Ndandiligosa Lomkhosi Ndaza Ndaba Ngumkhonzi WoThixo Oyinyaniso

Kubalisa uGottlieb Bernhardt

Ndandiligosa lama-SS eJamani, icandelo elikhethekileyo lomkhosi kaHitler kwiNqaba iWewelsburg. NgoAprili 1945, ndayalelwa ukuba ndibulale amabanjwa awayekwinkampu yoxinaniso ekufutshane nalapho. Loo mabanjwa ayengamaNgqina kaYehova. Xa ukwi-SS, ubungenakubuza xa uyalelwa ngumntu okuphetheyo. Ndasuka ndamelwa yingqondo kuba kwakufuneka ndikhethe phakathi kokuthobela umyalelo nokwenza into endiyazi ilungile. Makhe ndikuchazele kakuhle intsusa yale nto.

NDIZELWE ngowe-1922 kwidolophana ekufutshane noMlambo iRhine eJamani. Nangona ubukhulu becala loo mmandla wawuzele ngamaRoma Katolika, thina ekhaya sasikwiqela lamaPiet, icawa eyaqala ngenkulungwane ye-17. Ukuzithatha kukaHitler iintambo zolawulo ngowe-1933, mna ndineminyaka eli-11 ubudala. Kuthe ke kuba ndandikrelekrele esikolweni nasemidlalweni, kwiminyaka eyalandelayo ndathunyelwa kwisikolo esikufutshane neMarienburg, ngoku eyiMalbork, ePoland. Ndafika kuloo ndawo yayithe qelele ngamakhulukhulu eekhilomitha ekhaya, ndatshona andavela nangonwele kubuNazi. Thina njengabafundi sasihlohlwa ukuba nembeko, ukuzimisela, ukuthembeka, ukuthobela, ukuzijula nofele emsebenzini, nokulithanda egazini ilizwe laseJamani.

IMfazwe Yehlabathi II Nobu-SS

Kuthe xa kuqhambuka imfazwe yesibini ngowe-1939, ndabhalisa kwiLeibstandarte SS Adolf Hitler, icandelo lomkhosi elikhethekileyo elaliphethwe nguHitler uqobo. Oonogada bamagosa aseburhulumenteni babephuma kweli candelo, yaye lalisetyenziselwa imisebenzi ekhethekileyo yomkhosi. Ndabukela xa kwakusiliwa eBelgium, eFransi, eNetherlands, eRomania, eBulgaria naseGrisi. Xa ndandiseBulgaria, ndaya kwenye icawa eyayiqhutywa ngumfundisi wasemkhosini. Ndazibuza, ‘Ngaba notshaba luqhuba iinkonzo ezinjengezi?’ Kanti ndandikwazibuza ukuba: ‘Ngaba bethu uThixo uyayisikelela imfazwe? Ngaba uyawathatha amacala?’

Kamva, ndakhethwa phakathi kwabantu ababeza kuya kwiJunkerschule, isikolo sabafana ababeza kufumana izikhundla eziphambili emkhosini. Emva koko, ndithunyelwe kwiqela lomkhosi elalijonge ikomkhulu leReich eBerlin, apho ndabona khona uHitler engxolisa igosa lezobupolitika elikwisikhundla esiphezulu phambi kwabantu. Ndathi, ‘Bubukrwada noko obu.’ Kodwa ndandingenakuyithetha ndiviwe loo nto!

EBerlin, ndadibana noInge, owayesebenza kwelo komkhulu. Kuthe kanye xa ndimele nditshate naye, icandelo endisebenza kulo lathunyelwa ukuya kulwa eRashiya—lingenampahla ifanelekileyo yasebusika! Sasala sibamb’ ongezantsi njengamajoni, kuba kaloku ubusika bowe-1941 nobowe-1942, babubanda kangangokuba iqondo lobushushu lalingama-30 ngokukaCelsius ngaphantsi kweqondo lokukhenkceka. Kulapho ke ndafumana khona iMbasa yam yesibini yeIron Cross. Kamva, ndenzakala kakubi ndaza ndathunyelwa eJamani ngenqwelo-moya. Satshata noInge ngowe-1943.

