Ingathi Alisafiki Elo Xesha Lokubaxelela Oku, “Sonke Silapha!”
Kubalisa uAbigail Austin
Ndandineminyaka esithoba ubudala. Yayiyimini ezolileyo ngoAprili wowe-1995, yaye abathile kwibandla lethu lamaNgqina kaYehova bagqiba ekubeni baye kubethwa ngumoya emaphandleni aseNgilani. Sagcwalisa iimoto saza sahamba. Mna, udadewethu omkhulu uSarah nomhlobo wasekhaya uDeborah sasikhwele notata nomama. Ngequbuliso phambi kwethu kwathi gqi imoto eyayisiza ngesantya esiphezulu neyayihamba kwicala lethu lendlela yeza kuntlitheka kuthi. Kwasinda mna kuphela.
NDOTHUKA esibhedlele emva kweeveki ezimbini. Ndandiqhekeke ukhakhayi, ngoko oogqirha babelubambe ngeepleyiti ezininzi. Sekunjalo, ndakhawuleza ndachacha. Ekugqibeleni izalamane zam zandixelela okwenzekileyo, kodwa ndandingakholelwa. Ndandisoloko ndicinga ukuba abazali bam nodadewethu bebendityelele ngoxa bendingekho zingqondweni ngoko andizange ndibabone. Ndayamkela into eyenzekileyo xa ndandifika ekhaya. Intliziyo yam yayilihlwili.
Yintoni eyandincendayo ukuze ndikwazi ukuhlangabezana nale ntlungu?
Ilifa Lam Lokomoya
Ndandinguthunjana kubantwana abahlanu. Ngexesha kwakusenzeka le ngozi, uSarah wayeneminyaka engama-22 ubudala, ekaShane ingama-20, ekaJessica ili-17 yena uLuke eneminyaka eli-15 ubudala. Abazali bethu babelunge ngokwenene yaye babesinyamekela. Utata, uSteve, wayengumdala kwiBandla lamaNgqina kaYehova laseWest Yorkshire eShipley, yaye wayesaziwa ngokuthanda abantu nokuzipha ixesha lokubaphulaphula nokubanceda. Yena umama, uCarol, wayethandwa, ebanyamekela njengentombi yabo abantu abakhulileyo ebandleni. Wayelungiselela iimbutho zethu baselula aze asincede sifumane abahlobo abalungileyo. Wonk’ umntu wayesamkeleka ekhaya. Abazali bethu basifundisa ukuba nobubele nokubacingela abamelwane bethu.
Ngorhatya lwangooLwezithathu sasifunda iBhayibhile kunye njengentsapho. Maxa wambi sasidlala imidlalo yeBhayibhile sinxibe iimpahla zabo bantu sibalinganisayo. Sisebancinane uMama noTata basinceda ngokusifundisa ukuba sikwazi ukulungiselela iintlanganiso zebandla nokunikela isigidimi seBhayibhile ebantwini. Nangona babexakekile bekhulisa abantwana abahlanu, babechitha ixesha kunye nathi besinceda somelele ngokomoya.
Emva kokuba begqibile esikolweni, uSarah, uShane, uJessica noDeborah baba ngoovulindlela, abalungiseleli abangamaKristu bexesha elizeleyo. Mna noSarah sasingumtya nethunga. Wayengathi ngumama wam wesibini, yaye xa ndikwiiholide zesikolo, sasichitha ixesha kunye sifundisa abantu iBhayibhile. Kwakuba mnandi kakhulu ngaloo maxesha. Ndandibona indlela oovulindlela abonwabe ngayo, yaye ndandikuvuyela ukuba nabo. Usukelo lwam yayikukuba nguvulindlela kunye noSarah emva kokuba ndigqibile esikolweni.
Ngeeholide, intsapho yakowethu yayisoloko ichitha ixesha kunye nabanye ebandleni. Abancinane nabakhulu babengabahlobo yaye bethandana. Ndandingayiqondi indlela aba bahlobo bokwenene abaya kundinceda ngayo baze bandithuthuzele kwiintsuku ezizayo.
Emva Kwengozi
Ukuphuma kwam esibhedlele ndabuyela ekhaya. UShane noJessica basebenza nzima besinyamekela, besenza imisebenzi yesingxungxo ngoxa bekwinkonzo yexesha elizeleyo.
