Ndangenela Olona Gqatso Lubalulekileyo Ebomini Bam

Kubalisa uKarl-Erik Bergman

Kwakusithi ngco ngaphakathi kum xa ndibaleke ngesantya esiphezulu. Ndandikwazi ukubaleka, ngoko ukuba yimbaleki kwakuyeyona nto ibalulekileyo ebomini bam.

NGOWE-1972, xa ndandineminyaka eli-17 ubudala, ndaba kwiqela lezemidlalo. Ndakhawuleza ndaqonda ukuba ininzi into ekufuneka ndiyenzile ukuze ndibe yimbaleki esemanqwanqweni. Isiphiwo sokwemvelo sasinganelanga ukuze ndibe yimbaleki ephumelelayo. Kodwa ndandizimisele ukusebenza nzima.

Xa ndandineminyaka engama-22 ubudala, ndandikwiqela lesizwe laseFinland. Kunyaka olandelayo, ndankqenkqeza phambili kwiimbaleki zaseFinland kugqatso lweemitha ezili-100. Noko ke, ukwenzakala umsipha ka-Achilles kwandenza andabi sakwazi ukufikelela usukelo lwam. Kangangendlela endandikuthanda ngayo ukubaleka ndagqiba kwelokuba ndiqeqeshe ezinye iimbaleki ezibonakala zinesiphiwo. Ngowe-1982, ndagqiba kwelokuba ndifudukele eKhalifoniya, eUnited States ukuze ndifunde ndize ngenxa yokuhambela phambili kweso sixeko ndifumane umsebenzi kwezemidlalo. Ndade ndathenga itikiti lenqwelo-moya.

Into Eyatshintsha Ubomi Bam

Ngenye ingokuhlwa ngaphambi nje kokuba ndiye eKhalifoniya, ndeva kunkqonkqozwa emnyango. Xa ndivula kwakumi amabhinqa amabini angamaNgqina kaYehova. Ayezolile, phawu olo olufunekayo kwimbaleki. Ndawangenisa saza sahlala phantsi sancokola. Emva kwencoko ebangel’ umdla, andishiyela incwadi enomxholo othi Unokuphila Ngonaphakade KwiParadisi Esemhlabeni.a Ndaqalisa ukuyifunda. Xa ndandiphakathi kuyo ndaqonda ukuba inkcazelo ekule ncwadi iyinyaniso. La mabhinqa aphinda abuya, ndaza ndawabuza ukuba ndingenza ntoni ukuze ndibe liNgqina likaYehova. Andixelela ukuba, kufuneka ndiqhutyelwe isifundo seBhayibhile.

Andizange ndiphelele ekuvumeni ukuqhutyelwa isifundo seBhayibhile kodwa ndaqalisa nokuya kwiintlanganiso zamaNgqina kwiHolo yoBukumkani eVantaa, apho ndandihlala khona. Ndafumanisa ukuba izinto ezazifundiswa zazisekelwe eBhayibhileni. Ekuhambeni kwexesha zatshintsha izinto ezibalulekileyo ebomini bam ngenxa yenyaniso yeBhayibhile. Ndaya kwiziko lezokhenketho ndaza ndabacela ukuba bandibuyisele imali endandithenge ngayo itikiti. Inxalenye yaloo mali ndathenga ngayo isuti endandiza kuyinxiba ezintlanganisweni nebrifkheyisi endandiza kufaka kuyo iBhayibhile neencwadi. Ndabhaptizwa ndaba liNgqina likaYehova kwindibano eyayiseHelsinki ngowe-1983.

Ezinye Iimbaleki Nazo Zifunda IBhayibhile

Ndandixelela abahlobo ngeenyaniso endandizifunde eBhayibhileni. Ekuqaleni abazange bayikholelwe le nto. Bade basasaza amarhe okuba ndishiywa ziingqondo. Abahlobo bam baqalisa ukuhambela kude kum. Emva kokuba ndibhaptiziwe ndandidla ngokudibana neembaleki endandibaleka nazo ebaleni, kuba ndandizilolonga rhoqo ukuze ndizigcine ndisempilweni. Ukuncokola kwethu kwazinceda zabona ukuba nangona ndanditshintshile, ndandingashiywanga ziingqondo.

Ethubeni, abaninzi kwezi mbaleki babona ukuba izinto endandizithetha zazisengqiqweni yaye zibalulekile. Baphawula ukuba ndiyekile ukuthuka yaye andisekho ndlongondlongo. Abambalwa kubo babefuna ukufunda okungakumbi ngeBhayibhile. Ndandikuvuyela ukubonisa abanye ukuba iBhayibhile ifanisa ubomi bomKristu nogqatso. Siselugqatsweni lokufumana ubomi obungunaphakade.—2 Timoti 2:5; 4:7, 8.

