Imbono YeBhayibhile

Ndinokuyisebenzisa Njani Imali Ngobulumko?

“Ndamkela imali encinci, kodwa wona amatyala am aya esanda. Abuhli ubuthongo, kuba ndicingana nendlela yokondla intsapho yam.”—UJames.

“Kwakungathi iingxaki zindixinile yaye ndandingenayo indlela yokuphuma kuzo.”—USheri.

EZI ziintetho eziqhelekileyo xa iimeko zoqoqosho zikekele. Ethetha ngokukekela kwakutshanje kwemeko yoqoqosho, uJuan Somavia, ongumalathisi-jikelele weInternational Labour Office uthe: “Le ngxaki ayiphelelanga nje eWall Street kodwa ithwaxa wonke nje umntu.”

Ukuphelelwa ngumsebenzi ngesiquphe okanye ukungabi nayo imali yokuthenga izinto ezisisiseko entsatsheni kunokubangela umntu axinezeleke ade aphelelwe lithemba. Ngaxa lithile, umbhali weBhayibhile uDavide wakha wavakalelwa ngendlela efanayo. Wathandaza wathi: “Ukubandezeleka kwentliziyo yam kwandile; kwiingcinezelo eziphezu kwam ndikhuphe.” (INdumiso 25:17) Ithini iBhayibhile ngamaxesha esiphila kuwo ibe ngaba ubulumko bayo obuphefumlelweyo bunako ukusikhusela buze businike uxolo olungakumbi?

Ubulumko Obunokusinceda Ngamaxesha Amanqam

IBhayibhile yaprofeta yathi ‘imihla yokugqibela’ yeli hlabathi siphila kulo iya kubonwa ‘ngenimba’ kwakunye ‘namaxesha amanqam ekunzima ukujamelana nawo.’ (2 Timoti 3:1; Mateyu 24:8) Kuyabonakala ukuba yinyaniso kwaloo mazwi! Sekunjalo, sisenalo ithemba, kuba uThixo usebenzise iBhayibhile Engcwele ukusinika ubulumko bokuhlangabezana nala maxesha okukekela kwezoqoqosho.

Ngokomzekelo, iBhayibhile isinceda ukuba sibe nembono efanelekileyo ngemali. INtshumayeli 7:12 ithi: “Ubulumko buyakhusela njengokuba nemali ikhusela; kodwa ingenelo yolwazi kukuba ubulumko bubagcina bephila abo banabo.” Eneneni, imali inokusikhusela ngandlel’ ithile, kodwa bubulumko bukaThixo kuphela obufumaneka eBhayibhileni, obunokusikhusela ngamaxesha onke. Nantsi eminye imizekelo.

Ukuhlangabezana Nokukekela Kwezoqoqosho

Khuthala. “Ivila liyanqwenela, kodwa umphefumlo walo awunanto. Noko ke, umphefumlo wabakhutheleyo uya kutyetyiswa.” (IMizekeliso 13:4) Sifunda ntoni kule ndinyana? Zama ukuba ngumntu onyanisekileyo osebenza nzima. Abantu abakhutheleyo emsebenzini baxatyiswa kakhulu ngabaqeshi yaye abanakufane baphelelwe lula ngumsebenzi.—Efese 4:28.

Cinga ngeendleko ngaphambi kokuthenga. UYesu wathi: “Ngubani na kuni othi efuna ukwakha inqaba angahlali phantsi kuqala, abale indleko, ukuze abone ukuba unokwaneleyo kusini na kokuyigqiba?” (Luka 14:28) Nangona uYesu wayezekelisa imfuneko yokubala iindleko zokuba ngumlandeli wakhe, kucacile ukuba amazwi akhe ayeyinyaniso nangokoqobo. Ngoko zibhale phantsi ezona zinto uzifunayo neendleko zazo.

Ungachithi imali kwimikhwa emibi. Le mikhwa iquka ukungcakaza, ukutshaya nokuba likhoboka leziyobisi notywala, zinto ezo angazifuniyo uThixo.—IMizekeliso 23:20, 21; Isaya 65:11; 2 Korinte 7:1.

