Uxomoyi Intaka Emibalabala

KUTHI letshe into enebala eliluhlaza okwesibhakabhaka ingene emanzini kuze ngokukhawuleza kuphume intaka ibetha amaphiko inentlanzi emlonyeni wayo. Abantu badla ngokumbona olu hlobo ke uxomoyi, intak’ aph’ emibalabala enentloko nomlomo omkhulu ngendlela engaqhelekanga. Asizizo zonke iindidi zooxomoyi ezitya iintlanzi. Ezinye kwezi ntaka zithanda amacikilishe, iinyoka, oononkala okanye izinambuzane—izinambuzane zona zithanda ukuzibamba ngoxa zibhabha. Ukongezelela, sisinye kwisithathu nje kuphela sooxomoyi abasehlabathini lonke esihlala ngasemanzini. Ooxomoyi aba bayahlala kumahlathi ashinyeneyo, abanye bahlale kwiziqithi ezinekorale kanti uyabafumana nasentlango. Omnye onokumfumana entlango unomqolo obomvu yaye uyathanda ukuhlala kummandla oyinkqantosi waseOstreliya.

Ooxomoyi bangamachule okubambis’ iintlanzi. Le ntaka idla ngokulondela ixhoba layo isenkcochoyini. Ithi yakubona intlanzi ilungiselele ukuziphosa, isebenzisa ithuku layo ukuze iyibone kakuhle le ntlanzi ngaphandle kokuphazanyiswa yimitha yelanga. Emva koko, le ntaka iya ngasemanzini, ngoxa iphaphazelisa amaphiko ukuze ibe namendu. Ukuba intlanzi leyo idadela phezulu, le ntaka inokusuka nje iyithi xhwii ihambe nayo. Ngokuqhelekileyo, isonga iimpiko zayo ize ingene ngathi iyadutyulwa emanzini. Incwadi ethi The Life of Birds ithi: “Zonke ezi zinto izenza ngobuchule obungaqhelekanga ibe ayifuniseli kodwa iyazi kakuhle into eyenzayo.” Kanti ooxomoyi bayakwazi nokubamba iintlanzi ezingaphezu kwenye ngexesha! Yaye kwiindawo ezibandayo abanye bakhe babonwe beziphosa emkhenkceni, ukuze babamb’ ixhoba. EOstreliya kukhe kwabonwa uxomoyi iazure exhiphula izilwanyana ezincinane zasemanzini eziphazanyiswe ziiplatypuses ezikhangela ukutya ngaphantsi kwamanzi.

Ukuthandana Nokwakha Iindlwane

Ungayihleka ulale xa ubona indlela abathandana ngayo ooxomoyi. Abanye bayaleqana, kuze ke emva koko inkunzi ibonise ubuchule bayo bokwakha indlwane. Phakathi kwezinto ezenzayo kukuzithandisa ngokuphathela imazi iqathana lenyama emnandi.

Ooxomoyi abakhi nje iindlwane eziqhelekileyo. Abanye bakha iindlwane ekupheleni kwetonela ukuze bakwazi ukomba udonga lomlambo, umsele okanye uhlalutye. Abanye bakha emingxunyeni yeempuku okanye kuleyo isemithini.

Ukuze akwazi ukwakha indlwane yodongwe kufuneka embe itonela elibude buyimitha. Kunokuba nzima ukwakha le ndlwane. Abanye ooxomoyi bakha ngokuya ngomlomo bafike bahlabe ecaleni komlambo—iyingozi ke loo nto kuba inokuyothusa le ntaka ide ife. Kumahlathi ashinyeneyo aseNew Guinea nakumntla-ntshona weOstreliya uxomoyi obizwa ngokuba yiparadise kingfisher udla ngokumba umngxuma kwindlwane yeentubi. Ibonakala ingazikhathazi le nto ezi zinambuzane kuba ziye ziwulungise lo monakalo emva kokuba le ntaka izele yaza yemka.

Kwakhona kusenokuba nzima ukukhulisa amantshontsho. Omnye umntu waseAfrika wakha wabukela ooxomoyi ababini bephathela amantshontsho abo amahlanu iintlanzi ezimalunga nama-60 nama-70 ngosuku, singekathethi ngezo ziza kutyiwa ngabo. Kukhe kwenzeke ukuba inkunzi yondle amantshontsho ayo nangona iqabane layo life kwiintsuku ezine ngaphambi kokuba amaqanda aqanduselwe. Abanye ooxomoyi abangenamantshontsho bayancedisa ekufukameni amaqanda baze bancedise nasekunyamekeleni amantshontsho.

Ukusuka EIreland Ukuya KwiiSolomon Islands

Ngokuqhelekileyo ooxomoyi bafumaneka kummandla omkhulu osusela eIreland ekumntla-ntshona ukuya kutsho eYurophu naseRashiya nakwiiSolomon Islands ezikumzantsi-mpuma. Ekubeni ezinye zezi ndawo bahlala kuzo ziqhaqhazelis’ amazinyo ebusika, ooxomoyi baphakathi kweentaka ezifudukayo, abanye kubo behamba malunga neekhilomitha ezingama-3 000. Ooxomoyi abaninzi abaqhelekileyo kwakunye nabo kuthiwa ziipied kwanabo banemiqala emhlophe bayafumaneka kwaSirayeli, kuLwandle lwaseGalili nangakuMlambo iYordan. Kusenokwenzeka ukuba, uYesu Kristu wayedla ngokuzibukela ezi ntaka zintle nendlela ezenza ngayo izinto.—Sicela ufunde ibhokisi enomxholo othi “Qwalasela Ngenyameko Iintaka Zezulu.”

Uxomoyi owaziwa kakhulu yikookaburra ehlekayo yaseOstreliya. Le ntaka ibude buziisentimitha ezingama-43 nenomlomo owomeleleyo oziisentimitha ezisibhozo, imdaka ngebala yaye ngokuqhelekileyo ihlala egadini. Ikookaburra le yaziwa “ngentsini” yayo enenkohlakalo yaye izingela ngokungenaloyiko isitya neenyoka ezibude buyimitha!a

Nangona ooxomoyi bengenazintshaba, inani labo liyancipha xa amanzi omlambo engcolile kutshe namahlathi abahlala kuwo. Eneneni, kukho malunga neendidi ezingama-25, ezinye kuzo zisesichengeni sokuphela. Sinethemba lokuba amalinge olondolozo lwendalo aya kusinceda sigcine ezi ntaka zintle nezihlekisayo.

[Umbhalo osemazantsi]

[Ibhokisi/Umfanekiso okwiphepha 17]

“QWALASELANI NGENYAMEKO IINTAKA ZEZULU”

UYesu Kristu wayeyiqwalasela indalo yaye wayedla ngokusebenzisa izinto azibonileyo ukuze afundise abantu inyaniso nendlela abamele baziphathe ngayo. Ngokomzekelo, uYesu wathi: “Qwalaselani ngenyameko iintaka zezulu, ngokuba azihlwayeli mbewu, azivuni yaye azihlanganisi koovimba; ukanti uYihlo osemazulwini uyazondla. Anixabisekanga ngaphezu kwazo na?” (Mateyu 6:26) Kuchukumisa ngokwenene ukufunda ngothando analo uThixo ngabantu abadalileyo!

[Umfanekiso okwiphepha 16]