Eyona Nto Yanditsalayo KumaNgqina KaYehova

Kubalisa uTomás Orosco

Ukuqala kwam ukuya kwintlanganiso yamaNgqina kwiHolo yawo yoBukumkani, nkwenkwana ithile yayinikela intetho. Nakuba yayiphantse igqunywe liqonga eyayimi emva kwalo, ndaphawula ukuba izolile yaye inobuchule obungathethekiyo. Yandichukumisa ngokwenene.

NDABONA ukuba abantu ababelapho babephulaphule ngenyameko. Ekubeni ndandingunozakuzaku womkhosi waseBolivia eUnited States, ndingumphathi wemikhosi, yaye ndiyintong’ esekhosi kumongameli, ndandikuqhelile ukuhlonelwa. Kodwa imbeko eyayinikwa lo mntwana yandenza ndahlolisisa usukelo endinalo ebomini.

UTata wasweleka phakathi kwiminyaka yee-1930, kwiMfazwe yaseChaco eyayiphakathi kweParaguay neBolivia. Kungekudala emva koko, ndathunyelwa kwisikolo samaKatolika ekuhlalwa kuso. Kwaqengqeleka iminyaka, ndisiya rhoqo kuMthendeleko, apho sasicula iingoma zecawa, sifundiswe size sicengceleze imithandazo esiyinkqayileyo. Ndiseyinkwenkwana ndandihambisa nesiqhumiso, ndicula nasekwayareni. Kodwa, ndandingazange ndayifunda iBhayibhile; ndingasathethi ke ngokuyibona.

Ndandiyithanda imihla engcwele yecawa kuba yayifana namatheko kum yaye ndandifumana ithuba lokwenza into eyahlukileyo. Kodwa abefundisi nabanye ababesifundisa ngonqulo babengqwabalala. Kwakungekho nto inditsalayo kubo. Ndandisele ndidikiwe lunqulo.

Ndathanda Ulungelelwano Emkhosini

Ngenye imini eshushu, amagosa amabini omkhosi aselula nawayenxibe kakuhle atyelela idolophu yasekhaya, iTarija. Ayeseholideyini eLa Paz, isixeko esilikomkhulu laseBolivia. Ayehamba ekhululekile yaye ezithembile kwimarike yalapho. Ndathanda indlela awayenxibe kakuhle ngayo, ecocekile yaye enomfaneleko. Ayenxibe iyunifom eluhlaza, kunye neminqwazi eyayinemiphetho emenyezelayo. Ngelo xesha kanye, ndagqiba kwelokuba ndiza kuba lijoni. Ndandicinga ukuba ubomi bawo buzele ngamava nezinto ezintle awazenzayo.

Ngowe-1949, xa ndandineminyaka eli-16 ubudala ndabhalisa kwisikolo somkhosi saseBolivia. Ndandikunye nomkhuluwa wam njengoko ndandimi kulo mgca mde wabafana ababekwisango eliya kuloo ntente. Wandazisa kumphathi-mkhosi walapho, emcela ukuba aze andinyamekele kakuhle. Wandula ke wathetha kakuhle ngam kulo. Uthe akumka, ndamkelwa ngendlela eqhelekileyo kumajoni afikayo. Lo mphathi-mkhosi wandibetha ndaya kuwa esithi, “Siza kukhe sibone ukuba ngubani omele anconywe apha!” Ndadibana apho ke nengqeqesho yasemkhosini nokuhlala ndisoyika. Kodwa ke, ndanyamezela nangona ndandiziva ndithotyiwe.

Ekuhambeni kwethuba ndafunda indlela yokulwa yaye ndaba lijoni elihlonelwayo. Kodwa ngokuhamba kwexesha ndafunda ukuba ukucoceka nembonakalo enesidima yamajoni zingakuqhatha.

Ukufumana Isikhundla Esiphezulu

Ndathi ndisemtsha ebujonini, ndaqeqeshwa kwinqanawa yokulwa yoMkhosi Wamanzi waseArgentina iGeneral Belgrano, enokuthwala amajoni aliwaka. Ngaphambi kweMfazwe Yehlabathi II, yayiyeyaseUnited States ibizwa ngokuba yiUSS Phoenix yaye kamva yasinda xa yayihlaselwa ngamaJapan kwiZibuko iPearl eHawaii ngowe-1941.

Ekugqibeleni ndanyuselwa ndaba lisekela lomphathi-mkhosi kuMkhosi waManzi waseBolivia, owawugade imilambo ekwimida yaseBolivia. Le milambo yayiquka leyo ikuMmandla weAmazon, kwakunye nelona chibi lithwala amaphenyane amaninzi ehlabathini, iChibi iTiticaca.