Kuphephe ukuba ‘ngumthandi wemali.’ (Hebhere 13:5) Abantu abathanda imali abonwabi yaye bayadana, ngaloo ndlela “bezingxwelerha ngeentlungu ezininzi.” (1 Timoti 6:9, 10) Ukongezelela, baphilela ukurhwaphiliza, kuba enoba bafumana imali engakanani na, kodwa abade banele.—INtshumayeli 5:10.

Funda ukwaneliseka. “Asingenanga nanto ehlabathini, ngoko ke asinakuphuma nanto. Ukuba sinesixhaso nesambatho, masaneliswe zezo zinto.” (1 Timoti 6:7, 8) Abantu abanelisekayo zizinto ezimbalwa abanazo banokukuphepha ukuxhalaba gqitha xa imeko yezoqoqosho isiba mbi. Ngoko funda ukwaneliseka uze uphile ngokwemali onayo.—Sicela ufunde ibhokisi engasekunene.

Akukho namnye kuthi owaziyo ukuba kuza kube kunjani ngomso. INtshumayeli 9:11 ithi: ‘Sonke sehlelwa lixesha nasisihlo esingenakubonwa kwangaphambili.” Ngoko ke, abantu abalumkileyo ‘abathembeli kubutyebi obungaqinisekanga, kodwa bathembela kuThixo,’ obathembisa oku abo banyaniseke kuye: “Andiyi kuze ndikushiye, ndingayi kuze ndikutyeshele.”—1 Timoti 6:17; Hebhere 13:5.

NGABA WAKHA WAZIBUZA?

● IBhayibhile ilichaza njani ixesha esiphila kulo?—2 Timoti 3:1-5.

● Ukhokelo olunokuthenjwa lunokufunyanwa njani namhlanje?—INdumiso 19:7.

● Ndinokuqiniseka njani ukuba intsapho yam iza kukhuseleka?—INtshumayeli 7:12.

[Ibhokisi/Umfanekiso okwiphepha 19]

IINDLELA ZOKONGA

Xa uye kuthenga: Zibhale phantsi izinto oza kuzithenga. Kuphephe ukuthenga izinto ongakhange ucebe ukuzithenga. Khangela amaxabiso afikelelekayo. Thenga ngamatikiti esaphulelo nangemali eye ibuye xa uhlawule irhafu ethe kratya. Thenga izinto ozifunayo xa ixabiso lazo lehlile. Xa kunokwenzeka thenga ngezixa.

Iindleko zekhaya: Wahlawule kwangethuba amatyala akho uze uphephe ukuhlawuliswa imali ethe chatha. Ziphekele, uzidubelele ekhaya iziselo uze ube ngcathu ekutyeni nasetywaleni. Zicime izibane nezinto zombane xa ungazisebenzisi. Ukuba kunokwenzeka sebenzisa izixhobo ezonga umbane. Gcina ikhaya lakho lifudumele. Cinga ngokufudukela kwindlu encinci kunaleyo uhlala kuyo.

Isithuthi: Xa ufuna imoto, thenga eyonga amafutha neyomeleleyo. Akunyanzelekanga ukuba ibe ntsha. Ukuba kunokwenzeka yenza izinto ngexesha elinye uze uhambe neqela labantu. Okanye ke sebenzisa isithuthi sikawonkewonke, uhambe ngeenyawo okanye ukhwele ibhayisikile. Yiya eholideyini ngamaxesha angaxakekanga yaye ukuba kunokwenzeka funa indawo ekufutshane nekhaya.

Ifowuni nokuzonwabisa: Ngaba kuyimfuneko ukuba ube nefowuni yasekhaya kunye neselfowuni? Ukuba abantwana bakho baneeselfowuni, ngaba banokuzisebenzisa kakuhle okanye bangabi nazo? Ngaba unganciphisa izitishi ozirhafelayo kumabonwakude ukuze ungadleki kakhulu?a Ziboleke iincwadi neemovie kwimizi yogcino zincwadi kunokuzithenga.

[Umbhalo osemazantsi]