Ukutya Okufumaneka Lula Kwezinambuzane

● Izinambuzane zidla ngokutya ukutya okufumaneka lula nokunentswane. Eyona ndawo zikufumana kuyo ukutya okunjalo kukwiintyatyambo. Njengoko kunjalo ngeendawo ezithengisa ukutya, iintyatyambo ziqhayisa ngemibala yazo eqaqambileyo. Izinambuzane zitsaleleka kuzo zize zimfimfithe umungu nencindi yazo.

Emva kobusuku obupholileyo, izinambuzane zidla ngokungabi namandla. Ngoko ezi zidalwa zinemizimba ebandayo zixhomekeke elangeni ukuze zifumane amandla. Iintyatyambo ezininzi zinika izinambuzane yonke into eziyifunayo—ukutya okunesondlo nendawo yokugcakamela ilanga. Makhe sihlole umzekelo oqhelekileyo.

Ioxeye daisy yintyatyambo eqhelekileyo ekhula kwiindawo ezininzi eYurophu nakuMntla Merika. Isenokungabonakali ikhethekile, kodwa ukuba uyihlolisisa kakuhle, uya kuphawula ukuba zininzi izinto ezenzeka kuyo. Idaisy le yindawo entle izinambuzane eziluqala kuyo usuku lwazo. Indawo emhlophe kwintyatyambo itsala ubushushu belanga ize ke le iphakathi imthubi kube lapho zihlala khona izinambuzane ukuze zifumane amandla elanga.a

Eyona nto yenza kube mnandi ukuhlala kwesinambuzane kule ntyatyambo ngumungu nencindi ezalise umbindi wedaisy, zinto ezo ezikukutya okunesondlo kwizinambuzane ezininzi. Ayikho enye indawo ebhetele izinambuzane ezinokufumana kuyo isidlo sakusasa nendawo yokugcakamela ilanga.

Ngenxa yoko, izinambuzane ezahlukahlukeneyo zihlala kwiioxeye daisy ebudeni bemini. Kuzo uya kufika kukho ooqongqothwane, amabhabhathane amibalabala, iishield bug, iinyenzane neendidi ngeendidi zeempukane. Kakade ke, ukuba akungomntu uqwalaselayo, akunakuzibona ezi ndawo zintle zitya kuzo ezi zinambuzane.

Ngoko ke, xa uphinde waya emaphandleni, unokukhe uqwalasele ezi ntyatyambo ungenakufane ube nomdla kuzo nezinceda izinambuzane. Ukuba wenjenjalo, uya kumxabisa nangakumbi uMdali oyile zonke ezi zinto.

[Umbhalo osemazantsi]