Iphulo Labo Lokufuna Unqulo Oluchanileyo
KUSUSELA ebuntwaneni bambi abantu bebefuna iimpendulo ezanelisayo kwimibuzo yabo ngobomi. Ngoxa babesebancinane, kusenokwenzeka ukuba babesiya kwiinkonzo zonqulo. Kodwa abaninzi kubo bafumanisa ukuba iimpendulo ezazinikelwa nezithethe zecawa zazingabancedi ngokwenene bahlangabezane neengxaki zobomi.
Basenokuthi basengamalungu onqulo lwabazali babo, nangona benqabile kwiinkonzo zonqulo. Ngokutsho kobhishophu weCawa yaseTshetshi, banentsalela yokholo. Unqulo balubeke kwindawo yokugqibela. Bambi, ngenxa yokucatshukiswa luhanahaniso abalubonayo elunqulweni, abafuni nokulubona unqulo. Sekunjalo, imibuzo yabo engobomi isazingile.
Isizathu Sokuba Bambi Benamathandabuzo Ngokunzulu
Inkoliso yabantu iyazi ukuba iicawa ezininzi zinemibutho yokunceda abangenamakhaya, yokwaba ukutya kwabahlelelekileyo, nokukhuthaza imicimbi yasekuhlaleni. Kodwa phantse mihla le beva iingxelo zeendaba ezithetha ngogonyamelo nokuphalazwa kwegazi okuzalwa lunqulo kungekuphela nje phakathi kwabo bangengomaKristu kodwa kwanaphakathi kwabo bazibanga bengamaKristu. Ngaba kufanele kusimangalise xa bethandabuza ukuba amaqela abandakanyeke kugonyamelo olunjalo alunqulo oluchanileyo?
Abaninzi abakhuliselwa elunqulweni babecinga ukuba ubukho bemizi yokugcina iinkedama exhaswa ziicawa yinto entle. Noko ke, kwiminyaka yakutshanje baye bothuswa kukumangalelwa kwabefundisi kwiindawo ngeendawo ngokuxhaphaza ngokwesini abantwana ababagcinisiweyo. Ekuqaleni abantu babecinga ukuba ngabefundisi abambalwa kuphela ababebekek’ ityala. Ngoku abanye babo bayazibuza ukuba akungebi kukho nto ithile ephosakeleyo ecaweni.
Abanye, njengoEugenia, ngaxa lithile babebandakanyeke ngokunzulu kunqulo lwabo. Njengoselula waseArgentina, wayephakathi kwabo babehamba ngezonqulo besiya kunqula iNtombi Enyulu yaseItatí. Kangangeminyaka eli-14 wayehlala kumzi woonongendi engunongendi. Wandula ke wemka waya kuba yinxalenye yeqela lezizwe ngezizwe elijongene nonqulo nezobupolitika elalifuna iinguqu ezikhawulezileyo, nezigqibeleleyo kwezentlalo nakwezoqoqosho ebuthweni ngemvukelo. Ngenxa yoko wakubonayo nawakuvayo, waphelelwa lukholo nayintembelo kuThixo. Wayengalufuni ngokwenene unqulo awayenokukholwa kulo. Eyona nto wayeyifuna ngokwenene yayiyindlela yokuzisa okusesikweni kwabo babehlwempuzekile—ewe, efuna nomhlobo awayenokumthemba.
Abanye baphawula oko kwenzekayo ezicaweni baze bazicezele. Omnye ongakholelwayo kubukho bukaThixo ekwapapashwa iimbono zakhe ngowe-1991 kwiphephancwadi elithi Sputnik ngokuphandle wathi: “Andiboni mahluko ungako phakathi kweempawu zabahedeni neentsomi zobuKristu.” Ngokomzekelo, wachaza umngcelele apho abefundisi ababevethe imithika ehonjiswe ngegolide babethe chu bethwele ibhokisi yokungcwaba eyenziwe ngelitye enesidumbu esiqholiweyo kwizitrato zaseMoscow. Babethwele isidumbu “sengcwele yamaKristu angamaOthodoki” esasifuduselwa ecaweni sisuka emyuziyam, ibe lo mbhali samkhumbuza ngabefundisi nezidumbu eziqholiweyo zaseYiputa. Kwakhona, wakhumbula ukuba ngoxa abo babekuloo mngcelele waseMoscow babekholelwa “kuBathathu Emnye wamaKristu,” amaYiputa nawo ayenqula oothixo abahamba ngabathathu—uOsiris, uIsis noHorus.
Kwaloo mbhali wabhekisela kwingcamango yamaKristu yothando—“uThixo uluthando,” nokuthi “thanda ummelwane wakho”—njengaleyo ingafani nanto kwiYiputa yabahedeni. Kodwa waphawula oku: “Uthando lobuzalwana aluphumelelanga ekuloyiseni ihlabathi, nditsho naloo nxalenye izibiza ngokuba lihlabathi lobuKristu.” Emva koko wachaza iziqhamo ezibi zokuthi gqolo kwecawa izibandakanya kwimicimbi kaRhulumente. Oko wayekubona kwakungamshukumiseli ekubeni avakalelwe kukuba iicawa zeNgqobhoko zazikunikela oko wayekufuna.
Ngokuchasene noko, abanye bazifumene iimpendulo ezanelisayo kodwa kungekhona kwiicawa zeNgqobhoko.
