Khanikhe Nize Kubona Imarike YaseAfrika
ENYE yezona ndlela ziphambili zokubona inkcubeko, izithethe nezinto ezityiwa kwilizwe ondwendwele kulo, kukuya kwiimarike zalo. Kulapho ubabona khona abantu basekuhlaleni, ungcamle ukutya kwabo, uze uthenge nezinto zabo. Kanti uye udibane namaqhakraqhakra abathengisi abenza unako nako wokuthetha nawe—enoba uthetha luphi ulwimi.
Kunzima ukufumana iimarike ezibangel’ umdla kwezinye iindawo njengezaseAfrika. Zinyakazela abantu kwakunye nayo nantoni na ethengiswayo onokucinga ngayo. Kulapho uva khona udlamko olufumana eAfrika kuphela. Makhe sityelele imarike eqhelekileyo kwisixeko saseDouala, eCameroon.
Ukuya Emarikeni Ngezithuthi ZaseAfrika
Eyona ndlela ingabizi mali ingako nekhawulezayo yokuya emarikeni kwizixeko ezininzi ezikhulu zaseAfrika, kukukhwela isithuthuthu. Nakwesiphi na isitrato ojikela kuso, uya kufika abanini zithuthuthu befuna abantu abanokubakhwelisa. Ukuba unesibindi, unokucela ukukhwela nomnye wabo. Olu hlobo lwesithuthi luqhelekile eCameroon, alubizi mali ingako yaye luyakhawuleza.
Kubantu aboyikayo ukuqala izinto ezintsha, zikho iiteksi eziqhelekileyo yaye zininzi. Kudla ngokukhwela abantu abaliqela kwezi zithuthi ukuze bancedisane ngokuhlawula iindleko.
Amakhulukhulu Oonomarike
Umntu oqalayo ukutyelela apho angangazi ukuba makaqale aye kweliphi icala ngenxa yokuba apho kuzele abantu kwakunye noonomarike ezitratweni. Imiqodi yabantu equka abantwana ithwala izinto ezithengileyo entloko. Xa uzijongela kufutshane izinto abazithweleyo, uya kubona iinkukhu eziphilayo, amaorenji achutyiweyo namayeza awahlukeneyo nezinye izinto kwezo ngobozi zabo.
Kukho amakhulukhulu eekhawuntara zamaplanga ezinemifuno enjengekhaphetshu, iminqathe, iicucumber, iieggplants, amaceba, iimbotyi, iibhatata, iitumato, iiyams, neendidi ngeendidi zelethasi. Iindwendwe ezivela kwelinye ilizwekazi zisenokungaziqondi zonke izinto ezithengiswa apha, njengoko ezinye zazo zithandwa ekuhlaleni yaye zingekho kwenye indawo ngaphandle kwaseAfrika. Mhlawumbi ezona marike zibhanyabhanya zezo zithengisa iipepile ezibomvu nezimthubi, ezintle kangangokude zibengezele ngenxa yelanga. Ezinye iimarike zithengisa iiavocado, iibhanana, iimbambusi, iintyabontyi, amapayina, amaorenji neelamuni. Zivuzis’ izinkcwe ezi ziqhamo yaye lihle nexabiso lazo! Iiyams, iicassava, nerayisi—okona kutya kuthandwayo kwelo—zikho ngobuninzi, kanti kukwakho namatswele neekonofile ezithengwe kwamanye amazwe.
Kwenye imarike yaseDouala, oonomarike abaninzi bangamaHausa namaFula. Soz’ ungababoni aba nomarike kuba banxiba imiwunduzo eluhlaza okwesibhakabhaka, emhlophe okanye emthubi ebizwa ngokuba ziigandouras, okanye iiboubous yaye bakubulisa ngobubele ngolwimi lwesiFulfulde. Abantu bakhululekile nje kwezi marike. Ngoxa sasilapho omnye unomarike, uIbrahim, wakhetha amaqukunya amatswele amathathu waza wandipha. Wathi kum: “Uz’ uthi kumfazi wakho awahlohle irayisi eqholiweyo az’ awathele chu ukuwapheka.”
Kude kufuphi apho, kuthengiswa inyama esandul’ ukuxhelwa, edla ngokuba yeyenkomo okanye ibhokhwe ubukhulu becala. Amadoda awomeleleyo azithi tyu emagxeni izilwanyana ezisandul’ ukuxhelwa aze azibeke phezu kweetafile. Apho ke wofika iingcungela zabaxheli ziletshezisa iimela zicela abathengi ukuba bakhethe iinyama abazifunayo. Kanti kuthengiswa iibhokhwe, iinkuku neehagu eziphilayo ukulungiselela abathengi abathanda ukuzixhelela.
Makhe Siye Kwiindawo Ezithengisa Ukutya Okuphekiweyo
Ayikho imarike engenandawo ithengisa intw’ etyiwayo. ECameroon, iindawo ezithengisa ukutya kwiimarike zalapho kuthiwa ziichophouse. Kwezinye ufika oonomarike bewudlalela phezulu umculo ngenjongo yokutsala abantu abaze kuthenga, kodwa zikho nezo zingenangxolo, apho ufika uthenge ukutya kwaseAfrika uze uncokole nabantu basekuhlaleni. Iindidi zokutya okuthengiswayo zibhalwa ebhodini, yaye abo bangaqhelananga nokutya kwalapho basenokufuna ukucaciselwa ngezinto ezithengiswayo.
Okona kutya kuthandwayo yirayisi, nefufu, eyenziwe ngemanioc, iplantain, okanye iiyams ezicujiweyo. Kanti ikho nentlanzi eyosiweyo, inyama yenkomo kwakunye neyenkukhu eneesosi ezenziwe ngeokra, ipeanut butter, okanye iitumato. Kwezi chophouse akukho mntu ungxamele ndawo, yaye lininzi ixesha lokuncokola.
Kuza kuthi iiweyitala ezimbini. Enye iphethe itreyi enkulu eneepleyiti zenkcenkce ezizele irayisi eqhumayo, iimbotyi neefufu. Oku kutya kugalelwe isosi yeokra kwaza kwahonjiswa ngenyama nentlanzi ehlohlwe emakhunini. Kukwakho nesitya esincinane esinesosi yetshilisi ebomvu ukwenzela abo bathanda ukutya okunezinongo. Eyesibini iweyitala iza netawuli nesitya esinamanzi ukuze sihlambe izandla. Oku kubalulekile, ekubeni ukutya kwalapho kutyiwa ngesandla. Kuxhaphakile ukuba umntu othenge ukutya athandaze ngaphambi kokutya aze eve iindwendwe ezikwenye itafile zisithi “Amen.”
Ukushumayela Iindaba Ezilungileyo Emarikeni
Kudala iimarike ziyindawo yokuncokola kwabantu kwiindawo ezininzi. Ziyindawo entle yokuthenga nokuthengisa, ukuncokola nabantu nabahlobo kanti ungawufumana nomsebenzi apho. IBhayibhile ithi uYesu waya ezimarikeni, apho wafika wafundisa abantu ngoThixo waza waphilisa abanye. Kanti umpostile uPawulos waqiqa “nakwindawo yemarike yonke imihla kunye nabo kwakusenzeka ukuba babekho.” (IZenzo 17:16, 17; Marko 6:56) Nanamhlanje, amaNgqina kaYehova aseCameroon afumanisa ukuba imarike yindawo entle yokushumayela iindaba ezilungileyo zoBukumkani bukaThixo.—Linikelwe.
[Umfanekiso okwiphepha 24]
Iipepile ezimibalabala