Ukukhusela Intsapho Yakho Kumkhuhlane
Kwisiprofeto sikaYesu esithetha ngokupheliswa kwale nkqubo yezinto, wathi kuya kubakho ‘iindyikitya zokufa kwiindawo ngeendawo.’ (Luka 21:11) Umkhuhlane yenye yezifo ezibulala abantu.
UMKHUHLANE ubangelwa yintsholongwane engenakubonwa ngeliso lenyama, engena kwiiseli ize ibangele ukuba zivelise ezinye iintsholongwane. Intsholongwane yomkhuhlane ehlasela inkqubo yokuphefumla idluliselwa ngomnye umntu kwabanye ngamathontsana aphuma xa umntu ethimla, ekhohlela okanye xa ethetha. Isifo esibakho ehlabathini jikelele sasulela abantu abaninzi xa bekwindawo enkulu.
Iintsholongwane azigulisi nje kuphela abantu kodwa kwanezilwanyana neentaka. Ziyahluka iindidi zentsholongwane yomkhuhlane iba ngu-A, u-B, okanye u-C. Udidi olungu-A ludla ngokuba lolona lubangela umkhuhlane. Iintsholongwane zahlulwa ngokweeprotini ezimbini ezikuzo: ihemagglutinin (H) neneuraminidase (N).
Eyona nto ixhalabisayo ngentsholongwane yomkhuhlane kukuba, ikhawuleza ivelise ezinye nokuba iindidi ezahlukahlukeneyo zeentsholongwane zinokudibana zize zivelise olunye uhlobo lwentsholongwane. Ukuba oluhlobo lwentsholongwane lwahluke kakhulu, umzimba wakho usenokungakwazi ukuyithintela.
Badla ngokuba baninzi abantu abanomkhuhlane ebusika. Uphando lwakutshanje lubonisa ukuba kwiindawo ezipholileyo ulwelo lwangaphandle lwentsholongwane luyakhusela yaye lugcina intsholongwane emoyeni kodwa iyanyibilika kwiindawo ezishushu, kwiindawo zokuphefumla nto leyo ebangela ukuba ugule. Umoya obandayo awubangeli ukuba ungenwe ziintsholongwane kodwa uyazisasaza.
Iindlela Zokuzikhusela
Ngenxa yokuba esazi ukuba kufuneka uzikhusele, urhulumente uye wenza amalungiselelo amaninzi. Kodwa yintoni wena onokuyenza? Makhe sihlole ezi ndlela zintathu zokuzikhusela:
Womeleze umzimba wakho: Qiniseka ukuba intsapho yakho ilala ngokwaneleyo yaye itya ukutya okomeleza imizimba yayo ukuze ikwazi ukuzikhusela. Umele utye iziqhamo nemifuno, ukutya okunengqolowa neeprotini ezingenawo amafutha ezineeamino acido ezinokomeleza inkqubo yomzimba yokuzikhusela.
Zama ukuba indawo okuyo ingabi nazintsholongwane: Ukuba kunokwenzeka iitafile mazihlale zicocekile suku ngalunye. Hlamba iimbiza nezitya emva kokuba uzisebenzisile uze uwahlambe rhoqo amashiti, iingubo nezinye izinto zebhedi. Zisule ngento yokususa iintsholongwane izinto ezidla ngokubanjwa ngabantu: iletshi yomnyango, ifowuni neremote control. Ukuba kunokwenzeka makungene umoya endlwini.
Qhelisela imikhwa emihle yococeko: Hlamba izandla zakho ngesepha nangamanzi okanye ngento yokucoca izandla enotywala. (Ukuba kunokwenzeka, soloko uphethe ibhotilana enento yokucoca izandla.) Musa ukuyisebenzisa nabanye abantu nokuba ngabantu bakowenu itawuli yakho osula ngayo izandla nobuso.
