Okwenzeka Ehlabathini

◼ “Sithethanje, iRashiya ineetoni ezimalunga neebhiliyoni ezimbini zenkunkuma enetyhefu kumhlaba wayo, yaye ayinayo enye indlela yokwahlukana nayo.”—IRIA NOVOSTI, YASERASHIYA

◼ Kule nkulungwane yama-21, iya isiba ninzi into yokukhuthuzwa kweenqanawa ezihamba kwiilwandlekazi. Ngokomzekelo ngowama-2007, “zingama-263 iziganeko zokukhuthuza nokuzama ukukhuthuza iinqanawa.”—ITHE WALL STREET JOURNAL, YASEUNITED STATES.

Ukusela Utywala Ngoxa Ukhulelwe

ISüddeutsche Zeitung ithi: “Nyaka ngamnye eJamani, iintsana ezimalunga ne-10 000 zizalwa zineziphene ezibangelwa butywala. Ezimalunga nama-4 000 kwezi mveku zikhubazeka kakhulu ubomi bazo bonke.” IDrug Commissioner Sabine Bätzing ilumkisa ngelithi: “Awukho umlinganiselo okhuselekileyo wokusela utywala xa ukhulelwe. Sifuna ukugxininisa koogqirha, ababelekisi nakumabhinqa akhulelweyo ukuba, enoba [ibhinqa elikhulelweyo] lisela ngamaxesha athile, loo nto inokulwenzakalisa engqondweni ize ilukhubaze emzimbeni usana okanye ilwenze lube nengxaki ekukhuleni kwalo.”

Ukulima Kuyingenelo Empilweni Yakho

IPsychology Today ithi: “Abaphandi bafumanise ukuba ukuzilimela ukutya, enoba kungumsebenzi ongakanani na, kuyingenelo empilweni ngaphezu kokuba nabani na ecinga.” Uphando lubonisa ukuba “xa ezinye iintsholongwane ezincinane ezifumaneka emhlabeni zingena emzimbeni womntu, loo nto iye iyiphucule kakhulu inkqubo yomzimba yokuzikhusela.” Ngenxa yoko eli phephancwadi lithi: “Iya icaca into yokuba ukutya izinto ezifumaneka emhlabeni kunegalelo elibalulekileyo empilweni kanye njengemifuno neziqhamo ezimnandi ezilinyiweyo.”

Intaka Eyabhabha Owona Mgama Mde

Izazinzulu zeU.S. Geological Survey (USGS) zanikela ingxelo “ngentaka ehlala emhlabeni eyakha yabhabha elona xesha lide.” Iqela leentaka iigodwits zabonwa ngesatellite zifuduka njengokuba zidla ngokwenza minyaka le, zibhabha phezu koLwandlekazi iPasifiki. Enye imazi yabhabha iintsuku ezisibhozo kangangeekhilomitha ezili-11 650 ingaphumlanga, isuka eAlaska isiya eNew Zealand. Iphephancwadi iThe Week lithi, yathi ifika apho yayisiya khona, “yabe sele ihle ngesiqingatha sobunzima bayo obuziigram ezingama-700.” Xa zibuyela emva iigodwits ziye zisuke eNew Zealand ziye kutsho eTshayina ngaphambi kokuba zibuyele eAlaska—lulonke uhambo eziluthabathayo luba ziikhilomitha ezingama-29 000. IUSGS ithi: “Ukuba ngonyaka le ntaka ibhabha umgama ongako, loo nto ithetha ukuba igodwit endala ibhabha malunga neekhilomitha ezingama-463 000 ebomini bayo.”

Ukubamba Amasela Esityalo Icactus

ISaguaro National Park yaseArizona, eUnited States, ibelwa iicactus ezikhethekileyo ezikhula kuloo mmandla. UJim McGinnis, okwiofisi yophando olukhethekileyo yeSebe leZolimo eArizona, uthi: “Wonk’ umntu ufuna ukuba ne-saguaro phambi komzi wakhe.” Ngoko kuyinto eqhelekileyo ukudibana nemoto entlango ithwele icactus. Amasela athanda kakhulu ezo zinobude obuyimitha ukuya kwezimbini, kuba zona azithengisa ngeshumi lamawaka eerandi nangaphezulu. Ngelokuthintela obo busela, abasemagunyeni baceba ukufaka iitshiphu ezincinane zekhompyutha kwezi cactus. Izixhobo zokuhlola eziphathwayo zizo eziya kuchaza ukuba iicactus ezithengiswa kwiivenkile zezityalo zibiwe kule paki kusini na.