ngoko nawe unokuzixhakamfulela ithuba lokufumana isifundo seBhayibhile sasimahla.a Ngokwenene uThixo akakhethi buso ibe uthanda ukuba “zonke iintlobo zabantu zisindiswe zize zifikelele elwazini oluchanileyo lwenyaniso.”—1 Timoti 2:3, 4.

[Umbhalo osemazantsi]

[Amagama acatshulweyo akwiphepha 8]

Kungekudala ikhethe nocalucalulo azisayi kuphinda ziphixanise abantu.

[Ibhokisi/Umfanekiso okwiphepha 8, 9]

IMIGAQO KATHIXO ESINOKUYISEBENZISA EBOMINI BETHU

◼ “Musani ukubuyisela ububi ngobubi nakubani na. . . . Hlala uboyisa ububi ngokulungileyo.” (Roma 12:17-21) Sisifundisa ntoni esi sibhalo? Ukuba abanye abantu bakuphatha kakubi, wena baphathe kakuhle. UYesu Kristu wathi: “Bandithiya ngaphandle kwesizathu.” Kodwa yena akazange abathiye.—Yohane 15:25.

◼ “Masingazigwagwisi, . . . simonelana.” (Galati 5:26) Umona nekratshi zinokulonakalisa ulwalamano lwethu noThixo, nto leyo enokukhokelela kwintiyo nekhethe.—Marko 7:20-23.

◼ “Zonke izinto, ngoko, enifuna abantu bazenze kuni, yenzani ngokunjalo nani kubo.” (Mateyu 7:12) Khawuzibuze, ‘Mna ndifuna ukuphathwa njani?’ Baphathe ngendlela efanayo abanye abantu enoba badala kangakanani na, banaliphi na ibala, bathetha luphi ulwimi okanye bakhuliswe njani.

◼ “Yamkelanani, kanye njengokuba noKristu wasamkelayo.” (Roma 15:7) Ngaba ukhe uzame ukubazi abantu abaneemvelaphi neenkcubeko ezahlukahlukeneyo, ingakumbi xa bengabakhonzi bakaThixo?—2 Korinte 6:11.

◼ “Nokuba ubawo noma bangandishiya, ke yena uYehova uya kundithabatha.” (INdumiso 27:10) Enoba abanye abantu bangakuphatha njani na, uThixo akanakuze akushiye ukuba uqhubeka unyanisekile kuye.

[Umfanekiso okwiphepha 7]

UmSamariya olungileyo unceda umYuda okhuthuziweyo