Inyaniso yeyokuba, ubomi obunenjongo nobonwabisayo asibufumani ngokuphumelela elugqatsweni kodwa ngokwenza oko uMdali akholiswayo kuko. Ukuncokola kwam nabanye abadlali kwabangela ukuba baphinde bahlole usukelo lwabo yaye uninzi lwabo lwayamkela inyaniso eseBhayibhileni lwaza lwatshintsha nobomi balo. Okuvuyisayo kukuba, uninzi lwabo luzimisele ukukhonza uThixo kanye njengokuba lwaluzimisele ekubalekeni.

Omnye wabo yayinguYvonne, owayeyimbaleki enesiphiwo yogqatso lweemitha ezingama-800. Wayeyeyona mbaleki ilibhinqa inamendu eFinland ebaleka umgama ongaka. Wayimela kakuhle iFinland kwimidlalo eyayiseYurophu. Iincoko zethu noYvonne zenza waqalisa ukubona indlela ekulilize ngayo ukuzifunela udumo ehlabathini lanamhlanje. Wafumanisa ukuba, njengokuba iBhayibhile ifundisa, ihlabathi liyadlula yaye liza kuthatyathelw’ indawo lihlabathi elitsha likaThixo.—1 Yohane 2:17.

UYvonne wavuma ukuqhutyelwa isifundo seBhayibhile. Ngelo xesha, wayethandana noJouko, owayelilungu leqela lesizwe laseFinland. Wakhe waya kumela iFinland eYurophu nakumdlalo weentshatsheli zehlabathi. Ekuhambeni kwexesha, uYvonne noJouko bafudukela eUnited States ukuze baqhubeke nokuba ziimbaleki.

Xa babelapho, uYvonne waqhubeka efundelwa iBhayibhile yaye noJouko waqalisa ukufunda. Wayefundela nje ukukhangela into anokuyigxeka aze abuyisele uYvonne ezingqondweni. Kodwa ngokuthe ngcembe inyaniso yeBhayibhile yayifikelela intliziyo kaJouko. UYvonne noJouko batshata yaye kamva bazahlulela kuThixo befuzisela oko ngokubhaptizwa emanzini. Namhlanje bobabini bangoovulindlela, abalungiseleli bexesha elizeleyo abangamaNgqina kaYehova.

Ndakwazi nokufunda iBhayibhile noBarbro owayeyintshatsheli yamaFinish kugqatso lwamabhinqa lweemitha ezingama-400. Wayesandula ukumela iFinland kugqatso olwaluseYurophu. UBarbro nomyeni wakhe uJarmo owayeyipole-vaulter bafudukela eSweden. Bakufika apho uBarbro waqhubeka nesifundo seBhayibhile noJarmo naye waqalisa ukufunda. Bobabini babefuna ukuphila ubomi obunenjongo yaye emva kokuba befunde iinyaniso zeBhayibhile, babhaptizwa eSweden. Ekuhambeni kwexesha, uJarmo waba yingcali yamathambo yaye bobabini baye bazimisela entsimini. UJarmo ungumdala kwibandla lamaKristu.

Kwakukho noHeidi naye oyimbaleki enesiphiwo owayesandul’ ukuba kwishumi elivisayo. Njengokuba ndandimqeqesha ndaphawula ukuba unomdla xa kuthethwa ngoThixo. Ngoko ngenye imini ndathetha naye ngeemfundiso zeBhayibhile ezingoBukumkani bukaThixo neentsikelelo obuya kuza nazo emhlabeni. Ndambuza, “Ngaba uyakholelwa ukuba ezi zithembiso ziza kuzaliseka?”—INdumiso 37:11, 29; Mateyu 6:9, 10.

Waphendula wathi: “Ewe.” Wayekufuna ukufunda iBhayibhile. Ngoko ndenza amalungiselelo okuba omnye udade ongumKristu afunde naye. Emva kweminyaka embalwa, naye uHeidi wafuzisela uzahlulelo lwakhe kuThixo ngokubhaptizwa emanzini. Ekuhambeni kwexesha, wakhula wathand’ uThixo yaye waba yinkosikazi yam. Uye waba liqabane elilungileyo, esoloko ezimisele ukukhonza uThixo—yaye ukuba ebezimisele ngolu hlobo ekubalekeni, ebeya kuba yimbaleki ephumelelayo.

Umninawa wam uPeter naye owayethanda imidlalo, wayengathandi xa ndandiqala ukufunda iBhayibhile. Emva koko ndamnika incwadi ethi Unokuphila Ngonaphakade. Kamva weza kum waza wathi: “Ndiqalile ukuyifunda le ncwadi, kodwa andiyiqondi kakuhle yonke into ekuyo. Awunakundinceda?” Ndacela elinye iNgqina ukuba lifunde naye yaye emva kweenyanga ezine wabhaptizwa. Kamva watshata yaye inkosikazi yakhe nguvulindlela.

