Abazali Abanyanisekileyo Nabanentsebenziswano

◼ Kumathafa akumbindi woMzantsi Afrika imozulu iqhaqhazelis’ amazinyo. Njengoko ndihleli kwiofisi yam ethe gungqu ekumgangatho wesithathu, ndibukele ngomdla umthi owomileyo uvuthuzwa ngumoya wasebusika. Kumasebe asezantsi kulo mthi kukho ihobe elifukame amantshontsho alo amabini aneentsuku ezintathu ubudala.

Ngaphambi kokuba amaqanda okuqala abekwe, eli hobe lincedisana nenkunzi yalo ekwakheni indlwane—inkunzi izisa amasetyana ngoxa imazi isakha indlwane. Omabini enze umsebenzi omhle kuba imimoya evuthuzayo yasebusika ayiliwisi eli khaya lala maqanda mabini. Imazi iwafukama ebusuku la maqanda ize yona inkunzi iwafukame emini. Malunga neeveki ezimbini, la maqanda ayaqanduselwa. Kuthi kungekapheli neeveki ezimbini emva koko, abe la mantshontsho sele ekhule yaye omelele ngokwaneleyo ukuba angabhabha.

Khawuphulaphule! Ngaba uyakuva ukudumzela kwawo, okuyolisa ngathi nguqhuzu qhuzu wentsini? Le mazi yehobe iphathele amantshontsho ayo alambileyo ukutya, yenza isandi sokuzazisa ukuba ifikile yaye ikulungele ukuphumza elo liyinkunzi. Kuya kuthi naxa la mantshontsho sele ekwazi ukubhabha, abazali bawo baqhubeke bewondla, de akwazi ukuzinyamekela.

Isoloko indimangalisa intsebenziswano nenkathalo yezi ntaka, ezithuku lazo lidluliselwa kwizizukulwana ngezizukulwana. Oku kundikhumbuza amazwi akwiNdumiso 86:8 athi: “Akukho unjengawe . . . , Yehova, yaye akukho misebenzi injengeyakho.”

KwiLizwi lakhe, iBhayibhile eNgcwele, uYehova uThixo uye wanika abazali abangabantu ulwalathiso oluthembeke ngendlela efana nethuku alinike amahobe. Ngokomzekelo iBhayibhile ibongoza oomama ukuba ‘babathande abantwana babo.’ (Tito 2:4) Ithi kootata: “Musani ukubacaphukisa abantwana benu, kodwa qhubekani nibakhulisela kwingqeqesho nasekweyiselweni kwengqondo kuYehova.” (Efese 6:4; 1 Timoti 5:8) Ngokuqinisekileyo abazali abakwenzayo oku baxabisekile kuThixo.