Musa ukuphatha amehlo, iimpumlo okanye umlomo ngezandla ezingahlanjwanga. Ukuba kunokwenzeka, sebenzisa itissue xa ukhohlela okanye uthimla uze uyilahle emva kokuyisebenzisa. Kuphephe ukusebenzisa izinto ezinokusasaza iintsholongwane ezifana nefowuni. Abantwana bafanele baqeqeshwe kakuhle ukuze bakwazi ukwenza ezi zinto. Sifanele sizenze ngalo lonke ixesha ezi zinto kodwa ngokukodwa ebudeni bexesha lomkhuhlane.
Bacingele Abanye Abantu
Unokubasulela abanye abantu kusuku ngaphambi kokuba ugule nakwiintsuku ezintlanu emva kokuba ubukhe wagula. Iimpawu zomkhuhlane ziyafana nezomkhuhlane oqhelekileyo kodwa zona ziba ngakumbi. Ziquka: ifiva (ubushushu), intloko ebuhlungu, ukudinwa kakhulu, ukukhohlela nokuqaqanjelwa zizihlunu. Ukuvuzelwa ziimpumlo neengxaki zesisu—njengokuba nesicaphucaphu, ukugabha nokuhambisa—kuqhelekile ebantwaneni kunakubantu abadala. Ukuba ugula yenye kwezi zingasentla, hlala endlini uze uphephe ukosulela abanye.
Phumla ngokwaneleyo uze usele kakhulu. Iipilisi ezibulala iintsholongwane ziyanceda kodwa zinceda kuphela xa kanye ziqala ukuvela iimpawu zomkhuhlane. Iaspirin (acetylsalicylic acid) ayifanele inikwe abantwana abanomkhuhlane. Yiya kwagqirha xa uziva ngathi ungenwa yinyumoniya mhlawumbi kunzima ukuphefumla, uqaqanjelwa sisifuba okanye unentloko ebuhlungu engapheliyo.
Kuyoyikisa ukuba nomkhuhlane. Ukuzilungiselela kunokunceda. Njengokuba iBhayibhile ithembisa unokujonga phambili apho ‘kungayi kubakho mmi wakhona oya kuthi: “Ndiyagula.’”—Isaya 33:24.
[Ibhokisi ekwiphepha 27]
UMKHUHLANE OMKHULU
Umkhuhlane wokuqala owawuseMexico ngowama-2009 yi-H1N1, uyafana noMbathalala owabulala amashumi ngamashumi ezigidi. Intsholongwane yayo iyafana naleyo igulisa iihagu neentaka.
[Ibhokisi/Imifanekiso ekwiphepha 28, 29]
ZIKHUSELE WENA NABANYE ABANTU NGEZI NDLELA ZI-6
1. Gquma umlomo xa ukhohlela
2. Hlamba izandla
3. Mayisoloko ingena umoya indlu yakho
4. Yosule rhoqo
5. Hlala endlwini xa ugula
6. Kuphephe ukubamba abantu ngesandla
[Ibhokisi/Umfanekiso okwiphepha 29]
XA KUGULA UMNTU NGEQUBULISO
Okokuqala, landela ulwalathiso lwezonyango. Musa ukutatazela okanye usabele ngendlela ebaxiweyo. Yenza ezi zinto kuthethwa ngazo kweli nqaku. Ukuba kunokwenzeka kuphephe ukuba phakathi kwabantu abaninzi. Kunokukunceda ukugquma impumlo nomlomo xa ugula. Zihlambe rhoqo izandla zakho. Hlala unokutya okungaboliyo onokukugcina iiveki ezimbini nezinto zokucoca, kuba usenokungakwazi ukuya evenkileni.
Xa usemsebenzini, kwindawo yonqulo okanye nakweyiphi indawo enabantu abaninzi sebenzisa la macebiso anikiweyo. Kwakhona, indawo ohleli kuyo mayihlale inomoya ongenayo.
[Umfanekiso okwiphepha 27]
Intsholongwane i-H1N1 eyenziwe yankulu
[Inkcazelo]
CDC/Cynthia Goldsmith