Umsebenzi wam owalandelayo yayikukusebenza kwikomkhulu likaHitler iObersalzberg kwiintaba zeBavaria. Omnye umntu owayelapho yayinguHeinrich Himmler, umphathi we-SS, owenza amalungiselelo okuba ndibonwe ngugqirha wakhe uFelix Kersten. Kamva ndafumanisa ukuba lo kaKersten wayenendawo ebizwa ngokuba yiHartzwalde, ekufutshane neBerlin. Ngasekupheleni kwemfazwe, wacela lo kaHimmler ukuba ayalele amaNgqina kaYehova awayekwinkampu yoxinaniso ekufutshane apho, kuba aye kusebenza kumhlaba wakhe. UHimmler wavuma yaye uKersten wawaphatha ngesidima amaNgqina. INgqina elisebenzela lo kaKersten eSweden lalidla ngokufaka ikopi yeMboniselo ebhegini yakhe, lisenzela ukuba ifunyanwe ngamaNgqina aseJamani.a

AmaNgqina KaYehova Aqala Ukundifikelela Intliziyo

Ngasekupheleni kowe-1944, uHimmler wandibeka njengomncedisi womphathi-mkhosi owayekwiNqaba iWewelsburg, nqaba leyo eneminyaka engama-400 yakhiwayo ekufutshane nesixeko sasePaderborn. Lo kaHimmler waceba ukwenza iWewelsburg iziko leemfundiso zamaNazi. Kufutshane nale nqaba kwakukho inkampu yoxinaniso ebizwa ngokuba yiNiederhagen eyayineqela lamabanjwa akhethekileyo—amaNgqina kaYehova, akwabizwa ngokuba ngaBafundi beBhayibhile.

UErnst Specht owayelibanjwa wayemana ukuza kundonga njengoko ndandenzakele. Wayedla ngokuthi, “Bhota Mhlekazi.”

“Kutheni ungathi ‘Heil Hitler!’?” Ndambuza rhabaxa.

Ngobuchule wandibuza, “Ngaba ukhuliswe ngamaKristu?”

Ndathi, “Ewe, ndikhulele kwicawa yamaPiet.”

Walek’ umsundulo esithi, “Ngoko ke umele uyazi into yokuba iBhayibhile ithembisa ukuba siya kusindiswa (heil) ngomntu omnye, uYesu Kristu. Naso ke isizathu sokuba ndingathi ‘Heil Hitler!’”

Ndothukile kwangaxeshanye ndimangalisiwe, ndambuza, “Kutheni ulapha nje?”

“NdinguMfundi weBhayibhile,” waphendula ngelitshoyo.

Ukuncokola noErnst nelinye iNgqina, uErich Nikolaizig elilungisa iinwele kwandifikelel’ intliziyo. Noko ke, yayingavumelekanga le nto yezi ncoko yaye umphathi wethu wandixelela ukuba ndiyiyeke. Sekunjalo, ndandiyicinga into yokuba, ukuba wonk’ umntu waseJamani—ilizwe ekuthiwa lelamaKristu, elinezigidi ngezigidi zamarhamente—ebenokuziphatha njengamaNgqina, ngeyingekho le nto yale mfazwe. Ndandicinga ukuba, ‘amaNgqina ebefanele ukuba ayathandwa, kunokuba atshutshiswe.’

Kwathi ngelo xesha, ndafowunelwa ngumhlolokazi osezintsizini endicela ukuba ndimfunele imoto eyayiza kubalekisela unyana wakhe kwindawo awayeza kutyandwa kuyo ithunjana. Ndakhawuleza ukumfunela into yokuhamba kodwa umphathi wethu wathi loo nto ayizi kwenzeka. Kwakutheni? Umyeni walo mhlolokazi waxhonywa kuba wafunyaniswa ephakathi kwabantu abenza ilinge lokubulala uHitler ngoJulayi 1944. Yafa loo nkwenkwe, kungekho nto ndandinokuyenza ke phofu. Isanditya nangoku loo nto.

Nakuba ndandilityendyana elisandul’ ukunyathela kwiminyaka engama-20 ubudala, ndaqalisa ukubujonga ngendlela obuyiyo ubomi—hayi ngendlela obabuchazwa ngayo ngamaNazi. Kwangaxeshanye, ndaya ndiwathanda amaNgqina kaYehova neemfundiso zawo. Oku kwabangela ukuba ndenze isigqibo endingazange ndisicinge ebomini bam.

