Igama LikaThixo EDenmark
NYAKA ngamnye, uninzi lwamawakawaka abakhenkethi abatyelela iCopenhagen bayamangaliswa kukubona igama likaThixo, uYehova okanye inguqulelo yalo yesiHebhere ethi, יהוה, ibhalwe kwiinqaba nezinye izakhiwo ezikufutshane nekomkhulu lalapho.a Ngokomzekelo, kumbindi weso sixeko, iCawa iDockyard (iHolmens Kirke) inesango elibhalwe igama likaThixo ngoonobumba ababanzi begolide. Eli gama likho nakwicala elingaphakathi leli sango kwilitye lesikhumbuzo elabekwa ngowe-1661.
Kumganyana nje onokuwuhamba ngenyawo ukusuka kwiCawa iDockyard kukho isakhiwo esibizwa ngokuba yiRound Tower (iRundetårn). Kudonga lwaso olungaphandle, kubhalwe igama likaThixo ngoonobumba ababanzi besiHebhere njengenxalenye yomqondiso wesiLatini. Xa uguqulelwe ufundeka ngolu hlobo: “Ngamana uYehova angafaka iimfundiso ezizizo nokusesikweni kwintliziyo kaKumkani uChristian Wesine osetroneni.” Kwenzeka njani ukuba igama likaThixo laziwe kangaka eDenmark?
UHlaziyo LwamaProtestanti Nokuguqulelwa KweBhayibhile
Eyona nto yabangela ukusasazwa kwegama likaThixo yaba luHlaziyo lwamaProtestanti. AbaHlaziyi baseYurophu njengoMartin Luther, uJohn Calvin, kunye noHuldrych Zwingli bayiphengulula ngenyameko iBhayibhile neelwimi eyabhalwa ngazo ntlandlolo—isiHebhere, isiAramaic, nesiKoine okanye isiGrike esiqhelekileyo. Loo nto yabangela ukuba baqhelane negama likaThixo. Kwintetho yakhe, uMartin Luther wathi: “Igama elithi Yehova . . . leloThixo oyinyaniso kuphela.
Sekunjalo, xa uLuther wayeguqulela iBhayibhile kwisiJamani, wasebenzisa indlela engqubanayo nezibhalo yokuguqulela igama likaThixo ngokuthi “Nkosi” okanye “Thixo,” ngaloo ndlela esebenzisa izibizo, kungekhona igama Lakhe. Kamva uLuther wacela ihlakani lakhe, uJohannes Bugenhagen, ukuba aguqulele iBhayibhile yakhe ngesiJamani esithethwa kumantla eJamani nakumazantsi eDenmark. Kwintshayelelo yakhe yohlelo lowe-1541 (olokuqala lwalupapashwe ngowe-1533), lo kaBugenhagen wabhekisela izihlandlo eziliqela kwigama likaThixo, wathetha namazwi athi: “UYehova ligama likaThixo elingcwele.”
Ngowe-1604, umfundi oselula wezakwalizwi ogama linguHans Paulsen Resen wathetha noKumkani uChristian IV ngeempazamo ezithile kwinguqulelo yesiDanish yeBhayibhile kaLuther. Wandula ke lo kaResen wacela imvume yokwenza inguqulelo entsha esekelwe kwimibhalo yantlandlolo yesiHebhere nesiGrike. Wayinikwa loo mvume. Kumagqabaza akhe ngeGenesis 2:4, uResen wabhala wathi “uYehova” “ungoYena Wongamileyo, nokuphela kweNkosi.”b
Njengoko igama likaThixo laya lisaziwa, labonakala nakwiindawo zikawonke wonke. Ngokomzekelo, ngowe-1624, emva kokuba uHans Paulsen Resen enyulwe wangubhishophu, wayalela ukuba kubekwe ilitye kwiCawa iBronshoj. Phezulu kwelo litye, kwakubhalwe ngegolide igama likaThixo ngesiDanish, kwathiwa Jehova. Kanti, kwimibhalo yakhe emininzi njengobhishopu, uResen wayesithi xa etyobela afake namagama athi “UYehova uyabona.”
Ngasekupheleni kwenkulungwane ye-18, inguqulelo yeBhayibhile yesiJamani kaJohann David Michaelis yapapashwa ngesiDanish. Nale iBhayibhile inegama likaThixo kwiindawo ezininzi. Ngokufanayo ngenkulungwane ye-19, uChristian Kalkar nabanye abaguquleli beBhayibhile bafaka igama likaThixo kwiindawo ezininzi elivela kuzo kumbhalo wantlandlolo. Kwathi ke, ngowe-1985, amaNgqina kaYehova akhulula INguqulelo Yehlabathi Elitsha YeZibhalo Ezingcwele ngesiDanish. Abathandi beBhayibhile baba nemincili besakubona igama likaYehova liguqulelwe ngokuthembeka izihlandlo ezingaphezu kwama-7 000.
UYesu Kristu wathi xa wayethandaza kuThixo: “Ndilibonakalisile igama lakho.” (Yohane 17:6) Yaye kumthandazo wakhe ongumzekelo, odla ngokubizwa ngokuba nguBawo wethu Osezulwini, uYesu wathi: “Malingcwaliswe [malenziwe libe ngcwele] igama lakho.” (Mateyu 6:9) Njengoko imbali yaseDenmark ibonisa, la mazwi aye athetha lukhulu kubantu abaninzi.
[Imibhalo esemazantsi]
a Aba nobumba bane babizwa ngokuba yiTetragrammaton, bangamaqabane yaye bafundwa ukusuka ekunene ukuya ekhohlo. Badla ngokuguqulelwa ngokuthi YHWH okanye kuthiwe JHVH. Mandulo, umntu olifundayo eli gama ebefaka izikhamiso, njengoko kuxhaphakile namhlanje xa kufundwa amagama ashunqulelweyo.
b Igama likaThixo lavela okokuqala kwiGenesis 2:4 kwimibhalo yantlandlolo yeBhayibhile Engcwele. Elo gama livela izihlandlo ezimalunga nama-7 000 kwimibhalo yantlandlolo yaye lithetha ukuba “Ubangela Kubekho,’ gama elo elichaza uYehova njengaLowo uneenjongo ezisoloko ziphumelela. Oko akuthethayo kuyenzeka.
[Ibhokisi/Umfanekiso okwiphepha 25]
UTYCHO BRAHE NEGAMA LIKATHIXO
Ngowe-1597, isazi ngeenkwenkwezi saseDenmark uTycho Brahe washiya ilizwe lakhe lokuzalwa emva kokungavisisani neengqanga zaseDenmark noKumkani uChristian IV. Kumbongo awawubhala xa wayeshiya iDenmark, uBrahe wabhala ngesiLatini wathi: “Abantu basemzini baza kundiphatha kakuhle—oko kukuthanda kukaYehova.”
[Umfanekiso okwiphepha 24, 25]
Isango leCawa iDockyard
[Umfanekiso okwiphepha 24, 25]
IRound Tower
[Umfanekiso okwiphepha 25]
UHans Paulsen Resen
[Umfanekiso okwiphepha 25]
UJohannes Bugenhagen wafaka igama likaThixo kwintshayelelo yenguqulelo yeBhayibhile yesiJamani kaLuther, yowe-1541
[Inkcazelo Ngomfanekiso okwiphepha 25]
Hans Paulsen Resen and Tycho Brahe: Kobberstiksamilingen, Det Kongelige Bibliotek, København