NgoMeyi 1980, ndatyunjwa ukuba ndibe yinxalenye yegqiza loonozakuzaku bomkhosi ababeza kuya eWashington, D.C., elikomkhulu laseUnited States. Kwakukhethwa igosa eliphezulu eliza kumela icandelo ngalinye lomkhosi—umkhosi oqhelekileyo, owomoya nowasemanzini—ibe kwathiwa mandibe yintloko yelo gqiza ngenxa yokuba nexesha elide ndibhexesha emkhosini. Ndahlala malunga neminyaka emibini eUnited States yaye kamva ndaba yintong’ esekhosi kumongameli waseBolivia.

Njengomphathi-mkhosi, kwakunyanzelekile ukuba ndiy’ ecaweni Cawa nganye. Ukubandakanyeka kwabefundisi basemkhosini kuqhushululu nasezimfazweni kwandishiya ndingasaluthembi unqulo. Ndandisazi ukuba iphosakele into yokuba iicawa zixhase ukubulawa kwabantu ngolo hlobo. Kodwa kunokuba olo hanahaniso lundenze ndingaluhoyi unqulo, lwandishukumisela ekubeni ndikhangele olona nqulo lunenyaniso. Ndandingazange ndayifunda iBhayibhile, ngoko ndaqalisa ukuyifunda ngamaxesha athile yaye ndandifunda nje loo ndawo ndiyityhile kuqala.

Ucwangco KwiHolo YoBukumkani

Yandothusa into yokuba, inkosikazi yam uManuela aqalise ukufunda iBhayibhile nelinye iNgqina likaYehova elingumthunywa wevangeli, uJanet. Kamva, uManuela, waqalisa ukuhamba iintlanganiso zawo, kwiHolo yoBukumkani. Ndandingenangxaki yokumsa apho, kodwa mna ndandingafuni ukuya apho. Ndandicinga ukuba kwezo ntlanganiso kukho abantu abangxolayo, nabamana ukuba nomoya.

Ngeny’ imini uManuela wandibuza enoba ndingathanda kusini na ukutyelelwa ngumyeni kaJanet. Ndaqala andavuma. Kamva ndacinga ukuba, ulwazi endinalo ngonqulo luya kundinceda ndiphikise nantoni na ayithethayo. Eyona nto yanditsalayo kuIan ukuqala kwam ukumbona yayisisidima awayenaso—andinakuthi zizinto awayezithetha. Akazange azame ukundithoba kuba yena wayeyazi kakuhle iBhayibhile. Kodwa wandiphatha kakuhle nangembeko.

Kwiveki eyayilandela leyo, ndathi makhe ndiye kwiHolo yoBukumkani, ndayiva apho ke laa nkwenkwana, ndithethe ngayo ekuqaleni. Njengoko ndandiyiphulaphule ifunda ize icacise iindinyana ezikwincwadi yeBhayibhile kaIsaya, ndaqonda ukuba ndiyifumene intlangano eyahlukileyo kwezinye. Ungayihleka into yokuba, ndisakhula ndandifuna ukuba ligosa lomkhosi elibekekileyo, kodwa ndandisele ndifuna ukufana nale nkwenkwana ndize ndifundise abantu iBhayibhile. Intliziyo yam yasuka yathamba yaye ndamkela yonke into.

Eny’ into eyandichukumisayo ngokuhamba kwethuba, kukubamb’ ixesha kwamaNgqina nokundibulisa kwawo ngobubele, zinto ezo ezandenza ndaziva ndamkelekile. Eny’ into endandiyithanda kukundiliseka nokucoceka kweempahla zawo. Eyona nto ndandiyithanda ngokukhethekileyo, lucwangco olwalukwiintlanganiso zawo—ukuba ucwangciso luthe ngemini ethile intetho iza kuxubusha umbandela othile, iza kuthetha ngaloo nto ke. Ndandiyixabisa into yokuba olu lungelelwano lwalusekelwe eluthandweni, kungekhona ekugcineni abantu besoyika.

Emva kokuya okokuqala kwiintlanganiso, ndavuma ukufunda iBhayibhile noIan. Sayifunda sisebenzisa incwadi ethi Unokuphila Ngonaphakade KwiParadisi Esemhlabeni.a Ndisasikhumbula isahluko sesithathu esinomfanekiso kabhishopu osikelela amajoni aya emfazweni. Andizange ndibuthandabuze nakancinane ubunyaniso baloo nto kuba ndandiyibona ngala wam amehlo isenzeka. Xa ndandikwiHolo yoBukumkani, ndafumana incwadi ethi Ukuqiqa NgeZibhalo. Emva kokufunda imbono yeBhayibhile ngokungathabathi cala, ndaqonda ukuba kuza kufuneka nditshintshe. Ndagqiba kwelokuba ndingaze ndilubeke unyawo lwam kwiCawa yamaKatolika, ibe ndaqalisa ukuya rhoqo kwiintlanganiso eziqhutyelwa kwiHolo yoBukumkani. Kanti ndazama iindlela zokuyeka emkhosini.