NgoAprili 1945, kwasondela imikhosi eyiMbumba, yaye umphathi wam wabaleka eWewelsburg. Kwafika umkhosi owawuyalelwe nguHimmler ukuba utshabalalise inqaba uze ubulale amabanjwa awayelapho. Umlawuli wenkampu yoxinaniso ekufutshane wandinika uludwe olunamabanjwa awayemele abulawe—onke engamaNgqina. Ayeza kubulawelwa ntoni? Kwakusithiwa ayazi apho ifihlwe khona imizobo eyaphangwa nguRhulumente wamaNazi, imisebenzi yobugcisa ekubonakala ukuba yayifihlwe kwezinye zezo zakhiwo. Kwakuza kufuneka afe nayo loo mfihlelo! Ndandiza kuyithini le nto yokubulawa kwawo?

Ndaya kumlawuli wenkampu ndaza ndathi kuye: “Ayeza amajoni aseMerika. Akucingi ukuba kuya kuba kuhle ukuba ubaleke namajoni akho?” Akazange acinge kabini ngaphambi kokuba abaleke! Ndenza into eyayingenakuze yenziwe ligosa le-SS—ukungathobeli umyalelo, ibe loo nto yawasindisa amaNgqina.

Ilungelo Lokuba Ngumzalwana Wawo

Yathi yakuphela imfazwe, sinoInge saqhagamshelana namaNgqina kaYehova saza sazimisela ekufundeni iBhayibhile. Sancedwa linenekazi eliliNgqina elinguAuguste nangamanye amaNgqina. Ndandisenezivubeko zokwenzakala emfazweni yaye ixesha lasemva kwemfazwe lenza ubomi banzima. Sekunjalo, mna nenkosikazi yam sahlulela ubomi bethu kuYehova saza sabhaptizwa—mna ngowe-1948, uInge yena wabhaptizwa ngowe-1949.

Ngeminyaka yee-1950, amaNgqina amaninzi awayeseWewelsburg ngexesha lemfazwe aphinda aya kudibana apho. Phakathi kwawo kwakukho uErnst Specht, uErich Nikolaizig, nelinye ibanjwa elithembekileyo uMax Hollweg. Ndikugqala njengelungelo ukubizwa njengomzalwana wawo, kuba la madoda akhaliphileyo kaThixo abeka ubomi bawo esichengeni ukuze andishumayeze. Omnye owayezile nguMartha Niemann, owayengunobhala eWewelsburg. Naye yamfikelel’ intliziyo indlela awayeziphethe ngayo amaNgqina waza kamva waba ngumkhonzi kaYehova ozahluleleyo.

Xa ndibuyel’ umva ndicinga ngale minyaka idluleyo, ndibona ubungqina obuninzi ngendlela engathethekiyo bokuba “ihlabathi liphela lisemandleni [kaSathana uMtyholi]”—into endandingayiqondi ngoxa ndandisengumfana owazi izinto ngazinye nonguntamo-lukhuni. (1 Yohane 5:19) Kanti ndiwubona kakuhle umnkabankaba womahluko phakathi kokusebenzela oorhulumente abangoozwilakhe, njengalowo kaHitler kwakunye nokusebenzela uYehova. Abalawuli abangoozwilakhe bafuna ukuthotyelwa inkani nokuba baya emaweni, logama yena uYehova efuna simkhonze kuba simthanda ngokusekelwe ekubazini kakuhle ubuntu neenjongo zakhe njengoko zichazwe eBhayibhileni. (Luka 10:27; Yohane 17:3) Ngenene, ndisadl’ amazimba nje, yena uYehova ndiza kumkhonza.

[Umbhalo osemazantsi]

[Umfanekiso okwiphepha 19]

Mhla sasitshata ngoFebruwari 1943

[Umfanekiso okwiphepha 19]

INqaba iWewelsburg yayiza kuba liziko leemfundiso ze-SS

[Umfanekiso okwiphepha 20]

Ndim nenkosikazi, uInge ngoku