Ugqatso Luyaqhubeka

Kwangaphambi kokuba ndibhaptizwe ndandizimisele ukuba ngumthunywa wevangeli. Kungabanga thuba lide ndibhaptiziwe, ndaqalisa ukuba nguvulindlela. Ndandiyiqonda into yokuba, xa uselugqatsweni lobomi, ufanele ukwenze oko ngamandla akho onke. Mna nenkosikazi yam uHeidi safaka isicelo sokuya eGiliyadi, isikolo sabathunywa bevangeli samaNgqina kaYehova esiseNew York yaye ngowe-1994 isicelo sethu samkelwa. Emva kokuba siphumelele sabelwa ukuba siye kukhonza eLatvia apho kuthethwa khona isiRashiya.

Ukuwa kweSoviet Union kwashiya abantu bedanile. Abantu babengakholelwa eBhayibhileni yaye bengavumelekanga ukuba bayisebenzise kodwa babebaninzi ababenomdla kuyo. Ukufunda isiRashiya kwakuyeyona nto inzima kwendakha ndazenza. Emva kweminyaka emithandathu ndingumthunywa wevangeli eLatvia ndamiselwa ukuba ndityelele ndize ndikhuthaze amabandla amaNgqina kaYehova njengomveleli ohambahambayo. Ndisaqhubeka nalo msebenzi ndihamba nenkosikazi yam ethembekileyo.

Kangangeminyaka ndiye ndaqeqesha abantu abaninzi ukuba benze inkqubela kolu gqatso lobomi, “ubomi benene” kwihlabathi elitsha likaThixo. (1 Timoti 6:19) Ukuze ukwazi ukuqeqesha iimbaleki ukuze zifikelele apho zifuna ukufikelela khona, kufuneka uzazi kakuhle. Umqeqeshi kufuneka azincede zikhulise ubuchule bazo zize zinciphise iimpazamo zazo. Ufanele azikhuthaze ukuba zinyamezele zize zifikelele apho zifuna ukufikelela khona.

Iyandimangalisa indlela ukuba ngumKristu okufana ngayo nokuba yimbaleki, njengokuba umpostile uPawulos egxininisa kwincwadi yokuqala eya kumaKorinte. Imbaleki ephumelelayo inikela ingqalelo kakhulu ekuzilolongeni yaye ayisuki nje izibone sele iphumelela. Izibekela usukelo olufikelelekayo yaye ngokuthe ngcembe isebenzela kolo sukelo. Ukuba iyalibala ngosukelo lwayo ize ingasebenzeli kulo, kuba lilize ukusebenza kwayo nzima. Ngokufanayo, umKristu wokwenyaniso ufanele ahlale ezimisele.

Kwakhona imbaleki ephumelelayo iyanamathela kuluhlu lwemithetho yempilo, iyayijonga nento eyityayo. NomKristu wokwenyaniso ufanele enze okufanayo. Akazondli ngeemfundiso ezingcolileyo yaye njengokuba umpostile uPawulos esitsho, akadli “etafileni yeedemon.” Kunoko uzondla ngokutya okunesondlo kokomoya, iLizwi likaThixo iBhayibhile. (1 Korinte 10:21) Ukongezelela, xa kuvela iingxaki imbaleki ephumelelayo ihlala inembono efanelekileyo. Iyazivuma iimpazamo zayo ize izilungise. UPawulos wathi: “Indlela endibaleka ngayo asiyiyo eyokungaqiniseki.” Waphinda wathi, “kodwa ndiyawuqoba umzimba wam” ukuze angabi ngongakholekanga.—1 Korinte 9:24-27.

Mna nenkosikazi sisakuthanda ukwenza umthambo rhoqo ukuze sizigcine sisempilweni. Sekunjalo, asikuvumeli oku ukuba kusenze siyeke ukukhonza uYehova, owasidala ngendlela emangalisayo. (INdumiso 139:14) Sobabini sizimisele ukufumana umvuzo ‘obubomi benene’—‘obuzayo’ kwihlabathi elitsha likaThixo.—1 Timoti 4:8.

Emva kokuchaza ‘ilifu lamangqina’ langaphambi kwexesha lamaKristu, umpostile uPawulos usibongoza athi: “Masithi nathi sibothule bonke ubunzima nesono esisithandela ngokulula, yaye masilubaleke ngonyamezelo ugqatso olubekwe phambi kwethu.” (Hebhere 12:1) Ayikho enye into ezisa ulwaneliseko njengokubaleka kolo gqatso. Oku kungenxa yokuba abo balugqibayo olo gqatso baya kufumana iintsikelelo ngonaphakade.—2 Timoti 4:7, 8.

[Umbhalo osemazantsi]

[Umfanekiso okwiphepha 14]

Ekuqaleni kweminyaka yee-1980, uHeidi nam, uYvonne ngasentla noJouko nentombi yabo ngezantsi

[Umfanekiso okwiphepha 15]

Ndikunye noHeidi entsimini namhlanje

[Umfanekiso okwiphepha 15]

Kwindibano yamaNgqina kaYehova eHelsinki ngowama-2009. UYvonne noJouko ngasekhohlo kwethu, uJarmo noBarbro ngasekunene kwethu

[Inkcazelo Ngomfanekiso okwiphepha 12]

Published in Aamulehti 8/21/1979