Okwenzeka Ehlabathini

“UThixo onqulwa ngamaKristu usaphila kubantu baseMerika kodwa akasenanto yakwenza nezopolitiko nentlalo yabantu bale mihla.”—INEWSWEEK, YASEUNITED STATES.

“Ukudodobala kwezoqoqosho kubangela ezinye iingxaki: Izibini ezininzi ezitshatileyo azisazifikeleli iindleko zoqhawulo-mtshato. Kula maxesha anzima abantu abaninzi bakhetha ukuhlala kunye nakuba bengavisisani.”—ITHE WALL STREET JOURNAL, YASEUNITED STATES.

Ngokomlinganiselo umama omnye kwabathathu baseJamani ufunda kwintombi yakhe ukunxiba iimpahla ezisefashonini, ukwakha ubuhlobo, nokuba ngumntu ongenekayo okanye ozithembayo.—IBERLINER MORGENPOST, YASEJAMANI.

Zisekho Izinto Ezithintela Izifo

I-International Herald Tribune ithi: “Kwiminyaka engama-90 emva kokuphela kombathalala owabulala abona bantu baninzi embalini, ukusinda kwabanye abantu kule ntsholongwane yowe-1918 kwangqina ukuba namandla kwenkqubo yomzimba yokuzikhusela.” Emva kokuhlola igazi labantu abadala abasinda kwesi sifo, izazinzulu zafumanisa ukuba “zisekho izinto ezisithintelayo.” Ngenxa yezi zinto, izazinzulu ziye zafumanisa ukuba zinako ukunyanga iimpuku ngokuzitofela lo mkhuhlane ubulalayo. Abaphengululi baye bamangaliswa yindlela esebenza ixesha elide ngayo inkqubo yabantu yokuzikhusela. Omnye umphengululi wathi: “INkosi isivave ngezinto ezithintela izifo emizimbeni yethu logama sisaphila. Abantu abangazange babulawe ngulo mbathalala bomelele.”

Imibuzo Ebuzwa UThixo

“Kutheni uvumela abantu babandezeleke ukuba ulungile?” Iphephandaba laseSweden iDagen lithi: “Lo ngomnye wemibuzo yokuqala enokubuzwa uThixo ngabafundi bekholeji yaseSweden ukuba bebenokunikwa ithuba lokwenjenjalo. Olunye uhlolisiso luye lwafumanisa eminye imibuzo efana nale: “Yintoni injongo yobomi?” nothi “Kwenzeka ntoni emva kokuba umntu efile?” ISweden yaziwa njengelona lizwe linabantu abaninzi abanganquliyo. Ummeli wombutho wabafundi abangamaKristu owayesenza olo hlolisiso uthi: “Le mibuzo ayikaphenduleki nangoku. Ulutsha lusafuna iimpendulo zayo.”

Ukukhubazeka Emizimbeni Kwenza Abantu Bonwabe Emitshatweni Yawo

Abaphengululi bathi “kufunyaniswe ukuba amadoda namabhinqa enoba madala kangakanani na ayonwaba emitshatweni yawo emva kokuba omnye wabo eye wakhubazeka emzimbeni.” Ukungakwazi ukwenza imisebenzi yasekhaya kunokuxinezela kodwa oko kunokuwamanyanisa amaqabane omtshato. Amaxhego athi wona achitha ixesha elininzi namakhosikazi awo. UKaren Roberto ongumalathisi kwiCenter for Gerontology kwiVirginia Tech, eUnited States uthi: “Ukuba neembopheleleko ezintsha emtshatweni kwenze amadoda amaninzi anyamekele aze achithe ixesha elingakumbi nabafazi bawo nto leyo ewenze ayixabisa imitshato yawo.”