Sancedwa nangamaNgqina amaninzi asebandleni. Zininzi izinto awayesenzela zona. Babesipha ukutya, besicocela, besiyela evenkileni yaye besihlambela neempahla, de sakwazi ukuzenzela izinto. Sasinombulelo ngokwenene. Sasifumana izipho namakhadi amaninzi awayesithuthuzela evela kumaNgqina akude, nto leyo ebonisa uthando abanalo abantu abakwintlangano kaYehova.
Emva konyaka, abantakwethu nodadewethu bagqiba kwelokuba ndimele ndikhuliswe yintsapho ezinzileyo. Ezinye iintsapho ezinobubele ebandleni zakulangazelela ukundikhulisa, ngoko kwafuneka intsapho yasekhaya ihlale phantsi ukuze igqibe ngoko icinga ukuba uMama noTata bebeya kukuvuyela ngam nangekamva lam lokomoya. Ngoko bakhetha intsapho kaBilly ongumdala, nomfazi wakhe uDawn, ababesondelelene ngokwenene nentsapho yasekhaya, yaye benentombazana eneminyaka emihlanu ubudala, uLois. Bandamkela ekhayeni labo yaye ukususela ngoko bebendithanda ngokungathi ndiyintombi yabo. Nangona uLois wayesazi ukuba kwakuza kufuneka abazali bakhe bakhulise omnye umntwana, akazange abe nekhwele, yaye ngoku sithandana njengomntu nodadewabo.
Indlela Endahlangabezana Ngayo Nale Ntlungu
Ekuqaleni, ndandizibuza isizathu sokuba intsapho yasekhaya ihlelwe yile ntlungu, ingakumbi xa abazali bam uSarah noDeborah bebemthanda kangaka uYehova nabanye abantu. Kodwa ndakhumbula ingxelo eseBhayibhileni kaYobhi owahlala enokholo kuThixo nakuba wayefelwe ngabantwana. (Yobhi 1:19, 22) Ndacinga, ‘USathana obangela imbandezelo nokufa kweli hlabathini, uya kuvuya xa le ngozi isiyekisa ukukhonza uThixo.’ (Genesis 3:1-6; ISityhilelo 12:9) Ndakhumbula nokuba uYehova usinike ithemba elimangalisayo lovuko. (Yohane 5:28, 29) Siza kuphinda siyibone intsapho yethu kunye noDeborah eparadesi. Oko kwabangela ukuba ndimthande ngakumbi uYehova.
Xa ndidibene nabantu abatyhubele iintlekele, ndiba buhlungu ngakumbi xa bengalazi eli themba livuyisa kangaka leBhayibhile lovuko. Ndiye ndifune ukubaxelela ngethemba esinalo, kuba ndiqinisekile ukuba kungenxa kaYehova nentlangano yakhe le nto sikwazi ukutyhubela la maxesha anzima.
Mhlawumbi le ntlekele iye yaluncedo nangenye indlela, kuba ibangele abanye abazali bazibuze oku, ‘Ngaba thina siye sabanika isiseko esihle sokomoya abantwana bethu ukuze bakwazi ukuqhubeka bekhonza uYehova, xa kunokwenza okuthile kuthi ngenye imini?’
Ndazama ukuphila ngokungathi abazali bam basaphila. Ndiyazi ukuba bebeya kufuna ukuba ndizibhokoxe ekuncedeni abanye, kanye njengabo. Bendinguvulindlela ukususela oko ndagqiba esikolweni, yaye ngoku uLois unguvulindlela kunye nam. Abantakwethu nodadewethu batshatile yaye ngoku bakhonza uYehova bevuyile emabandleni abo.
Ndikhangele phambili kwihlabathi elitsha likaThixo nakuvuko. Ngelo xesha akuyi kubakho ntlungu nakufa. (ISityhilelo 21:3, 4) Ukwazi ukuba siseza kuphinda sibe kunye kuyandinceda. Ingathi alisafiki elo xesha lokuba ndange uMama, uTata, uSarah noDeborah ndize ndibaxelele oku, “Sonke silapha!”
[Umfanekiso okwiphepha 23]
UAbigail (ngowesibini ukusuka ekhohlo) nentsapho eyamkhulisayo namhlanje