Wafunda Inyaniso Ngabafi
UMagdalena, ngoku oneminyaka engama-37 ubudala, uhlala eBulgaria. Emva kokufa kukayisezala ngowe-1991, wayekhathazeke gqitha. Izihlandlo ezininzi wayezibuza ukuba, ‘Bayaphi abafi? Uphi ubawozala?’ Wayesiya ecaweni, aze athandaze ngaphambi komfanekiso ongcwele ababenawo ekhaya, kodwa akazange afumane zimpendulo.
Kwandula ke ngaminazana ithile ummelwane wamtsalela umnxeba emmemela ekhayeni lakhe. Lo mmelwane wayetyelelwe ngumfana owayefundisisa namaNgqina kaYehova. Waphulaphula njengokuba lo mfana wayethetha ngoBukumkani bukaThixo nenjongo yakhe yokwenza umhlaba ube yiparadisi abantu abaya kuhlala kuyo ngonaphakade ngolonwabo. Etafileni kwakukho incwadi ethi Unokuphila Ngonaphakade KwiParadisi Esemhlabeni. Esebenzisa yona, lo mfana walathisela ingqalelo yakhe kumbhalo weBhayibhile okwiNtshumayeli 9:5, othi: “Ke bona abafileyo abazi lutho.” Ngaloo ngokuhlwa wafunda okungakumbi. Wafunda ukuba abafi abayanga kobunye ubomi ezulwini okanye esihogweni; abazi lutho, ngokungathi bakobentlombe. Ngovuyo wamkela isimemo sokubakho kwintlanganiso yebandla lasekuhlaleni lamaNgqina kaYehova. Emva kwale ntlanganiso wavuma ukuqhutyelwa isifundo seBhayibhile rhoqo. Ekubeni kule ntlanganiso wayephawule indlela ekwakuthandazwa ngayo kuYehova, naye waqalisa ukuthandaza kuYehova ecela uncedo lokoyisa ukutyhafa awayenako. Wakuba uphenduliwe loo mthandazo wakhe, waqonda ukuba wayelufumene unqulo oluchanileyo.
Bafumana Ubomi Obunentsingiselo
UAndré wayekhulele kwikhaya lamaKatolika azinikeleyo eBelgium ibe wayencedisa umfundisi wasekuhlaleni. Noko ke, ebudeni belo xesha, wabona izinto ezayisingela phantsi intlonelo yakhe ngecawa. Ngenxa yoko, waba ngumKatolika ngegama nje kuphela.
Kangangeminyaka eli-15 wayekudidi lwabahlawulwayo kwibhola ekhatywayo. Ngasihlandlo sithile xa iqela lakhe lalidlala kukhuphiswano eItali, bamenyelwa ukuya kubonana nopopu. Kwakungekho nto yakhayo ngokomoya tu kwaphela kolo tyelelo, ibe ubunewunewu behlabathi obabujikeleze upopu bamphazamisa uAndré. Amathandabuzo awayenawo ngecawa aba nzulu ngakumbi. Ubomi bakhe babungonwabisi ngenxa yokuqhawukelwa yimitshato emibini. Imeko yehlabathi yayimkhathaza. Ngowe-1989 wabhala kwincwadi yakhe yeziganeko zemihla ngemihla wathi: ‘Yintoni intsingiselo yabo bonke obu budenge buqhubekayo?’ Unqulo lwakhe aluzange lukwazi ukumphendula.
Ngowe-1990, xa uAndré wayengumqeqeshi webhola ekhatywayo eIceland, uIiris, umvangeli wasemazweni wamaNgqina kaYehova, wamtyelela. Wamkela uncwadi waza wamema lo mvangeli wasemazweni ukuba abuye. Wabuya nomyeni wakhe, uKjell. Xa ekugqibeleni bakwaziyo ukuhlala phantsi baze bancokole noAndré, kwabonakala ukuba wayenomdla gqitha ekuyiqondeni iBhayibhile. Inkosikazi yakhe, uÁsta, nayo yayinomdla ngokufanayo. Emini, wayesiba neeyure ezintathu awayengaqeqeshi ngazo, yaye bagqiba kwelokuba basebenzise eli xesha ukwenzela ukufundisisa iBhayibhile. Wathi: “Ukufundisisa iBhayibhile kundihlaziya ngakumbi kunokuphumla nje.” Ngokuthe ngcembe iBhayibhile yayiphendula imibuzo yabo. Ngokuthe ngcembe ukholo lwabo kuYehova noBukumkani bakhe lwakhula. Amadinga azukileyo eBhayibhile ehlabathi elitsha elinoxolo, ihlabathi elingenabo “bonke obu budenge buqhubekayo,” aba ngawokwenene kubo. Ngoku uAndré noÁsta babelana nabanye ngokholo lwabo olutsha.
UMagdalena, uAndré noÁsta baqinisekile ukuba ekugqibeleni balufumene unqulo oluchanileyo. KwanoEugenia, emva kokuzama ukucombulula iingxaki zehlabathi ngeendlela zobupolitika, ekugqibeleni wafumana phakathi kwamaNgqina kaYehova unqulo olwabonakala luchanile kuye. Kodwa yintoni ngokwenene egqibayo enoba unqulo luchanile kusini na? Nceda ubone umbandela olandelayo.
[Umfanekiso okwiphepha 7]
Ukufundisisa iBhayibhile rhoqo namaNgqina kaYehova kunceda abantu abangaphezu kwezigidi ezihlanu kwiphulo labo lokufuna iimpendulo ezanelisayo