Ukuhambela Phambili De Ndibhaptizwe

Kwiiveki ezimbalwa emva koko, ndeva ukuba ibandla liza kucoca ibala ekuza kuqhutyelwa kulo indibano yesithili. Kangangendlela endandikhangele phambili ngayo kuloo ndibano, ndaya kuncedisa xa kwakucocwa elo bala. Ndandisebenza nomntu wonke, kumnandi sincokola. Njengoko ndanditshayela apho, kweza mfana uthile waza wandibuza ukuba andilogosa lasemkhosini na.

“Ewe ndililo,” ndaphendula ndatsho.

“Andiyikholelwa ke le!” watsho emangalisiwe. “Igosa eliphezulu emkhosini litshayele!” Igosa eliphezulu emkhosini lalingenakuchola nephepha eli, asisathethi ke ngokutshayela. Lo mfana wayeqeshelwe ukundiqhubela imoto yomkhosi ibe ngoku wayesele eliNgqina likaYehova!

Intsebenziswano Esekelwe Eluthandweni

Ulungelelwano emkhosini lusekelwe ekuhloneleni isikhundla akuso umntu, ibe ke yayendele kum loo nto. Ngokomzekelo, ndikhumbula ndibuza enoba amanye amaNgqina kaYehova anezikhundla eziphezulu kunamanye ngenxa yezinto azenzayo. Indlela endandizijonga ngayo izikhundla yayimilile entliziyweni yam kodwa yayiza kutshintsha kungekudala.

Malunga nelo xesha—ngowe-1989—ndeva ukuba kuza kufika ilungu leQumrhu Elilawulayo lamaNgqina kaYehova elivela eNew York lize kunikela intetho apho kwelo bala laseBolivia. Ndandifuna ukubona ukuba ilungu “eliphezulu” lentlangano liza kuphathwa njani. Ndandicinga ukuba umntu onembopheleleko engako uza kuzenza abonakale ukuba kufike umntu obalulekileyo.

Yaqala intlanganiso, ibe kwakungacaci nokuba kufike umntu obalulekileyo ndaza ndasuka ndadideka. Kwakukho esinye isibini esikhulileyo esasihleli ecaleni kwethu noManuela. UManuela waphawula ukuba, umfazi wayeneculo lesiNgesi, ngoko ebudeni bekhefu wancokola naye. Kodwa emva koko esi sibini semka.

Sothuka asalibala xa kamva sabona umyeni weli bhinqa esiya kunikela intetho engumxholo! Ngoko nangoko, yatshintsha yonke into endayifunda emkhosini ngezikhundla, intlonelo negunya. Ndathi, “Khawufan’ ucinge, laa mzalwana ebehleli nathi kweza zihlalo ziqinileyo, lilungu leQumrhu Elilawulayo!”

Andiwuvali umlomo xa ndicinga ngezihlandlo uIan ezama ukundinceda esebenzisa amazwi kaYesu akuMateyu 23:8 athi: “Nonke nina ningabazalwana.”

Ukushumayela Okokuqala

Ndathi ndakuzigqiba zonke iimbopheleleko endandinazo emkhosini, uIan wacela ukuba ndiye kushumayela naye kwindlu ngendlu. (IZenzo 20:20) Sasishumayela kwindawo endandinganqweneli ukuba siye kuyo—kwakukho izindlu ezininzi zamajoni. Kwenye indlu, umnyango wavulwa yenye injengele endandinganqweneli ukudibana nayo. Ndothuka ndaza ndoyika, ingakumbi xa yabona ibhegi neBhayibhile endandiyiphethe yaza yabuza ngendelelo, “Kuqhubeka ntoni ngawe?”

Emva komthandazo omfutshane, ndaziva ndomelele yaye ndikhululekile. Le njengele yandiphulaphula yaza yathatha neencwadi ezisekelwe eBhayibhileni. Loo nto yandikhuthaza ukuba ndizahlulele kuYehova. Ndakufuzisela oko ngokubhaptizwa emanzini ngoJanuwari 3, 1990.

Ekuhambeni kwexesha, umfazi wam, unyana nentombi yethu baba ngamaNgqina kaYehova. Ngoku ndingumdala ebandleni nomshumayeli wexesha elizeleyo weendaba ezilungileyo zoBukumkani bukaThixo. Elona lungelo lixabisekileyo ndinalo kukwazi uYehova nokwaziwa nguye. Oku kodlula nasiphi na isikhundla esinokufunwa ngumntu okanye asifumane. Eneneni, ulungelelwano alumele lube ngqwabalala luze lungabi nalwazelelelo kodwa lumele lube nobubele nenkathalo. UYehova nguThixo onolungelelwano, kodwa okona kubalulekileyo unguThixo onothando.—1 Korinte 14:33, 40; 1 Yohane 4:8.

[Umbhalo osemazantsi]

[Umfanekiso okwiphepha 13]

Ndim nomntakwethu uRenato, ngowe-1950

[Umfanekiso okwiphepha 13]

Apha sasisethekweni namanye amajoni aseTshayina nakwamanye amazwe